Ашпэ лошало, кала аштярэс лэ Иеговас

И всаек о Иегова камэл, кай амэ тэ аштярас, кала во лэла тэ терэл пэстири дила андэ время, сави стодя. Васо во када камэл? Со поможыя амэнди тэ аштярас и тэ на хасарас и радость?

ВАСО О ИЕГОВА КАМЭЛ, КАЙ АМЭ ЛЭС ТЭ АШТЯРАС?

Андэ Библия ԥэнэнпэ: «Важ када о Иегова аштярэл, кай тэ дэл тумэнди пэстирэ блаӷословении, во лэла тэ терэл лашимос, кай тэ сыкавэл, кай полэл и жалуий тумэн. Важ кода кай о Иегова — справедливо Дэл. Бахталэ всаворэ, ко надеийпэ пэр лэстэ» (Ис. 30:18). Кадэла лэ Исаястирэ алава спэрва сас пистромэ важ и евреёря, пэ савэ о Иегова ԥэндя, кай вонэ найкандинэ шавэ (Ис. 30:1). Но машкар лэндэ сас кодэла, ко на парашэнас тэ кандэн лэ Иеговас, и через кадэла алава лэндэ сас надежда. Кадэла алава кадяжэ адес поможын лэ Иеговастирэ служытелёнэнди тэ аштярэн англэ о лашымос.

Если о Иегова ӷанэн тэ аштярэл, тоди амэнди тожэ трэбуй кадя тэ терас. Во ужэ стодя и время, кала улэла о найлашымос андэ кадэя люма, и во аштярэл кадэва дес и часо (Матф. 24:36). Тоди всаворэнди драго дицола, кай о Сатана хохавэлас по Дэл и пэ лэстирэ служытеля. Посли када о Дэл улэла лэ Сатанас и кодэлэн, ко лэс подритярэлас, ай амэн «жалуия».

Но адес амэнди прижалпэ тэ пэрэжувас о ԥаримос. О Иегова най вся и время улэл амэндар када. Но во ԥэнэн, кай пока амэ аштярас, амэ можэм тэ ашаспэ лошалэ. Сар ԥэндя о Исая, амэндэ вижала тэ авас бахталэ, пока всаворэ́ одеса аштярас о лашымос (Ис. 30:18)a. Со тэ терас, кай андо ди тэ авэл кацави бах? Андэ када амэнди поможына штар маменторя.

САР ТЭ АШТЯРЭС И ТЭ НА ХАСАРЭС И РАДОСТЬ?

Гиндосар пала лашымос, саво исин андэ жызня. Андэ пэстири жызня о Давидо диқля бут жэстокость и нэсправедливость (Пс. 37:35). Но во всаек пистросардя: «Аш мулком англа Иегова и терпеливо аштяр лэс. На холяв, сар диқэс кодэлэс, кастэ драго вижал тэ стерэл о найлашымос, саво загиндосардя» (Пс. 37:7). О Давидо и екжэно када терэлас, кала гиндояс пала лэ Иеговастири обещяния тэ поможый лэсти. Ай инке во блаӷодарияс лэ Дэвлэс важ вся, со во важ лэстэ терэлас (Пс. 40:5). Амэ тожэ трэбуй тэ отшас и гиндоря, через савэ умэкэнпэ и вас, и май бут тэ шас сама по лашымос, саво исин андэ жызня. Кадя амэнди авэла май вушэро тэ аштярас лэ Иеговас.

Май бут дэ дума пала Иегова. О 71 Псалом — када дили, сави, файма, пистросардя о Давидо. Котэ исин кацавэ алава: «Мэ и май дур лава тэ аштярав тут и инке май фартэ тэ хвалисарав тут» (Пс. 71:14). Сар во хвалияс лэ Иеговас? Во росԥэнэнас пала лэстэ аврэнди и дилабэлас диля, савэ хвалинас лэс (Пс. 71:16, 23). Сар о Давидо амэ тожэ камас тэ авас лошалэ, кала аштярас лэ Иеговас. Амэ хвалисарас лэ Дэвлэс, кала служысарас лэсти, дас дума и дилабас диля. Кала ту пэ авэр разо лэса тэ дилабэс и дэвликони дили, драго погиндосар пала латирэ алава и пала кода, сави радость вой анэн тути.

Домэк, кай тут тэ подритярэн и ԥрала и ԥэя. Кала лэ Давидостэ сас ԥаримос, во ԥэндя лэ Иеговасти: «Сыкавава кодэлэнди, ко отдэл важ тутэ пэско ди, кай надеисавав пэ тиро алав» (Пс. 52:9). Амэ тожэ можэм тэ лас зор, кала дас дума лэ ԥралэнца и лэ ԥэянца — када можэт тэ авэл най кати пэ собрания и андэ служэния, но и кала просто проандярас лэнца время (Рим. 1:11, 12).

Тер вся, кай май фартэ тэ надеиспэ. Андо Псалом 62:5 ԥэнэнпэ: «Мэ нисо на ԥэнав и аштярав лэ Дэвлэс, важ кода кай во мэрни надия». Амэнди фартэ трэбуй, кай тэ авэл састи надежда, особено, если амэ гиндосарасас, кай и время кадэла люмати поджала май ӥто. Амэнди трэбуй тэ патяс кай вся, пала со о Иегова дя алав, исполнияпэ, скати бы амэнди тэ на прижалпэ тэ аштярас. Важно тэ пристас зор, кай амэндэ тэ авэл састи надежда. Важ када трэбуй май драго тэ роздиқас и Библия, латирэ пророчества, кода, сар и гиндоря зжанпэ ек еқэса, ай кадя жэ, сар вой поможый май драго тэ уӷанас лэ Иеговас (Пс. 1:2, 3). Инке амэнди трэбуй тэ на парашас тэ мангаспэ «кадя, сар андярэл о свынто духо». Када поможыя амэнди тэ фэрисарас и дружба лэ Иеговаса, пока амэ аштярас, кай тэ исполнийпэ лэстири обещяния — тэ дэл амэнди и вечно жызня (Иуда 20, 21).

Сытю кай о царё Давидо и патя, кай о Иегова шол сама кодэлэн, ко аштярэл лэс. Во отдэл пэско ди важ кацавэ мануша (Пс. 33:18, 22). Гиндосар пала лашымос, саво тутэ исин андэ жызня. Хвалисар лэ Дэвлэс. Лэ зор, кала дэс дума лэ ԥралэнца и лэ ԥэянца. Вся и время гиндосар пала тири надежда. Вся када поможыя тути тэ на парашэс тэ аштярэс лэ Иеговас.