О Иегова фэрий кодэлэс, касти «ԥарэс по ди»

1, 2. Пала со амэ подаса дума андэ кадэя статья?

ДЭКАЛА амэндэ исин кацаво гиндо, кай и жызня фартэ ԥари и андэр латэ нинай нисо лашо (Иов 14:1). Важ када амэнди фартэ ԥарэс по ди. Кацаво сас бутэ лэ Иеговастирэ служытелёнэнца, савэ жувэнас дэлмут. Дэсавэ андар лэндэ дажэ камэнас тэ мэрэн (1 Царей 19:2—4; Иов 3:1—3, 11; 7:15, 16). Но о Иегова, савэсти вонэ патянас, най еқварэс подритярэлас лэн и поможыяс. И кала амэ уӷанаса пала лэндэ анда Библия, када амэнди придэла зор, и бут сости сытярэла (Римлянам 15:4).

² Андэ кадэя статья дума жала пала Иосифо, лэ Иаковоско шаво, пала ԥивли Ноеминь и пала латири бори пала Руфь, пала ек левито и пала апостоло Пётро, лэнди сас фартэ ԥарэс по ди. Амэ уӷанаса, сар о Иегова лэнди поможыяс и сости амэ можэм лэндар тэ сытювас. Када поможыя амэнди тэ патяс, кай «о Иегова паша кодэва, ко бидаса умардо и фэрий кодэлэс, касти ԥарэс по ди» (Псалом 34:18).

О ИОСИФО ПЭРЭЖУДЯ НЭСПРАВЕДЛИВОСТЬ И ЖЭСТОКОСТЬ

3, 4. Со сас лэ Иосифоса андэ тэрнэ бэрша?

³ Кала лэ Иосифости сас варикай 17 бэрш, во диқля дуй сунэ лэ Дэвлэстар. Андар лэндэ во поля, кай ашэла барэ манушэса, и вся о родо лэла тэ стол пэр лэстэ патив (Бытие 37:5—10). Но лэстири жызня фартэ паруделяпэ. И ԥрала шутэ вэрыцыя пэр лэстэ и битиндэ лэс андо рабство. Во ля тэ жувэл андо Египто и ашэля рабоса кай о Патифаро (Бытие 37:21—28). Кадя о Иосифо анда любимо шаво ашэля рабо андо Египто (Бытие 39:1).

⁴ Но кай о Иосифо сас и авэр ԥаримос. Лэ Патифарости хулаи хохадя пэр лэстэ, кай во камля тэ пэрэл ласа, ай лако хулай на ля тэ розлэлпэ андэ када и шутя лэс андо баруно (Бытие 39:14—20; Псалом 105:17, 18). Кати погиндон, скати ԥаримос сас кай о Иосифо, и со лэстэ сас по ди. Во пэрэжывал, со пала лэстэ дэна дума и со дэна дума пала лэско Дэл Иегова. Канешно, кадэлэстар лэсти сас инке май ԥарэс.

5. Со поможыяс лэ Иосифости тэ на умэкэл и вас?

⁵ Кала о Иосифо сас андо баруно и сас рабоса, во нисо нэ моӷ тэ парувэл андэ пэстири жызня. Умэкля во кадэлэстар и вас? Най, на умэкля. Во терэлас вся, со андэ лэско зор и терэлас, со моӷ андэ кодэва маменто. Но само ӷлавно, кай о Иегова андэ лэстири жызня сас по пэрво ҭан. Вся када о Дэл диқэлас, и важ када блаӷословияс лэс (Бытие 39:21—23).

6. Сар подритярэнас и сунэ лэ Иосифос, савэ во диқля лэ Дэвлэстар?

⁶ Лэ Иосифости придэлас зор, кала во гиндояс пала сунэ, савэ лэсти дя о Дэл. Кала во гиндояс пала лэндэ, во полэлас, кай андэ лэстири жызня вся парудёлапэ, и во упалэ диқэлапэ пэстирэ ереса. Када тердяпэ тоди, кала лэ Иосифости сас варикай 37 бэрш. Кадя вся и сас! (Бытие 37:7, 9, 10; 42:6, 9).

7. Сар ԥэнэнпэ андэ 1 Петра 5:10, со поможыя амэнди тэ виритярас о ԥаримос?

⁷ Сости када амэн сытярэл? Через кода, со сас лэ Иосифоса, амэ полас, кай и люма фартэ жэстоко и нэсправедливо. Дажэ амарэ ԥрала и ԥэя, савэ андэ собрания, моӷут тэ стерэн, кай амэнди тэ авэл ԥарэс по ди. Но если амэ сэрас, кай о Иегова кодэва, ко спасый и фэрий, амэ на умэкаса и вас и на парашаса лэсти тэ служысарас (Псалом 62:6, 7; адиносар 1 Петра 5:10b). Шон сама, кай лэ Иосифости инке на сас 17 бэрш, кала во диқля и сунэ, савэ лэстэ сас лэ Иеговастар. Анда када дицол кай о Иегова патял кодэлэнди, ко служый лэсти андэ тэрнэ бэрша. Адес кадяжэ бут шавэ и щея служын лэ Иеговасти, и дэсавэ андар лэндэ дажэ бэшэн андо баруно пала кода, кай патян андо Иегова (Псалом 110:3).

ДУЙ ЖУВЛЯ, САВЭ УМАРДЭ БИДАСА

8. Саво ԥаримос сас андэ жызня кай и Ноеминь и кай и Руфь?

⁸ Андэ Иуда сас боқалимос и важ када и Ноеминь и лако ери ашадэ о цэр и линэ тэ жувэн андо Моаво. Котэ лако хулай муля и вой ашэляпэ екжэни дуе шавэнца. Прожыля время, и латирэ шавэ жэнисайлэ пэ моавитянки Руфь и Орфа. Через дэш бэрш кай и Ноеминь мулинэ и и шавэ. Вонэ на ашадэ посли пэстэ бэятонэн (Руфь 1:1—5). Кати погиндон, сар дэ ԥарэс сас кадэлэ тринэ жувлянди. И Руфь и Орфа моӷли инке еқвар тэ жан миростэ, но тоди пала Ноеминь най ко авелоп тэ диқэл. Кай и Ноеминь кадя сас ԥарэс по ди, кай вой ԥэндя: «Акана на ԥэнэн пэр мандэ Ноеминь, ай ԥэнэн пэр мандэ Мара, важ кода кай фартэ бут ԥаримос манди дя о Дэл тэ пэрэандярав». И Ноеминь умэкля и вас и закамля тэ рийпэ андо Вифлеемо и и Руфь жыля ласа (Руфь 1:7, 18—20).

9. Сар и Руфь заботияспэ пала Ноеминь, сар ԥэнэнпэ андэ книӷа Руфь 1:16, 17, 22?

⁹ Со поможысардя, кай и Ноеминь тэ пэрэжувэл кадэва ԥаримос? Када и любовь ла Руфяти и лэ Иеговасти. Кай и Руфь любияс пэстиря сасуя, дицэля андэ кода, кай вой ла на ашадя. (Адиносар Руфь 1:16, 17c, 22d.) Андо Вифлеемо и Руфь столас бут зор, кай тэ стидэл о зэрно пэ мал, кай тэ проправарэл пэс и пэстиря сасуя. И важ када пала кадэя тэрни манушни драго дэнас дума и мануша (Руфь 3:11; 4:15).

10. Сар о Иегова сыкадя, кай любий и заботийпэ пала чорорэ, ай кадяжэ пала Ноеминь и пала Руфь?

¹⁰ О Иегова дя пэстирэ народости кацаво законо, андэ саво дицолас, кай о Иегова анда вся оди диқэл и заботийпэ пала чорорэ. Во ԥэндя лэ израильтянонэнди, кай кала стидэн о зэрно пэ мал, тэ на стидэн вся о зэрно. Кадя и лэ чорорэндэ сас со тэ хан, важ кода кай вонэ моӷли тэ стидэн о зэрно, саво ашэласпэ (Левит 19:9, 10). Важ кода и Руфь и Ноеминь на сас боқалэ и лэнди на прижыляпэ тэ мангэн варикастар хамос.

11, 12. Сар о Иегова через о Воозо стердя кадя, кай и Ноеминь и Руфь упалэ тэ лошавэн?

¹¹ И мал, пэ сави терэлас и Руфь, сас лэ барвалэ манушэсти, савэс ақарэнас Воозо. Лэс фартэ ля лэ одестар кода, сар и Руфь диқэлас пала пэстири сасуи. Во витиндя вся, со прижалас латирэ шавэнди и жэнисайля пэ Руфь (Руфь 4:9—13). Кай и Руфь и кай о Воозо арақаделяпэ шаво. Лэс ақарэнас Овид и лэстар жыля о потомко, царё Давидо (Руфь 4:17).

¹² Кати погиндосарам, сар лошавэлас и Ноеминь, кала вой ля лэ бэятос пэ вас. Сар вой анда вся оди ԥэндя наис лэ Иеговасти. Вой лэла инке май фартэ тэ лошавэл, кала уӷанэна кай лэ Овидостар жыля о потомко о Иисус Христос, пала саво ԥэндясас о Дэл. Када авэла, кала о Иегова рия ла каринг и жызня андо раё пэ ԥув.

13. Сости амэ сытювас анда кода, со сас андэ жызня кай и Ноеминь и кай и Руфь?

¹³ Сости када амэн сытярэл? Дэкала амэнди можэт тэ авэл фартэ ԥарэс и дажэ тэ умэкас и вас. Но трэбуй тэ патяс лэ Иеговасти и тэ на дурювас лэ ԥралэндар и лэ ԥэяндар андэ собрания. О Иегова можэт и амэндар тэ на улэл о ԥаримос, кадяжэ, сар и кай Ноеминь. Во на рисардя латирэ хулас и лэ шавэн, но о Иегова подритярдя ла, во подритярэла и амэн. Дэкала во када терэл через и ԥрала и ԥэя, савэ моӷут тэ поможын амэнди (Притчи 17:17).

О ЛЕВИТО, САВО ЧУТЬ НА ПАРАШЭЛЯ ТЭ СЛУЖЫЙ ЛЭ ИЕГОВАСТИ

14. Васо ек левито умэкля и вас?

¹⁴ Акана подам дума пала ек левито. Лэстэ сас бари бах тэ служый лэ Дэвлэсти андо храмо. Но андэ ек маменто, во ля тэ завидуий лэ найлашэ манушэнди. Во гиндояс, кай лэндэ андэ жызня вся роздраго (Псалом 73:2—9, 11—14). Кай лэндэ исин барвалимос и лэндэ интересно жызня. Во на камэлас тэ терэл кадя, сар вонэ, но во гиндояс, кай лэндири жызня май лащи. О левито дажэ ԥэндя: «Евья мэ теравас вся, кай мэрно ди тэ авэл вужо». Кадя во чуть на хасардя и дружба лэ Дэвлэса.

15. Со поможысардя лэ левитости тэ на умэкэл и вас, сар ԥэнэнпэ андо Псалом 73:16—19, 22—25?

¹⁵ Адиносар Псалом 73:16—19e, 22—25f. Но со стердя кадэва левито? Во «зажыля андэ лэ Дэвлэско свынто храмо». Котэ во моӷ тэ авэл паша авэр лэ Иеговастирэ служытеля и тэ росԥэнэн вся андэ молитва лэ Иеговасти пала пэстирэ пэрэжывании. Кадя во ля тэ полэл, андэр со во сас нэ право. Када лэсти поможысардя тэ полэл, кай кодэла мануша андэ ек маменто моӷут вся тэ хасарэн. Во поля, пэ скати во найдраго гиндояс. И кай тэ парашэл тэ завидуий кодэлэ манушэнди, во трэбуй сас тэ парувэл пэско гиндо и тэ диқэл пэ када кадя, сар диқэлас о Иегова. Кадя во и стердя. И тоди лэстэ по ди ашэля драго. Во поля, кай май куч, чем о Иегова, лэстэ андэ жызня нико нинай.

16. Сости амэ сытювас кай о левито?

¹⁶ Сости када амэн сытярэл? Никала на трэбуй тэ завидуисарас лэ найлашэ манушэнди. Лэндэ найлащи жызня и кати здэлпэ, кай вой бахтали. И лэндэ нисо лашо англэ на авэла (Экклезиаст 8:12, 13). Если амэ ласа тэ завидуисарас лэнди, тоди амэнди авэла кадэлэстар фартэ ԥарэс, и амэ дажэ можэм тэ хасарас и дружба лэ Иеговаса. Если амэ полас, кай амэ лям тэ завидуисарас лэ найлашэ манушэнди, трэбуй тэ терас кадя, сар стердя о левито и тэ приашундювас каринг лэ Иеговастирэ советоря. Када тэ дружысарас кати кодэлэнца, ко лэс любий. Если амэ любисарас лэ Иеговас, тоди амэ па чачимастэ аваса бахталэ, и нисо амэн на змарэла па правильно дром (1 Тимофею 6:19).

ЛЭ ПЕТРОСТИ САС ԤАРЭС КОДЭЛЭСТАР, КАЙ ВО ТЕРЭЛАС ОШЫБКИ

17. Васо лэ Петрости сас ԥарэс по ди?

¹⁷ О апостоло Пётро сас фартэ шустро мануш. Но дэкала во спэрва терэлас варисо или ԥэнэнас, ай потом кати гиндояс. Например, кала лэ Иисусос трэбуй сас тэ умарэн, о Пётро ля тэ ԥэнэн: «Ӷосподо, жалуисар пэс, тэ на авэл туса кацаво никала» (Матфея 16:21—23). О Иисусос сындосардя лэ Петрос пала када. Ай кала авелэ и мануша тэ залэн лэ Иисусос, кай тэ стон андо бар и тэ умарэн, о Пётро сразу вихутилдя и шури и отшындя о кан еқэ рабости (Иоанна 18:10, 11). О Иисусо упалэ лэс сындосардя. Ай авэр разо о Пётро абуримаса ԥэндя: «Дажэ если всаворэ ашавэна тут, мэ никала на ашавава!» (Матфея 26:33). Сар жэ во патялас андэр пэстэ! Но прожыля время, во пэрэдарайля лэ манушэндар и дажэ тривар отԥэнделя лэ Иисусостар. Лэ Петрости сас фартэ ԥарэс кадэлэстар, и во ля тэ ровэл (Матфея 26:69—75). Во фартэ пэрэжывал, простия лэс варикала о Иисусо чи най?

18. Сар о Иисусо поможысардя лэ Петрости?

¹⁸ Но о Пётро на домэкля, кай через кода, кай стердя нэправильно, во тэ парашэл тэ служый лэ Иеговасти. Да, мэк во змарделя па лэ Дэвлэско дром, но во на парашэля тэ служый лэсти (Иоанна 21:1—3; Деяния 1:15, 16). Андэ када лэсти поможынас лэ Иисусостирэ алава, савэ во на бистрэлас: «Мэ фартэ манглэмпэ пала тутэ и пала кода, кай ту тэ на парашэс тэ патяс и ту, кала рисавэса, подритяр пэстирэ ԥралэн». О Иегова ашундя лэстири молитва и подритярдя лэ Петрос. Кала о Иисусо рисайля каринг и жызня, во авеля каринг о апостоло Пётро, кай тэ подритярэл лэс (Луки 22:32; 24:33, 34; 1 Коринфянам 15:5). Потом во авеля каринг авэр апостолоря, кала вонэ вся и рят нащи астарэнас о мащё и лэнца тоди сас о Пётро. Андэ кадэва маменто о Пётро ԥэндя, пэ скати дэ фартэ во лэс любий. О Иисусо простисардя лэс и дя тэ терэл инке май бут дила андэ служэния (Иоанна 21:15—17).

19. Сар и алава анда Псалом 103:13, 14 поможын амэнди тэ диқас пэр пэстэ кадя, сар диқэл о Иегова?

¹⁹ Сости када амэн сытярэл? О Иисусо полэлас и жалуияс лэ Петрос анда вся оди, ай амэ ӷанас, кай о Иисусо андэ вся шолпэ по пэско Дад, по Иегова. Вижал, кала амэ терас ошыбка и каисавас о Иегова амэн простия. Амэ на трэбуй тэ гиндосарас, кай о Иегова амэн никала на простия, важ кода кай када о Сатана камэл, кай амэндэ тэ авэн кацавэ гиндоря. Трэбуй тэ диқас пэр пэстэ, ай кадяжэ пэ авэр кадя, сар диқэл о Иегова, када тэ полас и тэ жалуисарас анда вся оди аврэн. (Адиносар Псалом 103:13, 14g.)

20. Пала со амэ подаса дума андэ авэр статья?

²⁰ Кода, со сас андэ жызня кай о Иосифо, Ноеминь и Руфь, о левито и кай о апостоло Пётро поможый тэ патяс, кай «о Иегова паша кодэла, ко бидаса умардо» (Псалом 34:18). Да, о Иегова домэкэл, кай амэндэ тэ авэл ԥаримос, через саво амэ можэм тэ умэкас и вас. Но амэ май фартэ ласа тэ патяс лэ Иеговасти, кала диқаса, кай во амэн подритярэл андо амаро ԥаримос (1 Петра 1:6, 7). Андэ авэр статья амэ подаса дума пала авэр лэ Дэвлэстирэ служытеля, савэндэ сас ԥарэс по ди и савэ пала кода, кай най совершэни, умэкэнас и вас.