2022: berš ando brige hem nemirija – so i Biblija phenela?

Ko 2022. berš, stalno šunđam o izveštaja ando mariba, ekonomska problemija hem prirodna katastrofe. Samo i Biblija objasnini so ćaće značinena sa akala događaja.

So ćaće značinena o događaja kola ulje ko 2022. berš?

Sa o događaja kola ulje ko akava berš mothovena so ćaće živinaja ko vreme kova ki Biblija vićini pe „poslednja dive“ (2. Timoteju 3:1). O poslednja dive počminđe ando 1914. berš. Zapazin sar o događaja kola ulje akana sigende mothovena soj tano ćaće okova so i Biblija vaćerđa ando amaro vreme:

„Mariba“ (Matej 24:6).

• „O 2022. berš hine o berš ked i Evropa osetinđa but bare posledice ando maribe.“a

„Bokhalipa“ (Matej 24:7).

• „O 2022. berš tano berš ando but baro bokhalipe.“b

„Zarazna nabormipa“ (Luka 21:11).

• „Palem irinđa pe i dečja paraliza, but manuša dobinena o majmunska boginje, a andi koronavirus o manuša pana merena. Sa akava mothovi kobor tane opasna o zarazna nabormipa hem so o manuša našti te borinen pe odoleja.“c

O buća kola ka daraven e manušen (Luka 21:11).

• “Niked na ka bistra o nilaj ko 2022. berš sose hine but baro tatipe, baro šukipe, požarija hem poplave. Sa odola buća ćerđe but bari šteta ki phuv, o manuša našalđe pe ćhera hem hiljade manuša našalđe po životi.“d

„Nemirija“ (Luka 21:9).

• “Sebepi so sa skuponđa, o manuša hine but holjame hem odolese ko 2022. berš hine but bare protestija protiv o vlastija.“e

So ka ovel ko aver berš?

Niko na đanela so tačno ka ovel ko 2023. berš. Ama, okova so đanaja tano so pana hari, e Devleso Kraljevstvo, kova vladini ko nebo, ka anel but bare promene ki phuv (Danilo 2:44). Odova kraljevstvo ka cidel sa o lošnipe hem i patnja, a ki phuv sa o manuša ka ćeren e Devlesi volja (Matej 6:9, 10).

Podstakninaja tumen te ićeren tumen ko savet kova dinđa o Isus Hrist te „aćhoven đangavde“ hem te dikhen sar o događaja kola desinena pe mothovena so e biblijake proročanstvija ispuninena pe (Marko 13:37). Ako mangeja te đane sar šaj i Biblija te pomožini tut hem sar šaj tu hem ti porodica te ovel tumen pravo nada asi budućnost, rode neko ando Jehovase svedokija te posetini tut.