Soj tano o Armagedon?

So phenela i Biblija?

O Armagedon tano o završno maribe maškaro manušikane vlastija hem o Devel. Odola vlastija hem okola so podržinena len protivinena pe e Devlese ađahar so na mangena te šunen le (Psalam 2:2). Ko Armagedon ka oven uništime sa o manušikane vlastija (Danilo 2:44).

O lafi „Armagedon“ pomini pe samo jekh puti ki Biblija, ko Otkrivenje 16:16. O proročanstvo ando Otkrivenje mothovi so „ko than kova ki hebrejsko ćhib vićini pe Armagedon“ o „kraljija ando celo sveto“ ka ćeden pe „aso maribe kova ka ovel ko baro dive ando Svemoćno Devel“ (Otkrivenje 16:14).

Ko ka borini pe ko Armagedon? O Isus Hrist ka vodini e nebesko vojska koja ka pobedini e Devlese dušmanen (Otkrivenje 19:11-16, 19-21). E Devlese dušmanija tane okola so protivinena pe olese hem kola na podržinena olesi vlast (Jezekilj 39:7).

Da li o Armagedon ka ovel ćaće ko Bliski istok? Na. O Armagedon na ka ovel ko jekh than, već ki celo phuv (Jeremija 25:32-34; Jezekilj 39:17-20).

O Armagedon ja o „Harmagedon“ (ko hebrejski Har Megidon) značini „megidsko brdo“. Angleder o Megido hine jekh diz ko purano Izrael. I istorija mothovi so disave važna mariba hine odothe. Ando disave olendar vaćeri pe ki Biblija (Sudije 5:19, 20; 2. Kraljevima 9:27; 23:29). Ama, o Armagedon našti te ovel disavo than paše uzo purano Megido. Uduri nane disavo baro brdo niti sa e Devlese dušmanija šaj te resen ki Jezraelsko dolina koja tani paše uzi odija diz. Umesto odova, o lafi Armagedon odnosini pe ki situacija koja ka ovel ko celo sveto ked o politička sile ka ušten protiv o Devel.

So ka koristini o Devel ko Armagedon? Amen na đanaja sar o Devel ka koristini pi moć. O Devel ka ovel le isto oružje kova koristinđa angleder – i kukudi, o zemljotresija, bare boršima, i jag hem o sumpor, o gromija hem o nabormipa (Jov 38:22, 23; Jezekilj 38:19, 22; Avakum 3:10, 11; Zaharija 14:12). E Devlese dušmanija na ka đanen so arakhlja len, odobor ka oven zbunime so ka mudaren jekh jekhe. Ama ko krajo ka haljon so o Devel borini pe protiv olende (Jezekilj 38:21, 23; Zaharija 14:13).

Da li tano o Armagedon kraj ando sveto? Amari planeta na ka ovel uništimi sose oj tani ćerdi te šaj o manuša večno te živinen upro late (Psalam 37:29; 96:10; Propovednik 1:4). Ko Armagedon na ka oven uništime sa o manuša, već but manuša ka spasinen pe. Ki Biblija pisini so o „baro mnoštvo“ ando manuša ka oven spasime (Otkrivenje 7:9, 14; Psalam 37:34).

O lafi „sveto“, osim so odnosini pe ki phuv, ki Biblija podijekh puti odnosini pe hem ko lošna manuša kola protivinena pe e Devlese (1. Jovanova 2:15-17). Ađahar šaj te phena so o Armagedon ćaće ka anel kraj akale svetose (Matej 24:3).

Ked ka ovel o Armagedon? Ked vaćerđa andi bari nevolja koja završini pe e maribaja Armagedon, o Isus phenđa: „Niko na đanela ked ka avel odova dive hem o vreme, ni o nebeska anđelija ni o Ćhavo, nego samo o Dad“ (Matej 24:21, 36). I Biblija phenela so o Armagedon ka ovel đi trajini e Hristesi prisutnost. Odova period počminđa ando 1914. berš (Matej 24:37-39).