But baro tatipe ko celo sveto – so phenela i Biblija?

Ko masek jul 2022. berš, ko but phuvja niked na hine odobor baro tatipe sar akana.

• Već dujto puti ko akava masek, o vlastija ki Kina dinđe upozorenje so ko prekalo 70 dizja ka ovel but baro tatipe“ (25. jul 2022, CNN Wire Service).

• „Ki celo Evropa, o temperature niked angleder na hine odobor bare sar akana. Sebepi odova, ko but phuvja o šume thabljona“ (17. jul 2022, The Guardian).

• „Ki nedelja, ko but dizja ki Amerika, niked angleder na hine zabeležime odobor bare temperature. O toplotno talas dolinđa i istočno obala, o delovija ando jug hem o srednjo zapad“ (24. jul 2022, The New York Times).

So značini sa akava? Da li ka avel o dive ked više na ka šaj te živina ki phuv? So i Biblija phenela odolestar?

Da li o but baro tatipe mothovi so ispuninena pe e biblijake proročanstvija?

Ja. O bare temperature kola isi avdije ko celo sveto tane uključime ko buća kola i Biblija phenđa so ka oven ko amare dive. Na primer, o Isus phenđa so o manuša ka daran ando buća kola ka dikhen (Luka 21:11). Sebepi o but bare temperature, but đene darana so jekh dive o manuša ka uništinen i phuv.

Da li ka avel o dive ked više na ka šaj te živina ki phuv?

Na. O Devel ćerđa i phuv te šaj o manuša zauvek te živinen ano late (Psalam 115:16; Propovednik 1:4). Umesto te mukhel o manuša te uništinen i phuv, ov ka uništini „okolen so uništinena i phuv“ (Otkrivenje 11:18).

Dikh pana duj proročanstvija kola mothovena so ka ćerel o Devel amare phuvjaja:

• „Ka radujini pe i pustinja hem i šuki phuv, ka radujini pe i phuv koja tani pusto hem ka cvetoni sar o šafran“ (Isaija 35:1). O Devel na ka mukhel amari phuv te ovel sar i pustinja ki koja niko našti te živini, već ov ka obnovini o thana kola o manuša uništinđe.

• „Tu brinineja tut e phuvjaće, ćerđan la te bijani but hem te ovel barvali“ (Psalam 65:9). Pana hari, o Devel ka ćerel i phuv te ovel raj.

Ako mangeja te đane pobuter sar o promene ki klima mothovena so ispuninena pe e biblijake proročanstvija, čitin o članko „Da li će planeta preživeti klimatske promene – šta kaže Sveto pismo?“

Ako mangeja te đane pobuter sar amari phuv ka ovel obnovimi, čitin o članko „Ko će spasti našu planetu?“