Подритярэн аврэн, сар о Иегова

1. Савэ алавэнца о Иегова подритярдя лэ манушэн, кала вонэ андо Эдемо жылэ против лэстэ?

КОДЭЛА времятар, сар и мануша ашэлэ лэ бэзэхэстирэ раборя и ашэлэ найсовершени, о Иегова най еқвар подритярэлас лэн. Андо Эдемо и мануша жылэ против Иегова. Но во йто дя лэнди тэ полэн, кай важ кодэла, ко жана лэ Адамостар най вся авэла бибах. Важ када о Иегова дя алав, саво запистромэ андэ Бытие 3:15. Во ԥэндя, кай кодэва пэрво сап о Сатана, лэс и вся лэстири найлащи дила, во улэла. Кала и мануша полинэ кадэла лэ Дэвлэстирэ алава, савэ инке трэбуй сас тэ авэн, вонэ линэ тэ аштярэн о лашимос (Отк. 12:9; 1 Иоан. 3:8).

О ИЕГОВА ПОДРИТЯРЭЛАС ПЭСТИРЭ МАНУШЭН, САВЭ ЖУВЭНАС АНДЭ ФАРТЭ ПУРАНИ ВРЕМЯ

2. Сар о Иегова подритярэлас лэ Ноёс?

² Лэ Иеговаско мануш о Ноё жувэлас андо миро, андэ саво по Дэл на шонас сама. Лэ Иеговасти тэлёнас кати о Ноё и лэско ери. Андо миро сас фартэ бут билажавардимос, и мануша марэнаспэ и умарэнас ек еқэс. Через када о Ноё умэклоп и вас (Быт. 6:4, 5, 11; Иуды 6). Но о Иегова ԥэндя лэ Ноёсти кода, со дя лэсти зор тэ на дарал. Ай кадяжэ о Иегова ԥэндя лэ Ноёсти, кай во и май англэ тэ авэл друӷо лэ чачунэ Дэвлэса (Быт. 6:9). Инке о Дэл ԥэндя лэсти, кай камэл тэ улэл кадэва найлашо миро. О Иегова росԥэндя лэ Ноёсти, со во трэбуй тэ терэл, кай тэ фэрий пэско ери (Быт. 6:13—18). О Иегова вся время подритярэлас лэ Ноёс.

3. Сар Иегова подритярдя лэ Иисусос Навинос? (Диқэн и картинка англа статья.)

³ Май англэ лэ Иисусости Навиности о Дэл дя найвушэро дила. О Иисусо Навино трэбуй сас тэ заандярэл лэ народос пэ ԥув, пала сави о Иегова ԥэндя, кай авэла лэндири. Кай када тэ стерэл, о Навино май англал трэбуй сас тэ марэлпэ лэ народонэнца, савэ котэ жувэнас и слинэ фартэ зоралэ. Кай о Навино сас васо тэ дарал. О Иегова полэлас када и ԥэндя лэ Моисеёсти тэ подритярэл лэс. Во ԥэндя: «Сто пэ пэско ҭан лэ Иисусос, подритяр лэс и дэ лэсти зор, важ кода кай во англа кадэва народо пэрэжала через и лэн. Када во заандярэла лэ народос пэ ԥув, сави прижалпэ лэнди, сави ту диқэс» (Втор. 3:28). Сар о Навино инке на ля тэ терэл кадэя дила, о Иегова подритярдя лэс кацавэ алавэнца: «На дар и ав састо! На дар и на пэрэдара, важ кода кай тиро Дэл о Иегова туса, каринг ту на жылоп» (Иис. Н. 1:1, 9). Сар тумэ гиндон, со сас кай о Навино андо ди после када?

4, 5. а) Сар о Иегова подритярдя пэстирэ народос андэ пурани время? б) Со ԥэндя о Иегова пэстирэ шавэсти, кай тэ подритярэл лэс?

⁴ О Иегова подритярэлас най кати дэсавэн манушэн, но и вся пэско народо. О Иегова подритярдя лэ евреёнэн, савэ слинэ андо плено андо Вавилоно. Во ԥэндя лэнди алава, савэ инке трэбуй сас тэ авэн англэ: «На дар, важ кода кай мэ туса. На дик па рига даратар, важ кода кай мэ тиро Дэл. Мэ дава тути зор, поможысарава тути, састэс ритярава тут правонэ вастэса, саво терэл чачимос и лашимос» (Ис. 41:10). Кадяжэ о Иегова подритярэлас лэ христианонэн, савэ жувэнас андэ пэрво вико, ай кадяжэ подритярэл пэстирэ манушэн и андэ амари время. (Адиносар 2 Коринфянам 1:3, 4a).

⁵ Со ԥэндя о Иегова пэстирэ шавэсти, кай тэ подритярэл лэс? Кала о Иисусо болдёлас, во па нэбо ашундя лэ Иеговастирэ алава: «Када мэрно любимо шаво, саво терэл кода, со манди чалёл» (Матф. 3:17). Кода, со ԥэндя о Иегова, дя лэ Иисусости фартэ баро зор, кай во тэ терэл лэ Иеговастири дила, кала сас пэ ԥув.

О ИИСУСО ПОДРИТЯРЭЛАС АВРЭН

6. Сар амэн подритярэл лэ Иисусостири притча пала таланторя?

⁶ О Иисусо, сар и лэско дад, подритярэлас аврэн. Во ԥэнэнас, кай и христианоря тэ на парашэн лэс тэ кандэн. Важ када во росԥэндя притча пала таланторя. Андэ кадэя притча о хулай хвалий кажнонэс анда раборя, савэ на парашэн лэс тэ кандэн. Во ԥэнэн кацавэ алава: «Драго стердян! Ту терэс лашимос. Ту рабо, саво на парашэл тэ кандэл. Андэ найбари дила ту на парашэлян тэ кандэс, важ када мэ става тут пэ май бари дила. Ав лошало тирэ хуласа» (Матф. 25:21, 23). Кадэла алава подритярдэ лэ Иисусостирэ манушэн, динэ лэнди зор и май дур тэ на парашэн тэ кандэн лэ Иеговас, и тэ терэн лэстири дила!

7. Сар о Иисусо подритярэлас лэ апостолонэн, но май фартэ лэ Петрос?

⁷ О Иисусо вся время подритярэлас пэстирэ апостолонэн. Во на шолас сама, кай вонэ дэкала терэнас варисо най кадя. И апостолоря най еқвар споринаспэ, ко андар лэндар май баро. Но о Иисусо на холявэлас пэр лэндэ. Во ԥэнэнас, кай вонэ тэ на заваздэн о шэро и тэ андярэн пэс, сар слуӷоря, ай най сар барэ мануша (Луки 22:24—26). О Пётро най еқвар терэлас кода, со на чалёлас лэ Иисусости (Матф. 16:21—23; 26:31—35, 75). Но о Иисусо на отԥэнделяпэ лэ Петростар. Во драго дя дума лэса и стодя лэс тэ диқэл пала ԥрала и ԥэя анда собрании (Иоан. 21:16).

ПОДРИТЯРЭНАС АНДЭ ПУРАНИ ВРЕМЯ

8. Сар о Езеки́я подритярдя лэ барэ манушэн анда армия и лэ манушэн анда Иуда?

⁸ Лэ Иеговастирэ мануша полэнас, пэ скати трэбуй тэ подритярэн аврэн. Вонэ када ӷанэнас, сар инке лэ Дэвлэско шаво на авеля пэ ԥув и на сыкадя, сар када тэ терэн. Погиндон пала Езеки́я. Кала и ассирийцоря камлэ тэ дэн по Иерусалимо, во стидя лэ барэ манушэн анда армия и лэ манушэн анда иудея, кай тэ подритярэл лэн. Кала вонэ ашундэ лэстирэ алава, вонэ «линэ зор». (Адиносар 2 Летопись 32:6—8b).

9. Со пала кода, сар подритярэн, амэ уӷанас анда книӷа Иов?

⁹ Лэ Иовости сас фартэ ԥарэс. Но андэ кадэя же время во подритярэлас аврэн. О Иово дя дума лэ манушэнца, савэ авелэ тэ подритярэн лэс. Во ԥэндя, кай сар лэнди прижылоп, во подритярдоп лэн. Сар? Во ԥэндоп алава, савэндар вонэ линоп зор и савэндар лэнди по ди ашэлоп фэдэр (Иов 16:1—5). Май англэ о Иово ашундя алава, савэ лэсти ԥэндя о Елиуё и екжэно о Иегова. Кадэлэ алавэндар лэсти ашэля май вушэро по ди (Иов 33:24, 25; 36:1, 11; 42:7, 10).

10, 11. а) Васо лэ Иеффаёстиря щя трэбуй сас тэ подритярэн? б) Кас андэ амарэ деса трэбуй тэ хвалисарас и тэ подритярас?

¹⁰ Лэ Иеффаёстиря щяти кадяжэ трэбуй сас, кай ла тэ подритярэн. О сындомари Иеффаё трэбуй сас тэ жал тэ марэлпэ лэ аммонитянонэнца. Англа кода, сар тэ жал тэ марэлпэ, во дя солах. Сави? Сар о Иегова дэла лэсти тэ вицэлэл и война, тоди во акэ со стерэла. Во отдэла лэ Иеговасти тэ служий андэ свынто бари катуна кодэлэс, ко пэрво вижала лэстэ, кала во авэла цэрэ. О Иеффаё вицэлдя и война. И пэрво, ко вижыля лэстэ, сас лэстири щей, сави сас лэстэ еқоры. Кадэлэстар лэсти ашэля фартэ ԥарэс по ди. Но всаек во зритярдя пэско алав. Во бишалдя пэстиря щя андо Силомо, кай вой вся пэстири жизня тэ служий лэ Иеговасти андэ свынто бари катуна (Суд. 11:30—35).

¹¹ Кати погиндон, сар дэ ԥарэс сас лэ Иеффаёсти. Но, файма, инке май ԥарэс сас лэстиря щяти, сави стердя кода, пала со солахадя лако дад (Суд. 11:36, 37). Када сыкавэлас, кай вой никала на жала миростэ и латэ на авэна бэятцэ. Инке када сыкавэлас, кай лэндэ парашэла тэ авэл и порода. Лати фартэ трэбуй сас, кай ла тэ подритярэн. Андэ Библия пистромэ: «Андо Израилё лэ израильтянонэндирэ щея присытелэ тэ авэн бэрш бэршэстар, штар дес андо бэрш, кай тэ хвалин ла щя, сави сас лэ Иеффаёстири лэ галаадитяниностири» (Суд. 11:39, 40). Через кода, со стердя лэ Иеффаёстири щей, амэ на бистрас пала христианоря андэ амарэ деса, савэ на женинпэ чи на жан миростэ. Амэ трэбуй тэ хвалисарас и тэ подритярас лэн, кай вонэ май бут тэ терэн лэ Иеговастири дила (1 Кор. 7:32—35).

И АПОСТОЛОРЯ ПОДРИТЯРЭНАС ЛЭ ԤРАЛЭН

12, 13. Сар о Пётро подритярдя пэстирэ ԥралэн?

¹² О Иисусо англа кода, сар тэ мэрэл ԥэндя лэ Петрости: «Симоно, Симоно о Сатана ԥэндя, кай тэ прошав тумэн, сар о зэрно. Но мэ фартэ манглэмпэ пала тутэ, пала кода, кай ту тэ на парашэс тэ патяс. И ту, кала рисавэса, подритяр пэстирэ ԥралэн» (Луки 22:31, 32).

¹³ О Пётро сас ек анда кодэла, ко ля тэ стидэл и христианско собрания, сави сас андэ пэрво вико (Гал. 2:9). Андэ Пятидесятница андо 33 бэрш лэ И. Х. о Пётро смило ԥэндя речь. Май англэ, кала во терэлас лэ Дэвлэстири дила, во кадяжэ на даралас. Кадэлэса, во подритярэлас лэ ԥралэн и лэ ԥэян. После кода, сар во бут бэрша терэлас лэ Дэвлэстири дила, во пистросардя лэ ԥралэнди: «Мэ пистросардэм тумэнди... кай тэ подритярав тумэн и анда вся о зор тэ росԥэнав пала лэ Дэвлэско чачуно лашимос, саво и мануша на затердэ. Тердён састэс андэр лэстэ» (1 Пет. 5:12). И письморя, савэ о Пётро пистросардя лэ Дэвлэстар, подритярэн и терэн май вушэро по ди лэ христианонэнди жы кай амарэ деса. Алава анда кадэла письморя и акана фартэ трэбуй амэнди, важ кода кай амэ аштярас, кай о Иегова стерэла, кода, пала со дя алав (2 Пет. 3:13).

14, 15. Сар вся время подритярэн и алава, савэ пистросардя о Иоанно?

¹⁴ О апостоло Иоанно сас кацаво же, сар о Пётро. Во кадяжэ андэ пэрво вико ля тэ стидэл и христианско собрания. Андэ пэстири книӷа, савэ вжал андэ Евангелии, во пистросардя пала лэ Иисусостири служения. Алава, савэ пистромэ андэ кадэя ла библиятири книӷа, подритярэн и дэн зор лэ христианонэнди жы кай амари время. Кати андэ Евангелия лэ Ионностар запистромэ лэ Иисусостирэ алава, кай лэ христианонэн ӷатярэна па кода, кай вонэ любин ек аврэс. (Адиносар Иоанна 13:34, 35c).

¹⁵ Андэ всаворэ трин письморя, савэ пистросардя о Иоанно, исин инке, со важ амэндэ куч. Кала амэ умэкас и вас, важ кода кай терас варисо най кадя, амэнди ашэл май вушэро по ди кацавэ алавэндар: «Лэ Иисусоско рат... терэл, кай амэ тэ авас вужэ всаворэ бэзэхэндар» (1 Иоан. 1:7). Но сар амаро ди всаек дошалярэл амэн, амэнди ашэла май вушэро по ди лэ алавэндар «о Дэл май бут ӷанэн амарэ одестар» (1 Иоан. 3:20). Кати о Иоанно пистросардя, кай «о Дэл исин любовь» (1 Иоан. 4:8, 16). Андо дуйто и трито письморя во хвалий лэ христианонэн, савэ на парашэн тэ ԥирэн андо чачимос (2 Иоан. 4; 3 Иоан. 3, 4).

16, 17. Сар о апостоло Павло подритярэлас лэ христианонэн?

¹⁶ Ко анда апостолоря андэ пэрво вико май драго всаворэндар подритярэлас лэ ԥралэн и лэ ԥэян? Када сас о апостоло Павло. После кода, сар муля о Иисусо, май бут апостолоря жувэнас андо Иерусалимо, важ када котэ и сас о руководящё совето (Деян. 8:14; 15:2). Андэ Иудея и мануша патянас андо ек Дэл и лэндири вера сас иудаизмо. Котэ и христианоря росԥэнэнас важ о Христос. Но лэ Павлос о свынто духо бишалдя, кай во тэ росԥэнэн лэ ӷреконэнди, лэ римлянонэнди и аврэ манушэнди, савэ тэлёнас бутэ дэвлэнди (Гал. 2:7—9; 1 Тим. 2:7).

¹⁷ О Павло най еқвар сас андэ ҭана, пэ савэ акана ԥэнэн Турция, Греция и Италия. Во росԥэнэнас лащи весть лэ манушэнди, савэ котэ жувэнас и вонэ на слинэ евреёря. Инке во стидэлас и христиански собрании. Важ и христианоря, савэ найдэлмут болделэ и жизня на сас вушэро. И мануша, савэ жувэнас лэнца пэ ек ԥув, ӷонинас лэн. Важ када лэнди трэбуй сас, кай лэн тэ подритярэн (1 Фес. 2:14). Варикай андо 50 бэрш лэ И. Х. о Павло пистросардя лэ манушэнди андэ собрания, сави найдэлмут стидэ, савэ жувэнас андэ Фессалоники: «Кажно разо блаӷодарисарас лэ Дэвлэс, кала ԥэнас пала кажно андар тумэндэ андэ пэстирэ молитвы. Важ кода кай амэ вся время сэрас, кай тумэ на парашэн тэ кандэн лэ Дэвлэс. Кадяжэ сэрас тумари любовь и сар тумэ виритярэн о ԥаримос» (1 Фес. 1:2, 3). Во кадяжэ ԥэндя: «Подритярэн ек аврэс и дэн зор ек аврэсти» (1 Фес. 5:11).

И ԤРАЛА АНДА РУКОВОДЯЩЁ СОВЕТО ПОДРИТЯРЭН

18. Сар и ԥрала анда руководящё совето подритярдэ лэ Филиппос?

¹⁸ Андэ пэрво вико о Иегова через и ԥрала анда руководящё совето подритярэлас и сытярэлас кодэлэн, ко стидэлас и собрании, ай кадяжэ всаворэн христианонэн. Кала о Филиппо росԥэнэнас лэ самаритянонэнди пала Христос, и ԥрала анда руководящё совето ԥэндэ, со тэ терэл и подритярдэ лэс. И ԥрала анда руководящё совето бишалдэ лэ апостолонэн лэ Петрос и лэ Иоаннос кай и самаритяноря. Васо? Кай вонэ тэ мангэнпэ пала христианоря, савэ найдэлмут болделэ, кай лэндэ тэ авэл свынто духо (Деян. 8:5, 14—17). О Филиппо и кодэла ԥрала и ԥэя, савэ найдэлмут болделэ, слинэ фартэ ради, кай лэн подритярдэ и ԥэндэ лэнди, со тэ терэн.

19. Со сас кай и христианоря андо ди, кала вонэ проадиносардэ о письмо лэ ԥралэндар анда руководящё совето?

¹⁹ Май англэ и ԥрала анда руководящё совето трэбуй сас тэ витидэн андэ ек дила, со тэ терэн. Трэбуй сас и христианоря, савэ най евреёря, тэ терэн обрезания, сар када терэнас и евреёря па лэ Моисеёско законо чи най? (Деян. 15:1, 2). И ԥрала анда руководящё совето манглэпэ пала свынто духо, ай кадяжэ диқлэ, со пала када пистромэ андэ писания. Тоди вонэ витидэ, будэр тэ на терэн обрезания. Пистросардэ письмо пала када и бишалдэ лэ ԥралэн, кай тэ ԥэнэн пала када. Со кадэлэстар кай и христианоря ашэля андо ди? Андэ Библия пистромэ: «Вонэ проадиносардэ лэс и ашэлэ лошалэ, кай лэн подритярдэ» (Деян. 15:27—32).

20. а) Сар и ԥрала анда руководящё совето подритярэн лэ ԥралэн и лэ ԥэян па вся ԥув? б) Пала со амэ уӷанаса андэ авэр статья?

²⁰ Андэ амари время и ԥрала анда руководящё совето, савэ лэ Иеговастирэ свидетелёнэндар, поможын и подритярэн кодэлэн, ко вся пэстири время отдэл андэ служения лэ Иеговасти. Кадяжэ подритярэн лэ вефильцонэн, лэ ԥралэн и лэ ԥэян па вся ԥув. Сар и андэ пэрво вико, андэ амари время всаворэ лошалэ кадэлэстар. И ԥрала анда руководящё совето витидэ, кай тэ авэл и брошюра «Вернись к Иегове». Ла вимэклэ андо 2015 бэрш, кай тэ подритярэн кодэлэн, ко ашадя и собрания. Андэ собрания лэ ԥралэн и лэ ԥэян подритярэн и ԥрала, савэн стодя о Иегова. Ко инке трэбуй тэ подритярэл лэ манушэн андэ собрания? Пала када амэ подаса дума андэ авэр статья.