I religija hem o maribe ki Ukrajina – so phenela i Biblija?

Aće so phenđe disave religiozna vođe ando maribe ki Ukrajina:

• „O poglavar andi Rusko pravoslavno crkva, o patrijarh Kiril, na buninđa pe protiv odova so ćerela i Rusija. . . . Olesi crkva vaćeri hovajba andi Ukrajina, hem o Putin koristini odola priče te opravdini o maribe“ (EUobserver, 7. mart 2022.).

• „O patrijarh Kiril. . . opravdini odova so i Rusija ćerela ki Ukrajina hem phenela so odova tano borba protiv o greh“ (AP News, 8. mart 2022.).

• „O poglavar andi Ukrajinsko pravoslavno crkva, o mitropolit Epifanije I ando Kijev, blagoslovinđa pe manušen te borinen pe protiv o ruska vojnikija. . . Isto ađahar, ov phenđa so nane greh te mudaren pe o ruska vojnikija (Jerusalem Post, 16. mart 2022.).

• „Amen [O ukrajinsko savet ando crkve hem o religiozna organizacije] podržinaja e ukrajinsko vojnikonen hem sarinen kola braninena i phuv. Mangaja te ovel len e Devleso blagoslov đi braninena e Ukrajina ando pe dušmanija hem molinaja amen olenđe“ (I izjava koja dinđa o UCCROa, 24. februar 2022.).

So tu mislineja? Da li o religije kola phenena so sledinena e Isuse valjani te podstakninen e manušen te đan ko maribe? So phenela i Biblija?

I religija hem o maribe – so mothovi i istorija?

I istorija mothovi so i religija but putija podržinđa, opravdinđa ja čak podstakninđa ko maribe, a ko isto vreme ćerđa pe so mangela mir. Beršencar, e Jehovase svedokija pomožinđe e manušenđe te dikhen o licemerstvo kova isi ki religija. Te dikha so hine pisimo ko disave amare publikacije.

• O članko „Krstaški ratovi – ’tragična iluzija‘“ mothovđa so i Rimokatoličko crkva hine odgovorno aso baro mudaribe kova ćerđa ko Devleso hem ko Hristeso anav.

• Ko članko „Katolička crkva u Africi“ hine objasnimo so i religija ništa na ćerđa te ćhinavi o maribe maškaro plemenija hem o baro mudaribe.

• Ko člankija „Da li je religija odgovorna?“, „I uloga ando religije ko mariba“ hem „I religija birini ki kasi strana ka ovel“ hine objasnimo sar i katoličko, i pravoslavno hem o protestantsko sveštenstvo podržinđa o solduj strane ko but mariba.

Da li o hrišćanska religije valjani te podržinen o mariba?

So o Isus sikavđa: „I dujto, slično sar akija, tani: ’Mang te pašutne sar kokri tut‘ “ (Matej 22:39). „Mangen tumare dušmanen“ (Matej 5:44-47).

So o Isus phenđa: „Mo Kraljevstvo nane deo kotar akava sveto. Ked bi mo Kraljevstvo ovela deo kotar akava sveto, me sluge bi borinena pe te na ovav dindo e Judejconenđe“ (Jovan 18:36). „Irin o mač ko oleso than, sose sa kola dolena pe ko mač, ka meren olestar“ (Matej 26:47-52).

Razmislin: Ako o hrišćanija na valjanđe te borinen pe te zaštitinen e Isuse, tegani da li isi opravdano razlog te borinen pe aso bilo so aver? Čitin o članko „Da li je rat spojiv sa hrišćanstvom?“ hem dikh sar o hrišćanija ko prvo veko sledinđe e Isuse hem ićerđe pe ko olese sikljoviba.

So ka ovel e religijencar kola podržinena o mariba?

I Biblija phenela so o Devel odbacini e religijen kola phenena so sledinena e Isuse ama na ićerena pe ko olese sikljoviba (Matej 7:21-23; Titu 1:16).

• I knjiga Otkrivenje mothovi so anglo Devlese jaćha o religije tane odgovorna aso bute manušengo meribe (Otkrivenje 18:21, 24). Ako mangeja te đane sose, čitin o članko „Šta je Vavilon Veliki?“

• O Isus sikavđa so sa o religija kolen o Devel odbacinđa ka oven uništime odolese so ćerđe lošna buća, sar so jekh kaš kova anela lošna plodija „ćhinela pe hem fordela pe ki jag“ (Matej 7:15-20). Ako mangeja te đane sar odova ka ovel, čitin o članko „Blizu je kraj krive religije!“

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images