Da li i šukar vest ćaće avela ando Devel?

1. Koj tano o Autor andi Biblija?

I šukar vest so o manuša večno ka živinen ki phuv, tani pisimi ki Biblija (Psalam 37:29). Ki Biblija isi 66 potikne knjige. O Devel koristinđa 40 verna manušen te pisinen la. O prva panđ knjige pisinđa o Mojsije oko 3 500 berš angleder. I poslednjo knjiga pisinđa o apostol Jovan pobuter ando 1 900 berš angleder. Kase mislija pisinđe odola piscija? O Devel prekalo po sveti duh mothovđa lenđe so te pisinen (2. Samuilova 23:2). On pisinđe e Devlese mislija, a na pekle. Odolese šaj te phena so o Devel tano o Autor andi Biblija. Čitin 2. Timoteju 3:16 hem 2. Petrova 1:20, 21.

Dikh o kratko film Ko je autor Svetog pisma?

2. Sar šaj te ova uverime so i Biblija ćaće avela ando Devel?

Amen đanaja so i Biblija avela ando Devel, sose oj tačno hem detaljno proreknini i budućnost. Nijekh manuš našti te ćerel odova (Isus Navin 23:14). Jedino o Svemoćno Devel šaj tačno te proreknini sa so ka ovel e manušencar ki budućnost. Čitin Isaija 42:9; 46:10.

I Biblija tani posebno knjiga sose avela ando Devel. Štampime tane milijarde primerkija ko but ćhibja. Iako tani but purani knjiga, i Biblija slažini pe e naukaja. Isto ađahar, ko odola zapisija ando 40 manuša nane ništa soj tano protivrečno.a I Biblija tani dokaz so o Devel mangela amen. Isto ađahar, oj pana isi la moć te menjini e manušengo đivdipe ko pošukar. Odolese, milionija manuša tane uverime so i Biblija tani e Devleso Lafi. Čitin 1. Solunjanima 2:13.

Dikh o kratko film Kako možemo biti sigurni da je Sveto pismo verodostojno?

3. Sostar vaćeri i Biblija?

Jekh ando najvažna teme ki Biblija tani so o Devel isi le šukar namera e manušencar. Ki Biblija vaćeri pe sar ki početka o manuša našalđe i prilika te živinen ko raj ki phuv hem sar odova raj ka ovel obnovimo. Čitin Otkrivenje 21:4, 5.

Ko e Devleso Lafi isi zakonija, načelija hem savetija. Isto ađahar, ki Biblija isi primerija kola mothovena amenđe sar o Devel postupinđa premalo manuša. Ando odola primerija sikljovaja savo tano Ov sar osoba. Odolese, i Biblija šaj te pomožini tuće te upoznajine e Devle hem sikavi tut sar šaj te ove oleso amal. Čitin Psalam 19:7, 11 hem Jakovljeva 2:23; 4:8.

4. Sar šaj te haljove i Biblija?

Te šaj te haljove i Biblija, ki akija brošura koristini pe isto metoda koja koristinđa o Isus. Ov objasninđa stih palo stih hem ađahar pomožinđa e manušenđe „jasno te haljon o Lila.“ Čitin Luka 24:27, 45.

Nane but buća kola šaj te oduševinen amen, sar o šukar vestija ando Devel. Ama, disaven na interesini odova so pisini ko e Devleso Lafi, a avera čak holjanena. Ma dozvolin odova te obeshrabrini tut. To večno đivdipe zavisini odolestar da li šukar penđareja e Devle. Čitin Jovan 17:3.