Источникоря важ и тетрадка, кай тэ сытювас «Дром и служэния»
7—13 ЯНВАРЯ
СОМНАК АНДА БИБЛИЯ | ДЕЯНИЯ 21, 22
«Мэк авэл лэ Иеговастири воля»
(Деяния 21:8—12) Пэ авэр дес амэ жылям андо дром и, сар авелям андэ Кесария, зажылям андо цэр кай о проповеднико Филиппо, саво ек анда семь, и ашэлямпэ лэса. 9 Лэстэ слинэ штар щея, савэ на слинэ миростэ и савэ росԥэнэнас и весть лэ Дэвлэстар. 10 Амэ самас котэ най ек дес, и анда Иудея авеля ек пророко, савэс ақарэн Ага́в. 11 Кала во зажыля амэндэ, во ля лэ Павлостири кущик, заԥангля пэсти и пэрнэ и вас и ԥэндя: «Акэ со ԥэнэн о свынто духо: „Кадя и иудеёря сԥандэна андо Иерусалимо лэ манушэс, савэстири кадэя кущик, и отдэна лэс андэ вас лэ манушэнди анда авэр народоря“». 12 Кала амэ када ашундям, амэ и катутнэ ԥрала лям тэ мангас лэс тэ на ваздэлпэ андо Иерусалимо.
«Мэк авэл лэ Иеговастири воля»
15 Кала о Павло сас инке кай о Филиппо, авеля авэр мануш, пэ саво стонас бари патив. Лэс ақарэнас Агав. Кодэла, ко стидэпэ кай о Филиппо, ӷанэнас, кай о Агаво сас пророко. Май англал во ԥэндясас пала баро боқалимос, саво сас, кала правияс о Клавдиё (Деяния 11:27, 28). Можэт, вонэ на полэнас: «Васо авеля о Агаво? Сави весть во росԥэнэна?» Вонэ диқэнас пэр лэстэ, ай во ля лэ Павлостири буӷли кущик, сави шолпэ по котор материя. Андэ кацави кущик моӷли тэ ԥиравэн и ловэ и инке варисо. Ла ԥиравэнас по ило. О Агаво сԥангля ласа пэсти и пэрнэ и вас. Тоди во ԥэндя: «Акэ со ԥэнэн о свынто духо: „Кадя и иудеёря сԥандэна андо Иерусалимо лэ манушэс, савэстири кадэя кущик, и отдэна лэс андэ вас лэ манушэнди анда авэр народоря“» (Деяния 21:11).
16 Кадэва пророчество доԥэнэнас, кай о Павло жала андо Иерусалимо. Кадяжэ кадэва пророчество сыкавэлас, кай через иудеёря лэ Павлос отдэна «андэ вас лэ манушэнди анда авэр народоря». Кадэла алава линэ лэ одестар кодэлэн, ко котэ сас. О Лука пистрой: «Кала амэ када ашундям, амэ и катутнэ ԥрала лям тэ мангас лэс тэ на ваздэлпэ андо Иерусалимо. Тоди о Павло ԥэндя: „Со тумэ терэн? Сости тумэ ровэн и терэн, кай мэрно ди тэ росшындёл? Патян, кай важ о алав лэ Ӷосподоско лэ Иисусоско мэ ӷотово, кай ман най кати тэ сԥандэн, но и тэ мэрав андо Иерусалимо“» (Деяния 21:12, 13).
(Деяния 21:13) Тоди о Павло ԥэндя: «Со тумэ терэн? Сости тумэ ровэн и терэн, кай мэрно ди тэ росшындёл? Патян, кай важ о алав лэ Ӷосподоско лэ Иисусоско мэ ӷотово, кай ман най кати тэ сԥандэн, но и тэ мэрав андо Иерусалимо»
«Мэк авэл лэ Иеговастири воля»
17 Погиндосар, и ԥрала, ай кадяжэ и о Лука, фартэ мангэн лэ Павлос тэ на жал андо Иерусалимо. Дэсавэ андар лэндэ ровэн. Лэ Павлос лэл лэ одестар кода, кай и ԥрала анда оди пэрэжывают пала лэстэ. Важ када во ковлэс пушэл лэндар, сости вонэ ровэн и «росшынэн [лэско] ди», или, сар пистромэ андэ авэр переводоря пэ греческо шыб, «розмарэн [лэско] ди». Но о Павло састэс тердёл пэ пэско, кадя жэ сар када сас и лэ ԥралэнца андо Тиро. Во на домэкэл, кай и ясва и кода, кай вонэ мангэн лэс, тэ парувэн лэско гиндо. Наоборот, во росԥэнэн лэ ԥралэнди, васо лэсти трэбуй тэ жал. Сар дэ састэс и дэ смило во пэс андярэл! Сар и о Иисусо, о Павло кадя жэ загиндосардя тэ жал андо Иерусалимо (Евреям 12:2). О Павло на камлоп тэ мэрэл важ и вера, но, если када прижалапэ, во сас ӷотово тэ прилэл и смэрть важ бахтатэ сар лэ Иисусоско ученико.
(Деяния 21:14) Кала амэндэ на вижыля тэ стерас кадя, кай во тэ на жал, амэ парашэлям тэ мангас лэс и ԥэндям: «Мэк авэл лэ Иеговастири воля».
«Мэк авэл лэ Иеговастири воля»
18 Сар пэ када диқлэ и ԥрала? Вонэ стодэ патив. Амэ адиносарас: «Кала амэндэ на вижыля тэ стерас кадя, кай во тэ на жал, амэ парашэлям тэ мангас лэс и ԥэндям: „Мэк авэл лэ Иеговастири воля“» (Деяния 21:14). Кодэла, ко мангэнас лэ Павлос тэ на жал андо Иерусалимо, на линэ тэ тердён пэ пэско. Вонэ ашундэ лэ Павлос и уштадэ лэсти. Вонэ полинэ и прилинэ кода, со камэл о Иегова, хоть важ лэндэ када и сас найвушэро. О Павло витидя о дром, саво май англэ трэбуй сас тэ анэн каринг и смэрть. Лэ Павлости авелоп май вушэро, если бы кодэла, ко лэс любий, тэ на мангэн лэс, кай во тэ отԥэндёл кодэлэстар, со витидя.
Виарақас сомнак анда Библия
(Деяния 21:23, 24) Важ када стер кода, со амэ тути ԥэнаса. Амэндэ исин штар мануш, савэ динэ алав. 24 Лэ лэн пэса и вихаладю вместе лэнца, сар пистромэ андо законо, и потин, кай вонэ тэ побреют и шэрэ. И кадя всаворэ уӷанэна, кай и дума, сави жал пала тутэ, най чачимос и кай ту терэс сар трэбуй и екжэно кадяжэ андярэс о законо.
«Ашунэн, со мэ ԥэнава... кай тэ зашавпэ важ пэстэ»
10 О Павло полэлас кодэлэн, касти камэласпэ тэ жувэл па дэсавэ иудейски традиции, например тэ на терэл бути андэ суббота или тэ на хал дэсаво хамос (Римлянам 14:1—6). Кадяжэ, о Павло на ԥэнэнас, трэбуй чи на трэбуй тэ терэн обрезания. О Павло дажэ стердя обрезания лэ Тимофеёсти, кай и иудеёря через кода, кай лэ Тимофеёско дад сас греко, тэ на парашэн лэсти тэ патян (Деяния 16:3). Тэ терэл обрезания чи най, кажно витидэлас екжэно. О Павло ԥэндя лэ галатонэнди: «Терэл о мануш обрезания, чи на терэл, ӷлавно кати и вера, сави через и любовь» (Галатам 5:6). Но, если варико тэ стердоп обрезания, кай тэ зритярэл о Законо, или тэ гиндосардоп, кай када фартэ трэбуй, кай тэ уӷодий лэ Иеговасти, када сыкадоп, кай лэстэ на хутилэл вера.
11 Хоть и бут со анда кадэя дума сас евья, через латэ пэрэжывали бут анда евреёря, савэ патянас андо Дэл. Важ када и старейшыноря ԥэндэ лэ Павлости тэ стерэл акэ со: «Амэндэ исин штар мануш, савэ динэ алав. Лэ лэн пэса и вихаладю вместе лэнца, сар пистромэ андо законо, и потин, кай вонэ тэ побреют и шэрэ. И кадя всаворэ уӷанэна, кай и дума, сави жал пала тутэ, най чачимос и кай ту терэс сар трэбуй и екжэно кадяжэ андярэс о законо» (Деяния 21:23, 24).
12 О Павло моӷ тэ ԥэнэн, кай вся и дила най андэ дума, сави жал пала лэстэ, ай андэ кода, кай и мануша анда евреёря камэн тэ ритярэн лэ Моисеёско законо. Но во на камэлас тэ тердёл пэ пэско, если када на жалас против лэ Дэвлэстирэ принцыпоря. Май англал о Павло пистросардя: «Важ и мануша, савэ тала законо, мэ ашэлэм кодэлэса, ко тала законо (хоть мэ и най тала законо), кай тэ патян кодэла, ко тала законо» (1 Коринфянам 9:20). Андэ кадэва разо о Павло стердя кадя, сар ԥэндэ лэсти и старейшыноря анда Иерусалимо, и ашэля «сар мануш тала законо». Кадэлэса о Павло сыкадя, сар амэнди тэ терас ек дила лэ старейшынонэнца и тэ на тердювас пэ пэско (Евреям 13:17).
(Деяния 22:16) И акэ, со ту цырдэс и время? Ущи, болдю и схалав пэстирэ бэзэха через лэско алав“.
nwtsty каментариё каринг и Деяния 22:16
схалав пэстирэ бэзэха через лэско алав Или «схалав пэстирэ бэзэха и ақар лэско алав». Лэ манушэстирэ бэзэха схаладён най лэ паеса, андэ саво во болделя. Кай тэ простинпэ лэстирэ бэзэха, лэсти трэбуй тэ ақарэл лэ Иисусос па алавэстэ. Када сыкавэл, кай лэ манушэсти трэбуй тэ патял андо Иисусо и тэ сыкавэл пэстири вера пэ дила (Деяния 10:43; Иакова 2:14, 18).
14—20 ЯНВАРЯ
СОМНАК АНДА БИБЛИЯ | ДЕЯНИЯ 23, 24
«И иудеёря дошалярдэ лэ Павлос, кай во зваздэл лэ мирос и терэл и биды»
(Деяния 23:12) Кала ашэля дес, и иудеёря доԥэнделэ, сар тэ умарэн лэ Павлос и солахадэ, кай на лэна тэ хан и тэ пэн, пока на умарэна лэс.
(Деяния 23:16) Но лэ Павлоско плиминнико, кала ашундя, кай вонэ аштярэн лэс, авеля андэ казарма и росԥэндя пала када лэ Павлости.
«Ав смило!»
5 Кадэла алава слинэ фартэ трэбуй важ о Павло андэ кадэя время. Пэ авэр дес май бут чем 40 иудеёря «солахадэ, кай на лэна тэ хан и тэ пэн, пока на умарэна лэ Павлос». Када сыкавэл, пэ скати дэ фартэ вонэ камэнас тэ умарэн лэ апостолос. Вонэ гиндонас, кай если лэндэ на вижала када тэ стерэн, тоди вонэ задиноп амрая екжэнэ пэс или лэнди авелоп варисаво найлашимос (Деяния 23:12—15). И рашая и и старейшыноря подритярэнас кода, со кадэла иудеёря загиндосардэ, кай лэ Павлос тэ андярэн андо Синедрионо, хабис котэ лэс май драго тэ роспушэн. Но па чачимастэ и иудеёря камэнас па дром чоралэс тэ умарэн лэ Павлос.
6 Но лэ Павлоско плиминнико ашундя, кай лэ Павлос камэн тэ умарэн и росԥэндя лэсти пала када. О Павло бишалдя лэс каринг о римско барэдэр воино, Клавдиё Лисиё, кай тэ росԥэнэн вся лэсти (Деяния 23:16—22). О Иегова фартэ любий лэ шавэн и лэ щеян, савэ сар лэ Павлоско плиминико, савэско алав амэ на ӷанас, на даран тэ терэн вся, кай лэ Иеговастирэ народостэ тэ авэл лашимос май бут чем пэстэ. И кай вонэ терэн вся, со трэбуй важ лэ Дэвлэско царство.
(Деяния 24:2) Кала ақардэ лэ Терту́ллос, во ля тэ дошалярэл лэс англа Феликсо и ԥэндя: «Блаӷодаря тути амэ фартэ ладисарас, и блаӷодаря кодэлэсти, кай ту диқэс май дур, андэ кадэва народо бут со парудёл,
(Деяния 24:5, 6) Амэ уӷанглям, кай кадэва мануш зваздэл лэ мирос, терэл и биды машкар всаворэ иудеёря па вся ԥув и во ӷлавно андэ секта кай и назаретяноря. 6 Во камэлас тэ маӷрисарэл о храмо и амэ лэс астардям.
«Ав смило!»
10 Андэ Кесария пала Павло диқэлас и стража «андэ лэ Иродоско преторско дворцо» и во аштярэлас, кала анда Иерусалимо авэна кодэла, ко лэс дошалярэл (Деяния 23:35). Через панч деса авеля о барэдэр рашай о Анания, о ораторо о Тертулло и дэсавэ старейшыноря. Спэрва о Тертулло похвалисардя лэ Феликсос важ кода, со во терэл важ и иудеёря, здэлпэ, кай тэ замалисарэл лэс. Тоди во ля тэ дэл дума пала Павло: «Амэ уӷанглям, кай кадэва мануш зваздэл лэ мирос, терэл и биды машкар всаворэ иудеёря па вся ԥув и во ӷлавно андэ секта кай и назаретяноря. Во камэлас тэ маӷрисарэл о храмо и амэ лэс астардям». И иудеёря линэ тэ ԥэнэн, кай вся кадя и сас (Деяния 24:5, 6, 9). Лэс дошалярэнас, кай во зваздэл лэ мирос и терэл и биды, ӷлавно андэ секта, камэлас тэ маӷрисарэл о храмо, через вся када лэс моӷли тэ сындон пэ смэрть.
(Деяния 24:10—21) Кала о правителё ԥэндя кай о Павло тэ дэл дума, во ԥэндя: «Мэ драго ӷанав, кай ту санас сындомари кадэлэ народости бут бэрша и важ када мэ лава тэ дав дума, кай тэ зашавпэ пала пэстэ. 11 Мэ кадя жэ ӷанав, кай ту екжэно можэш тэ уӷанэс, кай прожыля май набут чем двенадцать деса, кодэлэстар, сар мэ авелэм кай тэ тэлював лэ Дэвлэсти андо Иерусалимо. 12 И нико на диқля ман, кай мэ варикаса тэ спорисавав андо храмо или тэ стидав манушэн, хоть андэ синагога, хоть андо форо. 13 Лэндэ на вижал тэ доԥэнэн тути кода, андэр со вонэ акана ман дошалярэн. 14 Но прижандювава тути, кай мэ жував па учения, пэ сави вонэ ԥэнэн сектанско, и кадя мэ терав и свынто служэния мэрнэ папонэндирэ Дэвлэсти и патяв всаворэсти, со исин андо законо и со пистросардэ и пророкоря. 15 Мэ патяв лэ Дэвлэсти, сар и вонэ патян, кай ринапэ каринг и жызня кодэла, ко муля, и лашэ и найлашэ. 16 И важ када мэ екжэно терав вся, кай мандэ тэ авэл вужи совесть и ӷанав, кай мэ на терав нисо против о Дэл и против и мануша. 17 Прожылэ бут бэрша и мэ авелэм, кай тэ дав ловэ важ мэрно народо, ай кадяжэ тэ анав и жэртвы. 18 Пала када вонэ и приастардэ ман андо храмо, кала мэ вихаладелэм, сар пистромэ, и котэ на сас бут миро и на сас шумо. Но котэ сас дэсавэ иудеёря анда Азия, 19 савэ трэбуй сас тэ авэн каринг тутэ и тэ дошалярэн ман, если лэндэ исин варисо против мандэ. 20 Или мэк кадэла мануша екжэнэ ԥэнэна, саво бэзэх вонэ виарақлэ андэ кодэя время, кала мэ сымас андо Синедрионо, 21 кати най андэ кода, кай мэ цыписайлэм, кала тердювавас машкар лэндэ: „Важ кода кай о Дэл рий лэ мулэн каринг и жызня, ман сындон адес англа тумэндэ!“».
«Ав смило!»
13 О Павло драго сыкадя, сар амэ можэм тэ терас, кала амэнди прижалапэ тэ дас дума лэ манушэнца анда правительство пала кода, сар амэ тэлювас лэ Дэвлэсти. Кадяжэ, пала кода, кай амэн евья дошалярэн, кай зваздас лэ мирос, терас биды или гиндон, кай амэ анда «вэрыто секта». О Павло на дэлас дума кадя, кай тэ подмалий лэ правителёс, сар када тердя о Тертулло. Во сас спокойно и дэлас дума пативалэс. Во подтидэлас и алава и ԥэнэнас кода, со исин, понятно и па чачимастэ. О Павло ԥэндя, кай «[и] иудеёря анда Азия», савэ дошалярдэ лэс, кай во маӷрисардя о храмо, на авелэ по сындо и кай па законо во трэбуй тэ дэл дума лэнца и тэ виашунэл лэн (Деяния 24:18, 19).
14 Но со интересно, о Павло на проашэля мулком, кай тэ росԥэнэн пала кода, андэр со во патял. О апостоло би дарако зашоласпэ пала пэстири вера андэ кода, кай о Дэл рий каринг и жызня кодэлэн, ко муля. Через када андо Синедрионо зажыля баро споро (Деяния 23:6—10). Кала о Павло зашоласпэ пала пэстэ, во фартэ шутя сама пэ надежда, кай о Дэл рий каринг и жызня кодэлэн, ко муля. Васо? О Павло росԥэнэнас пала Иисусо и пала кода, кай во рисайля каринг и жызня, и када нисар нэ моӷли тэ прилэн кадэла мануша (Деяния 26:6—8, 22, 23). Да, кода, кай о Дэл рий лэ мулэн каринг и жызня, ай май точно, и вера андо Иисусо и кай во рисайля каринг и жызня, и сас кода, васо линэ тэ споринпэ.
Виарақас сомнак анда Библия
(Деяния 23:6) Кала о Павло уӷангля, кай епаш анда мануша, савэ котэ слинэ, саддукеёря, ай авэр, фарисеёря, во ԥэндя андо Синедрионо: «Ԥрала, мэ фарисеё, шаво лэ фарисеёско. Ман сындон важ кода, кай мэ патяв, кай о Дэл рий лэ мулэн каринг и жызня».
nwtsty каментариё каринг и Деяния 23:6
мэ фарисеё Дэсавэ мануша анда Синедрионо ӷанэнас лэ Павлос (Деяния 22:5). Кала о Павло ԥэндя, кай во лэ фарисеёско шаво, кодэла, ко слинэ андэ кадэя секта, полинэ, кай о Павло ԥэнэн пала кода, саво во сас, важ кода кай акана во ашэля христианино. Лэстэ и андо гиндо на сас тэ ашавэл пэстири нэви вера. Тоди сар тэ полас кадэла лэ Павлостирэ алава? О Павло ԥэндя пэр пэстэ фарисеё, ай най саддукеё, кати важ кода, кай и фарисеёря, сар и во, патянас, кай о Дэл рий каринг и жызня кодэлэн, ко муля. Кадэлэса во сыкадя, кай машкар лэстэ и машкар и фаресеёря исин варисо ек. Наверно, кала о Павло вазгля кадэя дума, во патялас, кай через када дэсавэ мануша анда Синедрионо залэна лэстири риг. Кадя и вижыля (Деяния 23:7— 9). Лэ Павлостирэ алава анда Деяния 23:6, сжанпэ кодэлэса, со во ԥэндя, кай тэ зашолпэ пала пэстэ, кала дэлас дума англа царё Агриппо (Деяния 26:5). Кала о Павло сас андо Римо и пистрояс о письмо лэ христианонэнди андэ Филиппы, во упалэ ԥэндя пала кода, ко во сас (Филиппийцам 3:5). Кадяжэ трэбуй тэ шас сама пэ кода, сар андэ Деяния 15:5 ԥэндэ пэ авэр христианоря, савэ варикала слинэ фарисеёря.
(Деяния 24:24) Через дэсавэ деса о Феликсо авеля пэстиря хулаяса, савя ақарэнас Друзи́лла и сави сас иудейка. Во бишалдя пала Павло, кай тэ ашунэл лэс пала вера андо Иисус Христос.
(Деяния 24:27) Но прожылэ дуй бэрш и вместо Феликсо авеля о По́рциё Фесто, ай о Феликсо ашадя лэ Павлос андо баруно, кай тэ подмалий лэ иудеёнэн.
nwtsty каментариё каринг и Деяния 24:24
Друзи́лла Трито, само цыкни щей кай о царё Иродо Агриппа Пэрво, пала сави пистромэ андэ Деяния 12:1. Вой арақаделя варикай андэ 38 бэрш лэ И. Х. и сас ԥэй лэ Агриппости Дуйтонэсти, ла Вереникати и ла Мариамнати Тритонати. О правителё Феликсо сас лако дуйто хулай. Лако пэрво хулай сас о Азизо, царё андо сирийско форо Эмесо. Лэса и Друзилла розжыляпэ и жыля пала Феликсо варикай андэ 54 бэрш лэ И. Х., кала лати сас 16 бэрш. Можэт, вой ашунэлас, сар о Павло ԥэнэнас лэ Феликсости «пала праведность, самообладания и сындо, саво авэла англэ» (Деяния 24:25). Кала вместо Феликсо авеля о Фесто, о Феликсо ашадя лэ Павлос андо баруно, «кай тэ подмалий лэ иудеёнэн» (Деяния 24:27). Дэсавэ гиндон, кай во стердя када важ пэстири тэрнёры хулаи, сави сас иудейка.
21—27 ЯНВАРЯ
СОМНАК АНДА БИБЛИЯ | ДЕЯНИЯ 25, 26
«О Павло ԥэнэн, кай камэл тэ дэл дума лэ цэзарёса и росԥэнэн важ о Дэл лэ царёсти Иродости»
(Деяния 25:11) Если жэ мэ па чачимастэ бидари и стердэм варисо важ со ман трэбуй тэ умарэн, то мэ на мангав тэ жалуин ман. Ай если нисо анда кода, андэр со кадэла мануша ман дошалярэн, на сас, тоди нико нэ можэт ман тэ отдэл, кай тэ уӷодий лэнди. Камав тэ дав дума лэ цэзарёса!»
«Камав тэ дав дума лэ цэзарёса!»
6 Через кода кай о Фесто камэлас тэ уӷодий лэ иудеёнэнди, лэ Павлос моӷли тэ умарэн. Важ када о Павло стердя кадя, сар лэсти можно сас па законо важ и римляноря. Во ԥэндя лэ Фестости: «Мэ тердював англа лэ цэзарёско сындо, кай ман и трэбуй тэ сындон. Мэ на стердэм лэ иудеёнэнди нисаво найлашимос, и ту екжэно када драго ӷанэс [...] Камав тэ дав дума лэ цэзарёса!» Обычно, кала камэнас тэ дэн дума лэ цэзарёса, када нащи сас тэ на домэкэн. О Фесто када сыкадя, кала ԥэндя: «Камэс тэ дэс дума лэ цэзарёса, кай о цэзарё и жаса» (Деяния 25:10—12). Кала о Павло закамля, кай лэстири дила тэ розлэл о май баро сындо, кадэлэса о Павло сыкадя примеро важ и христианоря адес. Кала и мануша савэ жан против Дэл камэн тэ стерэн амэнди «найлашимос через о законо», лэ Иеговастирэ свидетеля терэн вся па законо, кай тэ фэрин пэско право тэ росԥэнэн и лащи весть (Псалом 94:20).
(Деяния 26:1—3) О Агриппа ԥэндя лэ Павлости: «Тути дэн алав, кай тэ ԥэнэс важ пэстэ». Тоди о Павло процырдя о вас и ля тэ дэл дума важ пэстэ: 2 «Гиндосарав, кай мэ бахтало, царё Агриппа, важ кода кай именно англа тутэ манди адес трэбуй тэ зашавпэ пала пэстэ андэ вся, андэр со ман дошалярэн и иудеёря. 3 Ту драго ӷанэс всаворэ обычаи и спороря, савэ исин машкар иудеёря. Важ када мангав тут, виашун ман.
«Камав тэ дав дума лэ цэзарёса!»
10 О Павло пативаса поблаӷодарисардя лэ царёс Агриппос важ кода, кай во дя лэсти тэ дэл дума англа лэстэ. Кадяжэ о Павло прижангля кай о царё драго ӷанэн всаворэ обычаи и спороря лэ иудеёнэндирэ. Тоди о Павло росԥэндя, сар во варикала жувэлас: «Мэ андяравас пэс сар фарисеё, сар строӷо сытярэнас андэ амари секта» (Деяния 26:5). Сар фарисеё, о Павло аштярэлас, кай авэла о Христос. Ай акана, кала во ашэля христианино, во би дарако росԥэнэнас, кай о Иисус Христос када кодэва, кас кадя долӷо аштярэнас. Вера, сави лэстэ сас ек кодэлэнца, ко лэс дошалярдэ, ай именно кода, кай о Дэл зритярэла всаворэ пэстирэ алава, савэ дя лэндирэ папонэнди, и сас кода, васо лэ Павлос дошалярдэ андэ кодэва дес. Через кадэла лэ Павлостирэ алава о Агриппо инке май фартэ закамля тэ уӷанэн пала када.
11 О Павло, кала вспоминал, савя баря холяса во жалас пэ христианоря, ԥэндя: «Чаче, мэ екжэно гиндосаравас, кай трэбуй бут со тэ стерав против о Иисусо назаретянино... [...] ... Мэ сымас фартэ холинако пэр лэндэ [пэ кодэла, ко жал пала Христос] и ӷонисаравас лэн дажэ андэ авэр фороря» (Деяния 26:9—11). О Павло на ԥэнэнас евья. Бут мануша ӷанэнас савя холяса во ӷонияс лэ христианонэн (Галатам 1:13, 23). О Агриппа можэт пушэлас пэстар: «Состар кадя паруделя кадэва мануш?»
12 О Павло пэ када ԥэндя: «Мэ теравас кадэя дила и жавас андо Дамаско, и барэ рашая динэ манди пэ када власть и право. Андо епаш дес, о царё, мэ додиқлэм свето па нэбо, саво ԥаболас май фартэ, чем о қам и саво дяпэ яг паша мандэ и паша кодэла, ко жанас манца. Кала амэ всаворэ пэлям пэ ԥув, мэ ашундэм ӷолосо, саво дэлас дума манца пэ еврейско шыб: „Савло, Савло, васо ту ӷонис ман? Ԥарэс тути тэ жас против рожно“. Мэ пушлэм: „Ко ту, Ӷосподо?“ О Ӷосподо ԥэндя: „Мэ о Иисусо, савэс ту ӷонис“» (Деяния 26:12—15).
13 Сар о Павло инке на диқля кадэя видения, во, можно тэ ԥэнас, жалас против рожно. Сар о ското моӷ тэ шынэнпэ по востро краё кай о рожно, кадя о Павло ашэлас май дур лэ Дэвлэстар, кала жалас против кода, со камэлас о Дэл. Кала па дром андо Дамаско о Иисусо, саво рисайля каринг и жызня, сыкаделя лэ Павлости, во поможысардя лэсти тэ парувэл пэско гиндо. И хоть о Павло и патялас андо хохаимос, лэстэ сас лашо ди (Иоанна 16:1, 2).
14 О Павло па чачимастэ фартэ парудя пэстири жызня. Во ԥэндя лэ Агриппости: «Мэ тердэм кода, со манди сас ԥэндо па нэбо, но спэрва андо Дамаско, ай тоди и андо Иерусалимо и па вся иудея и машкар авэр народоря, мэ росԥэнавас лэ манушэнди кадэя весть, кай вонэ тэ каинпэ и тэ бандён каринг о Дэл. И кай вонэ тэ стерэн дила, сави сыкавэла, кай вонэ каинпэ» (Деяния 26:19, 20). Акэ ужэ бут бэрша о Павло терэлас кода, со ԥэндя лэсти тэ терэл андэ кодэва дес андэ видения о Иисус Христос. Каринг со када андя? Кодэла, ко прилэнас и лащи весть, сави росԥэнэнас о Павло, каинаспэ андэ пэстири найлащи и найвужи дила и бандёнас каринг о Дэл. Кадэла мануша парудёнас андэ лащи риг и стонас патив по законо и по порядко.
15 Но вся када сас евья важ и иудеёря, савэ жанас против о Павло. О Павло ԥэндя: «Важ када и иудеёря астардэ ман андо храмо и камэнас тэ умарэн. Но о Дэл манди поможысардя и мэ идоси росԥэнав и лэ цыкнэсти и лэ барэсти» (Деяния 26:21, 22).
16 Сар лэ чачунэ христианонэнди амэнди трэбуй вся и время тэ авас ӷотови тэ зашаспэ пала амари вера (1 Петра 3:15). Кала амэ дас дума лэ сындомаренца или лэ правителёнэнца пала кода, андэр со амэ патяс, авелоп драго тэ терас кадя сар о Павло, кала во дэлас дума лэ Агриппоса и лэ Фестоса. Кала амэ пативаса росԥэнас лэ барэ манушэнди андэ палитика, сар о чачимос анда Библия парудя андэ лащи риг амари жызня, ай кадяжэ и жызня кодэлэнди, ко ашундя и лащи весть, када можэт тэ лэл лэн лэ одестар.
(Деяния 26:28) Но о Агри́ппа ԥэндя лэ Павлости: «Йто ту стерэса кадя, кай мэ тэ ашав христианино».
«Камав тэ дав дума лэ цэзарёса!»
18 Но о Павло ԥэндя лэ правителёсти: «Фесто, мэ на сжылэм па годятэ, ай ԥэнав чачунэ и годявэрнэ алава. Но о царё, англа саво мандэ исин муй тэ дав дума, вся када драго ӷанэн... Патяс лэ Пророконэнди, царё Агриппа? Ӷанав, кай патяс». Пэ када о Агриппа ԥэндя: «Йто ту стерэса кадя, кай мэ тэ ашав христианино» (Деяния 26:25—28). Кадэла алава, савэ о царё ԥэндя анда оди чи най анда оди, сыкавэн, кай кода, со ԥэндя о Павло, дожыля каринг лэ царёско ди.
Виарақас сомнак анда Библия
(Деяния 26:14) Ай кала амэ всаворэ пэлям пэ ԥув, мэ ашундэм ӷолосо, саво дэлас дума манца пэ еврейско шыб: „Савло, Савло, васо ту ӷонис ман? Ԥарэс тути тэ жас против рожно“.
nwtsty каментариё каринг и Деяния 26:14
Тэ жас против рожно Рожно, када лунго рувли, пэ сави востро саструно краё, савяса ӷонинас лэ скотос (Судей 3:31). И алава «тэ жас против рожно» исин андэ древнегреческо литература. Кала о найкандино гурув, савэсти лэ рожноса сыкавэн о дром, терэл па пэстирятэ и хукэл пэ востро рувли, во екжэно пэсти терэл вэрыто. О Павло, англа кода, сар тэ ашэл христианино, шоласпэ пэ кацаво гурув. О Павло андярэлас пэско шэро, кала ӷонияс лэ Иисусостирэ учениконэн, савэнди поможыяс о Дэл Иегова. (Сыстосар Деяния 5:38, 39; 1 Тимофею 1:13, 14.) Андэ Экклезиаст 12:11 алава «рожноря важ и гурува» ԥэнэнпэ най ворта. Лэнца сыстон и алава годявэрнэ манушэстирэ, через савэ кодэла, ко лэн ашунэн, закамэн тэ терэн кадя, сар лэнди подԥэнэн.
nwtstg Словарё
Рожно. Када лунго рувли, пэ сави востро саструно краё. Кадэла рувляса ӷонинас лэ скотос андэ время, кала залэнаспэ ла ԥувьяса. Лэ рожноса сыстон и алава годявэрнэ манушэстирэ, через савэ кодэла, ко лэн ашунэн, закамэн тэ терэн кадя, сар лэнди подԥэнэн. И алава «тэ жас против рожно» росԥэнэн, сар андярэл пэс о гурув, саво тердёл пэ пэско и савэс ӷонин кадэла рувляса. Кала о гурув одмардёл ла рувлятар, во можэт тэ пусадёл по востро лэ рожноско краё (Деяния 26:14; Судей 3:31).
(Деяния 26:27) Патяс лэ Пророконэнди, царё Агриппа? Ӷанав, кай патяс».
w03 15/11 16, абз. 14
Поможысар лэ манушэнди тэ прилэн и весть пала царство
14 О Павло ӷанэнас, кай формально лэ Агриппостири вера сас иудаизмо. Важ када о Павло ԥэндя, кай во «на дэлас дума нисо, кроме кода, пала со и Пророкоря и о Моисеё ԥэнэнас, кай када трэбуй тэ авэл» важ кода, кай о Христос мэрэла и рияпэ каринг и жызня (Деяния 26:22, 23). О Павло ворта пушля лэ Агриппостар: «Патяс лэ Пророконэнди, царё Агриппа?» О Агриппа на ӷанэнас, со тэ ԥэнэн. Если во отԥэндёла лэ пророконэндар, тоди лэстири репутация, сар манушэсти, саво патял андо иудаизмо, римояпэ. Но если во прижанэна, кай кода, со ԥэндя о Павло, када чачимос, тоди во англа всаворэ мануша сыкавэла, кай о Павло правильно дэл дума и пэр лэстэ моӷут тэ ԥэнэн христианино. О Павло годявэрнэс дя ответо пэ пэско жэ вопросо: «Ӷанав, кай патяс». Со ԥэндя о Агриппа? «Йто ту стерэса кадя, кай мэ тэ ашав христианино» (Деяния 26:27, 28). Хоть о Агриппа и на ашэля христианиноса, дицол, кай лэ Павлостирэ алава хоть набут, но дожылэ каринг лэско ди (Евреям 4:12).
28 ЯНВАРЯ — 3 ФЕВРАЛЯ
СОМНАК АНДА БИБЛИЯ | ДЕЯНИЯ 27, 28
«О Павло жал андо Римо»
(Деяния 27:23, 24) и кадя сар андэ кадэя рят мандэ авеля о анӷело лэ Дэвлэстар, савэско мэ и касти мэ терав и свынто служэния. 24 Во ԥэндя: „На дар, Павло. Ту трэбуй тэ авэс кай о цэзарё, и акэ, о Дэл дя тути всаворэн, ко туса по караблё“.
«Ни ек мануш андар тумэндэ на хындёла»
15 О Павло росԥэнэнас бутэнди по караблё важ «и надежда по алав, саво дя о Дэл» (Деяния 26:6; Колоссянам 1:5). Акана, кала о караблё моӷ тэ розмардёл, о Павло моӷ тэ росԥэнэн лэнди важ и надежда, кай спасынапэ: «Андэ кадэя рят мандэ авеля о анӷело лэ Дэвлэстар... Во ԥэндя: „На дар, Павло. Ту трэбуй тэ авэс кай о цэзарё, и акэ, о Дэл дя тути всаворэн, ко туса по караблё“». Тоди о Павло ԥэндя лэнди: «На умэкэн и вас, важ кода кай мэ патяв лэ Дэвлэсти, кай вся авэла кадя, сар манди сас ԥэндо. Амэн трэбуй тэ вишол пэ варисаво острово» (Деяния 27:23—26).
(Деяния 28:1, 2) Кала амэ спасысайлям, амэ уӷанглям, кай пэ кадэва острово ԥэнэн Мальта. 2 Мануша, савэ дэнас дума пэ авэр шыб, стердэ важ амэндэ баро лашимос. Вонэ ростодэ и яг и анда оди прилинэ всаворэн амэн, важ кода кай жалас брышын и сас шудрэс.
«Ни ек мануш андар тумэндэ на хындёла»
18 Кодэла, ко спасысайлэ, уӷанглэ, кай вонэ по острово Мальта, саво по юго кай и Сицилия. И мануша, савэ жувэнас по острово и савэ дэнас дума пэ авэр шыб, стердэ важ лэндэ «баро лашимос» (Деяния 28:2). Вонэ ростодэ и яг важ и чужи мануша, савэ доплывуисардэ каринг о бэрэӷо и савэ тинонаспэ лэ шудримастар. Вонэ татилэ паша яг, хоть жалас брышын и сас шудро. Котэ жэ и стердяпэ чуда.
«Ни ек мануш андар тумэндэ на хындёла»
21 Пэ кодэва острово жувэлас барвало мануш, саво залэласпэ ла ԥувьяса, лэс ақарэнас Публиё. Наверно, во сас само баро римско чиновнико пэ Мальта. О Лука пистрой пала лэстэ, сар пала «мануш, саво диқэлас пала острово» и ԥэнэн пэр лэстэ кацаво жэ титуло, саво запистромэ андэ дуй Мальтийски тексторя. Трин дес во анда оди диқэлас пала Павло и пала кодэла, ко сас лэса. Андэ кодэя время лэ Публиёско дад сас фартэ насвало. И упалэ о Лука точно росԥэнэн пала кода, со сас лэ насвалэса. Во точно поля, саво када насвалимос и пистросардя, кай кодэва мануш «пашлёлас ԥабардо и лэстэ сас дизентерия». О Павло мангляпэ и стодя пэр лэстэ и вас, и и дук кодэлэ манушэстири отжыля. Кадэя чуда ля лэ одестар катутнэ манушэн и вонэ линэ тэ анэн каринг о Павло аврэ насвалэн, кай во тэ вилечий лэн. Кадяжэ вонэ анэнас подаркоря, кай лэ Павлостэ и лэ манушэндэ, савэ слинэ лэса, тэ авэл вся, со трэбуй (Деяния 28:7—10).
(Деяния 28:16, 17) Кала амэ авелям андо Римо, лэ Павлости динэ тэ жувэл отдельно, и о халавдо сторожыяс лэс. 17 Через трин деса во ақардя барэ манушэн анда иудеёря. Кала вонэ стидэпэ, во ԥэндя лэнди: «Ԥрала, хоть мэ и на стердэм нисо против о народо, против амарэ дадэндирэ обычаи, ман сар барунарес, отдинэ анда Иерусалимо андэ вас лэ римлянонэндирэ.
О Павло драго росԥэнэнас важ о Дэл
10 Кала кодэла, ко сас по караблё, авелэ андо Римо, «лэ Павлости динэ тэ жувэл отдельно, и о халавдо сторожыяс лэс» (Деяния 28:16). Кодэлэ манушэн, кас сторожынас, приԥандэнас цэпоса каринг о халавдо, кай вонэ тэ на занашэн. Но и тоди о Павло росԥэнэнас пала царство, и нисавэ цэпоря нэ моӷли тэ тердярэн лэс. Важ када, кала о Павло отцыеля лэ дромэстар кати трин дес, во ақардя лэ барэ манушэн анда иудеёря, савэ слинэ андо Римо, кай тэ росԥэнэн пала пэстэ и тэ росԥэнэн важ о Дэл.
Виарақас сомнак анда Библия
(Деяния 27:9) Прожыля бут время, и тэ плавуин акана сас опасно, важ кода кай дажэ прожыля осеннё посто и важ када о Павло ԥэндя лэнди:
nwtsty каментариё каринг и Деяния 27:9
осеннё посто Или просто «посто». Катэ тердёл греческо алав, саво ԥэнэн кати пала ек посто, саво трэбуй сас тэ терэн па лэ Моисеёско законо. Кадэва посто сас важ о дес, кала витинэн и бэзэха и када прожалас кажно бэрш. Пэ кадэва дес кадяжэ ԥэнэнас Йом Киппур (пэ еврейско йом хаккиппури́м, «дес, кала ушаравэн [и бэзэха]») (Левит 16:29—31; 23:26—32; Числа 29:7). О мануш зритярдёлас, например лэ хамастар, или ритярэлас о посто, кай «тэ сыкавэл, кай дуқал оди лэ бэзэхэндар» андо дес, кала витинэн и бэзэха (Левит 16:29). Кода, кай пала посто пистромэ андэ Деяния 27:9, доԥэнэн о гиндо, кай ӷлавно, со терэнас и мануша андо дес, кала витинэн и бэзэха, када ритярэнас о посто. Кадэва дес обычно сас машкар сентябрё и октябрё.
(Деяния 28:11) Прожылэ трин шон и амэ анда Александри́я лаглям по караблё, саво вся о йвэн протерделя по острово и по нак кай кадэва караблё сас украшэния «Лэ Зевсостирэ шавэ».
nwtsty каментариё каринг и Деяния 28:11
Лэ Зевсостирэ шавэ Пэ греческо шыб Диоску́ры. Андэ древнё ӷреция гиндонас, кай лэ Зевсостирэ (лэ Юпитеростирэ) шавэ слинэ близнецы, савэн ақарэнас Касторо и Поллуксо и лэндири дэй сас и Леда, царица андэ Спарта. Гиндонас, кай и шавэ лэ Зевсостирэ фэринас лэ моряконэн и спасынас лэн, кала ваздэласпэ бари буря. Кода со запистромэ пала украшэния, сави сас по караблё, инке еқварэс доԥэнэн, кай кодэва, ко пистросардя и книӷа Деяния, диқля када пэстирэ яқэнца.