I Rusija napadini e Ukrajina

Rano sabale ko 24. februar 2022. berš i Rusija počminđa o vojno napad upri Ukrajina, iako o vođe kotar but phuvja trudinđe pe te na avel đi odova. Sar akava sukob šaj te utičini ko sveto? Angleder nekobor dive, o generalno sekretari ando Ujedinjena nacije, o Antonio Guteres, phenđa: „Našti ni te zamislina kobor pharipa hem bari šteta ka anel akava sukob hem kobor lošno ka utičini upri sigurnost ki Evropa hem ko celo sveto.“

Premali Biblija, sose tane asavke događaja važna?

• O Isus Hrist prorekninđa so ka avel o vreme ked „ka uštel o narodo upro narodo hem o kraljevstvo upro kraljevstvo“ (Matej 24:7). Te šaj te uverine tut so o mariba avdije ispuninena e Isuseso proročanstvo, čitin o članko „Šta je znak ’poslednjih dana‘ ili ’vremena kraja‘?“, ki srpsko ćhib.

• Ki biblijaki knjiga Otkrivenje, o maribe tano ko jekh simbolično način opisujimo sar o jahači upro lolo gras kova „dobinđa vlast te lel o mir kotar phuv“ (Otkrivenje 6:4). Te šaj te đane sar o mariba avdije ispuninena akava proročanstvo, čitin o članko „Šta predstavljaju jahači Apokalipse?“, ki srpsko ćhib.

• E biblijaki knjiga Danilo prorekninđa so ka ovel borba maškaro duj kraljija – „o kralj ando sever“ hem „o kralj ando jug“ (Danilo 11:25-45). Te šaj te haljove sose šaj te phena so i Rusija hem olake saveznikija tane o kralj ando sever, dikh o video Ispunjeno proročanstvo – Danilo 11. poglavlje.a

• I knjiga Otkrivenje vaćeri kotar „maribe kova ka ovel ko baro dive ando Svemoćno Devel“ (Otkrivenje 16:14, 16). Ama, akava maribe nane maškaro narodija, sar akava so dikhaja akana. Te šaj te đane so ka ovel ko maribe ando kova pisini ki knjiga Otkrivenje, čitin o članko „Šta je Armagedon?“, ki srpsko ćhib.

Sose isi amen nada asi šukar budućnost?

• I Biblija phenela so o Devel ka „ćhinavi o mariba ki celo phuv“ (Psalam 46:9). Te šaj te đane so obećini o Devel asi budućnost, čitin o članko „Prava nada u bolje sutra“, ki srpsko ćhib.

• O Isus sikavđa pe učenikonen te molinen pe te avel e Devleso Kraljevstvo (Matej 6:9, 10). Akava Kraljevstvo tano nebesko vladavina koja ka ćerel e Devlesi volja ki phuv hem ka anel mir ko celo sveto. Ako mangeja te đane sar e Devleso Kraljevstvo šaj te pomožini tuće, dikh o video Soj tano e Devleso Kraljevstvo?

Ki Ukrajina živinena pobuter ando 129 000 e Jehovase svedokija. Sar sa avera Svedokija hem on oponašinena e Isuse ađahar so na mešinena pe ki politika hem na učestvujinena ko mariba (Jovan 18:36). Ko celo sveto, e Jehovase svedokija hem ponodri propovedinena so samo „i šukar vest ando Kraljevstvo“ šaj te rešini e manušenge problemija hem te cidel o mariba (Matej 24:14). Ako mangeja te đane pobuter andi nada kolatar vaćeri i Biblija, rode te posetini tut neko amendar.