Αύγουστος

Ντικχέν ντούι σημαντικά σημεία ανταλέ ψαλμόστε: (1) Ο δίκαιοι νακχένα προβλήματα. (2) Ο Ιεχωβά σώνελα-αμέν κατά προβλήματα. Σαρ σώνελα-αμέν ο Ιεχωβά; Εκ τρόπος ισί ότι βοηθίνελα-αμέν μα τι πακιάς ότι ο πράγματα αμαρέ ζωγιάτε κα τζαν πάντα λατσσές ανταλέ ντουνιάστε. Ενώ ο Ιεχωβά ντέλα πο λάφι ότι κα τθεράς χαρά κι υπηρεσία λέσκι, να ντέλα όμως πο λάφι ότι να κα τθεράς ιτς προβλήματα ακανά. (Ησ. 66:14) Βακερέλα αμένγκε τι τθεράς αμαρέ γιακχά ανγκλ’ αμέντε​—κο βακίτι σο κα τθεράς ι ζωή σο βοβ μανγκέλα τι απολαμβάνας για πάντα. (2 Κορ. 4:16-18) Μέχρι τι αβέλ-πες ανταβά όμως, βοηθίνελα-αμέν τι συνεχίνας τι υπηρετίνας-λες κάθε ντιβές. (Θρ. 3:22-24) Σο μπορίνασα τι σικλιάς κατά παράδειγμας πιστέ τζενένγκο κατά πουρανέ μπρεσά ντα αμαρέ ντιβεσένταρ; Μπορεί τι νακχάς προβλήματα σο να μπεκλεντίνασα. Αλλά άμα κα βασίντιβας κο Ιεχωβά, βοβ σίγουρα κα ντελ-αμέν ζορ.​—Ψαλμ. 55:22. w23.04 σ. 14, 15 ¶3, 4

Μπορίνασα τι σικλιάς μπουτ πράγματα κατά παράδειγμας σο μουκχλάς αμένγκε ο Ιωσήφ ντα η Μαρία, σο ισινέ έτοιμοι τι ντεν καν οντουλέντε σο τθερένας ι ζορ τι κερέν κουμάντος, ατζέ-ντα κάνα ανταβά να ισινέ εύκολος. (Λουκ. 2:1-6) Κάνα η Μαρία ισινέ κχαμνί πι μασικέστε, βόι ντα ο Ιωσήφ νακχλέ εκ δοκιμασία σο κα σικαβέλας άμα κα ντένας καν. Ο Αύγουστος, σο κυβερνίνελας ι Ρωμαϊκή Αυτοκρατορία, ντινάς εντολή τι αβέλ απογραφή. Ο Ιωσήφ ντα η Μαρία έπρεπε τι τζαν μέχρι κι Βηθλεέμ, ντα τι κερέν σχεδόν 150 χιλιόμετρα ντα τι νακχέν βεσένταρ. Οντουβά ταξίδι να ισινέ εύκολος, ειδικά ι Μαριάκε. Μπέκιμ τι ανησυχίνελας πέσκε ντα πι μαξιμίσκε σο να μπιάντιλοας ατζέκ. Σο κα αβέλας-πες άμα κα ασταρένας-λα ο ντουκχά; Τθερέλας πι περέστε ι Μεσσιάς. Κα αβέλας ανταβά δικαιολογία για μα τι ντελ καν κι κυβέρνηση; Ο Ιωσήφ ντα η Μαρία να μουκχλέ καέκ ανησυχία τι κερέλ-λεν μα τι ντεν καν κο νόμος. Ο Ιεχωβά ευλογιντάς-λεν επειδή ντινέ καν. Η Μαρία ερεσλί λατσσές κι Βηθλεέμ, μπιαντάς εκχέ ζουρανέ χουρντές ντα αντικάς κερντάς τι νικιόλ μπαγιά εκ προφητεία ι Γραφιάκι!​—Μιχ. 5:2. w23.10 σ. 8 ¶9· σ. 9 ¶11, 12

Σο αβέλα-πες άμα λέλα-τουμέν άγχος σάντε σο σκεφτίνενα ότι κα ντεν εκ απάντηση κι συνάθροιση; Μπέκιμ τι βοηθίνελ-τουμέν μπουτ τι προετοιμάντιβεν λατσσές. (Παρ. 21:5) Καζόμ πο λατσσές τζανένα οντουλά σο κα ντικχάς κι συνάθροιση, αζόμ πο εύκολος κα αβέλ τουμένγκε τι βάντεν τουμαρό βας. Επίσης, τι ντεν χουρντέ απαντήσεις. (Παρ. 15:23· 17:27) Εκ χουρντί απάντηση κα αγχώνελ-τουμέν πο χάνικ. Άμα κα ντεν εκ χουρντί απάντηση τουμαρέ λαφίντζαρ, κα σικαβέν ότι προετοιμαντέν-τουμέν λατσσές ντα ότι αγαντέν ξεκάθαρα οντουλά σο κα ντικχάς οτθέ. Σο αβέλα-πες όμως άμα κερένα ανταλά συμβουλές αλλά τουμαρό άγχος πάλι να μουκχέλα-τουμέν τι ντεν πο μπουτ από εκ ή ντούι απαντήσεις; Τι αβέν σίγουροι ότι ο Ιεχωβά κα εκτιμίνελ τουμαρέ μπαρέ προσπάθειες για τι κερέν ο πο λατσσό σο μπορίνενα. (Λουκ. 21:1-4) Τι κεράβ ο πο λατσσό να μανγκέλα τι βακερέλ ότι ζορισκιαράβα μο νεαυτός αζόμ μπουτ σο ανταβά τασαβέλα-μαν. (Φιλιπ. 4:5) Ντικχέν άμα μπορίνενα τι κερέν πο μπουτ πράγματα, τσσουβέν στόχος τι κερέν-λεν ντα προσευχίντιβεν τι αβέν ήρεμοι. Κι αρχή, ο πρώτος στόχος σο μπορεί τι τσσουβάς μερικοί αμένταρ ισί τι ντας εκ χουρντί απάντηση. w23.04 σ. 21 ¶6-8

Ο απόστολος Παύλος μοιασκιαρντάς-αμέν στρατιωτέντζαρ σο ισί τζανγκαντέ ντα ιρίνα πανοπλία. Εκ στρατιώτης πρέπει τι αβέλ έτοιμος για τζένγκι σο-ντα σαάτι τι αβέλ. Κάτι ασακό αβέλα-πες αμέντζαρ-ντα. Ατσσάσα έτοιμοι ι Ιεχωβάσκε ντιβεσέσκε κάνα ιριάσα ο θώρακας της πίστης ντα ι μανγκιμάσκο, ντα ι ελπίδα σαρ περικεφαλαία. Ο θώρακας αρακχαβέλας ι καρδιά ι στρατιωτίσκι. Η πίστη ντα η αγάπη αρακχαβένα αμαρό γκι. Κα βοηθίνεν-αμέν τι συνεχίνας τι υπηρετίνας ι Ντεβλές ντα τι ακολουθίνας ι Ιησούς. Η πίστη κερέλα-αμέν σίγουρους ότι ο Ιεχωβά κα ευλογίνελ-αμέν άμα ρόντασα λέσκε σαρέ αμαρέ γκίσαρ. (Εβρ. 11:6) Κα τσσίντελ-αμέν τι ατσσάς αφοσιωμέ αμαρέ Αρχηγόστε, κο Ιησούς, ατζέ-ντα άμα κα χρειαζίντιβελ τι νακχάς δυσκολίες. Σαρ κα μπαριαράς αμαρί πίστη για τι νταϊντίνας ο δυσκολίες ι ζωγιάκε; Μπορίνασα τι σικλιάς τζενένταρ αμαρέ ντιβεσέντε σο ατσσικιαρντέ πουμαρί ακεραιότητα παρόλο σο τζάνας λέντζαρ κόντρα ο γιαβερά ή τθερένας οικονομικά προβλήματα. Ντα μπορίνασα μα τι περάς κι παγίδα τι αβάς μπίτσαλε γιακχάκε άμα μοιάζασα οντουλέντε σο κερντέ απλή πουμαρί ζωή για τι τσσουβέν ι Βασιλεία πρώτη πουμαρέ ζωγιάτε. w23.06 σ. 10 ¶8, 9

Εγκράτεια μανγκέλα τι βακερέλ τι κεράς κουμάντος οντουλά σο νιωθίνασα ντα κεράσα. Χρειαζίντιβασα-λα εμ για τι κεράς αμαρέ στόχους, ατζέ πο μπουτ κάνα εκ στόχος ισί δύσκολος ή να μανγκάσα μπουτ τι κεράς-λες. Ντεν-τουμέν γκοντί ότι η εγκράτεια ισί αντρέ κο καρπός κι πνευμάσκο, οτθάρ τι μανγκέν κατά Ιεχωβά άγιος πνεύμας για τι βοηθίνελ-τουμέν τι μπαριαρέν ανταγιά σημαντική ιδιότητα. (Λουκ. 11:13· Γαλ. 5:22, 23) Μα μπεκλεντίνεν τι τζαν τουμένγκε τέλεια ο πράγματα. Ανταλέ ντουνιάστε, μάλλον ποτές να κα τζαν αμένγκε τέλεια ο πράγματα. Άμα κα μπεκλεντίνας κάτι ασακό, μπέκιμ να κα πετυχίνας ποτές αμαρό στόχος. Μπέκιμ μα τι μανγκάσα μπαγιά τι κεράς αμαρό στόχος επειδή ντικχιόλα αμένγκε μπουτ δύσκολος. Άμα ανταβά αβέλα-πες τουμέντζαρ-ντα, κα μπορίνενας τι χωρίνεν τουμαρό στόχος σε πο χουρντέ στόχους. Άμα τουμαρό στόχος ισί τι κερέν μπουτί οπράλ σε εκ ιδιότητα, αρχίνεν τι σικαβέν-λα πο χουρντέ πραγματέντε. Άμα τουμαρό στόχος ισί τι διαβάνεν σαρί ι Γραφή, αρχίνεν τι διαβάνεν χάνικ σαάτι κάθε φαρ. w23.05 σ. 29 ¶11-13

Ανταλέ τελευταίε ντιβεσέντε, ο Ιεχωβά χρησιμοποιήνελα πι οργάνωση για τι ντελ πάντα πνευματικός χαμπέ, σόσκε αντικάς βοηθίνελα-αμέν σαριλέν τι συνεχίνας αμαρό ταξίδι κο «Άγιος Ντρομ». (Ησ. 35:8· 48:17· 60:17) Κα μπορίναας τι βακεράς ότι, κάνα εκ τζενό δεχτίνελα τι κερέλ μελέτη κατά Γραφή, τθερέλα ι ευκαιρία τι τσσουβέλ-πες κο «Άγιος Ντρομ». Μερικοί κερένα χάνικ ταξίδι ντα σοράν νικιόνα κατά ντρομ. Γιαβερά ισί αποφασισμέ τι συνεχίνεν πουμαρό ταξίδι ανταλέστε μέχρι τι ερεσέν κο τθαν σο μανγκένα. Καβά ισί ανταβά τθαν; Οντουλένγκε σο τθερένα ι ελπίδα τι τζουβντιόν κο ουρανός, ο «Άγιος Ντρομ» γκερέλα «κι Ντεβλέσκο παράδεισος» κο ουρανός. (Αποκ. 2:7) Οντουλένγκε σο τθερένα ι ελπίδα τι τζουβντιόν κι πφουβ, ανταβά ντρομ γκερέλα κο τέλος κι 1.000 μπρεσένγκο κάνα σαρέ κα αβέν τέλειοι. Άμα κερένα ταξίδι ανταλέ ντρομέστε αντιβές, μα ντικχέν παλάλ. Ντα μα νικιόν κατά ντρομ μέχρι τι ερεσέν κο νεβό ντουνιάς! w23.05 σ. 17 ¶15· σ. 19 ¶16-18

Κάνα σκεφτίνενα σαρέ ο πράγματα σο κερντάς ο Ιεχωβά τουμένγκε, κα μανγκέν τι αφιερώνεν τουμαρί ζωή λέστε. (Ψαλμ. 116:12-14) Η Γραφή τθερέλα δίκιος κάνα βακερέλα ότι ο Ιεχωβά ντέλα «σαρέ ο λατσσέ ντα τέλεια δώρα». (Ιακ. 1:17) Ο πο μπαρό κατά δώρα σο ντινάς ισί η θυσία πι Τσσαβέσκι, ι Ιησού Χριστόσκι. Σκεφτίνεν καζόμ σουκάρ ισί ανταβά δώρος! Χάρη κο λύτρος, μπορίνενα τι τθερέν εκ λατσσί φιλία ι Ιεχωβάσαρ. Ντα βοβ ντινάς-τουμέν ι ευκαιρία τι τζουβντιόν για πάντα. (1 Ιωάν. 4:9, 10, 19) Η αφιέρωση κο Ιεχωβά ισί εκ κατά πο λατσσέ τρόποι για τι σικαβέν ότι νιωθίνενα εκτίμηση για την πο μπαρί αγάπη σο σικάντιλι ποτές, ντα σαρέ ι γιαβερέ ευλογιένγκε σο ντινάς-τουμέν ο Ιεχωβά.​—Δευτ. 16:17· 2 Κορ. 5:15. w24.03 σ. 5 ¶8

Κάνα ντικχάσα ο μπίλατζανε πράγματα σο κερένα ο τζενέ, νιωθίνασα σαρ ο δίκαιος Λωτ. Βοβ “στεναχωρίντιβελας μπουτ κατά μπίλατζανε πράγματα ι τζενένγκε σο να κερένας ο νόμος”, σόσκε τζανέλας ότι αμαρό Ντατ σο ισί κο ουρανός μισίνελα ο γκεραλέ πράγματα. (2 Πέτρ. 2:7, 8) Επειδή ο Λωτ νταρέλας κατά Ντεβέλ ντα μανγκέλας-λες, τζουνγκάλας κατά μπίλατζανε πράγματα σο κερένας ο τζενέ ντονταλάι λέσταρ. Αντιβές-ντα, ντονταλάι αμένταρ ισί τζενέ σο τθερένα χάνικ ή ιτς σεβασμός για το πάκι νόμοι ι Ιεχωβάσκε. Αμέν όμως, μπορίνασα τι ατσσάς πάκι άμα ατσσικιαράσα αμαρί αγάπη ι Ντεβλέσκε ντα άμα σικλιάσα τι τθεράς ι σωστή νταρ ι Ντεβλέσκε. Οντουλέσκε, ο Ιεχωβά βοηθίνελα-αμέν τι κεράς-λες ανταβά αντράλ κατά ενθάρρυνση σο λάσα κατά βιβλίος Παροιμίες. Σαρέ ο Χριστιανοί, μουρσά ντα τζουβλιά, τερνέ ντα πφουρέ, μπορίνενα τι βοηθίντιβεν μπουτ καζόμ κα ντικχέν ο γκοντιαβέρ συμβουλές σο ισί οτθέ. Κάνα νταράσα κατά Ιεχωβά, προσοχίνασα μα τι αβάς αμαλά οντουλέντζαρ σο κερένα γκεραλέ πράγματα. w23.06 σ. 20 ¶1, 2· σ. 21 ¶5

Επειδή τσσουβένα πρώτα ι Βασιλεία, μπέκιμ τουμαρί φαμιλί τι γκιλί κόντρα τουμέντζαρ ή μπέκιμ τι κερντέν θυσίες ντα οτθάρ να τθερένα αζόμ μπουτ λοβέ ντα πράγματα καζόμ κα μπορίνενας τι τθερέν. (Ματθ. 6:33) Άμα αβέλα-πες ανταβά, τι αβέν σίγουροι ότι ο Ιεχωβά ντικχλάς σαρέ ο πράγματα σο κερντέν λέσκε. (Εβρ. 6:10) Μάλλον ντικχλέν τουμαρέ ζωγιάτε καζόμ μπαγιά ισί ο λάφια ι Ιησούσκε: «Σαρέ οντουλέντζαρ σο μουκχλέ κχερ ή πφραλέν ή πφενίν ή νταγιά ή νταντές ή τσσαβέν ή χωράφια μάξους μάνγκε ντα ι λατσσέ αμπερίνγκε, κα τζαν λέντζαρ κόντρα, αλλά κα λεν 100 φαρ πο μπουτ ακανά, ανταλέ βακιτίστε, εμ κχερά εμ πφραλέν εμ πφενίν εμ νταΐν εμ τσσαβέν εμ χωράφια, ντα κο ντουνιάς σο κα αβέλ ζωή για πάντα». (Μάρκ. 10:29, 30) Ο ευλογίες σο λιντέν ισί μπαγιά πο μπαρέ σαρέ κατά θυσίες σο κερντέν.​—Ψαλμ. 37:4. w24.03 σ. 9 ¶5

Κάνα ο Χριστιανοί κι Ιουδαία νακχλέ μπαρί μποκχ, ο πφραλά κι κχανγκιρί κι Αντιόχεια λιντέ ι απόφαση τι μπουτσσαβέν βοήθεια κο πφραλά κι Ιουδαία, ο κάθε εκ οντουβά σο μπορίνελας». (Πράξ. 11:27-30) Παρόλο σο ο πφραλά σο επηρεασάλε κατά μποκχ τζουβντιόνας ντουρ κατά Αντιόχεια, ο Χριστιανοί κι Αντιόχεια ισινέ αποφασισμέ τι βοηθίνεν-λεν. (1 Ιωάν. 3:17, 18) Μπορίνασα αμέν-ντα αντιβές τι πφαμπάς ι γιαβερένγκε κάνα σικλιάσα ότι μερικά πφραλά επηρεασάλε από εκ καταστροφή. Μανγκάσα τι βοηθίνας-λεν αμέσως​—μπέκιμ πουτσάσα αμαρέ πρεσβυτερόν άμα μπορίνασα τι βοηθίνας σε εκ πρόγραμμα παροχής βοήθειας, κεράσα συνεισφορές ι εργόσκε σο αβέλα-πες σαρό κο ντουνιάς ή προσευχίντιβασα οντουλένγκε σο επηρεασάλε κατά καταστροφή. Αμαρέ πφραλά ντα πφενιά μπέκιμ κα χρειαζίντιβεν βοήθεια για τι τθερέν ο αναγκαία. Κάνα αμαρό Βασιλιάς, ο Χριστός Ιησούς, κα αβέλ για τι κρίνελ ι τζενέν, μακάρι τι αρακχέλ-αμέν τι πφαμπάς ι γιαβερένγκε, ντα τι καλίνελ-αμέν τι “λας ι Βασιλεία”.​—Ματθ. 25:34-40. w23.07 σ. 4 ¶9, 10· σ. 6 ¶12

Ο Ιησούς ισινέ λογικός σαρ ισί ο Ιεχωβά-ντα. Μπουτσσάντιλο κι πφουβ για τι βακερέλ ο λατσσέ αμπέρια “κο μπρακέ σο ισινέ χασαρντέ κο λαός Ισραήλ”. Όμως, σικαβέλας ότι ισινέ λογικός καζόμ κερέλας ανταβά διορισμός. Εκ φαρ, εκ τζουβέλ σο να ισινέ Ισραηλίτισσα μολιντάς-λες τι κερέλ λάκε τσσαγιά λατσσές, σο “τσσίντελας μπουτ κατά δαίμονας”. Επειδή πφαμπιλό ανταλέ τζουβλιάκε, ο Ιησούς κερντάς οντουβά σο μανγκλάς λέσταρ ντα κερντάς λατσσές λάκε τσσαγιά. (Ματθ. 15:21-28) Ντικχέν εκ γιαβέρ παράδειγμας. Πο τζανγκλέ καζόμ κερέλας πο έργος, ο Ιησούς βακερντάς: «Κον κα κερέλ-μαν πέρα . . . , κα κεράβ-λες με-ντα πέρα». (Ματθ. 10:33) Αλλά μήπως κερντάς πέρα ι Πετρός, σο βακερντάς τριν φαρ ότι να τζανέλας-λες; Νάα. Ο Ιησούς τζανέλας καζόμ μετανιωσάλοας ο Πέτρος ντα καζόμ πιστός ισινέ. Αφού αναστισάλο, ο Ιησούς σικαντάς-πες κο Πέτρος ντα ισί σχεδόν σίγουρος ότι βακερντάς λέσκε ότι συγχωριντάας-λες ντα ότι μανγκέλας-λες ατζέκ. (Λουκ. 24:33, 34) Εμ ο Ιεχωβά Ντεβέλ εμ ο Ιησούς Χριστός ισί λογικοί. Σο κα βακεράς αμένγκε; Ο Ιεχωβά μπεκλεντίνελα αμένταρ τι αβάς λογικοί. w23.07 σ. 21 ¶6, 7

Σο μπορίνασα τι βακεράς κο γιαβερά για τι κεράς-λεν τι αβέν σίγουροι ότι η πφουβ κα αβέλ Παράδεισος; Πρώτον, ο ίδιος ο Ιεχωβά ντέλα ι συγκεκριμέ υπόσχεση. Ο βιβλίος Αποκάλυψη βακερέλα: «Οντουβά σο μπεσέλα κο θρόνος βακερντάς: “Ντικχέν! Κεράβα-λεν σαρέ νεβέ”». Βοβ τθερέλα ι σοφία, ι ζορ ντα μανγκέλα αντράλ πι γκίσταρ τι κερέλ πι υπόσχεση τι νικιόλ μπαγιά. Δεύτερον, ισί αζόμ σίγουρος ότι κα νικιόλ μπαγιά λέσκι υπόσχεση, σο κο γιακχά κι Ιεχωβάσκε ισί σαρ τι αβιλί-πες. Οτθάρ βακερντάς: «Γράφινε, επειδή ανταλά λάφια ισί πιστά. . . . Αβιλέ-πες μπαγιά!» Τρίτον, κάνα ο Ιεχωβά αρχίνελα κάτι, μπιτισκιαρέλα-λες με επιτυχία, σαρ ντικχίντιβελα κατά λάφια: «Με ισινόμ ο Άλφα ντα ο Ωμέγα». (Αποκ. 21:6) Ο Ιεχωβά κα σικαβέλ ότι ο Μπενγκ ισί ψεύτης σο να μπορίνελα τι τσσιναβέλ ι Ιεχωβάς τι κερέλ πο σκοπός τι νικιόλ μπαγιά. Οτθάρ, κάνα κάποιος κα βακερέλ: «Σουκάρ ασούντιβενα σαρέ ανταλά, αλλά να πακιάβα ότι κα αβέν-πες», τι διαβάνεν ντα τι εξηγίνεν ο εδάφια Αποκάλυψη 21:5, 6. Σικαβέν καγιά σιγουριά ντινάς-αμέν ο Ιεχωβά για τι πακιάς λέσκι υπόσχεση, κάνα τσσουντάς πι υπογραφή, σαρ τι βακεράας.​—Ησ. 65:16. w23.11 σ. 7 ¶18, 19

Κάνα ο Αβραάμ ισινέ 75 μπρεσένγκο ντα να τθερέλας τσσαβέν, ο Ιεχωβά ντινάς-λες ανταγιά υπόσχεση. Ντικχλάς ο Αβραάμ τι νικιόλ μπαγιά ανταγιά υπόσχεση; Όχι σαρί. Αφού νακχλάς ι λεν Ευφράτης ντα μπεκλεντίνελας 25 μπρεσά, ο Αβραάμ ντικχλάς πι τσσαβές, τον Ισαάκ, τι μπιάντιβελ, ντα ανταβά ισινέ εκ θαύμας. Ντα αφού νακχλέ ατζέκ 60 μπρεσά, μπιάντιλε λέσκε αγγόνια, ο Ησαύ ντα ο Ιακώβ. (Εβρ. 6:15) Αλλά ο Αβραάμ να ντικχλάς ποτές πι προσαγγονίν τι αβέν εκ μπαρό λαός ντα τι λεν ο Υποσχεμέ Τθεμ. Όμως, οντουβά πιστός μουρς τθερέλας εκ μπουτ λατσσί φιλία πι Δημιουργόσαρ. (Ιακ. 2:23) Ντα κάνα κα αναστίντιβελ, καζόμ κα χαιρίνελ κάνα κα σικλιόλ ότι η πίστη ντα η υπομονή λέσκι αντέ ευλογίες σαρέ ι τθεμένγκε! (Γέν. 22:18) Σο σικλιάσα αμέν; Μπέκιμ αμέν μα τι ντικχάς ανταγιά στιγμή τι νικιόν μπαγιά σαρέ ο υποσχέσεις ι Ιεχωβάσκε. Άμα όμως κα κεράς υπομονή σαρ κερντάς ο Αβραάμ, μπορίνασα τι αβάς σίγουροι ότι ο Ιεχωβά κα ευλογίνελ-αμέν ακανά ντα ατζέ πο μπουτ κο νεβό ντουνιάς σο ντινάς πο λάφι ότι κα ανέλ.​—Μάρκ. 10:29, 30. w23.08 σ. 24 ¶14

Κάνα ισινέ τερνό, ο βασιλιάς Οζίας ισινέ ταπεινός. Σικλιλό «τι νταρέλ κατά αληθινός Ντεβέλ». Τζουβντιλό 68 μπρεσά, ντα ο Ιεχωβά ευλογίνελας-λες ο πο μπουτ μπρεσά σο τζουβντιλό. (2 Χρον. 26:1-4) Ο Οζίας νικιντάς μπουτέν πι ντουσμανίνταρ ντα κανονιντάς τι ατσσόλ αρακχαντί η Ιερουσαλήμ. (2 Χρον. 26:6-15) Ο Οζίας σίγουρα χαιρίνελας σαρέ οντουλένγκε σο βοηθιντάς-λες ο Ντεβέλ τι κερέλ. (Εκκλ. 3:12, 13) Ο βασιλιάς Οζίας σικλιλόας τι ντελ εντολές κο γιαβερά ντα βον τι κερέν-λεν. Μήπως ανταβά κερντάς-λες τι αμντίνελ ότι μπορίνελας τι κερέλ σο μανγκέλας; Εκ ντιβές, ο Οζίας λιντάς ι απόφαση τι τσσουβέλ-πες κο ναός κι Ιεχωβάσκο ντα, μπαρικανέ τροπόσαρ, προσπαθιντάς τι πφαμπαρέλ θυμίαμας κο θυσιαστήριος, κάτι σο ο βασιλιάδες να τθερένας ο δικαίωμας τι κερέν. (2 Χρον. 26:16-18) Ο αρχιερέας Αζαρίας προσπαθιντάς τι διορθώνελ-λες, αλλά ο Οζίας χολιασάλο μπουτ. Δυστυχώς, ο Οζίας καταστραφιντάς σαρέ οντουλά σο κερντάς ανταλά μπρεσά για τι ατσσόλ πιστός, ντα ο Ιεχωβά τιμωριντάς-λες με λέπρα. (2 Χρον. 26:19-21) Καζόμ διαφορετική κα αβέλας λέσκι ζωή άμα κα ατσσόλας ταπεινός! w23.09 σ. 10 ¶9, 10

Ατζέ-ντα κάνα αβιλό χρισμέ Χριστιανός, ο απόστολος Πέτρος μαρέλας-πες με το αδυναμίες σο τθερέλας. Κο 36 Κ.Χ., ισινέ ανγκλάλ κάνα λιντάς ο άγιος πνεύμας ο Κορνήλιος, σο ισινέ κατά γιαβερά τθεμά ντα να κερντάας περιτομή. Ανταβά σικαντάς ξεκάθαρα ότι «ο Ντεβέλ να ξεχωρίνελα ι τζενέν» ντα ότι ο τζενέ κατά γιαβερά τθεμά μπορίνενας τι αβέν κι Χριστιανική κχανγκιρί. (Πράξ. 10:34, 44, 45) Σοράν ανταλέσταρ, ο Πέτρος νιωθίνελας άνετα τι χαλ γιεκ ι τζενέντζαρ σο ισινέ κατά γιαβερά τθεμά, κάτι σο ανγκλέ να κα κερέλας-λες με τίποτα. Όμως, μερικοί Ιουδαίοι Χριστιανοί πακιάνας ότι ο Ιουδαίοι ντα ο τζενέ κατά γιαβερά τθεμά δεν έπρεπε τι χαν γιεκ. Κάνα μερικά τζενέ σο τθερένας ανταγιά άποψη αβιλέ κι Αντιόχεια, ο Πέτρος τσσιναντάς τι χαλ γιεκ πι πφραλέντζαρ σο ισινέ κατά γιαβερά τθεμά, μάλλον επειδή νταρέλας μα τι προσβαλίνελ ι Χριστιανόν σο ισινέ Ιουδαίοι. Ο απόστολος Παύλος ντικχλάς ότι κι περίπτωση οντιά, ο Πέτρος ισινέ υποκριτής ντα διορθωντάς-λες ανγκλάλ σαριλέντε. (Γαλ. 2:13, 14) Παρόλο σο κερντάς ανταβά λάθος, ο Πέτρος να παρατιντάς-λεν. w23.09 σ. 22 ¶8

Βακερέν ι αλήθεια τουμαρέ νεαυτόστε ντα αγαβέν σο κα μπορίνενας τι κερέν πο λατσσές. Αλλά μα χασαρέν τουμαρί ζορ. «Ο Κύριος σικαβέλα λατσσιπέ» ντα κα βοηθίνελ-τουμέν τι αβέν πο λατσσέ. (1 Πέτρ. 2:3) Ο απόστολος Πέτρος βακερέλα αμένγκε: «Ο Ντεβέλ . . . κα τελειώνελ τουμαρό σικλιαριπέ. Βοβ κα κερέλ-τουμέν τι αβέν σταθεροί». Ο Πέτρος κάποτε νιωσάλο ότι να αξίνελας τι αβέλ ι Ιησούσαρ. (Λουκ. 5:8) Αλλά επειδή ο Ιεχωβά ντα ο Ιησούς βοηθιντέ-λες μανγκιμάσαρ, να τσσιναντάς τι ακολουθίνελ πιστά ι Ιησούς. Αντικάς, ο Ιεχωβά μουκχλάς ι Πετρός τι τσσουβέλ-πες «κι Βασιλεία αμαρέ Κυριόσκι ντα Οντουλέσκι σο σώνελα-αμέν, ι Ιησού Χριστόσκι». (2 Πέτρ. 1:11) Σο μπαρί ευλογία! Άμα να τσσιναβένα τι προσπαθίνεν, σαρ ο Πέτρος ντα μουκχένα ι Ιεχωβάς τι σικλιαρέλ-τουμέν, κα λεν τουμέν-ντα ι αιώνια ζωή. Κα “ερεσέν κο στόχος της πίστης σο τθερένα, τι σώντιβεν”.​—1 Πέτρ. 1:9. w23.09 σ. 31 ¶16, 17

Κο πουρανέ μπρεσά η σκηνή της μαρτυρίας τθερέλας εκ αυλή​—εκ μπαρό τθαν σο ισινέ πφαντό ντονταλάι ντα οτθέ ο ιερείς κερένας πουμαρί υπηρεσία. Ο μπαρό χάλκινος θυσιαστήριος σο πφαμπαρένας θυσίες ισινέ κι αυλή εκχέ χάλκινε λεκανάσαρ σο τθερέλας πανί. Ο ιερείς χρησιμοποιήνενας-λα για τι τθοβέν-πες πριν τι κερέν πουμαρί ιερή υπηρεσία. (Έξοδ. 30:17-20· 40:6-8) Αντιβές, ο χρισμέ κι πφουβ υπηρετίνενα πιστά κο πνευματικός ναός, κι αυλή σο ισί αντρέ. Η μπαρί λεκάνη πανίσαρ σο ισινέ κι σκηνή της μαρτυρίας ντα κο ναοί ανέλα λένγκε γκοντιάτε κάτι σημαντικός λένγκε, ντα σαρέ ι Χριστιανόνγκε​—ότι πρέπει τι ατσσόν πάκι κο τρόπος σο τζουβντιόνα ντα ντένα λατρεία ι Ιεχωβάς. Αλλά κάι ντένα λατρεία ο τζενέ κο «μπαρό πλήθος»; Ο απόστολος Ιωάννης ντικχλάς-λεν τι “μπεσέν ανγκλάλ κο θρόνος”. Ανταβά τθαν κι πφουβ μανγκέλα τι βακερέλ ι αυλή σο ισί αβρί, σο οτθέ «υπηρετίνενα [ι Ντεβλές] ντισάρα ντα ιράτ λέσκε ναόστε». (Αποκ. 7:9, 13-15) Ισινάμ πφερντέ εκτίμηση σο ο Ιεχωβά ντινάς-αμέν ο μπαρό προνόμιος τι υπηρετίνας-λες λέσκε μπαρέ πνευματικέ ναόστε! w23.10 σ. 28 ¶15, 16

Εκ τρόπος σο ο Ιεχωβά ντέλα-αμέν ζορ ισί αντράλ κατά πρεσβύτεροι. (Ησ. 32:1, 2) Οτθάρ, κάνα νιωθίνενα ανησυχία, κερέν λάφι ανταλέσκε σο απασχολίνελα-τουμέν κο πρεσβύτεροι. Κάνα ντένα-τουμέν βοήθεια, δεχτίνεν-λα με εκτίμηση. Αντράλ λένταρ, ο Ιεχωβά μπορίνελα τι κερέλ-τουμέν ζουρανέ. Επίσης, η ελπίδα σο ντέλα-αμέν η Γραφή τι τζουβντιάς για πάντα​—είτε κο Παράδεισος σο κα αβέλ κι πφουβ είτε κι Βασιλεία κο ουρανός​—μπορίνελα τι πφερέλ-αμέν ζορ. (Ρωμ. 4:3, 18, 19) Αμαρί ελπίδα ντέλα-αμέν ζορ για τι νταϊντίνας δοκιμασίες, τι βακεράς ο λατσσέ αμπέρια ντα τι κεράς μπουτ διορισμούς κι κχανγκιρί. (1 Θεσ. 1:3) Η ίδια ελπίδα ντέλας ζορ κο απόστολος Παύλος-ντα. “Ισινέ πφαντό”, “να τζανέλας σο τι κερέλ”, “τζάνας λέσαρ κόντρα” ντα “περαβένας-λες τελέ”. Ισινέ σε κίνδυνος ατζέ-ντα λέσκι ζωή. (2 Κορ. 4:8-10) Ο Παύλος αρακχλάς ι ζορ τι νταϊντίνελ επειδή λέσκε γιακχά ισινέ κι ελπίδα σο τθερέλας. (2 Κορ. 4:16-18) Ο Παύλος σκεφτίνελας ι ελπίδα σο τθερέλας τι τζουβντιόλ για πάντα κο ουρανός. Ο Παύλος σκεφτίνελας λατσσές ανταγιά ελπίδα. Ο αποτέλεσμας ισινέ ότι “λέλας νεβί ζορ καζόμ νακχένας ο ντιβεσά”. w23.10 σ. 15, 16 ¶14-17

Κάνα προσευχίντιβενα, σκεφτίνεν άμα ισί ακανά ο βακίτι ι Ιεχωβάσκο για τι κερέλ οντουβά σο μανγκλέν. Μπέκιμ νιωθίνασα ότι χρειαζίντιβασα αμέσως εκ απάντηση αμαρέ προσευχιέντε. Ο Ιεχωβά όμως τζανέλα καβά ισί ο πο λατσσό βακίτι για τι βοηθίνελ-αμέν. (Εβρ. 4:16) Κάνα να λάσα αμέσως οντουβά σο μανγκάσα, μπέκιμ τι αμντίνασα ότι η απάντηση ι Ιεχωβάσκι ισί “Όχι”. Αλλά κι πραγματικότητα, λέσκι απάντηση μπέκιμ τι αβέλ “Όχι ατζέκ”. Για παράδειγμας, εκ τερνό πφραλ προσευχίντιβελας τι αβέλ λατσσές πι νασφαλιμάσταρ. Αλλά να αβιλό πο λατσσές κι υγεία λέσκι. Άμα ο Ιεχωβά κα κερέλας-λες λατσσές με εκ θαύμας, ο Μπενγκ κα μπορίνελας τι βακερέλ ότι ο μόνος λόγος σο ο πφραλ συνεχιντάς τι υπηρετίνελ ι Ιεχωβάς ισί επειδή κερντάς-λες λατσσές. (Ιώβ 1:9-11· 2:4) Επίσης, ο Ιεχωβά τραμπιντάς ήδη ο ντιβές σο κα νασκιαρέλ σαρέ ο νασφαλίματα. (Ησ. 33:24· Αποκ. 21:3, 4) Μέχρι τι αβέλ-πες ανταβά, να μπεκλεντίνασα κατά Ιεχωβά τι κερέλ θαύματα για τι αβάς λατσσές αμαρέ νασφαλιματένταρ. Οτθάρ, ο πφραλ κα μπορίνελας τι μανγκέλ κατά Ιεχωβά τι τθερέλ ζορ ντα ειρήνη αντρέ πέστε για τι νταϊντίνελ πο νασφαλιπέ ντα τι συνεχίνελ τι υπηρετίνελ ι Ντεβλές πιστά. w23.11 σ. 23 ¶13

Ο Σαμψών κερντάας εκ σοβαρός λάθος αλλά να τσσιναντάς τι κερέλ ο θέλημας ι Ιεχωβάσκο. Ροντιντάς εκ ευκαιρία για τι κερέλ ο διορισμός σο ντινάς-λες ο Ντεβέλ, δηλαδή τι τζαλ κόντρα ι Φιλισταιόντζαρ. (Κριτ. 16:28-30) Μολιντάς ι Ιεχωβάς τι βοηθίνελ-λες “τι λελ εκδίκηση κατά Φιλισταίοι”. Ο αληθινός Ντεβέλ απαντιντάς κο Σαμψών ντα ντινάς-λες πάλι ι ζορ σο τθερέλας ανγκλέ αντράλ εκχέ θαυμάσταρ. Οτθάρ, ο Σαμψών οντουλέ περιπτωσιάτε μουνταρντάς πο μπουτ Φιλισταιόν από κάθε γιαβέρ φαρ. Παρόλο σο ο Σαμψών να γλιτωντάς ο μπέτι αποτελέσματα κατά λάθος σο κερντάς, να τσσιναντάς τι κερέλ ο θέλημας ι Ιεχωβάσκο. Ατζέ-ντα άμα κα κεράς εκ λάθος ντα κα χρειαζίντιβας διόρθωση ή κα χασαράς εκ προνόμιος, δεν πρέπει τι τσσιναβάς τι κεράς ο θέλημας ι Ιεχωβάσκο. Τι ντεν-τουμέν γκοντί ότι ι Ιεχωβάσκε συνεχίνενα τι αβέν σημαντικοί. (Ψαλμ. 103:8, 9) Παρόλο σο κεράσα λάθη, μπορίνασα τι αβάς χρήσιμοι κο Ιεχωβά, σαρ ισινέ ο Σαμψών. w23.09 σ. 6 ¶15, 16

Τουμαρί υπομονή ανέλα ι ευλογία ι Ιεχωβάσκι. Ανταβά να μανγκέλα τι βακερέλ ότι ο Ιεχωβά χαιρίνελα σο νακχένα δοκιμασίες ή προβλήματα. Ο Ντεβέλ ευλογίνελα τουμέν. Τουμαρί υπομονή γκερέλα σε εκ λατσσί κατάσταση κο γιακχά κι Ντεβλέσκε. Σο σουκάρ ευλογία! (Ψαλμ. 5:12) Ντεν-τουμέν γκοντί ότι ο Αβραάμ νταϊντιντάς δοκιμασίες ντα ο Ντεβέλ ισινέ ευχαριστιμέ λέσαρ. Ο Ιεχωβά ντικχέλας-λες σαρ πο αμάλ ντα βακερντάς ότι ισινέ δίκαιος. (Γέν. 15:6· Ρωμ. 4:13, 22) Ο ίδιος μπορίνελα τι αβέλ-πες αμέντζαρ-ντα. Ο Ντεβέλ να ευλογίνελα-αμέν σάντε κάνα ντικχέλα καζόμ πράγματα κεράσα ή καζόμ προνόμια τθεράσα. Ευλογίνελα-αμέν χάρη κι πίστη σο τθεράσα ντα κι υπομονή σο κεράσα. Σαρέ μπορίνασα τι νταϊντίνας, καζόμ μπρεσένγκε-ντα τι αβάς, σαρ-ντα τι αβέν ο πράγματα αμαρέ ζωγιάτε ντα σο-ντα ικανότητες τι τθεράσα. Μήπως νταϊντίνενα πιστά κάποια δοκιμασία ανταγιά στιγμή; Άμα βα, τι αρακχέν παρηγοριά καζόμ σκεφτίνενα ότι τθερένα ι ευλογία ι Ντεβλέσκι. Κάνα αγαβάσα ότι τθεράσα ι ευλογία ι Ντεβλέσκι, ανταβά μπορεί τι τθερέλ μπαρί ζορ οπρ’ αμέντε. Μπορίνελα τι κερέλ αμαρί ελπίδα πο ζουρανί. w23.12 σ. 11 ¶13, 14

Ο Χριστιανός πρέπει τι σικλιόλ τι κερέλ-λες ανταβά λατσσές. Ανταβά μανγκέλα τι βακερέλ τι ασουνέλ προσεκτικά ι γιαβερέν ντα τι αγαβέλ λένγκε σκέψεις ντα λένγκε αισθήματα. (Παρ. 20:5) Μπορίνελα τι σικλιόλ σο σκεφτίνελα ντα σαρ νιωθίνελα εκ τζενό κατά φωνή λέσκι, κατά εκφράσεις σο κερέλα πι μόσαρ ντα κατά κινήσεις σο κερέλα πι σωμάσαρ. Ναστί σικλιόνα τι κερέν-λες ανταβά άμα να νακχένα σαάτι ι γιαβερέντζαρ. Άμα κερένα λάφι συνέχεια αντράλ κατά Ίντερνετ, σαρ ισί ο e-mail ντα ο μηνύματα, ανταβά μπορεί τι κερέλ τουμένγκε δύσκολος τι κερέν λάφι ι γιαβερέντζαρ πασάλ. Οτθάρ, τι αρακχέν ευκαιρίες για τι κερέν λάφι ι γιαβερέντζαρ πασάλ. (2 Ιωάν. 12) Εκ ώριμος Χριστιανός πρέπει επίσης τι μπορίνελ τι νικαβέλ ο αναγκαία πέσκε ντα πι φαμιλιάκε. (1 Τιμ. 5:8) Ισί λατσσό τι σικλιόν εκ χρήσιμος πράγμας σο κα βοηθίνελ-τουμέν τι αρακχέν μπουτί. (Πράξ. 18:2, 3· 20:34· Εφεσ. 4:28) Τι κερέν προσπάθεια για τι τθερέν ο ναβ ότι ισινέν μπουτιαρνέ ντα ότι μπιτισκιαρένα σο-ντα αρχίνενα. Αζομάν, κα αβέλ πο σίγουρος ότι κα αρακχέν εκ μπουτί ντα κα ατσσικιαρέν-λα. w23.12 σ. 27 ¶12, 13

Κάνα η Αγία Γραφή κερέλα λάφι “ι Ιεχωβάσκε ντιβεσέσκε”, βακερέλα ι βακιτίσκε σο ο Ιεχωβά κρίνελα πι ντουσμανίν ντα σώνελα πι λαός. Κο πουρανέ μπρεσά, ισινέ φαρ σο ο Ιεχωβά τιμωριντάς μερικά τθεμά. (Ησ. 13:1, 6· Ιεζ. 13:5· Σοφ. 1:8) Αμαρέ ντιβεσέντε, «ο ντιβές ι Ιεχωβάσκο» αρχίνελα κάνα ο αρχηγοί ι τθεμένγκε κερένα επίθεση κι Μπαρί Βαβυλώνα ντα μπιτίνελα με το τζένγκι σο βακέρντιβελα Αρμαγεδδώνας. Για τι σώντιβας οντουλέ “ντιβεσέσταρ”, χρειαζίντιβελα τι ετοιμάνας-αμέν από ακανά. Ο Ιησούς σικλιαρντάς ότι πρέπει, όχι σάντε τι ετοιμάνας-αμέν για την «μπαρί στεναχώρια», αλλά επίσης τι “αβάς συνέχεια έτοιμοι” ανταλέσκε. (Ματθ. 24:21· Λουκ. 12:40) Κι πρώτη επιστολή σο γραφιντάς κο Θεσσαλονικείς ι Ντεβλέσκε πνευμάσαρ, ο απόστολος Παύλος χρησιμοποιηντάς μερικά παραδείγματα για τι βοηθίνελ ι Χριστιανόν τι αβέν συνέχεια έτοιμοι ι μπαρέ ντιβεσέσκε σο κα κρίνελ ο Ιεχωβά. Ο Παύλος τζανέλας ότι ο ντιβές ι Ιεχωβάσκο να κα αβέλας αζομάν. (2 Θεσ. 2:1-3) Όμως, βακερντάς ι πφραλένγκε τι ετοιμάνεν-πες οντουλέ ντιβεσέσκε σαρ τι αβέλας γιαβίν. Ανταγιά συμβουλή μπορίνασα τι κεράς-λα αμέν-ντα. w23.06 σ. 8 ¶1, 2

Κο 1978, εκ μπουτ βουτσσό κτίριος χτίντιλο κο Τόκιος, κι Ιαπωνία. Ο τζενέ σκεφτίνενας σαρ κα νταϊντίνελας ανταβά κτίριος ο σεισμούς σο αβένας-πες συνέχεια κι πόλη οντιά. Καβά ισινέ ο μυστικός; Ο μηχανικοί κερντέ ανταβά βουτσσό κτίριος σταθερός για τι νταϊντίνελ ο σεισμοί. Επίσης κερντέ ανταβά βουτσσό κτίριος εκχέ τροπόσαρ σο κα μπορίνελας τι κουνιάντιβελ χάνικ χωρίς τι περέλ. Ο Χριστιανοί μοιάζενα ανταλέ βουτσσέ κτιριόσαρ. Σόσκε βακεράσα-λες ανταβά; Ο Χριστιανός πρέπει τι τθερέλ εκ ισορροπία​—δηλαδή εμ τι αβέλ σταθερός εμ τι κουνιάντιβελ, σαρ τι βακεράας, κατά απόψεις σο τθερέλα. Πρέπει επίσης τι αβέλ ζουρανό ντα σταθερός κο πράγματα σο τθερένα τι κερέν με το νόμοι ντα με το κανόνες ι Ιεχωβάσκε. Ισί “έτοιμος τι ντελ καν” ντα να τσσίντελα-πες παλάλ. Οκιά μπάνταρ, χρειαζίντιβελα τι αβέλ “λογικός”, ή γιαβέρσοϊ τι κουνιάντιβελ, σαρ τι βακεράας, κατά απόψεις σο τθερέλα άμα ισί λέσκε βαστέστε ή άμα ισί ανάγκη τι αβέλ-πες ανταβά. (Ιακ. 3:17) Ο Χριστιανός σο σικλιλό τι αβέλ ισορροπημέ να κα αβέλ ούτε μπουτ αυστηρός ούτε μπουτ κοβλό. w23.07 σ. 14 ¶1, 2

Ο Ιησούς χρειαζίντιλο τι τζαλ κόντρα κο Μπενγκ, σο προσπαθιντάς τι κερέλ ι Ιησούς τι αμαρτίνελ. Ντα βακερντάς ξεκάθαρα κο Ιησούς τι τσσιναβέλ τι αβέλ αφοσιωμέ κο Ντεβέλ. (Ματθ. 4:1-11) Ο Μπενγκ ισινέ αποφασισμέ τι κερέλ ι Ιησούς τι αμαρτίνελ για μα τι μπορίνελ τι ντελ πι ζωή σαρ λύτρος. Καζόμ κερέλας πο έργος κι πφουβ, ο Ιησούς νακχέλας γιαβερά-ντα δοκιμασίες. Λέσκε ντουσμάνια γκιλέ λέσαρ κόντρα ντα προσπαθιντέ τι μουνταρέν-λες. (Λουκ. 4:28, 29· 13:31) Τθερέλας τι νταϊντίνελ ο ατέλειες πι μαθητένγκε-ντα. (Μάρκ. 9:33, 34) Επίσης, ο τζενέ δικαντέ-λες, βασανιντέ-λες ντα πρασαντέ-λες. Σοράν, μουνταρντέ-λες εκχέ τροπόσαρ σο αντάς λέσκε μπαρί ντουκχ ντα λατζ. (Εβρ. 12:1-3) Έπρεπε τι νταϊντίνελ πο τελευταίες στιγμές κορκορό, χωρίς τι αρακχαβέλ-λες ο Ιεχωβά. (Ματθ. 27:46) Σίγουρα, ο Ιησούς νακχλάς μπουτ δυσκολίες για τι ντελ πι ζωή σαρ λύτρος. Να νιωθίνασα μπαρί αγάπη ι Ιησούσκε κάνα σκεφτίνασα λατσσές σαρέ ο θυσίες σο κερντάς αμένγκε; w24.01 σ. 10, 11 ¶7-9

Η υπομονή βοηθίνελα-αμέν τι τζας-λεν λατσσές ι γιαβερέντζαρ. Βοηθίνελα-αμέν τι ασουνάς προσεκτικά κάνα κερένα λάφι ο γιαβερά. (Ιακ. 1:19) Επίσης, η υπομονή ανέλα ειρήνη. Αρακχαβέλα-αμέν για μα τι κεράς κάτι σιγκιαριντός ούτε τι κεράς λάφι σκληρέ τροπόσαρ κάνα ισινάμ πιεσμέ. Ντα άμα σικαβάσα υπομονή, να κα χολιάνας εύκολα κάνα εκ τζενό πληγώνελα-αμέν. Αντίς τι κεράς λέσκε αμέν-ντα ο ίδια, “κα νταϊντίνας ο εκ ι γιαβερές ντα κα συγχωρίνας ο εκ ι γιαβερές αντράλ αμαρέ γκίσταρ”. (Κολ. 3:12, 13) Η υπομονή βοηθίνελα-αμέν επίσης τι λας πο λατσσέ αποφάσεις. Αντίς τι κεράς κάτι σιγκιαριντός ή τι κεράς σο τσσινέλα αμαρί γκοντί οντιά στιγμή, ντάσα αμαρέ σαατίσταρ για τι σικλιάς καζόμ πο μπουτ πράγματα αβέλα-πες για το επιλογές σο τθεράσα, ντα σοράν τι αποφασίνας καγιά ισί η πο λατσσί. Για παράδειγμας, άμα ρόντασα μπουτιάκε, μπέκιμ τι περάς κο πειρασμός τι δεχτίνας ι πρώτη μπουτί σο κα αρακχάς. Όμως, άμα κεράσα υπομονή, κα ντας αμαρέ σαατίσταρ για τι σκεφτίνας σαρ κα επηρεάνελ αμαρί φαμιλί ντα αμαρί φιλία ι Ιεχωβάσαρ. Η υπομονή μπορεί τι γλιτώνελ-αμέν από εκ λάθος απόφαση. w23.08 σ. 22 ¶8, 9

Άμα χασαρντέν τουμαρί ζορ επειδή πρέπει τι τζαν κόντρα κο λάθος επιθυμίες σο τθερένα, σκεφτίνεν ο λάφι σο ντινέν κο Ιεχωβά κάνα κερντέν τουμαρί αφιέρωση λέστε ντα κα αβέν ατζέ πο αποφασισμέ τι τζαν κόντρα κο πειρασμός. Σαρ; Κάνα αφιερώντιβενα κο Ιεχωβά, τσσιναβένα τι τζουβντιόν τουμένγκε. Ανταβά μανγκέλα τι βακερέλ τι μουκχέν παλάλ οντουλά πράγματα σο μπεϊντίνενα ή σο μανγκένα τι πετυχίνεν αλλά κα πφανγκένας ι Ιεχωβάσκο γκι. (Ματθ. 16:24) Οτθάρ, κάνα νακχένα εκ δοκιμασία, να κα χρειαζίντιβελ τι ντεν σαάτι για τι σκεφτίνεν σο τι κερέν. Αποφασιντέν ήδη σο κα κερέν​—κα αβέν πιστοί κο Ιεχωβά. Κα αβέν αποφασισμέ τι κερέν ι Ιεχωβάσκο γκι. Αντικάς κα μοιάζεν κο Ιώβ. Παρόλο σο βοβ νακχλάς μπουτ μπαρέ δοκιμασίες, βακερντάς με σιγουριά: «Κα ατσσικιαράβ σαστό μο γκι κο Ντεβέλ!»​—Ιώβ 27:5. w24.03 σ. 9 ¶6, 7

Ο Ιεχωβά, «ο Ντεβέλ σο σικαβέλα αγάπη», κα αβέλ αμέντζαρ! (2 Κορ. 13:11) Πφαμπόλα ι κάθε εκχέσκε αμένταρ. Ισινάμ σίγουροι ότι “αρακχάντιβασα λέσκε αφοσιωμέ μανγκιμάσαρ”. (Ψαλμ. 32:10) Καζόμ πο λατσσές σκεφτίνασα σαρ σικαβέλα ο Ιεχωβά πι αγάπη, αζόμ πο πραγματικός κα αβέλ αμένγκε ντα αζόμ πο πασέ λέστε κα νιωθίνας. Μπορίνασα τι τζας πασέ λέστε χωρίς τι λατζάς ντα τι βακεράς λέσκε καζόμ χρειαζίντιβασα λέσκι αγάπη. Μπορίνασα τι βακεράς λέσκε σαρέ ο πράγματα σο ανησυχίνενα-αμέν ντα τι αβάς σίγουροι ότι αγαβέλα-αμέν ντα ότι ισί έτοιμος τι βοηθίνελ-αμέν. (Ψαλμ. 145:19) Σαρ ταρτίνελα-αμέν η τατί γιακ εκ ντιβές σο κερέλα σιλ, αντικάς-ντα ταρτίνελα-αμέν η τατί αγάπη ι Ιεχωβάσκι. Παρόλο σο η αγάπη ι Ιεχωβάσκι ισί ζουρανί, ισί επίσης γκουλντί. Οτθάρ, τι δεχτίνεν ι τατί αγάπη ι Ιεχωβάσκι τουμαρέ ζωγιάτε. Ντα σαρέ τι δεχτίνας ι αγάπη λέσκι ντα τι βακεράς γκίσαρ: «Μανγκάβα ι Ιεχωβάς»!​—Ψαλμ. 116:1. w24.01 σ. 31 ¶19, 20

Ο Ιησούς να βακερντάς απλώς κο τζενέ ότι ο ναβ ι Ντεβλέσκο ισί Ιεχωβά. Ο Ιουδαίοι σο σικλιαρέλας-λεν τζανένας ήδη ο ναβ ι Ντεβλέσκο. Αλλά ο Ιησούς ισινέ «οντουβά σο εξηγιντάς κον ισί» ο Ντεβέλ. (Ιωάν. 1:17, 18) Για παράδειγμας, ο Εβραϊκές Γραφές σικαβένα ότι ο Ιεχωβά τζιτζίνελα ντα πφαμπόλα ι γιαβερένγκε. (Έξοδ. 34:5-7) Ο Ιησούς κερντάς ανταγιά αλήθεια ατζέ πο ξεκάθαρη κάνα βακερντάς ο παράδειγμας ι τσσαβέσκο σο νασλό πι κχερέσταρ. Κο παράδειγμας ανταβά, κάνα ο ντατ ντικχλάς «ντουράλ» πι τσσαβές σο μετανιωσάλοας, τθαβντισάλο πασέ λέστε, ντινάς-λες ανγκάλι ντα συγχωριντάς-λες αντράλ πι γκίσταρ. Ανταβά σικαβέλα ξεκάθαρα καζόμ μπουτ τζιτζίνελα ντα πφαμπόλα αμένγκε ο Ιεχωβά. (Λουκ. 15:11-32) Ο Ιησούς βοηθιντάς ι τζενέν τι αγαβέν σο χαρακτήρας τθερέλα μπαγιά λέσκο Ντατ. w24.02 σ. 10 ¶8, 9

Ο Ιεχωβά-ντα ντέλα ζωή ντα παρηγοριά οντουλέντε σο νακχένα βάσανα. Σαρ μπορίνασα τι μοιάζας κο Ιεχωβά ντα τι πφαμπάς ι γιαβερένγκε ντα τι ντας-λεν παρηγοριά; Εκ τρόπος ισί τι μπαριαράς αμαρέ γκίστε ιδιότητες σο τθερένα τι κερέν με την παρηγοριά. Καλά ισί μερικές ανταλένταρ; Σο κα βοηθίνελ-αμέν τι συνεχίνας τι μανγκάς ι γιαβερέν ντα “τι κοβλιαράς ι ντουκχ ο εκ ι γιαβερέσκι” κάθε ντιβές; (1 Θεσ. 4:18) Χρειαζίντιβελα τι μπαριαράς σουκάρ ιδιότητες, σαρ ισί τι αγαβάς ι γιαβερέν, τι μανγκάς-λεν σαρ πφραλά ντα τι σικαβάς λένγκε λατσσιπέ. (Κολ. 3:12· 1 Πέτρ. 3:8) Σαρ κα βοηθίνεν-αμέν ανταλά ιδιότητες; Κάνα πφαμπάσα αμαρέ πφραλένγκε ντα αγαβάσα λένγκι ντουκχ, κα μανγκάς μπουτ τι ντας-λεν παρηγοριά κάνα νακχένα βάσανα. Σαρ βακερντάς ο Ιησούς, «ο λάφια σο βακερέλα εκ τζενό σικαβένα καλέ πραγματέντζαρ ισί πφερντό λέσκο γκι. Ο λατσσό τζενό νικαβέλα ο λατσσέ πράγματα σο τθερέλα πι γκίστε». (Ματθ. 12:34, 35) Οτθάρ, εκ μπουτ σημαντικός τρόπος για τι σικαβάς αμαρί αγάπη κο πφραλά ντα κο πφενιά σο τθερένα ανάγκη, ισί τι ντας-λεν παρηγοριά. w23.11 σ. 10 ¶10, 11

Για τι αγαβάς ο προφητείες ι Γραφιάκε, χρειαζίντιβελα τι μανγκάς βοήθεια. Σκεφτίνεν ακαβά παράδειγμας: Ανέν τουμαρέ γκοντιάτε ότι τζάνα εκχέ τθανέστε σο να τζανένα, αλλά εκ τουμαρέ αμαλένταρ σο κερέλα ταξίδι τουμέντζαρ τζανέλα λατσσές οντιά περιοχή. Τζανέλα ακριβώς κάι ισινέν ντα κάι γκερέλα ο κάθε ντρομ. Σίγουρα, κα αβέλας τουμαρό γκι σο μανγκλάς τουμαρό αμάλ τι αβέλ τουμέντζαρ! Αντικάς ο Ιεχωβά-ντα τζανέλα καλέ βακιτίστε τζουβντιάσα ντα σο ισί ανγκλάλ αμαρέ ντρομέστε. Οτθάρ, για τι αγαβάς ο προφητείες ι Γραφιάκε, πρέπει τι μανγκάς ταπεινά ι Ιεχωβάσκι βοήθεια. (Δαν. 2:28· 2 Πέτρ. 1:19, 20) Σαρ κάθε λατσσό ντατ ντα κάθε λατσσί ντάι, αντικάς ο Ιεχωβά-ντα μανγκέλα λέσκε τσσαβέ τι τθερέν εκ ευτυχισμέ μέλλον. (Ιερ. 29:11) Αλλά ο Ιεχωβά μπορίνελα τι βακερέλ αμένγκε ακριβώς σο κα αβέλ-πες ανγκλ’ αμέντε, κάτι σο ναστί κερέλα-λες αμαρό ντατ ντα αμαρί ντάι. Κανονιντάς τι γραφίντιβεν προφητείες λέσκε Λαφίστε για τι τζανάς ο σημαντικά πράγματα πριν τι αβέν-πες.​—Ησ. 46:10. w23.08 σ. 8 ¶3, 4