Вся время поможын и алава анда Библия?

ԤЭНАСА, ту авелян андо музеё. Кала ту ԥирэс па зало, ту диқэс, кай бут статуи времяса ашэлэ пуранэ и поԥарэлэ. Дэсавэ статуи даже которэнца поԥаделэ. Но акэ, ек статуя тердёл цыло, и ла можно драго тэ роздиқэс. Ту пушэс: «Кадэя статуя най фартэ дэлмутни?» Кодэва, ко сыкавэл о музеё, ԥэнэн: «Най. Када ек анда само дэлмутни, и ла ни еқвар на подлашардэ». Ту пушэс: «Файма, тумэ драго диқэнас пала латэ?» Но кодэва, ко сыкавэл о музеё, ԥэнэн: «Най. Вой дэкала сас тала брышын и балвал. И мануша най еқвар камэнас тэ римон ла». Тоди ту закамлоп тэ пушэс: «Андар со вой стерди?»

Можно тэ ԥэнэс, кай и Библия, сар кадэя статуя. Каринг амэндэ дожылэ и авэр пуранэ книжки. Но бут андар лэндэ, сар прожыля и время, римосайлэ. Кадяжэ кода, со андэр лэндэ ԥэнэнпэ пала наука, на сжалпэ кодэлэса, со адес уже доԥэндо. Кода, со андэр лэндэ ԥэнэнпэ, сар о мануш трэбуй тэ лечийпэ, май йто римой о зор, чем фэрий. Бутэ пуранэ свитконэндар ашэлэпэ кати котора. Ай дэсавэ котора слинэ хасардэ или римосайлэ.

Дицол, кай и Библия най кацави, сар авэр дэлмутнэ книжки. Ла линэ тэ пистрон май бут чем 35 викоря палпалэ. Но вой всаек дожыля каринг амэндэ и на паруделяпэ. Вся кодэя время, и мануша камэнас бут со тэ терэн, кай и Библия тэ на авэл. И важ када вонэ сԥабарэнас ла, на мэкэнас, кай и мануша тэ адинон ла и асанаспэ кодэлэстар, со андэр латэ пистромэ. Но кай и мануша нисо на вижыля. Сар жалас и время, и мануша уӷанэнас варисо нэво пала наука. Ля май драго тэ дицол, кай и Библия най кацави, сар авэр дэлмутнэ книжки. Васо? Важ кода кай андэ Библия инке дэлмут ԥэндо, со и мануша инке на ӷанэнас. (Диқэн и рамка «Вой дэлмутни чи андэр латэ ԥэндо, со и мануша инке на ӷанэнас?».)

СО АМЭНДИ ТРЭБУЙ ТЭ ТЕРАС?

Может, ту пушэса: «Чаче кода, сости сытярэн и алава анда Библия, поможыя амэнди андэ кадэла деса?» Кай тэ ӷанас, со тэ ԥэнас, погиндосарэн акэ пала со. Состар адес май бут ԥарэс лэ манушэнди? Бут мануша ԥэнэна, када кодэлэстар, кай исин войны, и мануша мэлярэн и ԥув, чорэн, умарэн аврэн и кай и мануша подтинэн лэ ловэнца аврэн. Пуш пэстар: «Если и мануша тэ жувэн кадя, сар сытярэн и алава анда Библия, авелоп май драго?» Акана адиносараса алава анда Библия, савэ запистромэ май тэлэ.

ТЭ ЛАДИСАРАС АВРЭНЦА

«Бахталэ кодэла, ко терэн миро машкар и мануша, важ кода кай пэр лэндэ лэна тэ ԥэнэн, кай вонэ лэ Дэвлэстирэ шавэ» (Матфея 5:9). «Терэн вся пэстиря ригатар, кай тэ авэл миро всаворэ манушэнца» (Римлянам 12:18).

ТЭ ЖАЛУИСАРАС АНДА ВСЯ ОДИ И ТЭ КАМАС ТЭ ПРОСТИСАРАС

«Бахталэ кодэла, савэ жалуин анда вся оди, важ кода кай и лэн лэна тэ жалуин анда вся оди» (Матфея 5:7). «На холявэн ек пэ ек и анда вся оди простин ек еқэс, если варикастэ исин васо тэ холявэл пэ авэр. Сар о Иеговаa анда вся оди простисардя тумэн, кадяжэ простин и тумэ» (Колоссянам 3:13).

ТЭ НА ДИҚАС, САВИ НАЦИЯ

«Еқэ манушэстар во [о Дэл] создал всаворэ манушэн, кай вонэ тэ жувэн па вся ԥув» (Деяния 17:26). «О Дэл на диқэл, сави кай о мануш нация. Но андэ любо народо, о мануш, саво дарал лэстар и ритярэл лэско законо, чалёл лэсти» (Деяния 10:34, 35).

ТЭ ФЭРИСАРАС И ԤУВ

«О Дэл Иегова дя лэ манушэсти тэ жувэл андо садо Эдемо, кай во тэ диқэл пала лэстэ и тэ залэлпэ котэ ла ԥувьяса» (Бытие 2:15). О Дэл умарэла «кодэлэн, ко римой и ԥув» (Откровение 11:18).

ТЭ НА АВАС ЧОРЫМАСТИРЭ И ТЭ АВЭЛ ГРЯЦА О БИЛАЖАВАРДИМОС

«Фэринпэ, кай ни андэр со тэ на авэн чорымастирэ, важ кода кай даже, кала о мануш барвало, када на дэл лэсти жизня» (Луки 12:15). «Кай тэ на авэл тумэндэ нисаво билажавардимос и со найвужо или тэ на авэн чорымастирэ, важ кода кай тумэ тэлён лэ Дэвлэсти» (Эфесянам 5:3).

ТЭ НА ХОХАВАС И ТЭ ЛЮБИСАРАС ТЭ ТЕРАС БУТИ

«Камас ни андэр со тэ на хохавас» (Евреям 13:18). «Ко чорэ́лас, мэк будэр на чорэл, ай фэдэр тэ стол о зор, кай тэ терэл и бути» (Эфесянам 4:28).

ТЭ ПОМОЖЫСАРАС АВРЭНДИ

«Подритярэн кодэлэн, касти ԥарэс по ди, поможын кодэлэнди, касти найвушэро, на холявэн ни пэр кастэ» (1 Фессалоникийцам 5:14). «[Поможын] кодэлэнди, кастэ нинай дад и лэ ԥивлянди андэ лэнго ԥаримос» (Иакова 1:27).

Но када най просто шукарнэ алава. Кода, со пистромэ андэ Библия, кадяжэ поможый амэнди тэ ценисарас и тэ терас андэ пэсти жизня, кода, со андэ Библия пистромэ. Тэ жудоп и мануша кадя, сар пистромэ андэ Библия, тоди скати ԥаримос на авелоп! Дицол, кай кода, со андэ Библия пистромэ, адес фартэ драго поможый. Но сар кода, со пистромэ андэ Библия может тэ поможый тути уже адес?

ДИЦОЛ, КАЙ АЛАВА АНДА БИБЛИЯ ПОМОЖЫН УЖЕ АДЕС

Ек годявэрно мануш варикала ԥэндя, кай и мудрость дицол пэ дила (Матфея 11:19). Гиндос ту кадяжэ? Пала кадэла алава можно тэ ԥэнэс, кай вонэ годявэрнэ, кала ту диқэса, кай вонэ поможысардэ. Может, ту гиндос: «Если кода, со ԥэнэнпэ андэ Библии поможый, тоди мэрни жизня трэбуй тэ авэл фэдэр. Сар кода, со андэр латэ пистромэ, поможыя манди андэ мэрно ԥаримос?» Уӷанаса, со сас еқа жувляса.

Кай и Раяb сас вся драго андэ жизня. Но латэ тердяпэ бида, и вся паруделяпэ. Спэрва латэ муля и щей. Ай после кода, латар жылятар о хулай. Лати сас фартэ ԥарэс лэ ловэнца. И Рая росԥэнэн: «Мэ уже на ӷанавас, ко мэ. Мандэ будэр на сас ни и щей, ни о хулай, ни о цэр. Мандэ сас по ди фартэ шушо, мандэ на сас зор, кай варисо тэ терав и пала варисо тэ гиндосарав».

Пэ пэсти ԥари жизня, и Рая поля кода, саво чачимос запистромэ андэ Библия: «Амарэ деса, семьдесят бэрш. Ай сар исин май бут зор, восемьдесят бэрш, но андэр лэндэ всаек бут ԥаримос и биды. И бэрша фартэ йто прожан» (Псалом 90:10).

Кала ла Раяти сас ԥарэс, вой ля тэ адиной и Библия. И када спасысардя ла. Сар сыкавэн авэр статьи андэ кадэя брошюра, бут мануша полинэ, кай и алава анда Библия могут тэ поможын и тэ парувэн вся и жизня. И Библия, сар кодэя лащи статуя андо музеё, пала сави ԥэнэнаспэ англа кадэя статья. Дицол, кай вой най кацави, сар бут авэр книжки, савэ времяса ашэн пуранэ. Может вой най кацави сар авэр, важ кода кай андэр латэ исин, со нинай андэ авэр? Можно тэ патяс кодэлэсти, кай андэр латэ запистромэ лэ Дэвлэстирэ гиндоря, ай най лэ манушэндирэ? (1 Фессалоникийцам 2:13).

Может, ту кадяжэ ԥэнэса, кай и жизня йто прожал и андэр латэ бут ԥаримос. Кала ашэл фартэ ԥарэс по ди, кай ту родэс кода, со поможыя и подритярэла тут?

Давай уӷанаса, сар алава анда Библия могут

1.  тэ фэрин,

2.  тэ улэн,

3.  тэ терэн май вушэро по ди.

Анда авэр статьи умэ уӷанаса, сар кода, со пистромэ андэ Библия, поможый андэ жизня.