Da li o društvena mreže lošno utičinena upro te ćhave? – Sar šaj i Biblija te pomožini e roditeljenđe?

„But terne avdije psihički na osetinena pe šukar hem but putija o društvena mreže tane glavno razlog aso odova“ (dr Vivek Murti, o šef kotar služba ando javno sastipe ki Amerika, New York Times, 17. jun 2024).

Sar šaj o roditeljija te zaštitinen pe ćhaven ando opasnostija kola garavena pe ko društvena mreže? Ki Biblija šaj te arakha šukar savetija odolestar.

So o roditeljija šaj te ćeren?

Aće disave savetija andi Biblija kola šaj te pomožinen.

„O gođalo manuš šukar razmislini ando sa so ćerela“ (Poslovice 14:15).

O društvena mreže šaj lošno te utičinen upro te ćhave. Odolese, ma mislin so mora te mukhe len te koristinen o društvena mreže. Angleder so dozvolineja lenđe te ovel len društvena mreže, najangleder te ćhave valjani te mothoven da li poštujinena ked odredineja lenđe o vreme aso disave buća, da li đanena te birinen pese šukar amalen hem da li cidena pe andi nepristojno zabava.

• Ako mangeja te đane pobuter, čitin o člankija „Da li moje dete treba da koristi društvene mreže?“ hem „Pomozite tinejdžeru da pametno koristi društvene mreže“.

„Mudro koristinen o vreme“ (Efešanima 5:16).

Ako dozvolineja te ćhavenđe te ovel len društvena mreže, ćhiv lenđe disave pravilija hem objasnin sar odola pravilija ka zaštitinen len. Ako dikheja so te ćhavengo ponašibe meninđa pe, razmislin da li tano odova sebepi o društvena mreže hem ćer disave promene.

• Koristin o video Pazin sar koristineja o društvena mreže te šaj te pomožine te ćhavenđe te haljon so mora te pazinen sar koristinena o društvena mreže.

Sikljov pobuter

I Biblija phenela so živinaja ko „but pharo vreme“ (2. Timoteju 3:1-5). Ko isto vreme, ano late šaj te arakha savetija kola šaj te pomožinen amenđe. Ko akava članko kova vaćeri ando psihičko sastipe, šaj te arakhe prekalo 20 člankija kola šaj te pomožinen e roditeljenđe hem e ćhavenđe.