Sose o Devel isi le organizacija?

1. Sose o Devel organizujinđa e Izraelcen?

O Devel organizujinđa e Avrahamese potomkijen te oven jekh narodo hem dinđa len zakonija. Akava narodo, kase ov dinđa anav Izrael, ulo jedino narod kova služinđa lese ko ispravno način hem kova ićerđa oleso Lafi (Psalam 147:19, 20). Ađahar, prekalo Izraelcija avera narodija šajinđe te upoznajinen e Devle. Čitin Postanak 22:18.

O Devel birinđa e Izraelcen te oven olese svedokija. Olengi istorija mothovi save blagoslovija šaj te ovel len o manuša ked šunena e Devlese zakonija (Ponovljeni zakoni 4:6). Prekalo Izraelcija avera narodija šaj hine te penđaren e ćaćutne Devle. Čitin Isaija 43:10, 12.

2. Sose o prava hrišćanija tane organizujime?

Sar đelo o vreme, o Izraelcija na ćerđe o buća kola hine pali e Devlesi volja hem o Jehova zameninđa odole narodo e hrišćansko skupštinaja (Matej 21:43; 23:37, 38). Avdije, ko e Izraelcengo than, o prava hrišćanija služinena sar e Jehovase svedokija. Čitin Dela apostolska 15:14, 17.

O Isus organizujinđa pe učenikonen te đan te propovedinen hem te ćeren učenikonen ando sa o narodija (Matej 10:7, 11; 24:14; 28:19, 20). Pana hari, o Devel ka cidel sa o lošnipe kotar i phuv. Odova značini so pana hari, o propovedibe ka ovel završimo. Prvo puti ki istorija, o Jehova ćerđa o milionija manuša kotar sa o narodija te oven ko jekhipe hem te obožavinen le ko ispravno način (Otkrivenje 7:9, 10). O prava hrišćanija tane organizujime te šaj te ohrabrinen jekh jekhe hem te pomožinen jekh jekhese. Ko celo sveto, on isi len isto biblijaki pouka ko olenge sastankija. Čitin Jevrejima 10:24, 25.

3. Sar ulji i organizacija ando e Jehovase svedokija ko avdisutno vreme?

Ko 1870-ta berša, jekh tikni grupa, o Istraživačija andi Biblija, palem arakhlje e biblijako ćaćipe kova dugo hine garavdo. On đanđe so o Isus organizujinđa e prvo hrišćansko skupština te propovedini. Odolese, on počminđe te propovedinen ko celo sveto ando Devleso Kraljevstvo. Ko 1931. berš, on usvojinđe o anav Jehovase svedokija. Čitin Dela apostolska 1:8; 2:1, 4; 5:42.

4. Sar tane e Jehovase svedokija organizujime?

Ko prvo veko, postojinđa o vodeće telo, kova brininđa pe kotar sa o skupštine ko razna phuvja hem kova priznajinđa so o Isus tano o Poglavari andi skupština (Dela apostolska 16:4, 5). Hem avdije, e Jehovase svedokonenđe ko celo sveto but tane korisna o smernice kola dobinena ando Vodeće telo. O Vodeće telo brinini pe ando podružnice kotar e Jehovase svedokija kuri prevodinena pe, štampinena pe hem delinena pe e biblijake publikacije ko prekalo 800 ćhibja. Ađahar o Vodeće telo šaj te ohrabrini hem te del o uputstvija ando e Devleso Lafi, ko prekalo 110 000 skupštine ko celo sveto. Ki svako skupština, o murša kola ispuninena e biblijake uslovija služinena sar starešine ja nadglednikija. On vilestar brininena pe ando e Devleso stado. Čitin 1. Petrova 5:2, 3.

E Jehovase svedokija tane organizujime te propovedinen i šukar vest hem te ćeren učenikonen. Sar o apostolija, hem amen avdije propovedinaja kotar ćher ko ćher (Dela apostolska 20:20). Isto ađahar, amen nudinaja e manušenđe kola ćaće mangena o ćaćipe te proučinen i Biblija. E Jehovase svedokija nane samo nesavi organizacija. Amen hijam sar jekh porodica koja isi la jekh brižno Dad. Amen hijam phralja hem phenja kola brininena pe jekh jekhestar (2. Solunjanima 1:3). E Jehovaso narodo tano organizujimo te ćerel odova so o Devel mangela hem te pomožini averenđe. Sebepi odova, on tane najbahtali porodica ki phuv. Čitin Psalam 33:12 hem Dela apostolska 20:35.