O Isus birini dešuduj apostolija

Nakhlja oko jekh tekvaš berš sar o Isus propovedinđa hem alo o vreme te anel jekh važno odluka. Ov valjanđa te birini učenikonen kola ka pomožinen lese ko oleso zadatko hem kola ka brininen pe averendar. O Isus đanđa so valjani lese e Jehovasi pomoć. Odolese ov đelo ki jekh planina kaj šaj hine te ovel kokri hem uduri celo rat molinđa pe. Tajsato dive sabale, o Isus vićinđa disaven ando pe učenikija hem olendar birinđa 12 apostolija. Da li đaneja sar on vićinđe pe? Olenge anava hine Petar, Andrija, Jakov, Jovan, Filip, Vartolomej, Toma, Matej, Jakov (e Alfejeso ćhavo), Tadija, Simon hem Juda Iskariotski.

Akala 12 apostolija valjanđe te putujinen e Isuseja. Ov sikavđa len hem palo odova bićhalđa len te propovedinen. O Jehova dinđa len moć te ikalen e demonen ando manuša hem te saćaren e nabormen.

O Isus dikhlja e apostolen sar amalen hem hine le poverenje upro lende. O fariseja mislinđe so o apostolija ništa na đanena hem soj tane prosta manuša. Ama, o Isus ceninđa len hem sikavđa len sar te propovedinen. On hine oleja ko najvažna trenutkija ko oleso životi, na primer angleder te merel hem palo oleso uskrsenje. Isto sar o Isus, disave apostolija hine andi Galileja, a disave olendar hine ženime.

O apostolija hine nesavršena hem ćerđe greške. Disavo puti, vaćerđe diso bizo te razmislinen hem anđe disave lošna odluke. Uzo odova, disavo puti na hine strpljiva, pa čak svađinđe pe koj tano pobaro olendar. Ama, o apostolija hine šukar manuša kola manglje e Jehova. Palo Isuseso meribe, odola učenikija hine len but važno uloga ki skupština.