Da li o Armagedon ka počmini ko Izrael – so phenela i Biblija?

I Biblija mothovi so o Armagedon tano o maribe maškaro manušikane vlastija hem o Devel. Odolese, odova maribe našti te ovel samo ko jekh than, već ka ovel ki celo phuv.

• „O lafija so avena ando demonija. . . đana ko kraljija ando celo sveto, te ćeden len aso maribe kova ka ovel ko baro dive ando Svemoćno Devel. . . Ćedinđe len ko than kova ki hebrejsko ćhib vićini pe Armagedon“ (Otkrivenje 16:14, 16).

O lafi „Armagedon“ avela kotar hebrejsko lafi Har Megidon, so značini „megidsko brdo“. O Megido hine jekh diz ko purano Izrael. Odolese, disave manuša mislinena so o maribe ka ovel ko Izrael. Ama, ni o Megido niti bilo kova aver than ko Blisko istok nane dovoljno baro te šaj te resen „o kraljija ando celo sveto“ hem olenge vojske.

I knjiga Otkrivenje tani pisimi „ko znakija“ hem odolese but buća našti te haljon pe ađahar sar so pisini (Otkrivenje 1:1). O Armagedon na odnosini pe ko disavo than, već ki situacija koja ka ovel ko sveto ked o narodija poslednjo puti ka suprotstavinen pe e Devlese (Otkrivenje 19:11-16, 19-21).