Sar e Jehovase svedokija ponašinena pe premalo okola so više nane Svedokija?
Amen daja sa amendar svakonese te mothova mangipe, šukaripe hem poštovanje. Ako neko više na avela ko sastankija ja na đala te propovedini, ja ako ćhinavđa te služini e Jehovase, amen trudinaja amen te posetina odola osobaa, te mothova laće so mangaja la hem te pomožina laće palem te ovel paše e Devleja (Luka 15:4-7).
Podijekh puti, neko šaj te ovel cidimo andi skupština sebepi pe postupkija (1. Korinćanima 5:13). Ama, sebepi so mangaja odola osoba, amen daja sa amendar te pomožina laće te na bi avela đi odova te ovel cidimi andi skupština. Čak hem te ovel cidimi, amen hem ponodri ka mothova so mangaja la hem so poštujinaja la, sar so i Biblija sikavi amen (Marko 12:31; 1. Petrova 2:17).
Sose neko šaj te ovel cidimo andi skupština?
I Biblija jasno phenela so ako neko ćerela ozbiljno greh hem na mangela te menini pe, ov valjani te ovel cidimob andi skupština (1. Korinćanima 5:11-13). Oj mothovi kola grehija tane odobor ozbiljna so šaj te anen đi odova neko te ovel cidimo andi skupština. Disave olendar tane i preljuba, ked neko nane le kontrola kobor pijela, o mudaribe, o nasilje ki porodica hem ćoribe (1. Korinćanima 6:9, 10; Galatima 5:19-21; 1. Timoteju 1:9, 10).
Ama, ako neko ćerđa ozbiljno greh, odova na značini so odmah ka ovel cidimo andi skupština. Najangleder, o starešinec ka den sa pestar te pomožinen lese te menini pe (Rimljanima 2:4). On ka trudinen pe te resen đi oleso vilo ađahar so ka oven blaga, ljubazna hem šukar premalo leste (Galatima 6:1). Odova šaj ka pomožini lese te haljol kaj grešinđa hem te pokajini pe (2. Timoteju 2:24-26). Ama, ako ov hem ponodri ćerela okova soj tano neispravno premali Biblija hem na kajini pe, iako o starešine dinđe sa pestar te pomožinen lese, tegani ov ka ovel cidimo. O starešine samo ka den jekh obaveštenje ki skupština so odija osoba više nane e Jehovaso svedoko.
O starešine dena sa pestar te pomožinen okolese kova grešinđa te menini pe ađahar soj tane blaga, ljubazna hem šukar
Sose tano važno te ovel cidimo neko ko na mangela te ćhinavi te ćerel ozbiljno greh? Sar prvo, ađahar mothovaja so ićeraja amen ko Devlese moralna merilija hem i skupština tani zaštitimi ando lošno uticaj (1. Korinćanima 5:6; 15:33; 1. Petrova 1:16). Sar dujto, odova šaj ka podstaknini odola osoba te ćhinavi te ćerel odova greh hem te menini pe (Jevrejima 12:11).
Sar e Jehovase svedokija ponašinena pe premalo okola soj tane cidime andi skupština?
I Biblija phenela so valjani te ćhinava te družina amen okoleja soj tano cidimo andi skupština, pa čak asavkeja na valjani ni te ha (1. Korinćanima 5:11). Amen na družinaja amen nekasa koj tano cidimo. Ama odova na značini so odija osoba tani odbacimi. Amen hem ponodri ka mothova laće poštovanje. Oj šaj hem ponodri te avel ko amare sastankija hem okola soj tane Svedokija, ako mangena, šaj te pozdravinen la.d Isto ađahar, odija osoba šaj te rodel pomoć ando starešine te bi irini pe e Jehovase.
Okola soj tane cidime andi skupština šaj te aven ko amare sastankija
Ama so ako neko tano cidimo, a olesi romni ja olako rom hem o tikne ćhave pana služinena e Jehovase? Iako odija osoba više na služini e Jehovase pe porodicaja, on tane pana porodica. Sebepi so živinena ko isto ćher, on hem ponodri valjani te mothoven mangipe jekh jekhese hem te brininen pe jekh jekhestar.
I osoba koja tani cidimi šaj te pućel e starešinen te aven te posetinen la hem tegani o starešine šaj te podstakninen la te irini pe e Jehovase hem te den la disavo savet andi Biblija (Zaharija 1:3). Ako ćhinavi te ćerel odova soj tano lošno hem ako pe deloncar mothovi so mangela te ićeri pe ko Devlese moralna merilija, oj šaj palem te ovel deo andi skupština. I skupština ka oprostini odola osobaće hem ka utešini la, sar so odova ćerđe o Korinćanija ked jekh manuš kova grešinđa meninđa pe (2. Korinćanima 2:6-8).
Sar osetinena pe okola so hine cidime andi skupština?
Dikh so phenđe disave e Jehovase svedokija kola angleder hine cidime andi skupština, a kasnije irinđe pe e Devlese.
„Ked odlučinđum te irinav man e Jehovase, mislinđum so o starešine ka mangen te đanen sa so ćerđum odola berša đi hijum le cidimi. Ama, on samo phenđe maje: ’Najvažno tano so ka ćere ando akana.‘ Ked phenđe odova, hine maje polokho“ (Marija, Amerika).
„Celo skupština hine bahtali ked irinđum man. Osetinđum so ćaće mangena man. On uverinđe man so o Jehova hem on oprostinđe maje hem odolese više na osetinđum man lošno sebepi i prošlost. O starešine ćaće trudinđe pe te pomožinen maje palem te ovav paše e Jehovaja. On utešinđe man hem pomožinđe maje te dikhav so o Jehova pana mangela man“ (Malkom, Sijera Leone).
„Bahtali hijum so o Jehova odobor mangela pe narodo so ka ćerel sa so valjani te šaj olesi organizacija te aćhol čisto. Đanava so nekase odova šaj te delujini strogo, ama odova tano potrebno hem ađahar mothovi so mangela amen. Zahvalno hijum so amaro Dad tano pherdo mangipaja hem so spremno oprostini“ (Sandi, Amerika).
a O informacije ko akava članko odnosinena pe hem ko murša hem ko đuvlja.
b Angleder okolenđe so na kajinena pe aso lošna buća phenđam soj tane isključime. Ama, akana koristinaja isto lafi kova pisini ki Biblija hem aso asavke phenaja soj tane cidime andi skupština.
c O starešine tane zrela murša kola sikavena averen ando Devleso Lafi hem kola brininena pe ando Devleso narodo ađahar so pomožinena len hem ohrabrinena len. On nane platime asi pi buti (1. Petrova 5:1-3).
d Ko disave slučaja, neko na samo so aćhavđa i skupština, već dela sa pestar te rumini o šukar anav andi amari organizacija, mangela te peravi averen andi vera ja te ćhivel len te ćeren okova soj tano pogrešno. Ko asavke situacije, amen ićeraja amen ko odova so pisini ki 2. Jovanova 9-11 hem na pozdravinaja le.