Τι Εκτιμίνεν ο Προνόμιος τι Ντεν Λατρεία ι Ιεχωβάς Λέσκε Πνευματικέ Ναόστε

1. Σο βακερέλα εκ άγγελος, ντα σο μανγκέλα τι βακερέλ ανταβά αμένγκε;

ΑΜΑ κερέλας τουμέντζαρ λάφι εκ άγγελος, κα ασουνένας-λες; Αντιβές, εκ άγγελος κερέλα λάφι «σαρέ κο τθεμά, κο φυλές, κο τσσιμπά ντα κο λαοί». Σο βακερέλα; «Νταρέν κατά Ντεβέλ ντα ντεν-λες δόξα . . . Ντεν λατρεία Οντουλέστε σο κερντάς ο ουρανός ντα ι πφουβ». (Αποκ. 14:6, 7) Ο Ιεχωβά ισί ο μόνος αληθινός Ντεβέλ ντα σαρέ πρέπει τι ντεν-λες λατρεία. Ισινάμ πφερντέ εκτίμηση σο ντινάς-αμέν ι σουκάρ ευκαιρία τι ντας-λες λατρεία λέσκε μπαρέ πνευματικέ ναόστε!

2. Σο ισί ο πνευματικός ναός ι Ιεχωβάσκο; (Ντικχέν ο πλαίσιος-ντα «Σο Νανέ»)

² Σο ακριβώς ισί ο πνευματικός ναός, ντα κάι μπορίνασα τι αρακχάς ο λεπτομέρειες σο εξηγίνενα-λες; Ο πνευματικός ναός νανέ εκ κανονικός κτίριος. Ισί οντουβά σο κανονιντάς ο Ιεχωβά για τι δεχτίνελ ι λατρεία σο ντάσα-λες αντράλ κατά θυσία ι Ιησούσκι. Ο απόστολος Παύλος εξηγιντάς πο μπουτ πράγματα ανταλέσκε κι επιστολή σο γραφιντάς κο Εβραίοι Χριστιανοί κο πρώτος αιώνας σο τζουβντιόνας κι Ιουδαία.b

3, 4. Καλά ανησυχίες τθερέλας ο Παύλος ι Εβραίε Χριστιανόνγκε κι Ιουδαία, ντα σαρ βοηθιντάς-λεν;

³ Σόσκε γραφιντάς ο Παύλος πι επιστολή κο Εβραίοι Χριστιανοί κι Ιουδαία; Μάλλον για ντούι λόγους. Πρώτον, για τι ντελ-λεν ζορ. Πριν τι αβέν Χριστιανοί, ο πο μπουτ λένταρ ισινέ κι Ιουδαϊκή θρησκεία. Ο παπάζια σο ισινέ λένγκε πουρανέ θρησκειάτε μπέκιμ πρασάνας-λεν σο αβιλέ Χριστιανοί. Σόσκε; Επειδή ο Χριστιανοί να τθερένας εκ εντυπωσιακός ναός για τι ντεν λατρεία ούτε εκ θυσιαστήριος για τι κερέν θυσίες κο Ντεβέλ ούτε ιερείς για τι υπηρετίνεν-λεν. Ανταβά κα μπορίνελας τι κερέλ ι Χριστόσκε μαθητέν τι χασαρέν πουμαρί ζορ ντα πουμαρί πίστη. (Εβρ. 2:1· 3:12, 14) Μερικοί λένταρ μπέκιμ σκεφτιντέ τι βουρτίνεν κι Ιουδαιόνγκι θρησκεία.

⁴ Δεύτερον, ο Παύλος βακερντάς κο Εβραίοι Χριστιανοί ότι να μαρένας-πες τι αγαβέν καέκ νεβό ή αχόρτ πνευματικός σικλιαριπέ, ο «χαμπέ» σο ισί κο Λάφι κι Ντεβλέσκο. (Εβρ. 5:11-14) Ντικχίντιβελα ότι μερικοί λένταρ κερένας ατζέκ ο Μωσαϊκός Νόμος. Ο Παύλος όμως εξηγιντάς ότι ο θυσίες σο μανγκέλας λένταρ ο Νόμος ναστί νασκιαρένας ντιπ ι αμαρτία. Οντουλέσκε, “μουκχλέ κι νάκρη” ο Νόμος. Σοράν, ο Παύλος σικλιαρντάς μερικές πο αχόρτ αλήθειες. Αντάς πι πφραλένγκε γκοντιάτε εκ «πο λατσσί ελπίδα» σο βασίντιβελα κι θυσία κι Ιησούσκι, σο μπορίνελας τι βοηθίνελ-λεν μπαγιά τι “τζαν πο πασέ κο Ντεβέλ”.​—Εβρ. 7:18, 19.

5. Σο χρειαζίντιβελα τι αγαβάς κατά Επιστολή κο Εβραίους, ντα σόσκε;

⁵ Ο Παύλος εξηγιντάς πι Εβραίε πφραλένγκε σόσκε ο τρόπος σο ντένας λατρεία σαρ Χριστιανοί ισινέ μπουτ πο λατσσό κατά τρόπος σο ντένας λατρεία ανγκλέ. Ο τρόπος σο ντένας λατρεία κι θρησκεία κι Ιουδαιόνγκι ισινέ σάντε «βουτσσάλ οντουλέ πραγματένγκε σο κα αβέν ανγκλ’ αμέντε, αλλά η αλήθεια ισί κο Χριστός». (Κολ. 2:17) Η βουτσσάλ εκχέ πραγμάσκι σικαβέλα αμένγκε περίπου σαρ ισί ανταβά πράγμας. Αντικάς-ντα, ο τρόπος σο ντένας λατρεία ο Ιουδαίοι κο πουρανέ μπρεσά ισινέ σάντε εκ βουτσσάλ ι αληθειάκι σο κα αβέλας. Ανταβά μανγκέλα τι βακερέλ ότι κα αβέλας εκ μπουτ πο λατσσό τρόπος για τι ντας λατρεία, δηλαδή ο πνευματικός ναός. Οντουβά σο κανονιντάς ο Ιεχωβά μπορίνελα τι συγχωρίνελ αμαρέ αμαρτίες, για τι ντας-λες λατρεία σαρ μανγκέλα. Οτθάρ, ισί μπουτ σημαντικός τι αγαβάς οντουβά σο κανονιντάς. Ακανά, για τι ντικχάς σο διαφορές τθερέλα η «βουτσσάλ» (η λατρεία ι Ιεχωβάσκι κο πουρανέ μπρεσά) με την «αλήθεια» (η λατρεία ι Ιεχωβάσκι αντιβές), σαρ εξηγίντιβενα κι Επιστολή κο Εβραίους. Άμα κα κεράς-λες ανταβά, κα αγαβάς πο λατσσές ο πνευματικός ναός ντα σο σχέση τθερέλα αμέντζαρ.

Η ΣΚΗΝΗ ΤΗΣ ΜΑΡΤΥΡΙΑΣ

6. Σαρ χρησιμοποιήνενας ο Ισραηλίτες ι σκηνή της μαρτυρίας;

⁶ Η λατρεία ι Ιεχωβάσκι κο πουρανέ μπρεσά. Ο λάφια σο γραφιντάς ο Παύλος τθερένας τι κερέν με τη σκηνή της μαρτυρίας σο κερντάς ο Μωυσής κο 1512 Π.Κ.Χ. (Ντικχέν ο πίνακας «Η Λατρεία ι Ιεχωβάσκι κο Πουρανέ Μπρεσά​—Η Λατρεία ι Ιεχωβάσκι Αντιβές») Η σκηνή της μαρτυρίας ισινέ σαρ εκ τσαντίρι σο, κι αρχή, ακχαρένας-λα πουμέντζαρ ο Ισραηλίτες καζόμ τζάνας τθεμ τθεμέστε. Χρησιμοποιήνενας-λα για σχεδόν 500 μπρεσά μέχρι σο κερντιλό εκ ναός κι Ιερουσαλήμ. (Έξοδ. 25:8, 9· Αριθ. 9:22) Ανταγιά «σκηνή της συνάντησης» ισινέ ο σημείος σο ο Ισραηλίτες τζάνας πασέ κο Ντεβέλ, κερένας πουμαρέ θυσίες ντα ντένας-λες λατρεία. (Έξοδ. 29:43-46) Η σκηνή της μαρτυρίας όμως σικαβέλας εμ κάτι μπουτ πο μπαρό σο κα αβέλας ι Χριστιανόνγκε.

7. Κάνα αρχισάλο τι υπαρχίντιβελ ο πνευματικός ναός;

⁷ Η λατρεία ι Ιεχωβάσκι αντιβές. Η πουρανί σκηνή της μαρτυρίας ισινέ «βουτσσάλ ι πραγματένγκε κο ουρανός» ντα σικαβέλας ο μπαρό πνευματικός ναός ι Ιεχωβάσκο. Ο Παύλος βακερντάς ότι «ανταγιά σκηνή [της μαρτυρίας] μανγκέλα τι σικαβέλ ανταβά σο υπαρχίντιβελα ακανά». (Εβρ. 8:5· 9:9) Άρα, κάνα γραφιντάς κο Εβραίοι, ο πνευματικός ναός υπαρχίντιβελας ήδη. Αβιλό κο 29 Κ.Χ. Οντουβά μπρες, ο Ιησούς μπολντιλό, αβιλό χρισμέ ι άγιε πνευμάσαρ ντα αρχισάλο τι υπηρετίνελ σαρ ο “μπαρό αρχιερέας” ι Ιεχωβάσκο κο πνευματικός ναός.c​—Εβρ. 4:14· Πράξ. 10:37, 38.

Ο ΑΡΧΙΕΡΕΑΣ

8, 9. Σαρ βακερένα ο εδάφια Εβραίους 7:23-27, καγιά μπαρί διαφορά τθερένα ο αρχιερείς κο Ισραήλ ντα ο μπαρό Αρχιερέας, ο Ιησούς Χριστός;

⁸ Η λατρεία ι Ιεχωβάσκι κο πουρανέ μπρεσά. Ο αρχιερέας βοηθίνελας ι λαός τι τθερέλ λατσσί φιλία ι Ντεβλέσαρ. Ο πρώτος αρχιερέας κο Ισραήλ, ο Ααρών, διορισάλο κατά Ιεχωβά κάνα αβιλί η αφιέρωση της σκηνής της μαρτυρίας. Όμως, σαρ εξηγιντάς ο Παύλος, «ισινέ μπουτ οντουλά σο αβιλέ ιερείς ο εκ παλάλ κατά γιαβέρ επειδή μερένας ντα να μπορίνενας τι ατσσόν ιερείς».d (Διαβάνεν Εβραίους 7:​23⁠-27) Ντα σαρ ατελείς τζενέ, οντουλά αρχιερείς έπρεπε τι κερέν θυσίες πουμαρέ αμαρτιένγκε. Ανταγιά ισί εκ μπουτ μπαρί διαφορά σο τθερένας ο αρχιερείς κο Ισραήλ ντα ο μπαρό Αρχιερέας, ο Ιησούς Χριστός.

⁹ Η λατρεία ι Ιεχωβάσκι αντιβές. Σαρ αμαρό Αρχιερέας, ο Ιησούς Χριστός «υπηρετίνελα . . . κι αληθινή σκηνή, σο κερντάς-λα ο Ιεχωβά, ντα όχι ο τζενέ». (Εβρ. 8:1, 2) Ο Παύλος εξηγιντάς ότι, «αφού [ο Ιησούς] ατσσόλα τζουβντό για πάντα, να χρειαζίντιβελα τι αβέν γιαβερά ιερείς σοράν λέσταρ». Ο Παύλος βακερντάς επίσης ότι ο Ιησούς «να τθερέλα αμαρτία, ισί μπουτ διαφορετικός κατά αμαρτωλοί» ντα ότι να μοιάζελα κο αρχιερείς κο Ισραήλ, επειδή βοβ «να χρειαζίντιβελα τι κερέλ θυσίες κάθε ντιβές» πι αμαρτιένγκε. Ακανά, ντικχέν καλά διαφορές τθερένα ο θυσιαστήρια ντα ο θυσίες κο πουρανέ μπρεσά κατά πράγματα σο μανγκένα τι σικαβέν αντιβές.

Ο ΘΥΣΙΑΣΤΗΡΙΑ ΝΤΑ Ο ΘΥΣΙΕΣ

10. Σο μανγκένας τι σικαβέν ο θυσίες σο κερένας κο χάλκινος θυσιαστήριος;

¹⁰ Η λατρεία ι Ιεχωβάσκι κο πουρανέ μπρεσά. Αβρί κατά σκηνή της μαρτυρίας ισινέ εκ χάλκινος θυσιαστήριος σο θυσιάνενας ζώα κο Ιεχωβά. (Έξοδ. 27:1, 2· 40:29) Όμως οντουλά θυσίες να μπορίνενας τι νασκιαρέν ντιπ ο αμαρτίες ι λαόσκε. (Εβρ. 10:1-4) Ο θυσίες ι ζωόνγκε σο αβένας-πες συνέχεια κι σκηνή της μαρτυρίας μανγκένας τι σικαβέν ι θυσία σο κα νασκιαρέλας ντιπ ο αμαρτίες ι τζενένγκε.

11. Καβά ισινέ ο θυσιαστήριος σο ντινάς ο Ιησούς πο νεαυτός σαρ θυσία; (Εβραίους 10:5-7, 10)

¹¹ Η λατρεία ι Ιεχωβάσκι αντιβές. Ο Ιησούς τζανέλας ότι ο Ιεχωβά μπουτσσαντάας-λες κι πφουβ για τι ντελ πι ζωή σαρ λύτρος ι τζενένγκε. (Ματθ. 20:28) Οτθάρ, κάνα μπολντιλό, ο Ιησούς ντινάς πο νεαυτός για τι κερέλ ο θέλημας ι Ιεχωβάσκο. (Ιωάν. 6:38· Γαλ. 1:4) Ο Ιησούς ντινάς πο νεαυτός σε εκ συμβολικός θυσιαστήριος. Ανταβά θυσιαστήριος μανγκέλας τι σικαβέλ ο «θέλημας» ι Ντεβλέσκο, σο ισινέ τι θυσιάνελ λέσκο Τσσαβό ι τέλεια ζωή σο τθερέλας σαρ τζενό. Η ζωή ι Ιησούσκι ντιντιλί «εκ φαρ για πάντα» για τι συγχωρίντιβεν ντιπ ο αμαρτίες σαρέ οντουλένγκε σο σικαβένα πίστη κο Χριστός. (Διαβάνεν Εβραίους 10:​5⁠-7, 10) Ακανά, ντικχέν ι σημασία σο τθερένας ο πράγματα αντρέ κι σκηνή της μαρτυρίας.

Ο ΑΓΙΑ ΝΤΑ Ο ΑΓΙΑ ΤΩΝ ΑΓΙΩΝ

12. Κον μπορίνελας τι τζαλ κο κάθε δωμάτιος κι σκηνή της μαρτυρίας;

¹² Η λατρεία ι Ιεχωβάσκι κο πουρανέ μπρεσά. Η σκηνή της μαρτυρίας ντα ο ναοί σο χτιντέ-λεν πο σοράν κι Ιερουσαλήμ μοιάζενας μπουτ. Αντρέ, υπαρχίντιβενας ντούι δωμάτια​—«ο Άγια» ντα «ο Άγια των Αγίων»​—σο χωρίντιβενας εκχέ κουρτινάσαρ. (Εβρ. 9:2-5· Έξοδ. 26:31-33) Αντρέ κο Άγια υπαρχίντιβελας εκ χρυσός λυχνοστάτης, εκ θυσιαστήριος για τι πφαμπαρέν θυμίαμας ντα εκ τραπέζι ι μαντρένγκε της πρόθεσης. Σάντε “ο χρισμέ ιερείς” μπορίνενας τι τζαν κο Άγια για τι κερέν πουμαρί ιερή υπηρεσία. (Αριθ. 3:3, 7, 10) Ο Άγια των Αγίων τθερένας ι χρυσή κιβωτός της διαθήκης σο μανγκέλας τι σικαβέλ ότι ο Ιεχωβά ισινέ οτθέ. (Έξοδ. 25:21, 22) Σάντε ο αρχιερέας μπορίνελας τι νακχέλ κατά κουρτίνα ντα τι τζαλ κο Άγια των Αγίων εκ φαρ κάθε μπρες, κο Ντιβές σο κερένας για τι ιτσσάρντιβεν λένγκε αμαρτίες. (Λευιτ. 16:2, 17) Κάθε μπρες, ο αρχιερέας τζάλας ι ρατέσαρ σο λέλας κατά ζώα για τι ιτσσάρντιβεν λέσκε αμαρτίες ντα ο αμαρτίες σαρέ ι λαόσκε. Τελικά, αντράλ πι άγιε πνευμάσταρ, ο Ιεχωβά σικαντάς ξεκάθαρα καγιά σημασία τθερένας ανταλά πράγματα κι σκηνή της μαρτυρίας.​—Εβρ. 9:6-8.

13. Σο μανγκένα τι σικαβέν ο Άγια ντα ο Άγια των Αγίων κι σκηνή της μαρτυρίας αντιβές;

¹³ Η λατρεία ι Ιεχωβάσκι αντιβές. Χάνικ μαθητές ι Χριστόσκε αβιλέ χρισμέ ι άγιε πνευμάσαρ ντα τθερένα εκ διαφορετική σχέση ι Ιεχωβάσαρ. Οντουλά 144.000 κα υπηρετίνεν σαρ ιερείς κο ουρανός γιεκ ι Ιησούσαρ. (Αποκ. 1:6· 14:1) Καζόμ ισί ατζέ κι πφουβ, ο Ντεβέλ κερέλα-λεν χρισμέ ι άγιε πνευμάσαρ ντα λέλα-λεν πέσκε σαρ τσσαβέ. Ο Άγια κι σκηνή της μαρτυρίας μανγκένα τι σικαβέν ανταγιά διαφορετική σχέση σο τθερένα ι Ντεβλέσαρ. (Ρωμ. 8:15-17) Ο Άγια των Αγίων κι σκηνή της μαρτυρίας μανγκένα τι σικαβέν ο ουρανός, ο τθαν σο μπεσέλα ο Ιεχωβά. Η «κουρτίνα», σο χωρίνελας ο Άγια κατά Άγια των Αγίων, μανγκέλα τι σικαβέλ ο σώμας ι Ιησούσκο. Καζόμ τθερέλας σώμας σαρ τζενό, ο Ιησούς ναστί τζάλας κο ουρανός σαρ ο μπαρό Αρχιερέας κο πνευματικός ναός. Κάνα ντινάς πο σώμας σαρ θυσία ι τζενένγκε, ο Ιησούς πουταρντάς ο ντρομ για τι τζουβντιόν κο ουρανός σαρέ ο χρισμέ Χριστιανοί. Βον-ντα πρέπει τι μουκχέν πουμαρό σώμας σαρ τζενέ για τι τζαν κο ουρανός. (Εβρ. 10:19, 20· 1 Κορ. 15:50) Κάνα ο Ιησούς αναστισάλο, γκιλό κο Άγια των Αγίων κο πνευματικός ναός, οτθέ σο τελικά κα τζαν σαρέ ο χρισμέ.

14. Σόσκε ισί μπουτ πο λατσσό ανταβά σο κανονιντάς ο Ιεχωβά ι πνευματικέ ναόσκε, σαρ σικαβένα ο εδάφια Εβραίους 9:12, 24-26;

¹⁴ Ατθέ μπορίνασα τι ντικχάς ξεκάθαρα καζόμ πο λατσσό ισί ανταβά σο κανονιντάς ο Ιεχωβά για τι ντας-λες πάκι λατρεία. Ανταγιά λατρεία βασίντιβελα κι θυσία κι Ιησούσκι ντα τθερέλα σαρ Αρχιερέας ι Ιησούς Χριστός. Ο αρχιερέας κο Ισραήλ τζάλας κο Άγια των Αγίων, σο ισινέ κερντέ κατά τζενέ, ι ρατέσαρ σο λέλας κατά ζώα. Όμως ο Ιησούς γκιλό «κο ουρανός», κο πο άγιος τθαν σο υπαρχίντιβελα, για τι τζαλ ανγκλάλ κο Ιεχωβά. Οτθέ, σικαντάς μάξους αμένγκε ι αξία πι τέλειε ζωγιάκι «για τι νασκιαρέλ ι αμαρτία αντράλ κατά θυσία πι νεαυτόσκι». (Διαβάνεν Εβραίους 9:​12, 24-26) Η θυσία ι Ιησούσκι ισί πο οπρέ σαρέ κατά γιαβερά θυσίες σόσκε νασκιαρέλα ι αμαρτία για πάντα. Σαρ κα σικλιάς σοράν, είτε τθεράσα ι ελπίδα τι τζουβντιάς κο ουρανός είτε κι πφουβ, σαρέ μπορίνασα τι ντας λατρεία κο Ιεχωβά λέσκε πνευματικέ ναόστε.

Ο ΑΥΛΕΣ

15. Κον υπηρετίνενας κι αυλή κι σκηνή της μαρτυρίας;

¹⁵ Η λατρεία ι Ιεχωβάσκι κο πουρανέ μπρεσά. Η σκηνή της μαρτυρίας τθερέλας εκ αυλή​—εκ μπαρό τθαν σο ισινέ πφαντό ντονταλάι ντα οτθέ ο ιερείς κερένας πουμαρί υπηρεσία. Ο μπαρό χάλκινος θυσιαστήριος σο πφαμπαρένας θυσίες ισινέ κι αυλή εκχέ χάλκινε λεκανάσαρ σο τθερέλας πανί. Ο ιερείς χρησιμοποιήνενας-λα για τι τθοβέν-πες πριν τι κερέν πουμαρί ιερή υπηρεσία. (Έξοδ. 30:17-20· 40:6-8) Όμως, ο ναοί σο κερντιλέ πο σοράν τθερένας εκ γιαβέρ-ντα αυλή σο ισινέ αβρί. Οντουλά σο να ισινέ ιερείς μπορίνενας τι τζαν οτθέ ντα τι ντεν λατρεία ι Ντεβλές.

16. Κον υπηρετίνενα κι κάθε αυλή κο πνευματικός ναός;

¹⁶ Η λατρεία ι Ιεχωβάσκι αντιβές. Πριν τι τζαν κο ουρανός για τι υπηρετίνεν σαρ ιερείς ι Ιησούσαρ, ο χρισμέ κι πφουβ υπηρετίνενα πιστά κο πνευματικός ναός, κι αυλή σο ισί αντρέ. Η μπαρί λεκάνη πανίσαρ σο ισινέ κι σκηνή της μαρτυρίας ντα κο ναοί ανέλα λένγκε γκοντιάτε κάτι σημαντικός λένγκε, ντα σαρέ ι Χριστιανόνγκε​—ότι πρέπει τι ατσσόν πάκι κο τρόπος σο τζουβντιόνα ντα ντένα λατρεία ι Ιεχωβάς. Αλλά κάι ντένα λατρεία ο τζενέ κο «μπαρό πλήθος», σο υποστηρίνενα πιστά ι χρισμέ πφραλέν ι Χριστόσκε; Ο απόστολος Ιωάννης ντικχλάς-λεν τι “μπεσέν ανγκλάλ κο θρόνος”. Ανταβά τθαν κι πφουβ μανγκέλα τι βακερέλ ι αυλή σο ισί αβρί, σο οτθέ «υπηρετίνενα [ι Ντεβλές] ντισάρα ντα ιράτ λέσκε ναόστε». (Αποκ. 7:9, 13-15) Ισινάμ πφερντέ εκτίμηση σο ο Ιεχωβά ντινάς-αμέν ο μπαρό προνόμιος τι υπηρετίνας-λες λέσκε μπαρέ πνευματικέ ναόστε!

Ο ΠΡΟΝΟΜΙΟΣ ΣΟ ΤΘΕΡΑΣΑ ΤΙ ΝΤΑΣ ΛΑΤΡΕΙΑ Ι ΙΕΧΩΒΑΣ

17. Καλά θυσίες τθεράσα ο προνόμιος τι ντας κο Ιεχωβά;

¹⁷ Αντιβές, σαρέ ο Χριστιανοί τθερένα ο προνόμιος τι ντεν θυσίες κο Ιεχωβά καζόμ χρησιμοποιήνενα πουμαρό σαάτι, πουμαρί ζορ ντα πουμαρέ πράγματα για τι υπηρετίνεν-λες. Σαρ βακερντάς ο απόστολος Παύλος κο Εβραίοι Χριστιανοί, μπορίνασα «τι ντας πάντα κο Ντεβέλ θυσίες για τι δοξάνας-λες, ντα οντουλά θυσίες ισί ο καρπός αμαρέ βουστένγκο σο κερένα λάφι ι Ντεβλέσκε ναβέσκε». (Εβρ. 13:15) Μπορίνασα τι σικαβάς ότι εκτιμίνασα μπουτ ο προνόμιος σο τθεράσα τι ντας λατρεία ι Ιεχωβάς κάνα κεράσα ο πο λατσσέ θυσίες σο μπορίνασα.

18. Σαρ βακερένα ο εδάφια Εβραίους 10:22-25, σο πρέπει πάντα τι κεράς, ντα σο δεν πρέπει ποτές τι μπιστράς;

¹⁸ Διαβάνεν Εβραίους 10:22-25. Καζόμ ο Παύλος μπιτισκιαρέλα πι επιστολή κο Εβραίους, βακερέλα διάφορα πράγματα σο πρέπει πάντα τι κεράς καζόμ ντάσα λατρεία ι Ιεχωβάς. Μερικά ανταλένταρ ισί τι τζας πασέ κο Ιεχωβά αντράλ κατά προσευχή, τι κεράς έργος, τι τζας κο συναθροίσεις ντα τι ντας ζορ ο εκ ι γιαβερές, «ντα ατζέ πο μπουτ καζόμ [ντικχάσα] τι ερεσέλ ο ντιβές [ι Ιεχωβάσκο]». Κο τέλος κι Αποκάλυψη, ο άγγελος ι Ιεχωβάσκο βακερέλα: «Κο Ντεβέλ ντε λατρεία!» (Αποκ. 19:10· 22:9) Βακερντάς-λες ντούι φαρ για τι σικαβέλ καζόμ σημαντικός ισί. Μα τι μπιστράς ποτές ανταγιά αχόρτ πνευματική αλήθεια σο τθερέλα τι κερέλ ι Ιεχωβάσκε μπαρέ πνευματικέ ναόσαρ ντα ο μπαρό προνόμιος σο τθεράσα τι ντας λατρεία αμαρέ μπαρέ Ντεβλές!