Лука

1 Бут мануша линэ тэ пистрон пала время, пала сави амэ драго ӷанас, и амэ всаворэ́ одеса патяс, кай тоди вся кадя и сас. 2 Кадяжэ пала кодэя время амэнди росԥэндэ кодэла, ко вся када диқля пэстирэ яқэнца; вонэ пэрви росԥэнэнас о алав лэ Дэвлэстар. 3 Кочай и мэ закамлэм вся драго тэ розуӷанав кодэлэстар, сар вся када заляпэ, и тэ пистросарав пала вся па порядко тути, пативало Фяфи́ло. 4 Тоди ту инке май фартэ патяса, кай кода, сости тут сытярдэ, — када чачимос.

5 Кала правияс о И́радо*, о иудейско царё, жувэлас ек рашай, савэс ақарэнас Заха́рия, во сас анда лэ рашанго круӷо, пэ саво ԥэнэнас лэ Авияско*. Лэстири хулаи сас анда лэ Ароноско колено*, ла ақарэнас Елизаве́та. 6 Вонэ сас правильни англа Дэл и жувэнас кадя, кай пала лэндэ на сас нисави дош, — вонэ ритярэнас вся лэ Иеговаско* законо и терэнас вся, со во ԥэнэнас. 7 Но лэндэ на сас бэяцэ, важ кода кай и Елизаве́та сас насвали и не моӷла тэ анэн бэятонэн*, и вонэ лэдуй сас андэ ԥурэ бэрша.

8 Еқвар о Заха́рия терэлас англа Дэл и рашаицко дила, важ кода кай поджыля и время важ лэско круӷо*. 9 Сар када терэласпэ кай и рашая, лэс витидэ́, кай во тэ зажал андэ лэ Иеговаско свынто ҭан* и тэ сԥабарэл и ароматно смесь*. 10 Кала во сԥабарэлас и ароматно смесь, о народо мангэласпэ аврял. 11 Неожыдано лэ Захариясти сыкаделя лэ Иеговаско анӷело: во тердёлас справа лэ жэртвеникостар, пэ саво сԥабарэнас и ароматно смесь. 12 Кала о Заха́рия додиқля лэ анӷелос, во на ӷанэнас, каринг тэ дэл, и лэс шутя андэ дар. 13 Но о анӷело ԥэндя лэсти: «На́ дар, Заха́рия, о Дэл ашундя тири молитва. Тири хулаи и Елизаве́та анэна тути шавэс, и ту приԥэнэса лэсти Иоа́но. 14 Ту лэса тэ радуиспэ и тэ лошавэс и бут мануша авэна ради, кай во арақаделя, 15 важ кода кай во ашэла ашунгло андэ лэ Иеговастирэ яқа. Но во на трэбуй тэ пэл ни о вино, ни авэр пимос*. Инке жы каринг кода, сар во арақадёла, лэсти авэла дино о свынто зор, 16 и во поможыя бутэ израильтянонэнди тэ ринпэ каринг пэско Дэл — каринг о Иегова. 17 Во жала англа Дэл лэ Ильястиря хваткаса* и зорэса, кай тэ стерэл лэ дадэнго ди кацаво жэ, сар лэ бэятонэнго ди*, и тэ поможый лэ найкандинэнди тэ ашэн кацавэ жэ годявэрнэ, сар кодэла, ко правильни. Кадя во поможыя лэ народости тэ авэл ӷотово важ о Иегова».

18 О Заха́рия пушля лэ анӷелостар: «Сар кацаво можэт тэ авэл? Мэ ужэ ԥуро, и мэрни хулаи тожэ андэ бэршэндэ». 19 О анӷело ԥэндя: «Ман ақарэн Гаври́ло, и мэ тердював англа Дэл*. Ман бишалдэ тэ пэрэдав тути кадэя лащи новость. 20 Но ту на патяян мэрнэ алавэнди, хоть андэ время, сави стодя о Дэл, вся и ашэла кадя, сар мэ ԥэндэм. Кочай ту не сможэш тэ дэс дума, пока вся када на терэлапэ». 21 Андэ кодэва маменто о народо аштярэлас лэ Захарияс. И мануша нащи полэнас, васо во кадя долӷо на вижал анда свынто ҭан. 22 Ай кала во вижыля, во не моӷ тэ дэл дума, и вонэ полинэ, кай андо свынто ҭан лэсти варисо сыкаделя. И важ кода, кай во не моӷ тэ дэл дума, во сыкавэлас лэнди лэ вастэнца, со камэлас тэ ԥэнэн. 23 Кала во стердя и рашаицко дила, во жыля цэрэ.

24 Через дэсави время лэстири хулаи и Елизаве́та ля тэ аштярэл бэятос* и панч шон на вижалас анда цэр. Вой ԥэнэнас: 25 «Акэ со стердя важ мандэ о Иегова: во на бистэрдя ман, кай тэ злэл пар мандэ о лажаимос».

26 Кала и Елизаве́та ԥирэлас ужэ шовто шон, о Дэл бишалдя лэ анӷелос лэ Гаврилос андо галилейско форо Назаре́то 27 каринг и манушни, сави на сас миростэ,* вой сас просватано пала мануш, савэс ақарэнас Ио́сифо, во сас анда лэ Давидоско колено. Кадэла манушня ақарэнас Мария. 28 Кала о анӷело авеля каринг латэ, во поздоровкиисайля ласа и ԥэндя: «О Иегова туса, тути випэля особо бах*!» 29 Кадэлэ алавэндар вой фартэ запережывала и ля тэ гиндой, со во кадэлэса камля тэ ԥэнэн. 30 О анӷело ԥэндя лати: «На́ дар, Мариё. О Дэл здиқля пэр тутэ. 31 Ту лэса тэ аштярэс бэятос*, анэса шавэс и приԥэнэса лэсти Исусо. 32 Во авэла ашунгло, пэр лэстэ ԥэнэна лэ Барэ Дэвлэско Шаво, и о Дэл о Иегова дэла лэсти тэ правий па лэ Давидоско троно, лэстирэ дадэско. 33 Во лэла вечно тэ правий пэ бэяцэ анда лэ Иаковоско колено и никала на парашэла тэ хулаий сар Царё*».

34 И Мария пушля лэ анӷелостар: «Сар када можэт тэ авэл, если мэ никала на сымас миростэ?» 35 О анӷело ԥэндя: «Пэр тутэ авэла о свынто зор; лэ Барэ Дэвлэско зор ушаравэла тут. Важ када по бэято, саво тутэ арақадёла, ԥэнэна свынто, лэ Дэвлэско Шаво. 36 Тири родичка и Елизаве́та тожэ аштярэл бэятос, шавэс, хоть вой ужэ андэ бэршэндэ. О миро гиндояс, кай вой насвали и латэ не моӷут тэ авэн бэяцэ, но вой ԥирэл ужэ шовто шон. 37 Важ кода кай важ о Дэл нинай нисо невозможно*». 38 Тоди и Мария ԥэндя: «Мэ лэ Иеговастири рабыня! Мэк авэл манца вся, со ту ԥэндян». И о анӷело ужылятар.

39 Посли када и Мария ӥто жыля андо форо, саво андэ Иудейски плая. 40 Вой зажыля андо цэр кай о Заха́рия и задя дума* ла Елизаветаса. 41 Кала и Елизаве́та ашундя ла Мариятирэ алава, о бэято латэ андо ӥло потхукля. Ла Елизаветати сас дино о свынто зор, 42 и вой ӷромко ԥэндя: «Ту само бахтали* анда всаворэ жувля и бахтало* тиро бэято! 43 Каринг мандэ авеля мэрнэ Царёстири* дэй! Сар жэ мэ затердэм кацави бах*? 44 Сар мэ кати ашундэм тирэ алава, о бэято мандэ андо ӥло потхукля лошатар. 45 Бахтали кодэя, ко патяя, важ кода кай вся, пала со о Иегова дя лати алав, ашэла кадя!»

46 И Мария ԥэндя: «Мэрно ди андярэл лашо алав по Иегова, 47 и мэ лошавав через о Дэл, саво спасый лэ мирос, 48 важ кода кай во шутя сама пэ пэстири служанка, сави нисо на ашэл! Акана всаворэ народоря* лэна тэ ԥэнэн пэр мандэ бахтали, 49 важ кода кай о Зорало Дэл стердя важ мандэ бари дила. Лэско алав свынто. 50 Во никала* на парашэл тэ авэл одяло каринг кодэла, ко дарал лэстар. 51 Во стердя пэстирэ вастэса ашунгли дила, росшутя кодэлэн, ко путярдо. 52 Во сшутя лэ барэ манушэн па лэндирэ троноря* и вазгля лэ простонэ манушэн, 53 правардя лэ боқалэн, ай лэ барвалэн одбишалдя би нисоско. 54 Во авеля тэ дэл помощь пэстирэ слуӷости лэ Израилёсти, важ кода кай на бистрэлас пала алав, саво дя, — о вико вечно тэ авэл одяло 55 каринг о Авраамо и каринг лэстирэ бэяцэ*, сар во и ԥэнэнас амарэ ԥурэнди». 56 И Мария сас кай и Елизаве́та варикай трин шон, ай посли када рисайля цэрэ.

57 Поджыля и время, и кай и Елизаве́та арақаделя шаво. 58 Латирэ сосидоря и лако родо ашундэ, кай о Иегова сас фартэ одяло каринг латэ, и линэ тэ лошавэн вместе ласа. 59 По восьмо дес вонэ авелэ тэ опшынэн лэ бэятос и камлэ тэ приԥэнэн лэсти па лэско дад — Заха́рия. 60 Но лэстири дэй ԥэндя: «Най. Лэс ақарэна Иоа́но». 61 Вонэ ԥэндэ: «Машкар тиро родо никас кадя на ақарэн», 62 и линэ вастэнца тэ пушэн лэ дадэстар, сар во камлоп тэ приԥэнэн лэ бэятости. 63 О Заха́рия мангля досточка и пистросардя: «Лэско алав — Иоа́но». И всаворэ фартэ удивисайлэ. 64 Андэ кодэва маменто каринг о Заха́рия рисайля и дума, во задя дума и ля тэ ԥэнэн лашо алав пала Дэл. 65 Тоди всаворэн, ко жувэлас паша лэндэ, ля и дар, ай и новость пала када розжыляпэ па вся кодэва краё андэ Иуде́я. 66 Всаворэ, ко када ашунэлас, гиндонас пала када и ԥэнэнас: «Ко жэ авэла кадэва бэято?» — важ кода кай дицолас, кай лэса о Иегова.

67 Лэстирэ дадэсти лэ Захариясти сас дино о свынто зор, и во ля тэ ԥэнэн и дэвликунэ алава*: 68 «Мэк жал лашо алав по Иегова, пэ лэ Израилёско Дэл, саво на бистэрдя пэстирэ народос и спасысардя лэс! 69 Во дя амэнди тэ спасысавас* через пэстирэ рабоско, лэ Давидоско колено, 70 важ кода кай через лэ Дэвлэстирэ особи свынти мануша, савэ жувэнас дэлмут, во ԥэнэнас, 71 кай спасыя амэн лэ вороӷонэндар и всаворэндар, ко амэн вэрыцый. 72 Во зритярэла о алав, саво дя амарэ ԥурэнди, и авэла одяло каринг амэндэ. Во на бистрэла пала пэско свынто доӷоворо, 73 пала солах, сави во дя амарэ ԥурэсти лэ Авраамости. 74 Во солахадя, кай, кала спасыя амэн лэ вороӷонэндар, дэла амэнди бари бах тэ андярас* лэстири время би дарако, 75 всаворэ́ одеса и правильно вся амари жызня. 76 Ай ту, мэрно шаво, авэса лэ Барэ Дэвлэско особо мануш, важ кода кай ту жаса англа Иегова, кай тэ стерэс важ лэстэ о дром 77 и тэ анэс лэстирэ народости и новость, кай о Дэл спасыя лэс. Када авэла возможно через кода, кай простинапэ и бэзэха 78 и кай амаро Дэл лэла тэ жалуий. Пар мэндэ, сар тэсара лэ қамэстар, дэладап лэско свето кодэлэстар, кай во жалуий амэн. 79 Кадя во лэла тэ светий кодэлэнди, ко андэ тэмнота и андэ тень ла смэртятар, и тэ андярэл амэн па дром каринг и мирно жызня».

80 О бэято вибареля и ашэля састо лэ Дэвлэстирэ свынтонэ зорэстар. Англа кода сар тэ авэл каринг о Израилё, во жувэлас андэ пустыня.