Sose o manuša tane podelime sebepi i politika? – So phenela i Biblija?

Ko celo sveto o manuša tane podelime sebepi i politika. Premalo izveštaj ando Istraživačko centar Pju aso 2022. berš, „65% manuša ko 19 phuvja phenena so ki olengi phuv o manuša kola tane ko različita politička stranke hić na slažinena pe jekh jekheja.“

Da li othe kaj tu živineja o manuša tane podelime sebepi i politika? Sose odova tano ađahar? Da li isi disavo rešenje? Dikhen so phenela i Biblija.

O manuša tane podelime sebepi pe stavija

I Biblija phenđa so ko amaro vreme, „ko poslednja dive“, but manuša ka ovel len stavija sebepi kola ka ovel lenđe pharo te oven ko jekhipe.

• „Ko poslednja dive ka ovel but pharo vreme. Sose o manuša ka oven sebična. . . nespremna aso bilo savo dogovor“ (2. Timoteju 3:1-3).

Avdije disave manuša kola tane ki vlast trudinena pe te anen e manušenđe diso pošukar. Ama, sebepi so o manuša isi len različita mišljenja, but tano pharo te sarađujinen jekh jekheja hem te rešinen o problemija. Odolese, desini pe odova so but angleder pisinđa ki Biblija:

• „Ked o manuš vladini upro manuš odova anela samo lošnipe“ (Propovednik 8:9).

Ama, i Biblija mothovi soj tano o rešenje – i vlast koja ka cidel sa o problemija sebepi kola o manuša avdije patinena.

Sposobno vladari kova brinini pe ando manuša

I Biblija mothovi soj tano o Isus Hrist odova vladari kova šaj te rešini sa amare problemija. Ov isi le moć, autoritet hem želja te anel mir ki phuv hem ka ćerel sa o manuša te oven ko jekhipe.

• „Ko dive ked ov ka vladini ka niconen o pravednikija, ki celo phuv ka vladini o mir“ (Psalam 72:7).

• „Ka služinen lese sa o narodija“ (Psalam 72:11).

O Isus tano najšukar vladari sose ov brinini pe e manušendar hem mangela te pomožini len, posebno okolenđe kola doživinđe disave nepravde ko životi.

• „Sose ov ka izbavini e ćororen kola rodena lestar pomoć, e ponizno manušen hem sa okolen kola nane len nikas te pomožini len. Ka sažalini pe upro jadna hem upro ćorore, ka arakhi o đivdipe e ćororengo. Ka izbavini len ando manuša kola mangena te povredinen len hem kola mučinena len“ (Psalam 72:12-14).

Sikljov soj tano e Devleso Kraljevstvo, sar odova Kraljevstvo šaj te pomožini tut hem sar šaj tu te podržine odova Kraljevstvo.

• Dikh o video Soj tano e Devleso Kraljevstvo?

• Čitin o članko „Božje Kraljevstvo – vlast bez korupcije.“