Кода, со о Дэл дэлмут ԥэндя, кадя, вся и ашэля
Амэ набут дям дума пала царё Крёзо. Во патяя кодэлэсти, со ԥэндя о дельфийско ора́куло и процэлдя и война лэ Кироса, саво сас царё андэ Персия. Андэ Библия кадяжэ исин алава, савэ сас дэлмут ԥэндэ и савэ сас трэбуй тэ авэн пала царё Персии. Када на шолпэ пэ кода, со ԥэндя о ора́куло, важ кода кай вся, со сас ԥэндо, стердяпэ.
Варикай пала 200 бэрш жы каринг кода, сар тэ арақадёлпэ о Киро, о еврейско пророко Исаия ԥэндя, сар ақарэна кадэлэ царёс. Кадяжэ во ԥэндя, сар во захутилэла о састо форо Вавилоно.
Исаия 44:24, 27, 28: «Кадя ԥэнэн о Иегова... [...] Ԥэнав лэ паести, саво ӷлыбо́ко: „Вишутю, мэ вишутярава всаворэ тирэ лэна“. Кадяжэ ԥэнав пала Киро: „Во мэрно пастухо, и во стерэла вся, со мэ камав, и кадяжэ мэрнэ алава пала Иерусалимо: „Во авэла вазгло, ай пала храмо ԥэнав: „Тиро фундаменто авэла стодо“».
Сас о Геродо́то, саво сас ӷреко и саво драго ӷанэнас и полэлас история. Во ԥэндя, кай лэ Киростирэ воиноря стердэ кадя, кай и лэн Ефрато, сави прожалас через о Вавилоно, тэ жал андэ авэр риг. Када поможысардя, кай и персидски воиноря тэ прожан па лэн, кай ашэля май набут паи и тэ зажан андо форо. Кала о Киро захутилдя о Вавилоно, во одмэкля лэ евреёнэн анда вавилонско плено. Во мэкля лэн, кай вонэ тэ ринпэ андо Иерусалимо и тэ ваздэн о форо, саво сас розмардо и 70 бэрш сас замэкло.
Исаия 45:1: «Кадя ԥэнэн о Иегова пэстирэ помазанникости лэ Кирости, савэс во ля пала право вас, кай тэ тэлярэл англа лэстэ и народоря и тэ злэл и кущика па царёря, кай тэ ԥэрнавэл англа лэстэ и двойни вудара и кай и вороты ԥандадэ тэ на авэн».
И персидски воиноря зажылэ андо Вавилоно через и двойни вороты, савэ слинэ барэ и буӷлэ. И вороты сас ԥэрнадэ, важ кода кай на удиқлэ, кай тэ ԥандавэн лэн. Тэ ӷанглоп и вавилоняноря, со загиндосардя о Киро тэ стерэл, вонэ ԥандадоп всаворэ вороты, савэ андярэнас каринг и лэн. Но вонэ на уӷанглэ и о форо сас захутилдо.
Кода, со сас дэлмут ԥэндо пала Киро, када ек, со пистромэ андэ Библия, кай трэбуй тэ авэл. И кода, со сас лэ Кироса, фартэ лэл лэ одестар, важ кода кай со сас дэлмут ԥэндо вся кадя и стердяпэa. Када на шолпэ, савэ алава ԥэнэнас и мануша, через и хохавнэ дэвла. Васо? Важ кода кай кадэла алава, савэ трэбуй сас тэ авэн англэ, ԥэндя кодэва, ко ԥэндя пала пэстэ: «Мэ росԥэнав май англал кода, со авэла англэ и жы анда дэлмутни время пала кода, со инке на стердэм» (Исаия 46:10).
Кати о чачуно Дэл, савэс ақарэн Иегова, ԥэнэн кацавэ алава. И мануша, савэ драго полэн и Библия, ԥэнэн: «Во ашэл кодэлэса, каса трэбуй тэ ашэл». Кадэла алава сыкавэн, кай во ӷанэн кода, со авэла англэ и терэл кадя, кай тэ авэл кода, со во загиндосардя. Када дэл тэ патяс, кай пала вся, со во дя алав, всаек вся кадя и стерэла.
КОДА, СО САС ДЭЛМУТ ԤЭНДО, ТЕРЭЛПЭ И АДЕС
Камлоп ту тэ уӷанэс, со андэ Библия ԥэнэнпэ пала амарэ деса? Варикай 2 000 бэрш палпалэ андэ Библия ԥэнэнаспэ, кай «андэ послидни деса авэла фартэ ԥари время». Послидни деса авэла сости? Най ла ԥувьяти и лэ манушэнди, ай кодэлэсти, кай на авэла ԥаримос, кай и мануша на ладин ек еқэса и кода, кай тасавэн пэ мануша. Най ек бэрш и мануша домардён тэ улэн, кай када вся тэ на авэл. Акэ дэсо анда кода, со сас дэлмут ԥэндо и трэбуй тэ авэл андэ «послидни деса».
2 Тимофею 3:1—5: «Андэ послидни деса... И мануша лэна тэ любин кати корко пэс, тэ любин и ловэ, тэ патян кати андэр пэстэ, тэ гиндон пала пэстэ бут, тэ ԥэнэн найлашэ алава по Дэл, тэ на кандэн лэ дадэс и ла да, авэна найблаӷодарни, лэна тэ ашавэн, важ кода кай на любин, на лэна тэ полэн пэстирэ родос, на авэна тэ ладин, лэна тэ хохавэн, на ӷанэна тэ ритярэн пэс андэ вас, авэла баруно ди, на любина тэ терэн лашимос, лэна тэ придэн, тэ терэн кати па пэстирятэ, тэ заваздэн о шэро, тэ любин и развлечении и тэ отцыён. Но на любина лэ Дэвлэс. Притерэнапэ, кай на ашавэн лэ Дэвлэс, важ кода кай любин лэс, но отшон лэско зор».
На здэлпэ тути, кай адес кацавэ манушэн ашэл май бут? Диқлян ту кацавэ манушэн, савэ фартэ любин кати пэс, любин фартэ ловэ и заваздэн о шэро? Ту шутян сама, кай и мануша на ладин и камэн, кай вся тэ авэл кати па лэндирятэ? Ту кадяжэ шутян сама пэ кода, кай и бэятцэ адес на кандэн пэстирэ дадэс и ла да, и кай и мануша май фартэ любин и развлечении и тэ отцыён, чем лэ Дэвлэс. Дес десэстар вся ашэл кати май вэрыто.
Матфея 24:6, 7: «Тумэ ашунэна пала войны, савэ лэна тэ терэнпэ андэ разни ҭана. [...] Народо жала пэ авэр народо, и царство пэ авэр царство».
И мануша виадиносардэ, кай жы лэ 1914 бэршэстар ашэлэ бут войны. Андэ кадэла войны мулинэ май бут, чем 100 миллионоря мануша. Погиндон, када най кати цифра, но када сыкавэл, скати када андя ясва, биды и ԥаримос! Сытелэ анда када варисости и мануша? Стердэ вонэ варисо, кай тэ на авэн войны?
Матфея 24:7: «Авэла боқалимос».
Дэсавэ мануша анда ООН, савэ диқэн пала хамос па вся миро, ԥэнэн: «Андо миро исин бут хамос, кай тэ проправарэн всаворэн. Но 815 миллионоря мануша всаек, кажно девято андар лэндэ, пэрэл тэ совэл боқало. Инке, кажно трито мануш андо миро насвавэл кодэлэстар, кай на дохал». Сар дэсавэ пистрон, кажно бэрш лэ боқалимастар мэрэн варикай трин миллионоря бэятцэ.
Луки 21:11: «Авэла фартэ тэ тинойпэ и ԥув».
Кажно бэрш варикай 50 000 разоря найфартэ тинойпэ и ԥув. Варикай 100 андар лэндэ анэн каринг кода, кай фартэ розмарэл и здании. И варикай еқвар андэ кажно бэрш лэл фартэ тэ тинойпэ и ԥув. И мануша виадиносардэ, кай лэ бэршэстар 1975 жы кай 2000 бэрш, кодэлэстар, кай фартэ тиносайля и ԥув, мулинэ 471 000 мануша.
Матфея 24:14: «Кадэя лащи весть пала царство росԥэнэна па вся ԥув, кай тэ уӷанэн всаворэ народоря, и тоди авэла конец».
Лэ Иеговастирэ свидетелёнэн май бут, чем восемь миллионоря мануша. Вонэ росԥэнэн и лащи весть важ лэ Дэвлэско царство па вся ԥув, варикай андэ 240 страны. Кадяжэ вонэ росԥэнэн и лащи весть важ лэ Дэвлэско царство андэ фороря, кай фартэ бут мануша, андэ дурутнэ гавора, андэ джунгли и котэ кай и плая. Кала о Дэл диқэла, кай кадэя дила уже стерди, тоди, сар дэлмут сас ԥэндо, «авэла конец». Конец сости? Кодэлэсти, кай и мануша правин и тоди авэла лэ Дэвлэско царство. Сави авэла тутэ жизня, кала лэла тэ правий лэ Дэвлэско царство? Пала када ту уӷанэса анда авэр статьи.