Свынто тайна
1 Лэ Исусостири лэ Христостири свынто тайна, пала сави во дя тэ ӷанэн. Во уӷангля пала када лэ Дэвлэстар, кай тэ сыкавэл лэстирэ рабонэнди, со ӥто трэбуй тэ авэл. О Исусо бишалдя лэ анӷелос и через лэстэ сыкадя пэстирэ рабости лэ Иоаности, сар када авэла. 2 О Иоа́но потвердисардя кода, со ԥэндя о Дэл и пала со дэлас дума о Исусо Христос, — во росԥэндя пала вся, со диқля. 3 Бахтало кодэва, ко адиной*, и бахталэ кодэла, ко ашунэл кадэла дэвликунэ алава и терэл кадя, сар ашундя, важ кода кай пашэ и время, сави стодя о Дэл.
4 Мэ, о Иоа́но, пистросарав и взвисавав каринг и семь ӷурторя андэ Азия.
Мэк здиқэл пэр тумэндэ па пэско баро ковло ди и дэл мирно жызня кодэва, ко исин, сас и авэла, ай кадяжэ семь зора, савэ англа лэско троно, 5 и о Исусо Христос, о Кандино* Свидетелё, пэрво анда мулэ и правителё пэ ла ԥувьятирэ царёря.
О Исусо любий амэн и пэстирэ ратэса освободисардя амэн лэ бэзэхэстар 6 и стодя тэ авас лэстирэ Дэвлэстирэ и Дадэстирэ царёря и рашая. Мэк во авэл ашунгло и зорало о вико вечно. Аминь.
7 Во авэла машкар тучи, и лэс диқэна всаворэ, дажэ кодэла, ко лэс пропусадя. Через лэстэ всаворэ породы пэ ԥув лэна тэ марэн пэс андо колин бидатар. Кадя и авэла, аминь.
8 О Дэл о Иегова* ԥэнэн: «Мэ А́льфа и Аме́га*, кодэва, ко исин, сас и авэла, о Само Зорало Дэл».
9 Мэ, о Иоа́но, тумаро ԥрал и лэ Исусоско ученико, вместе тумэнца ашавпэ састо андэ ԥари время и аштярав, кала ласа тэ прависарас андо царство. Мэ сымас по острово Па́тмасо важ кода, кай давас дума пала Дэл и росԥэнавас пала Исусо. 10 О Дэл пэстирэ свынтонэ зорэса пэрэандярдя ман андэ лэ Барэ Хуласко дес, и мэ ашундэм пала думэ́ ӷромко ӷолосо, саво сас, ԥэнэса анда трубатэ. 11 Во ԥэндя: «Запистросар* кода, со диқэса, и бишал андэ семь ӷурторя: андо Ефе́со, андэ Сми́рна, андо Перга́мо, андэ Фяти́ра, андэ Са́рды, андэ Филадэ́льфия и андэ Лади́кия».
12 Мэ обрисайлэм, кай тэ диқав, ко дэл дума манца, и додиқлэм семь сомнакунэ лампы. 13 Машкар кадэла лампы сас варико кацаво, ко шоласпэ пэ лэ манушэско шаво. Во сас утидо андэ лунго ӥда и заԥангло па колин буӷля сомнакуня кущикаса. 14 И бал пэ лэско шэро сас сар парни шэрсть, сар ӥв, ай лэстирэ яқа — сар яг, сави марэл половняса. 15 Лэстирэ пэрнэ блестинас, сар вужо харкум, саво сас биладо андо бов, ай лэско ӷолосо шоласпэ по шумо лэ барэ паестар*. 16 Андо право вас лэстэ сас семь черӷая, анда лэско муй вижалас лунго и востро бари шури*, ай о муй лэстэ фартэ светияспэ, сар қам. 17 Кала мэ додиқлэм лэс, мэ пэлэм сар муло андэ лэстирэ пэрнэ.
Тоди во стодя пэр мандэ о право вас и ԥэндя: «На́ дар. Мэ Пэрво и Послиднё, 18 мэ кодэва, ко жувэл. Мэ сымас муло, но акана жував вечно, и мандэ исин тии па смэрть и па моӷилка*. 19 Запистросар, со ту диқлян, со терэлпэ щас и со авэла посли када. 20 Мэ дава тути тэ ӷанэс и свынто тайна пала семь черӷая, савэ ту диқлян андэ мэрно право вас, и пала семь сомнакунэ лампы: семь черӷая — када анӷелоря анда семь ӷурторя, ай и семь лампы — када семь ӷурторя.