2. LEKCIJA
Koj tano o Devel?
1. Sose valjani te služina samo e Devlese?
O ćaćutno Devel tano o Stvoritelj kova stvorinđa sa so isi ki phuv. Ov nane le početak hem niked na ka ovel le krajo (Psalam 90:2). Olestar avena o šukar vestija kola šaj te arakha ki Biblija (1. Timoteju 1:11). Odolese so o Devel dinđa amenđe o đivdipe, amen valjani te služina samo olese. Čitin Otkrivenje 4:11.
2. Savo tano o Devel?
Nijekh manuš niked na dikhlja e Devle odolese so ov tano Duh. Ov tano but posposobno hem pomudro ando manuša (Jovan 1:18; 4:24). Sa so ćerđa o Devel mothovi amenđe savo tano ov. Na primer, odova so stvorinđa razno voće hem luluđa, mothovi amenđe kobor mangela amen hem kobor tano mudro. O baro svemir mothovi amenđe kobor tano moćno. Čitin Rimljanima 1:20.
Prekali Biblija, amen šaj pobuter te sikljova ando e Devlese osobine. Na primer, oj vaćeri so o Devel mangela hem so mrzini, savo tano premalo manuša hem sar postupini ko razna situacije. Čitin Psalam 103:7-10.
3. Da li o Devel isi le anav?
O Isus phenđa: „Dade amareja, kova hijan ko nebo, nek svetini pe to anav“ (Matej 6:9). Iako o Devel isi le but titule, ov isi le samo jekh anav. Ki svako ćhib odova anav averćhane izgovorini pe. Ki amari ćhib oleso anav izgovorini pe Jehova. Ama, disave manuša izgovorinena le Jahve. Čitin Psalam 83:18.
Ko but prevodija andi Biblija, e Devleso anav hine ikaldo hem zamenimo e titulencar Gospod ja Devel. Ked o pisibe andi Biblija hine završimo, e Devleso anav hine ćhivdo ko prekalo 7 000 thana. Đi sikavđa e manušen ando Devel, o Isus vaćerđa lenđe e Devleso anav. Čitin Jovan 17:26.
Dikh o kratko film Da li Bog ima ime?
4. Da li o Jehova brinini pe amendar?
Sar akava brižno dad, o Devel čerela sa aso amaro večno šukaripe
Da li odova so patinaja, mothovi so o Jehova tano Devel kova na brinini pe amendar? Disave manuša phenena so ov ćerela amenđe pharipa te bi iskušini amen. Ama, odova nane ćaće. Čitin Jakovljeva 1:13.
Odoleja so dinđa amenđe slobodno volja, o Devel mothovđa so cenini amen. Amen hijam but zahvalna sose isi amen sloboda te birina da li ka služina e Devlese (Isus Navin 24:15). Ama, but manuša birinena te ćeren lošna buća averenđe hem odolese but manuša patinena. E Jehova but dukhala ked dikhela odobor bari nepravda. Čitin Postanak 6:5, 6.
O Jehova tano Devel kova brinini pe amendar. Ov mangela te uživina ko đivdipe. Pana hari, ov ka cidel i patnja hem okolen so prouzrokujinena la. Đi na avela odova vreme, ov isi le šukar razlog sose dozvolini disavo vreme te postojini i patnja. Ki 8. lekcija ka dikha kova tano odova razlog. Čitin 2. Petrova 2:9; 3:7, 13.
5. Sar šaj te ova paše e Devleja?
O Jehova vićini amen te ova paše oleja ađahar so ka molina amen olese. Ov brinini pe kotar svako manuš (Psalam 65:2; 145:18). Ov tano spremno te oprostini. O Devel dikhela ked daja sa amendar te šuna le, iako disavo puti odova nane lokho. Odova mothovi so iako hijam nesavršena, amen ćaće šaj te ova paše e Devleja. Čitin Psalam 103:12-14 hem Jakovljeva 4:8.
Odolese so o Jehova dinđa amenđe đivdipe, amen valjani te manga le pobuter nego bilo kas avere (Marko 12:30). Đi mothoveja to mangipe premalo Devel ađahar so pobuter sikljoveja olestar hem so ćereja odova so ov rodela, tu ka ove pana popaše oleja. Čitin 1. Timoteju 2:4 hem 1. Jovanova 5:3.