Ma mukh te aćhol „o plamen kova avela ando Jah“

1. Sar i Biblija opisujini o pravo mangipe?

O MANGIPE tano sar „o plamen andi jag koja thabljola, o plamen kova avela ando Jah. Ni o bare panja našti te aćhaven o mangipe, niti o reke šaj te legaren len“ (Pesma 8:6, 7).b Akala stihija but šukar opisujinena soj tano o pravo mangipe. O lafija ando akala stihija tane but ohrabrujuća okolenđe kola tane ko brak, sose mothovena so olengo mangipe šaj te trajini večno.

2. So šaj o rom hem i romni te ćeren te ne bi šudrola olengo mangipe?

² Da li o mangipe maškaro rom hem i romni ka trajini večno, zavisini ando odova kobor on trudinena pe. Te phena jekh primer: I jag šaj te thabljol sa đi neko ćhivela kašta. Ako niko na ćhivela kašta ki jag, i jag ka aćhol. Isto ađahar, o mangipe maškar o rom hem i romni šaj te ovel zoralo samo ako on zorjaćerena po brak. Disavo puti, o mangipe maškar o rom hem i romni šaj te šudrol, pogotovo ako isi len finansijska problemija, problemija sastipaja, ja problemija đi barjaćerena pe ćhaven. Odolese, ako tu hijan ko brak, so šaj te ćere te na aćhol o plamen kova avela ando Jah? Ko akava članko ka dikha trin buća kola šaj te pomožinen tut te zorjaćere to mangipe hem te ovel tut bahtalo brak.c

DE SA TUTAR HEM PONODRI TE ZORJAĆERE TO AMALIPE E JEHOVAJA

3. Sar šaj o amalipe e Jehova te pomožini e romese hem e romnjaće te na šudrol olengo mangipe? (Propovednik 4:12; dikh i slika.)

³ Te ne bi aćhola „o plamen kova avela ando Jah“, o rom hem i romni valjani te zorjaćeren po amalipe e Jehova. Sar akava šaj te zorjaćeri olengo brak? Ked o rom hem i romni ceninena po amalipe e Jehovaja, on tane spremna te primeninen olese savetija. Odova ka pomožini lenđe te rešinen hem te ciden pe ando problemija, sebepi kola šaj olengo mangipe te šudrol. (Čitin Propovednik 4:12.) O manuša kola tane paše e Jehova, dena sa pestar te oponašinen le hem te razvijinen osobine kola ov isi le. Odolese, on trudinena pe te oven šukar, strpljiva hem te oprostinen jekh jekhese (Ef. 4:32–5:1). Ked o rom hem i romni mothovena asavke osobine, olengo mangipe ovela pana pobaro. Jekh phen koja vićini pe Lena, koja tani ko brak pobuter ando 25 berš, phenela: „Lokho tano te mange hem te poštujine e duhovno manuše.“

4. Sose o Jehova birinđa e Josife hem e Marija te oven e Isusese roditeljija?

⁴ Hajde te razmotrina jekh primer andi Biblija. Ando sa e Davidese potomkija, o Jehova birinđa e Josife hem e Marija te oven e Isusese roditeljija. Sose? Odolese so on hine paše e Jehovaja hem ov đanđa so on uvek ka ćhiven le ko prvo than ko po brak. So šaj okola kola tane ko brak te sikljon ando Josif hem i Marija?

5. So o roma šaj te sikljon ando Josif?

⁵ O Josif uvek ićerđa pe ko Jehovase smernice hem sebepi odova hine but šukar rom. O Jehova najhari trin putija dinđa le disave smernice so te ćerel pe porodicaja. Svako puti, o Josif šunđa e Jehova, čak hem ked na hine lese lokho (Mat. 1:20, 24; 2:13-15, 19-21). Ađahar, ov šaj hine te štitini e Marija hem te brinini pe olatar. Sebepi sa odova so ćerđa, i Marija pana pobuter manglja le hem poštujinđa le. Romalen, oponašinen e Josife, ađahar so andi Biblija ka roden savetija sar te brininen tumen andi tumari porodica.d Ked primeninena odola savetija, iako nane tumenđe lokho, tegani zorjaćerena tumaro brak hem mothovena so mangena tumare romnjen. Jekh phen kotar Vanuatu, koja pobuter ando 20 berš tani ko brak, phenela: „Ked mo rom rodela pomoć ando Jehova hem ićeri pe ko olese smernice, me pana pobuter poštujinava le, osetinava man so hijum sigurno hem isi man poverenje so uvek ka anel šukar odluke.“

6. So o romnja šaj te sikljon andi Marija?

⁶ I Marija hine paše e Jehova hem olaki vera na zavisinđa ando odova so Josif ćerđa. Oj šukar penđarđa e Devleso Lafi.e Isto ađahar, arakhlja vreme hor te razmislini ando odova so čitinđa (Luka 2:19, 51). Odova so i Marija hine duhovno osoba, ćerđa la te ovel šukar romni. Avdije, o romnja dena sa pestar te oponašinen e Marija. Na primer, jekh phen koja vićini pe Emiko phenela: „Đi na hijum le ko brak, kokri brininđum man andi mi duhovnost. Ked khuvđum ko brak, mo rom molinđa pe amenđe hem predvodinđa ko duhovna buća. Odolese, mi vera počminđa te zavisini ando odova so ov ćerđa. Akana trudinava man te arakhav vreme te ovav kokri e Jehovaja, te molinav man, te čitinav oleso Lafi hem te razmislinav ando odova so čitinava“ (Gal. 6:5). Romnjalen, nastavinen te zorjaćeren tumaro amalipe e Jehovaja hem tumare roma ka ovel len pobuter razlogija te hvalinen tumen hem te mangen tumen (Posl. 31:30).

7. Sar šaj e Josifeso hem e Marijako primer te pomožini e romese hem e romnjaće te ćeren o duhovna buća zajedno?

⁷ O Josif hem i Marija dinđe sa pestar te zorjaćeren po amalipe e Jehovaja. On haljilje kobor tano važno te ćeren o duhovna buća zajedno sar porodica (Luka 2:22-24, 41; 4:16). Ama, odova šaj na hine lenđe uvek lokho, pogotovo ked hine len poviše ćhave, ama on uspinđe. O Josif hem i Marija tane but šukar primer aso bračna parija avdije! Ako hem tumen isi tumen ćhave, šaj te ovel tumenđe pharo te đan ko sastankija hem te arakhen vreme aso porodično proučibe. Pana popharo šaj te ovel te arakhen vreme te proučinen hem te molinen tumen zajedno sar bračno par. Ama, ma bistren so ako zajedno ćerena o duhovna buća, ka oven pana popaše e Jehovaja hem jekh jekheja. Odolese, nek o duhovna buća ovena tumenđe ko prvo than.

8. So šaj ko porodično proučibe te ćeren o bračna parija kola isi len problemija?

⁸ So šaj te ćeren ako isi tumen problemija ko brak? Tegani šaj na mangena zajedno te proučinen. Ama, ipak bi ovela šukar te čitinen diso kratko sostar bi mangena o solduj te vaćeren. Akava ka pomožini tumen te ovel tumen pana pobaro mangipe jekh premalo jekheste hem te mangen te ćeren o duhovna buća zajedno.

PROVODINEN VREME ZAJEDNO

9. Sose o rom hem i romni valjani te provodinen vreme zajedno?

⁹ O rom hem i romni šaj te zorjaćeren po mangipe hem ađahar so ka provodinen vreme zajedno. Odova ka pomožini lenđe te đanen so olengo bračno drug mislini hem sar osetini pe (Post. 2:24). Te dikha so i Lilija hem o Ruslan, kola tane ko brak prekalo 15 berš, haljilje sigate palo odova so khuvđe ko brak. Oj phenela: „Amen haljiljam so na ka ovel amen but vreme amenđe sar so mislinđam. Valjanđam te đa ki buti, te čistina o ćher, a kasnije hem te brinina amen ando amare ćhave. Haljiljam so ako na arakhaja vreme amenđe, šaj lokho te cida amen jekh jekhestar.“

10. Sar šaj o bračna parija te primeninen o načelo ando Efešanima 5:15, 16?

¹⁰ So šaj o rom hem i romni te ćeren te bi provodinena vreme zajedno? Šaj ka valjani te ćeren plan te šaj te oven zajedno. (Čitin Efešanima 5:15, 16.) Jekh phral andi Nigerija kova vićini pe Uzondu, phenela: „Ked ćerava maje raspored, pisinava ked mangava te provodinav vreme me romnjaja hem odova vreme tano maje but važno“ (Fil. 1:10). Te dikha sar i Anastasija, i romni kotar pokrajinsko nadgledniko andi Moldavija, šukar koristini po vreme. Oj phenela: „Trudinava man te završinav me obaveze đi mo rom završini pe zadatkija. Sebepi odova, kasnije šaj te ova zajedno.“ Ama, so šaj te ćeren ako sebepi tumare obaveze našti te provodinen vreme zajedno?

11. So o Akila hem i Priskila ćerđe zajedno?

¹¹ O bračna parija šaj but buća te sikljon ando Akila hem i Priskila. Olen but manglje o hrišćanija ko prvo veko (Rimlj. 16:3, 4). Iako i Biblija na vaćeri but buća ando olengo brak, ipak koro late pisini so on uvek zajedno propovedinđe, ćerđe buti hem pomožinđe averenđe (Dela 18:2, 3, 24-26). Ki Biblija o Akila hem i Priskila uvek pominena pe zajedno.

12. So šaj o rom hem i romni te ćeren te šaj pana pobuter vreme te oven zajedno? (Dikh i slika.)

¹² Sar šaj o bračna parija te oponašinen e Akila hem e Priskila? Razmislin ando but buća kola tu hem to bračno drug valjani te ćeren. Da li šaj odova te ćeren zajedno, umesto te ćeren odvojeno? Na primer, o Akila hem i Priskila zajedno đelje ki služba. Da li hem tumen isi tumen disave zajednička planija asi služba? Isto ađahar, o Akila hem i Priskila zajedno ćerđe buti. Tu hem to bračno drug šaj nane tumen isto buti, ama šaj li zajedno te ćeren o buća ko ćher? (Prop. 4:9). Ked pomožinena jekh jekhese ko akala buća, tumen šaj te osetinen tumen sar tim hem šaj te ovel tumen pobuter vreme te vaćeren jekh jekheja. O Robert hem i Linda tane ko brak pobuter ando 50 berš. Ov phenela: „Iskreno, nane amen but vreme asi rekreacija. Ama ked me thovava o ćare, a oj kosela len ja ked me ćerava disavi buti ki bašta, a oj avela te pomožini man, me osetinava man but bahtalo. Ked akala buća ćeraja zajedno, tegani ovaja pana popaše jekh jekheja. Isto ađahar, amaro mangipe jekh premalo jekheste ovela pana pobaro.“

13. So valjani te ćeren o rom hem i romni te bi ovena popaše jekh jekheja?

¹³ Ma bistri, odova so hijen zajedno ne mora uvek te značini so ka oven popaše jekh jekheja. Jekh romni kotar Brazil, phenela: „Avdije hijam but zauzeta hem lokho šaj te pera ki zamka te mislina so provodinaja vreme zajedno samo odolese so živinaja ko isto ćher. Haljiljum so nane dovoljno samo te ova zajedno. Amen valjani te mothova pažnja jekh jekhese.“ Dikh so o Bruno hem olesi romni i Taiz ćerena te šaj te mothoven pažnja jekh jekhese. Ov phenela: „Ked hijam zajedno, amen aćhavaja amare telefonija hem uživinaja ko vreme ko kova šaj te ova jekh jekheja.“

14. So šaj te ćeren o bračna parija kola na uživinena ked tane zajedno?

¹⁴ Ama, so ako tu hem to bračno drug na uživinena đi hijen zajedno? Šaj interesujinena tumen različita buća ili šaj nervirinena jekh jekhe. So tegani šaj te ćeren? Razmislin ando primer kotar jag kova pominđam angleder. Ki početka, i jag nane odobor bari, ama te bi ovela bari amen mora hari pohari te ćhiva kašta. Isto ađahar, sose na trudinena tumen barem hari te oven zajedno svako dive? Tegani bi ovela šukar te ćeren diso ko so o solduj uživinena, a na diso so ka holjanćeri nekas tumendar (Jak. 3:18). Ako počminena ando asavke tikne buća, tumen ka dikhen sar tumaro mangipe palem barjola.

MOTHOVEN POŠTOVANJE JEKH JEKHESE

15. Sose tano o poštovanje važno ko brak?

¹⁵ Ko brak o poštovanje tano but važno. Ov tano sar kiseonik kova pomožini e jagaće te thabljol. Bizo kiseonik i jag šaj sigate te aćhol. Isto ađahar, ako o rom hem i romni na mothovena poštovanje jekh jekhese, olengo mangipe šaj sigate te šudrol. Ki aver strana, ako mothovena poštovanje jekh jekhese, tegani mothovena so mangena jekh jekhe. Ama, ma bistri so nane važno da li tu mislineja so mothoveja poštovanje, već da li to bračno drug osetini so tu poštujineja le. I Peni hem o Aret tane ko brak pobuter ando 25 berš. Oj phenela: „Sebepi so mothovaja poštovanje jekh jekhese, ko amaro ćher isi baro mangipe. Osetinaja amen slobodna te phena jekh jekhese so mislinaja, odolese so đanaja so ceninaja jekh jekheso mišljenje.“ Odolese, so šaj te ćere te bi to bračno drug osetini so tu ćaće poštujineja le? Te dikha o primer ando Avraham hem i Sara.

16. So šaj o roma te sikljon ando Avrahameso primer? (1. Petrova 3:7; dikh i slika.)

¹⁶ O Avraham mothovđa so poštujini e Sara. Ov pažljivo šunđa la hem razmislinđa ando odova sar oj osetini pe. Jekh puti, i Sara hine holjami hem sa pi holi ikalđa upro leste. Da li o Avraham holjanđa upro late sebepi odova? Na. Ov đanđa so i Sara tani podložno romni hem so uvek pomožini lese. Odolese, o Avraham pažljivo šunđa la hem trudinđa pe te rešini o problemi (Post. 16:5, 6). So šaj te sikljova? Romalen, tumen sar poglavarija ki porodica isi tumen odgovornost te anen odluke (1. Kor. 11:3). Ama, šukar bi ovela jekh rom te šunel pe romnjako mišljenje angleder so ka anel disavi odluka, pogotovo ako odija odluka ka utičini upro late (1. Kor. 13:4, 5). Ki disavi aver situacija, ti romni šaj ka ovel uznemirimi hem šaj ka valjani laće te vaćeri sar osetini pe. Da li tegani ka poštujine olake osećanja ađahar so pažljivo ka šune la? (Čitin 1. Petrova 3:7.) I Anđela hem o Dmitrij tane skoro 30 berš ko brak. Oj phenela sar olako rom mothovi olaće poštovanje: „O Dmitrij tano uvek spremno te šunel man ked hijum uznemirimi ja ked isi man potreba te vaćerav. Ov tano strpljivo mancar, čak hem ked hijum holjami.“

17. So šaj o romnja te sikljon andi Sara? (1. Petrova 3:5, 6)

¹⁷ I Sara poštujinđa e Avrahame ađahar so podržinđa olese odluke (Post. 12:5). Jekh puti, o Avraham manglja te mothovi gostoprimstvo aso manuša kola iznenada alje koro leste. Ov phenđa e Saraće te mukhel i buti koja ćerđa hem te ćerel maro (Post. 18:6). I Sara odmah ćerđa odova so o Avraham phenđa laće. Romnjalen, tumen šaj te oponašinen e Sara ađahar so ka podržinen tumare romenge odluke. Ked ka ćeren odova, tumaro brak ka ovel zoralo. (Čitin 1. Petrova 3:5, 6.) O Dmitrij, kas angleder pominđam, phenela sar osetini pe sose olesi romni poštujini le. Ov phenela: „But ceninava e Anđela odolese so dela sa pestar te podržini me odluke, čak hem ked na slažini pe olencar. Ako ko krajo odija odluka šaj na hine baš najšukar, oj na kritikujini man.“ Kobor tano lokho te mange nekas ko poštujini tu!

18. Sar o mangipe pomožini okolenđe kola tane ko brak?

¹⁸ Avdije, o Beng mangela te ćhinavi o mangipe kova isi len o bračna parija. Ov đanela so ako o bračna parija našaljena o mangipe kova isi len jekh premalo jekheste, on ka počminen te ciden pe ando Jehova. Ama, o ćaćutno mangipe niked na ćhinavđola! Odolese, de sa tutar o mangipe ko to brak te ovel asavko sar so opisujini pe ko Pesma nad pesmama. Sar bračno par, oven odlučna te ćhiven e Jehova ko prvo than, te odvojinen vreme jekh jekhese hem te poštujinen jekh jekhese osećanja. Ked ka ćeren odova, tumaro brak ka anel čast okolese ando kova avela o mangipe, e Jehovase. Sar so i jag ki koja ćhivela pe kašta na aćhola, ađahar hem tumaro mangipe niked na ka ćhinavđol.