Ο Γράμμας σο Μπουτσσάντιλο κο Εβραίοι
13 Μα τσσιναβέν τι μανγκέν ο εκ ι γιαβερές σαρ μανγκένα τουμαρέ πφραλέν. 2 Μα μπιστρέν τι πουτρέν τουμαρό κχερ ι γιαβερένγκε,* σόσκε αντικάς μερικοί, χωρίς τι τζανέν-λες, πουταρντέ πουμαρό κχερ αγγελόνγκε. 3 Τι ντεν-τουμέν γκοντί οντουλέν σο ισί κι φυλακή, σαρ τι αβένας τουμέν-ντα κι φυλακή λέντζαρ, ντα οντουλέν σο τσσίντενα μπουτ κατά γιαβερά, αφού τουμέν-ντα τζενέ ισινέν.* 4 Ο μπιαβ τι τθερέλ μπαρί αξία κο γιακχά σαριλένγκε ντα ο κρεβάτι ι ρομέσκο ντα ι ρομνιάκο μα τι μαγαρίντιβελ, σόσκε ο Ντεβέλ κα κρίνελ οντουλέν σο κερένα λουμνιπέ* ντα οντουλέν σο κερένα λουμνιπέ οπράλ κο μπιαβ.* 5 Μα μανγκέν μπουτ ο λοβέ αλλά τι ερεσέν-τουμέν οντουλά σο τθερένα, σόσκε ο Ντεβέλ βακερντάς: «Ποτές να κα μουκχάβ-τουτ ντα ποτές να κα τσσιναβάβ τι βοηθίναβ-τουτ». 6 Οτθάρ, μα τι τθεράς ιτς νταρ αλλά τι βακεράς: «Ο Ιεχωβά* ισί μο βοηθός, να κα νταράβ. Σο μπορίνελα τι κερέλ-μαν εκ τζενό;»
7 Τι ντεν-τουμέν γκοντί οντουλέν σο οδηγίνενα-τουμέν ντα βακερντέ τουμένγκε ο λάφι ι Ντεβλέσκο, ντα καζόμ σκεφτίνενα ο λατσσέ πράγματα σο κερένα πουμαρέ ζωγιάτε, τι τθερέν ι πίστη σο τθερένα βον.
8 Ο Ιησούς Χριστός ίτζι ντα αντιβές ντα για πάντα ισί ο ίδιος.
9 Μα χουχάντιβεν διάφορε πραγματένταρ σο σικλιαρένα ο τζενέ ντα σο νανέ σαρ οντουλά σο σικλιλέν τουμέν, σόσκε ισί πο λατσσές τι λελ ζορ τουμαρό γκι κατά μπαρό λατσσιπέ ι Ντεβλέσκο παρά κατά χαμπίματα.* Ανταλά χαμπίματα να κερένα καέκ λατσσιπέ οντουλένγκε σο ασχολίντιβενα λέντζαρ.
10 Αμέν τθεράσα εκ θυσιαστήριος ντα ανταλέσταρ να τθερένα δικαίωμας τι χαν οντουλά σο ντένα άγια υπηρεσία κο τσαντίρι. 11 Ο σώματα κατά ζώα σο λένγκο ρατ ανέλας ο αρχιερέας αντρέ κο άγιος τθαν για τι συγχωρίντιβεν ο αμαρτίες πφαμπόνας αβρί κατά τθαν σο μπεσένας ο τζενέ. 12 Οτθάρ ο Ιησούς-ντα τσσιντιντάς μπουτ ντα μουλό αβρί κατά πόλη για τι αγιάνελ ι λαός πι ρατέσαρ. 13 Άρα αμέν, τι τζας λέστε σο ισί αβρί κατά τθαν σο μπεσένα ο τζενέ ντα τι λας οπρ’ αμέντε ι λατζ σο λιντάς βοβ-ντα, 14 σόσκε να τθεράσα εκ πόλη σο ατσσόλα για πάντα, αλλά μπεσάσα σαρ σαρ οντουλάκε σο κα αβέλ ανγκλ’ αμέντε. 15 Αντράλ κατά Ιησούς τι ισαράς πάντα ι Ντεβλές. Ανταβά ισί σαρ εκ θυσία σο ντάσα λέστε. Αμαρέ βουστέντζαρ τι μουτθαβάς λέσκο ναβ ανγκλάλ κο γιαβερά. Ανταβά ισί σαρ εκ καρπός σο ντάσα λέστε. 16 Ντα μα μπιστρέν τι κερέν ο λατσσιπέ ντα τι ντεν οντουλένταρ σο τθερένα κο γιαβερά. Ανταλά πράγματα ισί σαρ θυσίες σο κερένα ι Ντεβλέσκο γκι.
17 Τι ασουνέν ντα τι ντεν καν οντουλέν σο οδηγίνενα-τουμέν, σόσκε βον αρακχαβένα-τουμέν* ντα κα ντεν λογαριασμός. Αντικάς, βον κα αρακχαβέν-τουμέν χαράσαρ ντα όχι πφανγκέ γκίσαρ. Άμα κα αρακχαβένας-τουμέν πφανγκέ γκίσαρ, ανταβά κα κερέλας τουμένγκε ζιάνι.
18 Μα τσσιναβέν τι προσευχίντιβεν αμένγκε, σόσκε ισινάμ σίγουροι ότι τθεράσα πάκι συνείδηση* ντα μανγκάσα τι αβάς τίμιοι σαρέ κο πράγματα σο κεράσα. 19 Βακεράβα τουμένγκε αντράλ μι γκίσταρ τι προσευχίντιβεν για τι αβάβ πάλι πασέ τουμέντε καζόμ πο σουγκό αβέλα-πες.
20 Ο Ντεβέλ αντάς παλάλ κατά μουλέ αμαρέ Κυριός, ι Ιησού Χριστός, ι μπαρέ τσομπανής ι μπρακένγκο, ντα ο Ιησούς ντινάς κο Ντεβέλ ο ρατ εκχέ συμφωνιάκο σο ατσσόλα για πάντα. Ο Ντεβέλ σο τθερέλα ντα ντέλα ειρήνη 21 τι ντελ-τουμέν κάθε λατσσό πράγμας για τι αβέν έτοιμοι τι κερέν οντουβά σο μανγκέλα. Ντα αντράλ κατά Ιησούς Χριστός βοβ τι τσσίντελ-αμέν τι κεράς ο πράγματα σο κερένα λέσκο γκι. Κο Ντεβέλ τι αβέλ η δόξα για πάντα. Αμήν.
22 Πφραλάλεν, βακεράβα τουμένγκε τι ασουνέν με υπομονή ανταλά λάφια σο ισί για τι ντεν-τουμέν ζορ, σόσκε ο γράμμας σο γραφιντόμ τουμένγκε νανέ μπουτ μπαρό. 23 Μανγκάβα τι τζανέν ότι αμαρό πφραλ ο Τιμόθεος νικίστιλο κατά φυλακή. Άμα κα αβέλ ατζεχάνικ, κα αβάς γιεκ τι ντικχάς-τουμέν.
24 Κερέν σελιάμι* σαρέ οντουλένγκε σο οδηγίνενα-τουμέν ντα σαρέ κο άγιοι. Κερένα τουμένγκε σελιάμι οντουλά σο ισί κι Ιταλία.
25 Ο μπαρό λατσσιπέ ι Ντεβλέσκο τι αβέλ σαρέ τουμέντζαρ.