Ιούλιος

Σο-ντα βακερέλας ντα κερέλας ο Ιησούς, αντρέ οντουλέντε ισινέ λέσκε θαύματα-ντα, σικαβέλας ο τρόπος σο σκεφτίνελα ντα νιωθίνελα λέσκο Ντατ. (Ιωάν. 14:9) Σο σικλιάσα κατά θαύματα ι Ιησούσκε; Ο Ιησούς ντα λέσκο Ντατ μανγκένα-αμέν μπουτ. Κάνα ο Ιησούς ισινέ κι πφουβ, σικαβέλας καζόμ μπουτ μανγκέλας ι τζενέν κάνα κερέλας θαύματα για τι βοηθίνελ οντουλέν σο τθερένας ντουκχ. Εκ φαρ, ντούι κορορέ μολίνενας ι Ιησούς τι βοηθίνελ-λεν. (Ματθ. 20:30-34) Τσσουβέν σημασία ακαβά. Ο Ιησούς πρώτα «τζιτζισάλο λένγκε» ντα σοράν κερντάς-λεν λατσσές. Ο πουρανό μπαλαμανό λάφι σπλαγχνίζομαι, σο χρησιμοποιήντιβελα ατθέ, μανγκέλα τι βακερέλ ότι πφαμπάσα ι γιαβερένγκε ντιπ αντράλ αμαρέ γκίσταρ. Επειδή ο Ιησούς πφαμπόλας ι γιαβερένγκε ντα μανγκέλας-λεν, παρβαρντάς μποκχαλέν ντα κερντάς λατσσές εκχέ λεπρός. (Ματθ. 15:32· Μάρκ. 1:41) Μπορίνασα τι αβάς σίγουροι ότι ο Ιεχωβά Ντεβέλ ντα λέσκο Τσσαβό “μανγκένα-αμέν μπουτ” ντα πφανγκιόλα λένγκο γκι κάνα αμέν τθεράσα ντουκχ. (Λουκ. 1:78· 1 Πέτρ. 5:7) Μπεσένα σαρ σαρ τι νασκιαρέν σαρέ ο προβλήματα σο ανένα ντουκχ κο τζενέ! w23.04 σ. 3 ¶4, 5

Μπορίνασα τι κεράς ο πο λατσσό σο μπορίνασα για μα τι τσσουβάς αμαρέ γκοντιάτε ο λάθος πράγματα σο κερένα ο πο μπουτ τζενέ κι Μπενγκέσκο ντουνιάς. Μπορίνασα τι πφεράς αμαρί γκοντί λατσσέ πραγματέντζαρ κάνα διαβάνασα ντα σικλιαράσα-αμέν κατά Γραφή. Κάτι γιαβέρ σο κα αρακχαβέλ αμαρί γκοντί ισί τι τζας κο συναθροίσεις ντα τι κεράς έργος. Ντα ο Ιεχωβά ντέλα πο λάφι ότι να κα μουκχέλ-αμέν τι δοκιμάντιβας πο μπουτ οντουλέσταρ σο αντιχίνασα. (1 Κορ. 10:12, 13) Ο κάθε εκ αμένταρ χρειαζίντιβελα τι προσευχίντιβελ πο μπουτ από ποτές για τι ατσσόλ πιστός κο Ιεχωβά ανταλέ δύσκολε τελευταίε ντιβεσέντε. Ο Ιεχωβά μανγκέλα “τι πουτράς αμαρό γκι λέστε” αντράλ κατά προσευχή. (Ψαλμ. 62:8) Τι δοξάνεν ι Ιεχωβάς ντα τι βακερέν λέσκε ευχαριστώ σαρέ οντουλένγκε σο κερέλα. Τι μανγκέν λέσταρ τι βοηθίνελ-τουμέν τι τθερέν θάρρος κο έργος. Τι μολίνεν-λες τι βοηθίνελ-τουμέν τι νταϊντίνεν τουμαρέ προβλήματα ντα μα τι περέν καέκ πειρασμόστε σο μπορεί τι νακχένα. Μα μουκχέν τίποτα ντα καεκχές τι τσσιναβέλ-τουμέν τι προσευχίντιβεν συνέχεια κο Ιεχωβά. w23.05 σ. 7 ¶17, 18

Σόσκε τζάσα κο συναθροίσεις; Ο πο σημαντικός λόγος ισί για τι ντας δόξα κο Ιεχωβά. (Ψαλμ. 26:12· 111:1) Επίσης, τζάσα κο συναθροίσεις για τι ενθαρρύνας ο εκ ι γιαβερές ανταλέ δύσκολε ντιβεσέντε. (1 Θεσ. 5:11) Κάνα βάντασα αμαρό βας ντα ντάσα εκ απάντηση, κεράσα ο ντούι-ντα πράγματα. Αλλά υπαρχίντιβενα ντούι πράγματα σο μπέκιμ τι δυσκολίνεν-αμέν κάνα ισί τι ντας απαντήσεις. Μπορεί τι λελ-αμέν άγχος κάνα σκεφτίνασα ότι κα ντας εκ απάντηση. Ή μπορεί τι κεράς σαρ σαρ για τι ντας απαντήσεις, αλλά ο πφραλά σο κερένα ο μέρη μα τι ντεν-αμέν απάντηση αζόμ φαρ καζόμ κα μανγκάας. Σαρ μπορίνασα τι νακχαβάς ανταλά δυσκολίες; Ο απόστολος Παύλος βακερντάς ότι πρέπει τι τθεράς πο μπουτ αμαρέ γκοντιάτε «τι ντας ζορ ο εκ ι γιαβερές». Άμα ντάσα-αμέν γκοντί ότι ο γιαβερά μπορίνενα τι λεν ζορ ατζέ-ντα άμα κα βακεράς εκ απλή απάντηση σο σικαβέλα αμαρί πίστη, κα αβέλ πο εύκολος αμένγκε τι βάντας αμαρό βας. Οκιά μπάνταρ, άμα ο πφραλά σο κερένα ο μέρη να ντένα-αμέν απάντηση μπουτ φαρ, μπορίνασα τι χαιρίνας σόσκε ο γιαβερά κι κχανγκιρί κα τθερέν ι ευκαιρία τι ντεν απαντήσεις.​—1 Πέτρ. 3:8. w23.04 σ. 20 ¶1-3

Ο αμπέρια πφιρντιλέ! Ο Ιουδαίοι, σο ισινέ αιχμάλωτοι κι Βαβυλώνα πασέ 70 μπρεσά, ισινέ ελεύθεροι τι βουρτίνεν πουμαρέ τθεμέστε, κο Ισραήλ. (Έσδρ. 1:2-4) Σάντε ο Ιεχωβά μπορίνελας τι κερέλ-λες ανταβά. Η Βαβυλώνα να μουκχέλας ι τζενέν σο ισινέ αιχμάλωτοι οτθέ τι νασέν. (Ησ. 14:4, 17) Αλλά ο πράγματα κι Βαβυλώνα αλλαξάλεας, ντα λάκο νεβό άρχοντας βακερντάας ι Ιουδαιόνγκε ότι μπορίνενας τι νασέν. Σαρέ ο Ιουδαίοι, ντα ατζέ πο μπουτ ο σορέ ι φαμιλίνγκε, έπρεπε τι λεν εκ απόφαση: τι νασέν κατά Βαβυλώνα ή τι ατσσόν οτθέ. Ανταγιά απόφαση μπέκιμ να ισινέ εύκολη. Μπουτ τζενέ ισινέ πφουρέ ντα ναστί κερένας ανταβά μπαρό ταξίδι. Επίσης, ο πο μπουτ Ιουδαίοι μπιάντιλεας κι Βαβυλώνα, ντα να τζουβντιλέας ποτές γιαβερτθέ. Λένγκε, ο τθεμ Ισραήλ ισινέ ο τθεμ λένγκε παππουδένγκο. Μερικοί Ιουδαίοι μάλλον τζουβντιόνας μπουτ λατσσές κι Βαβυλώνα, οτθάρ μπέκιμ τι δυσκολίντιβενας τι μουκχέν πουμαρέ μπαρέ κχερά ή πουμαρέ μπουτιά για τι τζαν εκχέ τθεμέστε σο να τζανένας. w23.05 σ. 14 ¶1, 2

Ο Λάφι ι Ντεβλέσκο βακερέλα αμένγκε τι συνεχίνας τι κεράς υπομονή, τι πφαμπάς ι γιαβερένγκε ντα τι σικαβάς αγάπη. Ο εδάφιος Λουκάς 21:19 βακερέλα: «Άμα κα νταϊντίνεν, κα ατσσικιαρέν τουμαρί ζωή». Ο εδάφιος Κολοσσαείς 3:12 βακερέλα: «Ιρίν ι συμπόνια». Ντα ο εδάφια 1 Θεσσαλονικείς 4:9, 10 βακερένα: «Τουμέν ο ίδιοι σικλιλέν κατά Ντεβέλ τι μανγκέν ο εκ ι γιαβερές. . . . Αλλά βακεράσα τουμένγκε, πφραλάλεν, τι συνεχίνεν τι κερέν-λες ανταβά ατζέ πο μπουτ». Σαρέ ανταλά λάφια γραφίντιλε ι μαθητένγκε σο κερένας υπομονή, πφαμπόνας ι γιαβερένγκε ντα σικαβένας αγάπη. Όμως, έπρεπε τι συνεχίνεν τι σικλιόν σαρ τι σικαβέν ανταλά ιδιότητες. Αμέν-ντα πρέπει τι κεράς-λες ανταβά. Για τι βοηθίντιβεν, ντικχέν σαρ ο πρώτοι Χριστιανοί σικαβένας ανταλά τριν ιδιότητες. Σοράν, κα ντικχέν σαρ μπορίνενα τουμέν τι μοιάζεν ανταλέ μαθητέντε, ντα αντικάς τι αβέν έτοιμοι για την μπαρί στεναχώρια. Αντικάς, κάνα κα αρχίνελ η μπαρί στεναχώρια, τουμέν κα τζανέν σαρ τι κερέν υπομονή ντα κα αβέν αποφασισμέ τι συνεχίνεν τι νταϊντίνεν. w23.07 σ. 3 ¶4, 8

Εμ ο χρισμέ Χριστιανοί εμ ο “γιαβερά μπρακέ” χρειαζίντιβελα τι ατσσόν κο «Άγιος Ντρομ», επειδή ανταβά ντρομ βοηθίνελα-αμέν τι συνεχίνας τι υπηρετίνας ι Ιεχωβάς ακανά ντα γκερέλα-αμέν κο ευλογίες σο κα ανέλ η Βασιλεία κο μέλλον. (Ιωάν. 10:16) Κατά 1919 Κ.Χ., εκατομμύρια μουρσά, τζουβλιά ντα τσσαβέ νασλέ κατά Μπαρί Βαβυλώνα, σο ισί σαρέ ο ψεύτικες θρησκείες ι ντουνιάσκε, ντα αρχισάλε τι κερέν ταξίδι οντουλέ συμβολικέ ντρομέστε. Ο Ιεχωβά κανονιντάς μα τι τθερέν εμπόδια ανγκλά-πουμέντε κάνα ο Ιουδαίοι νασλέ κατά Βαβυλώνα. (Ησ. 57:14) Σο κα βακεράς ι “Άγιε Ντρομέσκε” αμαρέ ντιβεσέντε; Για μπουτ μπρεσά πριν κατά 1919, ο Ιεχωβά χρησιμοποιήνελας τζενέν σο σεβάνενας-λες μπουτ για τι βοηθίνεν τι πουτάρντιβελ ο ντρομ σο κα νικαβέλας ι τζενέν κατά Μπαρί Βαβυλώνα. (Ντικχέν Ησαΐας 40:3) Οντουλά τζενέ ετοιμαντέ ο ντρομ για τι μπορίνεν ο τζενέ σο τθερένα λατσσό γκι τι μουκχέν ι ψεύτικη θρησκεία ντα τι ντεν λατρεία ι Ιεχωβάς λέσκε λαόσαρ. w23.05 σ. 16 ¶8, 9

Ο Ιεχωβά μανγκέλα τι υπηρετίνας-λες χαράσαρ ντα αντράλ αμαρέ γκίσταρ. (2 Κορ. 9:7) Οτθάρ, υπαρχίντιβελα καέκ λόγος τι προσπαθίνας τι πετυχίνας εκ πνευματικός στόχος άμα να ντέλα αμαρό γκι τι κεράς-λες ανταβά; Σκεφτίνεν ο παράδειγμας ι απόστολε Παυλόσκο, σο βακερντάς: «Νταπάβα μο σώμας ντα κεράβα-λες κουμάντος σαρ δούλος». (1 Κορ. 9:25-27) Ο Παύλος ζορισκιαρέλας πο νεαυτός τι κερέλ ο σωστός, ατζέ-ντα κάνα να ντέλας λέσκο γκι τι κερέλ-λες ανταβά. Μπεϊντιντάς ο Ιεχωβά ο έργος ι Παυλόσκο; Σίγουρα! Επίσης, ευλογιντάς-λες λέσκε προσπαθειένγκε. (2 Τιμ. 4:7, 8) Αντικάς-ντα, κάνα ο Ιεχωβά ντικχέλα αμέν-ντα τι προσπαθίνας τι πετυχίνας αμαρό στόχος​—ατζέ-ντα άμα να μανγκάσα-λες μπουτ ανταβά​—αβέλα λέσκο γκι. Νιωθίνελα αντικάς σόσκε, παρόλο σο μπορεί μα τι κεράς-λες επειδή μανγκάσα οντουβά πράγμας, τζανέλα ότι κεράσα-λες επειδή μανγκάσα Λες. Σαρ ο Ιεχωβά ευλογιντάς ι Παυλός, αντικάς κα ευλογίνελ αμέν-ντα αμαρέ προσπαθειένγκε. (Ψαλμ. 126:5) Ντα καζόμ ντικχάσα ι ευλογία ι Ιεχωβάσκι, μπορεί τι αρχίνας τι μανγκάς πο μπουτ τι πετυχίνας αμαρό στόχος. w23.05 σ. 29 ¶9, 10

Ο Παύλος μοιασκιαρντάς οντουλέν σο να κα σώντιβεν κατά Ιεχωβάσκο ντιβές ι τζενέντζαρ σο σοβένα. Οντουλά τζενέ να αγαβένα σο αβέλα-πες ντονταλάι λένταρ ούτε αγαβένα ότι νακχέλα ο σαάτι. Άρα, να μπορίνενα τι αγαβέν ο σημαντικά πράγματα σο αβένα-πες, ντα οτθάρ να μπορίνενα τι κερέν κάτι. Ο πο μπουτ τζενέ αντιβές σοβένα, σαρ τι βακεράας. (Ρωμ. 11:8) Να χάλα-λεν ανάγκη ο πράγματα σο σικαβένα ότι τζουβντιάσα κο «τελευταία ντιβεσά» ντα ότι η μπαρί στεναχώρια κα αβέλ σουγκό. (2 Πέτρ. 3:3, 4) Αμέν όμως αγαβάσα ότι ισί μπουτ σημαντικός τι ατσσάς τζανγκαντέ κάθε ντιβές σο νακχέλα. (1 Θεσ. 5:6) Οτθάρ πρέπει τι ατσσάς ήρεμοι ντα σταθεροί. Σόσκε; Για μα τι ανακατούντιβας κο πολιτικά πράγματα ντα κο προβλήματα σο τθερέλα η κοινωνία αμαρέ ντιβεσέντε. Η πίεση τι τσσίντας ανταλέ πραγματένταρ κα αβέλ ατζέ πο μπαρί καζόμ ερεσέλα ο ντιβές ι Ιεχωβάσκο. Όμως, να χρειαζίντιβελα τι ανησυχίνας σο κα κεράς. Ο πνεύμας ι Ντεβλέσκο κα βοηθίνελ-αμέν τι αβάς ήρεμοι ντα τι λας γκοντιαβέρ αποφάσεις.​—Λουκ. 12:11, 12. w23.06 σ. 10 ¶6, 7

Σο αβέλα τουμαρέ γκοντιάτε κάνα ασουνένα ο ναβ Σαμψών; Μάλλον αβέλα τουμαρέ γκοντιάτε εκ τζενό με μπουτ μπαρί ζορ. Ανταβά ισί μπαγιά. Αλλά ο Σαμψών λιντάς εκ μπέτι απόφαση σο τθερέλας μπέτι αποτελέσματα. Όμως ο Ιεχωβά ντικχλάς σαρέ οντουλά σο κερντάς ο Σαμψών για τι υπηρετίνελ-λες. Ντα ο Ντεβέλ κανονιντάς τι υπαρχίντιβελ κι Γραφή ο πιστός παράδειγμας του Σαμψών αμαρέ λατσσιμάσκε. Ο Ιεχωβά χρησιμοποιηντάς τον Σαμψών για τι κερέλ μπαρέ πράγματα για τι βοηθίνελ ι λαός σο τραμπιντάας, τον Ισραήλ. Μπουτ μπρεσά σοράν κατά μεριπέ του Σαμψών, ο Ιεχωβά πι πνευμάσαρ κερντάς ι απόστολε Παυλός τι γραφίνελ ο ναβ του Σαμψών σε μερικά εδάφια σο ισινέ ο ναβά γιαβερέ μουρσένγκε-ντα σο σικαντέ μπαρί πίστη. (Εβρ. 11:32-34) Ο παράδειγμας του Σαμψών μπορίνελα τι ντελ-αμέν ζορ. Βοβ στηρίντιβελας κο Ιεχωβά ατζέ-ντα κο δυσκολίες. Μπορίνασα τι λας ζορ ντα τι σικλιάς γιαβερά-ντα σημαντικά πράγματα λέσκε παραδειγμάσταρ. w23.09 σ. 2 ¶1, 2

Μπορίνασα τι μπαριαράς αμαρί υπομονή κάνα κεράσα συνέχεια προσευχή κο Ιεχωβά ντα βακεράσα λέσκε σαρέ αμαρέ ανησυχίες. (1 Θεσ. 5:17) Μπορεί μα τι νακχένα εκ μπαρί δοκιμασία ανταγιά στιγμή. Κερένα όμως προσευχή κο Ιεχωβά ντα μανγκένα λέσκι βοήθεια κάνα τθερένα άγχος, ισινέν μπερδεμέ ή να τζανένα σο τι κερέν; Άμα προσευχίντιβενα συνέχεια κο Ντεβέλ για τι βοηθίνελ-τουμέν κο χουρντέ προβλήματα σο τθερένα ακανά, να κα σακιντίνεν τι κερέν-λες ανταβά κάνα κα νακχέν μπαρέ προβλήματα κο μέλλον. Αζομάν, κα αβέν ντιπ σίγουροι ότι ο Ιεχωβά τζανέλα ακριβώς κάνα ντα σαρ τι βοηθίνελ-τουμέν. (Ψαλμ. 27:1, 3) Ισί πο σίγουρος ότι κα νταϊντίνας ι μπαρί στεναχώρια σο ισί ανγκλ’ αμέντε άμα ατσσάσα πιστοί κο Ιεχωβά κάνα νακχάσα δοκιμασίες αντιβές. (Ρωμ. 5:3) Σόσκε βακεράσα-λες ανταβά; Μπουτ πφραλά βακερντέ ότι κάθε φαρ σο νακχένας εκ δοκιμασία ντα κερένας υπομονή, ανταβά βοηθίνελας-λεν τι νταϊντίνεν ι γιαβέρ δυσκολία. Η υπομονή κερντάς-λεν πο λατσσέ τζενέ, ντα μπαριαρντάς λένγκι πίστη ότι ο Ιεχωβά ισί έτοιμος τι βοηθίνελ-λεν αντράλ πι γκίσταρ. Ντα η πίστη βοηθιντάς-λεν τι νταϊντίνεν ι γιαβέρ δοκιμασία.​—Ιακ. 1:2-4. w23.07 σ. 3 ¶7, 8

Επειδή ο Ιεχωβά ισί ταπεινός ντα πφαμπόλα ι γιαβερένγκε, ανταβά τσσίντελα-λες τι αβέλ λογικός. Για παράδειγμας, ο Ιεχωβά σικαντάς ταπεινότητα κάνα ισινέ έτοιμος τι καταστραφίνελ ι πφιρνέ τζενέν σο μπεσένας κο Σόδομα. Ο Ιεχωβά μπουτσσαντάς πι αγγελόν τι βακερέν κο δίκαιος Λωτ τι τζαλ σουγκό κο βεσά. Ο Λωτ νταρέλας τι τζαλ οτθέ. Οτθάρ, ο Λωτ μολιντάς ι Ιεχωβάς τι μουκχέλ-λες τι τζαλ πι φαμιλιάσαρ κι Σηγώρ, εκ χουρντί πόλη σο κανονικά κα καταστραφίντιβελας. Ο Ιεχωβά κα μπορίνελας τι πιένελ τον Λωτ τι κερέλ ντιπ ο οδηγίες σο βακερντάας λέσκε. Αντίς τι κερέλ-λες ανταβά, ο Ιεχωβά μουκχλάς τον Λωτ τι τζαλ κι πόλη οντιά, παρόλο σο ανταβά μανγκέλας τι βακερέλ ότι να κα καταστραφίνελας-λα. (Γέν. 19:18-22) Μπουτ μπρεσά πο σοράν, ο Ιεχωβά σικαντάς ότι πφαμπόλας ι τζενένγκε κι Νινευή. Μπουτσσαντάς ι προφητής Ιωνάς τι βακερέλ κο πφιρνέ τζενέ κι Νινευή ότι κα καταστραφίντιβενας εμ βον εμ λένγκι πόλη. Αλλά κάνα ο Νινευίτες μετανιωσάλε, ο Ιεχωβά τζιτζισάλο λένγκε ντα να καταστραφιντάς ι πόλη.​—Ιωνάς 3:1, 10· 4:10, 11. w23.07 σ. 21 ¶5

Σο σικλιάσα κατά παράδειγμας του Ιωάς; Βοβ ισινέ σαρ εκ δέντρος σο να τθερέλας μπαρέ ρίζες ντα έπρεπε τι στηρίντιβελ εκχέ καστέστε. Κάνα ασουντάς ι αποστατόν, σο ισινέ σαρ εκ ζουρανί μπαρμπάλ, σαρ τι βακεράας, ντα νασλό ο κας​—δηλαδή ο Ιωδαέ​—ο Ιωάς πελό τελέ. Ανταβά σικαβέλα ξεκάθαρα ότι δεν πρέπει τι νταράς κατά Ντεβέλ σάντε επειδή τθεράσα ντονταλάι αμένταρ λατσσέ παραδείγματα πφραλένταρ ντα πφενίνταρ ή αμαρέ φαμιλιάταρ. Για τι ατσσάς πνευματικά ζουρανέ, πρέπει τι μπαριαράς αμαρί αφοσίωση κο Ντεβέλ ντα αμαρί νταρ λέσκε. Ανταβά κεράσα-λες κάνα σικλιαράσα-αμέν κατά Γραφή, σκεφτίνασα λατσσές οντουλά σο διαβάνασα ντα κεράσα προσευχή. (Ιερ. 17:7, 8· Κολ. 2:6, 7) Ο Ιεχωβά να μανγκέλα μπουτ πράγματα αμένταρ. Ανταβά ντικχίντιβελα χάνικ λαφίντζαρ κο εδάφιος Εκκλησιαστής 12:13, σο βακερέλα: «Τι νταρές κατά αληθινός Ντεβέλ ντα τι κερές ο εντολές λέσκε, σόσκε ανταγιά ισί σαρί η υποχρέωση ι τζενέσκι». Άμα νταράσα κατά Ντεβέλ, κα νταϊντίνας σο-ντα δοκιμασίες κα αβέν ανγκλ’ αμέντε ντα κα ατσσάς σταθεροί. Τίποτα να κα μπορίνελ τι χαλαβέλ αμαρί φιλία ι Ιεχωβάσαρ. w23.06 σ. 18, 19 ¶17-19

Η σιγουριά σο ντέλα-αμέν ο Ντεβέλ αρχίνελα ακαλέ λαφίντζαρ: «Οντουβά σο μπεσέλα κο θρόνος βακερντάς». (Αποκ. 21:5α) Ανταλά λάφια ισί ξεχωριστά επειδή ανταγιά ισί η πρώτη κατά τριν φαρ σο κερέλα λάφι ο ίδιος ο Ιεχωβά κο βιβλίος Αποκάλυψη. Οτθάρ, ανταγιά σιγουριά λάσα-λα, όχι εκχέ ζουρανέ αγγελόσταρ ούτε κατά αναστημέ Ιησούς, αλλά κατά Ιεχωβά! Ανταβά σικαβέλα αμένγκε καζόμ μπαγιά ισί οντουβά σο βακερέλα ο Ιεχωβά κι συνέχεια. Σόσκε; Επειδή ο Ιεχωβά «ναστί βακερέλα ψέματα». (Τίτο 1:2) Οτθάρ, ο λάφια σο διαβάνασα κο εδάφια Αποκάλυψη 21:5, 6 σίγουρα κα νικιόν μπαγιά. Ο Ιεχωβά βακερέλα: «Ντικχέν!» (Αποκ. 21:5) Ο πουρανό μπαλαμανό λάφι ἰδοὺ σο μεταφράντιβελα «ντικχέν!» χρησιμοποιήντιβελα μπουτ φαρ κο βιβλίος Αποκάλυψη. Σο βακερέλα ο Ντεβέλ πο σοράν; Βακερέλα: «Κεράβα-λεν σαρέ νεβέ». Ισί μπαγιά ότι ατθέ ο Ιεχωβά κερέλα λάφι για το αλλαγές σο κα αβέν-πες κο μέλλον. Αλλά επειδή ισί αζόμ σίγουρος ότι κα κερέλ πι υπόσχεση τι νικιόλ μπαγιά, βακερέλα ότι ανταλά αλλαγές ισί σαρ τι αβιλέ-πες.​—Ησ. 46:10. w23.11 σ. 3, 4 ¶7, 8

Ο απόστολος Πέτρος μαρέλας-πες με το αδυναμίες σο τθερέλας. Σκεφτίνεν μερικά παραδείγματα. Κάνα ο Ιησούς εξηγιντάς κο Πέτρος ότι αβιλό κι πφουβ για τι τσσιντικιαρέν-λες μπουτ πράγματα ντα τι μουνταρέν-λες, σαρ βακερένας ο προφητείες ι Γραφιάκε, ο Πέτρος διορθωντάς-λες. (Μάρκ. 8:31-33) Μπουτ φαρ, ο Πέτρος ντα ο γιαβερά απόστολοι χάνας-πες κον λένταρ ισινέ ο πο μπαρό. (Μάρκ. 9:33, 34) Ι τελευταία ιράτ πριν τι μερέλ ο Ιησούς, ο Πέτρος, χωρίς τι σκεφτίνελ-λες, τσσιντάς ο καν εκχέ τζενέσκο. (Ιωάν. 18:10) Ι ίδια οντιά ιράτ, νταρασάλο αζόμ μπουτ σο βακερντάς τριν φαρ ότι να τζανέλας πι αμαλές, ι Ιησούς. (Μάρκ. 14:66-72) Ανταβά κερντάς ι Πετρός τι ροβέλ γκίσαρ. Ι Ιησούσκε συνεχίνελας τι αβέλ πολύτιμος λέσκο απόστολος σο χασαρντάας σαρί πι ζορ. Αφού αναστισάλο, ο Ιησούς ντινάς κο Πέτρος ι ευκαιρία τι σικαβέλ ότι ατζέκ μανγκέλας-λες. Ο Ιησούς καλιντάς ι Πετρός τι υπηρετίνελ ταπεινά σαρ τσομπάνης λέσκε μπρακένγκο. (Ιωάν. 21:15-17) Ο Πέτρος δεχτιντάς ι πρόσκληση. Οτθάρ, κι Πεντηκοστή, ισινέ κι Ιερουσαλήμ ντα ισινέ κατά πρώτα τζενέ σο αβιλέ χρισμέ ι άγιε πνευμάσαρ. w23.09 σ. 22 ¶6, 7

Ο απόστολος Πέτρος βακερντάς κο γιαβερά πρεσβύτεροι: «Τι αρακχαβέν ντα τι σικλιαρέν ι Ντεβλέσκε μπρακέν». (1 Πέτρ. 5:1-4) Άμα ισινέν πρεσβύτερος, τζανάσα ότι μανγκένα τουμαρέ πφραλέν ντα πφενίν ντα μανγκένα τι αρακχαβέν-λεν ντα τι σικλιαρέν-λεν. Όμως, μπέκιμ μπάζιμα νιωθίνενα ότι τθερένα αζόμ μπουτ τι κερέν ή ισινέν αζόμ κχινέ σο ναστί κερένα ανταβά διορισμός. Σο μπορίνενα τι κερέν; Βακερέν κο Ιεχωβά οντουλά σο ανησυχίνενα-τουμέν. Ο Πέτρος γραφιντάς: «Άμα εκ τζενό υπηρετίνελα, τι στηρίντιβελ κι ζορ σο ντέλα ο Ντεβέλ». (1 Πέτρ. 4:11) Τουμαρέ πφραλά ντα πφενιά μπέκιμ νακχένα προβλήματα σο να αβέλα-πες τι νασέν ντιπ ανταλέ ντουνιάστε. Αλλά ντεν-τουμέν γκοντί ότι «ο αρχηγός ι τσομπανίγκο», ο Ιησούς Χριστός, μπορίνελα τι βοηθίνελ-λεν πο λατσσές τουμένταρ. Μπορίνελα τι κερέλ-λες ανταβά εμ αντιβές εμ κο νεβό ντουνιάς. Ο Ντεβέλ μανγκέλα κατά πρεσβύτεροι απλώς τι μανγκέν πουμαρέ πφραλέν ντα πφενίν, τι αρακχαβέν-λεν ντα τι αβέν «λατσσέ παραδείγματα ι μπρακένγκε». w23.09 σ. 30 ¶13, 14

Πρέπει τι νασάς ντουρ κατά τρόπος σο σκεφτίνενα ο τζενέ. Άμα σκεφτίνασα σαρ ο τζενέ κο ντουνιάς, μπέκιμ τι αρχίνας μα τι ντας καν κο Ιεχωβά ντα κο νόμοι λέσκε. (1 Κορ. 3:19) Μπουτ φαρ, «η σοφία ανταλέ ντουνιάσκι» βακερέλα ι τζενένγκε τι κερέν ο πράγματα σο μανγκέλα ο σώμας. Χάνικ Χριστιανοί κι Πέργαμος ντα κο Θυάτειρα αρχισάλε τι κερέν μπίλατζανε πράγματα ντα τι ντεν λατρεία κο είδωλα σαρ ο γιαβερά τζενέ. Ο Ιησούς ντινάς ζουρανί συμβουλή κο ντούι-ντα κχανγκιριά επειδή μουκχένας τι αβέλ-πες λουμνιπέ. (Αποκ. 2:14, 20) Αντιβές, ο τζενέ πιένενα αμέν-ντα τι σκεφτίνας σαρ σκεφτίνενα βον. Αμαρέ τζενέ ντα αμαρέ αμαλά μπέκιμ προσπαθίνενα τι κερέν-αμέν τι πακιάς ότι ισινάμ μπουτ αυστηροί ντα ότι δεν πρέπει τι ντας καν κο νόμοι κι Ντεβλέσκε. Για παράδειγμας, μπέκιμ τι βακερένα ότι να πειράνελα τι κεράς οντουβά σο μανγκέλα αμαρό σώμας ντα ότι ο πάκι κανόνες ι Γραφιάκε ισί πουρανέ. Κάποιες φορές, μπέκιμ τι σκεφτίνας ότι ο οδηγίες σο ντέλα-αμέν ο Ιεχωβά νανέ αζόμ ξεκάθαρες. Κα μπορίναας ατζέ-ντα τι τζας κο πειρασμός μα τι “ακολουθίνας σάντε ο πράγματα σο ισί γραμμέ”.​—1 Κορ. 4:6. w23.07 σ. 16 ¶10, 11

Η Μαρία, η ντάι ι Ιησούσκι, χρειαζίντιβελας ζορ. Να ισινέ παντριμέ, αλλά κα ατσσόλας κχαμνί. Να τθερέλας μπαριαρντό τσσαβέν, αλλά έπρεπε τι αρακχαβέλ εκχέ τσσαβές σο κα αβέλας ο Μεσσίας. Ντα αφού να σοτάας ποτές μουρσέσαρ, σαρ κα εξηγίνελας-λεν σαρέ ανταλά πι νισανλίσκε, κο Ιωσήφ; (Λουκ. 1:26-33) Σαρ λιντάς η Μαρία ζορ; Μανγκλάς βοήθεια. Για παράδειγμας, μανγκλάς κατά Γαβριήλ τι βακερέλ λάκε πο μπουτ πράγματα ανταλέ διορισμόσκε. (Λουκ. 1:34) Χάνικ πο σοράν, κερντάς ταξίδι «κο βεσά» κο Ιούδας για τι τζαλ κι Ελισάβετ, σο ισινέ λάκε τζενένταρ. Η Ελισάβετ ισαρντάς ι Μαριά ντα αντράλ κατά πνεύμας ι Ιεχωβάσκο βακερντάς λάκε εκ προφητεία για τι λελ οπρά-πέστε, σο τθερέλας τι κερέλ λάκε μαξιμίσαρ σο ισινέ λάκε περέστε. (Λουκ. 1:39-45) Η Μαρία βακερντάς ότι ο Ιεχωβά «πι βαστέσαρ, κερντάς μπουτ μπαρέ πράγματα». (Λουκ. 1:46-51) Αντράλ κατά Γαβριήλ ντα κατά Ελισάβετ, ο Ιεχωβά ντινάς ζορ κι Μαρία. w23.10 σ. 14, 15 ¶10-12

Χάνικ μαθητές ι Χριστόσκε αβιλέ χρισμέ ι άγιε πνευμάσαρ ντα τθερένα εκ διαφορετική σχέση ι Ιεχωβάσαρ. Οντουλά 144.000 κα υπηρετίνεν σαρ ιερείς κο ουρανός γιεκ ι Ιησούσαρ. (Αποκ. 14:1) Καζόμ ισί ατζέ κι πφουβ, ο Ντεβέλ κερέλα-λεν χρισμέ ι άγιε πνευμάσαρ ντα λέλα-λεν πέσκε σαρ τσσαβέ. Ο Άγια κι σκηνή της μαρτυρίας μανγκένα τι σικαβέν ανταγιά διαφορετική σχέση σο τθερένα ι Ντεβλέσαρ. (Ρωμ. 8:15-17) Ο Άγια των Αγίων κι σκηνή της μαρτυρίας μανγκένα τι σικαβέν ο ουρανός, ο τθαν σο μπεσέλα ο Ιεχωβά. Η «κουρτίνα», σο χωρίνελας ο Άγια κατά Άγια των Αγίων, μανγκέλα τι σικαβέλ ο σώμας ι Ιησούσκο. Καζόμ τθερέλας σώμας σαρ τζενό, ο Ιησούς ναστί τζάλας κο ουρανός σαρ ο μπαρό Αρχιερέας κο πνευματικός ναός. Κάνα ντινάς πο σώμας σαρ θυσία ι τζενένγκε, ο Ιησούς πουταρντάς ο ντρομ για τι τζουβντιόν κο ουρανός σαρέ ο χρισμέ Χριστιανοί. Βον-ντα πρέπει τι μουκχέν πουμαρό σώμας σαρ τζενέ για τι τζαν κο ουρανός.​—Εβρ. 10:19, 20· 1 Κορ. 15:50. w23.10 σ. 28 ¶13

Ο Γεδεών απαντιντάς ήρεμα κάνα ο Εφραϊμίτες κρίνενας-λες. (Κριτ. 8:1-3) Να απαντιντάς λένγκε χολιάσαρ. Σικαντάς ότι ισινέ ταπεινός κάνα ασουντάς λένγκε παράπονα, ντα απαντιντάς εκχέ τροπόσαρ σο ηρεμιντάς ο πράγματα. Ο γκοντιαβέρ πρεσβύτεροι μοιάζενα κο Γεδεών κάνα ασουνένα προσεκτικά, απαντίνενα ήρεμα ντα ατσσόνα κοβλέ γκίσκε άμα κρίνενα-λεν. (Ιακ. 3:13) Ανταλέ τροπόσαρ, κα υπαρχίντιβελ ειρήνη κι κχανγκιρί. Τι ντεν σαρί ι δόξα κο Ιεχωβά. Κάνα ο γιαβερά ισαρένας τον Γεδεών σόσκε νικιντάς ι Μαδιανιτέν, βοβ ντινάς σαρί ι δόξα κο Ιεχωβά. (Κριτ. 8:22, 23) Σαρ μπορίνενα ο πρεσβύτεροι τι μοιάζεν κο Γεδεών; Πρέπει τι ντεν κο Ιεχωβά ι δόξα ι πραγματένγκε σο κερένα. (1 Κορ. 4:6, 7) Για παράδειγμας, άμα ο γιαβερά ισαρένα εκχέ πρεσβυτερός σόσκε ισί λατσσό δάσκαλος, βοβ μπορίνελα τι βακερέλ ότι λέσκο σικλιαριπέ ισί κατά Λάφι ι Ντεβλέσκο ντα ότι σαρέ σικλιάσα κατά οργάνωση ι Ντεβλέσκι. Μπάζιμα, ο πρεσβύτεροι ισί λατσσό τι σκεφτίνεν άμα ταρτίνενα μπουτ ι προσοχή πουμαρέ νεαυτόστε. w23.06 σ. 4 ¶7, 8

Άμα να λιντάμ οντουβά σο μανγκλάμ αμαρέ προσευχιάτε, κα μπορίναας τι σκεφτίνας: “Προσευχίντιβαβα ι σωστέ πραγμάσκε;” Μπουτ φαρ, αμντίνασα ότι τζανάσα καβά ισί ο πο λατσσό αμένγκε. Αλλά ο πράγματα σο μανγκάσα μπορεί μα τι κερέν αμένγκε μπαγιά λατσσιπέ. Άμα προσευχίντιβασα εκχέ προβλημάσκε, μπέκιμ τι υπαρχίντιβελα εκ πο λατσσί λύση οντουλάταρ σο μανγκάσα αμέν. Ντα μερικά πράγματα σο μανγκάσα μπέκιμ μα τι συμφωνίνενα οντουλέντζαρ σο μανγκέλα ο Ιεχωβά. (1 Ιωάν. 5:14) Σκεφτίνεν ο παράδειγμας εκχέ νταντέσκο ντα εκχέ νταγιάκο σο μανγκλέας κατά Ιεχωβά τι ατσσικιαρέλ λένγκε τσσαβές κι αλήθεια. Ανταβά σο μανγκλέ νανέ λάθος. Όμως ο Ιεχωβά να αναγκάνελα καεκχές τι υπηρετίνελ-λες. Μανγκέλα σαρέ αμένταρ, εμ αμαρέ τσσαβένταρ, τι τραμπίνας τι ντας-λες λατρεία. (Δευτ. 10:12, 13· 30:19, 20) Οτθάρ, ο νταντά ντα ο νταγιά κα μπορίνενας τι μανγκέν κατά Ιεχωβά τι βοηθίνελ-λεν τι ερεσέν κο γκι πουμαρέ τσσαβέσκο, ντα αντικάς τι μανγκέλ ι Ιεχωβάς ντα τι αβέλ Λέσκο αμάλ.​—Παρ. 22:6· Εφεσ. 6:4. w23.11 σ. 21 ¶5· σ. 23 ¶12

Σόσκε κάνα κοβλιαράσα ι ντουκχ ι γιαβερένγκι σικαβάσα λένγκε αμαρί αγάπη; Εκ βιβλίος σο κερέλα λάφι ι Γραφιάκε εξηγίνελα ότι ο πουρανό μπαλαμανό λάφι παρακαλείτε σο χρησιμοποιηντάς ατθέ ο Παύλος μανγκέλα τι βακερέλ ότι «κάνα εκ τζενό νακχέλα εκ μπαρί δυσκολία, εκ γιαβέρ ισί πασέ λέστε για τι ντελ-λες ζορ». Οτθάρ, κάνα κοβλιαράσα ι ντουκχ εκχέ πφραλέσκι σο τσσίντελα μπουτ βάσανα, βοηθίνασα-λες τι ιστίλ ντα τι συνεχίνελ τι πφιρέλ κο ντρομ κι ζωγιάκο. Κάθε φαρ σο ισινάμ πασέ εκχέ πφραλέστε για τι πουτρέλ αμένγκε πο γκι, σικαβάσα λέσκε ότι μανγκάσα-λες. (2 Κορ. 7:6, 7, 13) Κάνα κάποιος πφαμπόλα εκχέ τζενέσκε σο νακχέλα βάσανα, μανγκέλα τι ντελ-λες παρηγοριά ντα τι κερέλ κάτι για τι βοηθίνελ-λες. Άρα, πρώτα πφαμπάσα ι γιαβερένγκε ντα σοράν ντάσα-λεν παρηγοριά. Ο Παύλος εξηγίνελα ότι, επειδή ο Ιεχωβά πφαμπόλα ι γιαβερένγκε, ανταβά τσσίντελα-λες τι ντελ-λεν παρηγοριά. Ο Παύλος βακερέλα ότι ο Ιεχωβά «σικαβέλα έλεος αντράλ πι γκίσταρ ντα [ισί] ο Ντεβέλ κάθε παρηγοριάς».​—2 Κορ. 1:3. w23.11 σ. 9, 10 ¶8-10

Σαρέ ο μαθητές ι Χριστόσκε μπεκλεντίνενα ότι κα νακχέν στεναχώρια. Σκεφτίνεν ο παράδειγμας ι απόστολε Παυλόσκο, σο βακερντάς κο Χριστιανοί κι Θεσσαλονίκη: «Κάνα ισινάμας τουμέντζαρ, βακεράας τουμένγκε πο τζανγκλέ ότι κα νακχάας στεναχώρια ντα . . . ανταβά ακριβώς αβιλό-πες». (1 Θεσ. 3:4) Κο πφραλά κι Κόρινθος γραφιντάς: «Μανγκάσα τι τζανέν λατσσές, πφραλάλεν, ι προβληματένγκε σο νακχλάμ . . . Να ισινάμας σίγουροι ατζέ-ντα αμαρέ ζωγιάκε». (2 Κορ. 1:8· 11:23-27) Αντιβές-ντα, ο Χριστιανοί μπεκλεντίνενα ότι κα νταϊντίνεν κάποια στεναχώρια. (2 Τιμ. 3:12) Καζόμ σικαβένα πίστη κο Ιησούς ντα ακολουθίνενα-λες, τουμαρέ αμαλά ντα τουμαρέ τζενέ μπέκιμ τι γκιλέ τουμέντζαρ μπαρί κόντρα. Μήπως νακχλέν προβλήματα τουμαρέ μπουτιάτε επειδή ισινέν αποφασισμέ τι αβέν τίμιοι σαρέ κο πράγματα; (Εβρ. 13:18) Μήπως η κυβέρνηση γκιλί τουμέντζαρ κόντρα επειδή κερένας λάφι κο γιαβερά για την ελπίδα σο τθερένα τουμέν; Σο-ντα στεναχώρια τι νακχάσα όμως, ο Παύλος βακερέλα ότι πρέπει τι χαιρίνας. w23.12 σ. 10, 11 ¶9, 10

Ο Ιακώβ νακχλάς μπουτ προβλήματα. Ντούι τσσαβέ ι Ιακωβίσκε, ο Συμεών ντα ο Λευί, αντέ λατζ πουμαρέ φαμιλιάτε ντα μελιαρντέ ο ναβ ι Ιεχωβάσκο. Επίσης, η αγαπημέ ρομνί ι Ιακωβίσκι, η Ραχήλ, μουλί καζόμ μπιανέλας πι δεύτερε τσσαβές. Ντα επειδή πελί εκ μπαρί μποκχ, ο Ιακώβ αναγκασάλο τι νασέλ κι Αίγυπτος πι πφουριματέντε. (Γέν. 35:16-19· 37:28· 45:9-11, 28) Παρόλο σο νακχλάς ανταλά προβλήματα, ο Ιακώβ ποτές να χασαρντάς πι πίστη κο Ιεχωβά ντα κο υποσχέσεις Λέσκε. Ντα ο Ιεχωβά σικαβέλας κο Ιακώβ ότι τθερέλας Λέσκι ευλογία. Για παράδειγμας, ο Ιεχωβά ευλογίνελας ι Ιακωβίς μπουτέ πραγματέντζαρ. Σκεφτίνεν επίσης καζόμ μπαρί εκτίμηση πρέπει τι τθερέλας ο Ιακώβ ι Ιεχωβάσκε κάνα ντικχλάς πάλι ι Ιωσηφίς​—ι τσσαβές σο για μπουτ μπρεσά αμντίνελας ότι ισινέ μουλό! Επειδή ισινέ λατσσέ αμαλά ι Ιεχωβάσαρ, ο Ιακώβ μπορισάλο τι νακχαβέλ ο προβλήματα σο τθερέλας. (Γέν. 30:43· 32:9, 10· 46:28-30) Κάνα ισινάμ λατσσέ αμαλά ι Ιεχωβάσαρ, μπορίνασα αμέν-ντα τι νακχαβάς ο προβλήματα σο αβένα οτθέ σο να μπεκλεντίνασα λένγκε. w23.04 σ. 15 ¶6, 7

Ο Ψαλμός 23 ισί εκ ύμνος σο σικαβέλα σιγουριά για την αγάπη ντα για τη φροντίδα ι Ιεχωβάσκι. Ο Δαβίδ, σο γραφιντάς ανταβά ψαλμός, βακερέλα ι ζουρανί σχέση σο τθερέλας πι Τσομπανίσαρ, ι Ιεχωβάσαρ. Ο Δαβίδ νιωθίνελας αρακχαντό καζόμ μουκχέλας ι Ιεχωβάς τι οδηγίνελ-λες ντα ντέλας σαρί πι μπέσα λέστε. Τζανέλας ότι η αγάπη ι Ιεχωβάσκι κα ακολουθίνελας-λες σαρέ ο ντιβεσά λέσκε ζωγιάκε. Σόσκε ισινέ αζόμ σίγουρος; Ο Δαβίδ νιωθίνελας ότι τθερέλας λατσσί φροντίδα επειδή ο Ιεχωβά ντέλας-λες συνέχεια σο-ντα τθερέλας ανάγκη. Ο Δαβίδ απολαμβάνελας επίσης ι φιλία ντα ι ευλογία ι Ιεχωβάσκι. Οτθάρ, ισινέ σίγουρος ότι, σο-ντα τι αβέλας λέσκε κο μέλλον, ο Ιεχωβά κα συνεχίνελας τι φροντίνελ λέσκε ανάγκες. Η μπέσα σο τθερέλας ο Δαβίδ κι μπαρί αγάπη κι Ιεχωβάσκι ισινέ πο ζουρανί από κάθε ανησυχία σο τθερέλας ντα κερέλας-λες τι νιωθίνελ πφερντό ντα ευτυχισμέ.​—Ψαλμ. 16:11. w24.01 σ. 28, 29 ¶12, 13

Κατά Δεύτερος Παγκόσμιος Πόλεμος ντα σοράν, ο λαός ι Ιεχωβάσκο κερέλα έργος ελεύθερα μπουτέ τθεμέντε. Μάλιστα, μπουτ τζενέ γνωριντέ ι Ιεχωβάς, ντα λέσκε υπηρέτες κερένα έργος σαρί κι πφουβ. Αντιβές, ο πφραλά σο ισί κο Κυβερνών Σώμας συνεχίνενα τι στηρίντιβεν κο Χριστός για τι οδηγίνελ-λεν. Καζόμ ντένα οδηγίες κο πφραλά, μανγκένα ανταλά οδηγίες τι συμφωνίνεν ι τροπόσαρ σο ντικχέλα ο Ιεχωβά ντα ο Ιησούς ο πράγματα. Ντα ο Κυβερνών Σώμας χρησιμοποιήνελα ι επισκοπόν ντα ι πρεσβυτερόν για τι ντελ οδηγίες κο κχανγκιριά. Ο χρισμέ πρεσβύτεροι, ντα σαρέ ο γιαβερά πρεσβύτεροι κο κχανγκιριά, ισί κο “δεξίς βας” κι Χριστόσκο. (Αποκ. 2:1) Ισί μπαγιά όμως ότι ανταλά πρεσβύτεροι ισί ατελείς ντα κερένα λάθη. Ο Μωυσής ντα ο Ιησούς του Ναυή κερντέ λάθη μερικές φορές, σαρ ο απόστολοι-ντα. (Αριθ. 20:12· Ιησ. Ναυή 9:14, 15· Ρωμ. 3:23) Αλλά ο Χριστός οδηγίνελα προσεκτικά ι πιστέ ντα γκοντιαβέρ δουλός ντα ι πρεσβυτερόν, ντα κα συνεχίνελ τι κερέλ-λες ανταβά. Άρα, τθεράσα μπουτ λόγους τι ντας μπέσα κο οδηγίες σο ντέλα-αμέν αντράλ οντουλένταρ σο ισί διορισμέ τι οδηγίνεν-αμέν. w24.02 σ. 23, 24 ¶13, 14

Αντιβές, αμέν μπορίνασα τι κεράς ο γκι ι Ιεχωβάσκο κάνα κεράσα λάφι λέσκε με τρόπος σο σικαβέλα καζόμ εκτίμηση νιωθίνασα ντα καζόμ μανγκάσα-λες. Κάνα ισινάμ κο έργος, τθεράσα αμαρέ γκοντιάτε ότι αμαρό σκοπός ισί τι βοηθίνας ι τζενέν τι αβέν πασέ κο Ιεχωβά, τι ντικχέν αμαρέ αγαπημέ Νταντές σαρ ντικχάσα-λες αμέν. (Ιακ. 4:8) Χαιρίνασα μπουτ τι σικαβάς κο τζενέ αντράλ κατά Γραφή κον ισί ο Ιεχωβά, ντα μερικές κατά ιδιότητες λέσκε σαρ ισί η αγάπη, η δικαιοσύνη, η σοφία, η ζορ ντα γιαβερά μπουτ σουκάρ ιδιότητες σο τθερέλα. Επίσης, δοξάνασα ι Ιεχωβάς ντα κεράσα λέσκο γκι κάνα προσπαθίνασα τι μοιάζας λέστε. Κάνα κεράσα-λες ανταβά, ξεχωρίνασα αντρέ ανταλέ πφιρνέ ντουνιάστε. Ο τζενέ μπέκιμ ντικχένα ότι ισινάμ διαφορετικοί ντα μπορεί τι σκεφτίνεν καβά ισί ο λόγος. (Ματθ. 5:14-16) Καζόμ κεράσα διάφορα πράγματα κάθε ντιβές, μπορεί τι ντιντιόλ-αμέν η ευκαιρία τι εξηγίνας λένγκε σόσκε ισινάμ διαφορετικοί. Ντα ανταβά ταρτίνελα ι τζενέν σο τθερένα λατσσό γκι αμαρέ Ντεβλέστε. Κάνα δοξάνασα ι Ιεχωβάς ανταλέ τροπόντζαρ, ανάσα χαρά λέσκε γκίστε.​—1 Τιμ. 2:3, 4. w24.02 σ. 10 ¶7

Για τι αβέν ώριμοι Χριστιανοί, πρέπει τι σικλιόν μερικά χρήσιμα πράγματα σο κα βοηθίνεν-τουμέν τουμαρέ ζωγιάτε. Ανταλά πράγματα κα βοηθίνεν-τουμέν τι λεν ευθύνες κι κχανγκιρί, τι ατσσικιαρέν εκ μπουτί για τι τθερέν ο αναγκαία τουμέν ή τουμαρί φαμιλί ντα τι αβέν λατσσέ αμαλά ι γιαβερέντζαρ. Για παράδειγμας, σικλιόν τι διαβάνεν ντα τι γραφίνεν λατσσές. Η Γραφή βακερέλα ότι ο ευτυχισμέ ντα επιτυχιμέ τζενό ντέλα σαάτι κάθε ντιβές για τι διαβάνελ ο Λάφι ι Ντεβλέσκο ντα τι σκεφτίνελ-λες λατσσές. (Ψαλμ. 1:1-3) Καζόμ διαβάνελα ι Γραφή κάθε ντιβές, σικλιόλα ο τρόπος σο σκεφτίνελα ο Ιεχωβά. Ανταβά κα βοηθίνελ-λες τι σκεφτίνελ καθαρά ντα τι κερέλ λογικές σκέψεις. (Παρ. 1:3, 4) Αμαρέ πφραλά ντα πφενιά χρειαζίντιβενα ι βοήθεια μουρσένγκι σο μπορίνενα τι σικλιαρέν ντα τι ντεν συμβουλές κατά Γραφή. Άμα διαβάνενα ντα γραφίνενα λατσσές, κα μπορίνεν τι ετοιμάνεν ομιλίες ντα απαντήσεις σο βοηθίνενα ι γιαβερέν ντα μπαριαρένα λένγκι πίστη. Επίσης, κα μπορίνεν τι ατσσικιαρέν λατσσέ σημειώσεις σο κα βοηθίνεν-τουμέν τι τθερέν πο ζουρανί πίστη ντα τι ντεν ζορ ι γιαβερέν. w23.12 σ. 26, 27 ¶9-11

Κάνα νταρένα, τι σκεφτίνεν λατσσές οντουλά σο κα κερέλ ο Ιεχωβά κο μέλλον κάνα ο Σατανάς να κα υπαρχίντιβελ. Εκ επίδειξη κι περιφερειακή συνέλευση κο 2014, σικαντάς εκχέ νταντές σο κερέλας λάφι πι φαμιλιάσαρ ι εδαφιόνγκε 2 Τιμόθεο 3:1-5 ντα σκεφτίνενας σο κα βακερένας ανταλά εδάφια άμα κερένας λάφι για τον Παράδεισο: «Κο νεβό ντουνιάς ο πράγματα κα αβέν αντικάς σο κα ανέν αμένγκε μπουτ χαρά. Σόσκε ο τζενέ κα μανγκέν ι γιαβερέν, κα μανγκέν ι αλήθεια, κα αγαβέν πουμαρέ όρια, να κα αβέν μπαρικανέ, κα δοξάνεν ι Ντεβλές, κα ντεν καν πουμαρέ νταντές ντα πουμαρέ νταγιά, κα σικαβέν εκτίμηση, κα αβέν αφοσιωμέ, κα μανγκέν μπουτ πουμαρί φαμιλί, κα ασουνέν ι γιαβερέν, πάντα κα κερέν λατσσό λάφι ι γιαβερένγκε, κα ατσσικιαρέν-πες, κα αβέν κοβλέ γκίσκε, κα μανγκέν ο λατσσιπέ, κα αβέν μπεσαλήδες, να κα μανγκέν τι νακχέλ σάντε λένγκο, κα αβέν ταπεινοί, κα αβέν τζενέ σο μανγκένα ι Ντεβλές ντα όχι ο απολαύσεις, ο σεβασμός σο κα τθερέν ι Ντεβλέσκε κα τσσίντελ-λεν τι κερέν λατσσέ πράγματα· ντα τι ατσσός πασέ λέντε». Τουμέν, συζητίνενα τουμαρέ φαμιλιάσαρ ή τουμαρέ πφραλέντζαρ σαρ κα αβέλ η ζωή κο νεβό ντουνιάς; w24.01 σ. 6 ¶13, 14

Τζανάσα ότι ο λαός ι Ιεχωβάσκο σαρ ομάδα κερέλα λέσκο γκι. Καζόμ μπουτ ηρεμίνελα-αμέν ανταβά! Η Αγία Γραφή βακερέλα: «Ο Ιεχωβά χαιρίνελα πι λαόσαρ». (Ψαλμ. 149:4) Μπάζιμα όμως μερικοί χασαρένα αζόμ μπουτ πουμαρί ζορ σο μπέκιμ πουτσένα-πες: “Κεράβα με προσωπικά ι Ιεχωβάσκο γκι;” Μπουτ πιστοί υπηρέτες ι Ιεχωβάσκε κο πουρανέ μπρεσά δυσκολίντιβενας τι πακιάν ότι κερένας ι Ιεχωβάσκο γκι. (1 Σαμ. 1:6-10· Ιώβ 29:2, 4· Ψαλμ. 51:11) Η Αγία Γραφή σικαβέλα ξεκάθαρα ότι ατελείς τζενέ μπορίνενα τι κερέν ι Ιεχωβάσκο γκι. Σαρ; Πρέπει τι σικαβάς πίστη κο Ιησούς Χριστός ντα τι μπολντιάς. (Ιωάν. 3:16) Αντικάς, σικαβάσα ανγκλάλ σαριλέντε ότι μετανιωσάλαμ αμαρέ αμαρτιένγκε ντα ότι ντινάμ αμαρό λάφι κο Ντεβέλ τι κεράς λέσκο θέλημας. (Πράξ. 2:38· 3:19) Ο Ιεχωβά χαιρίνελα μπουτ κάνα κεράσα ανταλά βήματα για τι μπαριαράς εκ φιλία λέσαρ. Άμα συνεχίνασα τι κεράς ο πο λατσσό σο μπορίνασα για τι τζουβντιάς αντικάς σαρ ντινάμ αμαρό λάφι κάνα αφιερωσάλαμ, κα κεράς ο γκι ι Ιεχωβάσκο ντα κα τθεράς λατσσί φιλία λέσαρ.​—Ψαλμ. 25:14. w24.03 σ. 26 ¶1, 2

Αμέν μοιάζασα κο μαθητές καζόμ συνεχίνασα τι κεράς έργος ατζέ-ντα κάνα η κυβέρνηση βακερέλα αμένγκε τι τσσιναβάς. Μπορίνασα τι αβάς σίγουροι ότι ο Ιεχωβά κα βοηθίνελ-αμέν τι κεράς αμαρό έργος. Οτθάρ τι προσευχίντιβεν για θάρρος ντα σοφία ντα τι μανγκέν ι βοήθεια ι Ιεχωβάσκι για τι νταϊντίνεν τουμαρέ προβλήματα. Μπουτ αμένταρ ταλαιπωρίντιβασα επειδή ισινάμ νασφαλέ, τθεράσα προβλήματα αντρ’ αμέντε, χασαρντάμ εκχέ τζενές σο μανγκάας, νακχάσα εκ πρόβλημας αμαρέ φαμιλιάτε, τζάνα αμέντζαρ κόντρα ή τθεράσα εκ γιαβέρ πρόβλημας. Πράγματα σαρ ισί ο πανδημίες ντα ο τζένγκια κερντέ μπουτ ανταλέ προβληματένταρ ατζέ πο δύσκολα. Τι πουτρέν τουμαρό γκι κο Ιεχωβά. Τι κερέν λέσκε λάφι οντουλένγκε σο νακχένα αντικάς σαρ κα κερένας λάφι εκχέ λατσσέ αμαλέστε. Τι αβέν σίγουροι ότι ο Ιεχωβά “κα βοηθίνελ-τουμέν”. (Ψαλμ. 37:3, 5) Άμα να τσσιναβάσα τι κεράς προσευχή, ανταβά κα βοηθίνελ-αμέν “τι νταϊντίνας κάνα τθεράσα πφανγκό γκι”. (Ρωμ. 12:12) Ο Ιεχωβά τζανέλα σο νακχένα λέσκε υπηρέτες​—“ασουνέλα κάνα ντένα-λες βίκος για βοήθεια”.​—Ψαλμ. 145:18, 19. w23.05 σ. 5, 6 ¶12-15

Κάνα ισί τι λας σημαντικές αποφάσεις, χρειαζίντιβελα τι αγαβάς «σο ισί οντουβά σο μανγκέλα ο Ιεχωβά» ντα σοράν τι κεράς-λες. (Εφεσ. 5:17) Κάνα ρόντασα για τι αρακχάς ο αρχές ι Γραφιάκε σο ταιριάνενα αμαρέ περιπτωσιάτε, προσπαθίνασα τι αγαβάς ο τρόπος σο σκεφτίνελα ο Ντεβέλ κι περίπτωση ανταγιά. Σοράν, καζόμ κα κεράς ο αρχές λέσκε, κα μπορίνας τι λας λατσσέ αποφάσεις. «Ο πφιρνό», αμαρό ντουσμάνι ο Μπενγκ, κα μανγκέλας τι ατσσικιαρέλ-αμέν αζόμ απασχολημέ με το πράγματα ανταλέ ντουνιάσκε σο να κα τθεράς χρόνος τι υπηρετίνας ι Ντεβλές. (1 Ιωάν. 5:19) Κα αβέλας μπουτ εύκολος για εκ Χριστιανός τι τσσουβέλ ο υλικά πράγματα, ο σπουδές ή πι μπουτί πο οπρέ κατά υπηρεσία ι Ιεχωβάσκι. Άμα κα κερέλας-λες ανταβά, κα σικαβέλας ότι αρχίνελα τι σκεφτίνελ σαρ ο τζενέ κο ντουνιάς. Σίγουρα, ανταλά πράγματα νανέ λάθος, αλλά δεν πρέπει ποτές τι αβέν κι πρώτη θέση αμαρέ ζωγιάτε. w24.03 σ. 24 ¶16, 17