ӶЛАВА 8
Со када лэ Дэвлэско Царство?
1. Пала сави ашунгли молитва амэ подаса дума?
МИЛИОНОРЯ мануша па вся и ԥув ӷанэн и молитва «Отче наш». Андэ кадэя молитва о Иисусо сыкадя лэ учениконэнди, пала со трэбуй тэ мангэнпэ. Подам дума пала латэ май драго, кай тэ уӷанас, пэр со трэбуй тэ шас сама.
2. Пэ савэ трин важни просьбы шутя сама о Иисусо, кала сытярэлас, сар тэ мангаспэ?
2 О Иисусо ԥэндя: «Важ када мангэнпэ кадя: „Амаро Дад по нэбо, мэк тиро алав авэл свынто. Мэк авэл тиро царство. Мэк тири воля авэла и пэ ԥув, сар по нэбо“». (Адиносар Матфея 6:9—13.) Васо о Иисусо камля, кай андэ амарэ молитвы тэ ашундён кадэла трин просьбы? (Дик и ссылка 20.)
3. Со трэбуй тэ ӷанас важ лэ Дэвлэско Царство?
3 Амэ ужэ уӷанглям лэ Дэвлэско алав и пала кода, со во камэл тэ стерэл важ и мануша и важ и ԥув. Но со камля тэ ԥэнэн о Иисусо, кала ԥэндя: «Мэк авэл тиро царство»? Подам дума, со када лэ Дэвлэско Царство, со во стерэла и сар во стерэла, кай лэ Дэвлэско алав тэ авэл свынто?
СО КАДА ЛЭ ДЭВЛЭСКО ЦАРСТВО?
4. Со када лэ Дэвлэско Царство и ко лэско Царё?
4 О Иегова создал по нэбо правительство и витидя лэ Иисусос Царёса. Андэ Библия пэр лэстэ ԥэнэн лэ Дэвлэско Царство. Ай пала Иисусо пистромэ, кай во «Царё пэ всаворэ царёря и Ӷосподо пэ всаворэ ӷосподиноря» (1 Тимофею 6:15). О Иисусо можэт тэ стерэл важ и мануша май бут, чем любо авэр правителё. Лэстэ май бут зор, чем тэ стидэс вся о зор всаворэ́ правителёнэнго.
5. Катар правий лэ Дэвлэско Царство? Соса во лэла тэ правий?
5 Сар прожылэ 40 деса посли кода, сар о Иисусо рисайля каринг и жызня, во рисайля по нэбо (Деяния 2:33). Прожыля дэсави время и о Иегова стодя лэ Иисусос Царёса андэ пэско Царство. Лэ Дэвлэско Царство лэла тэ правий па нэбо ла ԥувьяса (Откровение 11:15). Акэ васо пэ кадэва правительство кадяжэ ԥэнэн «небесно Царство» (2 Тимофею 4:18).
6, 7. Васо о Иисусо май лашо любонэ аврэ правителёстар?
6 Андэ Библия ԥэнэнпэ, кай о Иисусо най кацаво, сар авэр правителёря. Во жувэл вечно (1 Тимофею 6:16). Всаворэ правителя пэ ԥув, скати тэ на жувэн, всаек мэрэн. Но о Иисусо на мэрэла никала. Вся, со во стерэла важ и мануша, анэна лашимос пэ вся и вечность.
7 Андо библейско пророчество ԥэнэнпэ, кай о Иисусо справедливо Царё, саво жалуий анда вся оди. Котэ пистромэ: «Пэр лэстэ авэла лэ Иеговаско духо. О духо, саво дэл мудрость и саво дэл тэ полэс. О духо, саво подԥэнэн и саво фартэ зорало. О духо, саво дэл тэ уӷанас и саво дэл тэ дарас лэ Иеговастар. И во авэла тэ виарақэл лош андэ кода, кай дарал лэ Дэвлэстар. Во на лэла тэ сындой кати па кода, со диқэн лэстирэ яқа и тэ спушэл кати важ кода, со ашунэн лэстирэ кан. Во лэла тэ сындой лэ чорорэн па чачимастэ» (Исаия 11:2—4). Камлоп тумэндэ тэ авэл кацаво правителё?
8. Катар амэ ӷанас, кай о Иисусо лэла тэ правий най екжэно?
8 О Дэл витидя дэсавэ манушэн, кай тэ правин еқэҭанэ лэ Иисусоса по нэбо. Андэ Библия пистромэ, кай вонэ авэна Царёря и еқэҭанэ правина (2 Тимофею 2:12). Скати мануша правина еқэҭанэ лэ Иисусоса?
9. Скати мануша еқэҭанэ лэ Иисусоса лэна тэ правин? Кала о Дэл заля тэ стидэл кадэлэ манушэн?
9 Сар амэ уӷанглям анда 7 ӷлава, лэ Иисусоса правина 144 000 Царёря. Ко кадэла Царёря? О апостоло Иоанно диқля андэ видения кадэлэ Царёнэн еқэҭанэ лэ Иисусоса. О Иоанно ԥэндя, кай када кодэла, «кастэ по чикат пистромэ... о алав [лэ Иисусоско] и о алав лэстирэ Дадэско». Инке во ԥэндя, кай вонэ «жан пала бакроро [пала Иисусо], каринг бы во тэ на жал». (Адиносар Откровение 14:1, 4.) Вижал, кадэла Царёря, 144 000 христианоря, савэ кандэн лэ Дэвлэс. Лэн о Дэл стодя лэ Иисусоса еқэҭанэ «тэ правин ла ԥувьяса». Кала кадэла мануша мэрэн, вонэ ринпэ каринг и жызня, кай тэ жувэн по нэбо (Откровение 5:10). О Иегова ля тэ стидэл кадэлэ манушэн инке кодэла времятар, сар слинэ и апостолоря.
10. Сар андэ кода, кай правина о Иисус Христос и 144 000, дицол лэ Иеговастири любовь?
10 Андэ кода, кай лэ Христоса еқэҭанэ лэна тэ правин мануша, дицол, кай о Иегова заботийпэ пала амэндэ. О Иисусо авэла лашо правителё, важ кода кай во полэл, сар када тэ авэс манушэса и тэ пэрэандярэс о ԥаримос. О апостоло Павло пистросардя, кай о Иисусо «промэкэл через пэско ди амаро ԥаримос». Важ кода кай во «пэрэандярдя вся кода, со и амэ» (Евреям 4:15; 5:8). И 144 000 кадяжэ полэн, сар када тэ авэс найсовершэно и тэ насвавэс. Важ када можэм тэ патяс, кай о Иисусо и кодэла, ко правия лэса, полэн, со амэндэ андо ди и ӷанэн, саво ԥаримос амэндэ исин.
СО ЛЭ ДЭВЛЭСКО ЦАРСТВО СТЕРЭЛА АНГЛЭ?
11. Васо о Иисусо сытярэлас тэ мангэнпэ, кай по нэбо тэ авэл кадя, сар камэл о Дэл?
11 О Иисусо сытярэлас лэ учениконэн тэ мангэнпэ, кай по нэбо тэ авэл кадя, сар камэл о Дэл. Васо? Анда трито ӷлава, андэ кадэя книжка, амэ уӷанглям, кай о Сатана жыля против Иегова. Посли када о Иегова пэ дэсави время ашадя лэ Сатанас и найвужэн тэ жувэн по нэбо. Вижал, кай най вса́ворэ, ко по нэбо, терэнас кадя, сар камэл о Дэл. Анда десято ӷлава андэ кадэя книжка амэ уӷанаса май бут пала Сатана и найвужэ.
12. Пала савэ дуй важни маменторя пистромэ андэ Откровение 12:10?
12 Андэ Библия ԥэнэнпэ, кай посли кода, сар о Иисусо ашэля Царёса андэ лэ Дэвлэско Царство, во жыля войнаса против Сатана. (Адиносар Откровение 12:7—10.) Андо десято стихо пистромэ пала дуй важни маменторя. Пэрво, лэ Дэвлэско Царство лэл тэ правий и Царёса андэр лэстэ ашэл о Иисус Христос. Дуйто, лэ Сатанас сшон па нэбо пэ ԥув. Сар амэ уӷанаса май англэ, лэдуй кадэла маменторя ужэ слинэ.
13. Со паруделя по нэбо посли кода, сар котар сшутэ лэ Сатанас?
13 Андэ Библия пистромэ: «Лошавэн, небесоря и кодэла, ко жувэн пэр лэндэ!» (Откровение 12:12). Сар жэ лошавэнас и анӷелоря, савэ кандэнас лэ Дэвлэс, кала о Сатана и найвужэ сас сшутэ па нэбо! Акана, вса́ворэ, ко жувэн по нэбо, терэн кадя, сар камэл о Дэл. Вонэ жувэн спокойно и ладин машкар пэстэ.
Ԥаримос пэ ԥув ашэля май бут кодэла времятар, кала лэ Сатанас и найвужэн сшутэ па нэбо. Но йто ԥаримос на авэла
14. Со терэлпэ пэ ԥув, важ кода кай лэ Сатанас сшутэ па нэбо?
14 Но пэ ԥув акана вся па аврятэ. И мануша пэрэандярэн бут ԥаримос, важ кода кай о Найвужо «фартэ холинако». «Во ӷанэн, кай лэстэ ашэлпэ набут время» (Откровение 12:12). Лэ Сатанас сшутэ па нэбо и во ӷанэн, кай лэс йто умарэна. Лэстэ фартэ бари холи. Во терэл вся, кай пэ ԥув тэ авэн бут биды, насвалимос и ԥаримос.
15. Со о Дэл камэл важ и ԥув?
15 Но кода, со о Дэл загиндосардя важ и мануша, на паруделя. Во кадяжэ камэл, кай и ԥув тэ авэл раё и пэр латэ тэ жувэн вечно и совершэни мануша (Псалом 37:29). Сар лэ Дэвлэско Царство стерла када?
16, 17. Со ԥэнэнпэ важ лэ Дэвлэско Царство андэ Даниила 2:44?
16 Андэ книӷа, сави пистросардя о пророко Даниило, пистромэ: «И андэ кодэла деса, кала правина и царёря, о Дэл, саво по нэбо, стола царство, саво никала на розмарэна. Кадэва царство на авэла пэрэдино аврэ народости. Во розмарэла всаворэ кадэла царстворя и стерэла кадя, кай лэн будэр на авэла, ай екжэно [кадэва царство] авэла тэ тердёл вечно» (Даниил 2:44). Со амэ уӷанас пала лэ Дэвлэско Царство анда кадэва пророчество?
17 Пэрво, о Царство залэла тэ правий андэ «кодэла деса, кала правина и царёря». Када сыкавэл, кай о Царство залэла тэ правий, кала пэ ԥув инке авэна тэ правин авэр правительства. Дуйто, лэ Дэвлэско Царство лэла тэ правий вечно и лэс на парувэна авэр правительства. И трито, машкар лэ Дэвлэско Царство и авэр правителя авэла война. Лэ Дэвлэско Царство победия андэ кадэя война и ашэла ек правительство пэ ԥув, май лашо анда всаворэ.
18. Сар ԥэнэн пэ война машкар лэ Дэвлэско Царство и манушыканэ правительства?
18 Со терэлапэ англа кода, сар залэлапэ и война машкар лэ Дэвлэско Царство и авэр правителя пэ ԥув? Андэ Библия пистромэ, кай и найвужэ обхохавэна «лэ царёнэн па вся и ԥув, кай тэ стидэн лэн пэ война, сави авэла андо баро лэ Всемоӷущёнэ Дэвлэско дес». Лэ манушэндирэ правительства жана пэ война против лэ Дэвлэско Царство. Но лэ Дэвлэско Царство победия. Пэ кадэя война ԥэнэн Армагеддон (Откровение 16:14, 16; дик и ссылка 10.)
19, 20. Васо амэнди кадя фартэ трэбуй лэ Дэвлэско Царство?
19 Васо амэнди кадя фартэ трэбуй лэ Дэвлэско Царство? Подам дума пала трин причины. Пэрво, через о бэзэх всаворэ мануша насвавэн и мэрэн. Но кала правия лэ Дэвлэско Царство амэ ласа тэ жувас вечно. Андэ Иоанна 3:16 пистромэ: «О Дэл кадя фартэ любий лэ мирос, кай отдя пэстирэ Шавэс, саво лэстэ ек кацаво, кай кажно, ко сыкавэл, кай патял андэр лэстэ, тэ на мэрэл, ай тэ жувэл вечно».
20 Дуйто, амэнди трэбуй лэ Дэвлэско Царство, важ кода кай амэ жувас машкар найлашо миро. Круӷом бут хохаимос и билажавардимос. Най андэ амаро зор тэ улас вся о найлашимос, но о Дэл можэт када тэ стерэл. Во улэла лэ найлашэ манушэн андо Армагеддоно. (Адиносар Псалом 37:10.) Трито, амэнди трэбуй лэ Дэвлэско Царство, важ кода кай лэ манушэндэ, савэ андэ кадэла правительства, барунэ одя и вонэ дилярэн. Вонэ нэ моӷут тэ улэн о ԥаримос, саво исин кай и мануша. Вонэ на поможын лэ манушэнди тэ кандэн лэ Дэвлэс. Андэ Библия ԥэнэнпэ: «Сар о мануш хулаий аврэ манушэса, када на анэн лэсти лашимос» (Экклезиаст 8:9).
21. Сар лэ Дэвлэско Царство стерэла, кай пэ ԥув тэ авэл кадя, сар камэл о Дэл?
21 Посли Армагеддоно, лэ Дэвлэско Царство стерэла, кай пэ ԥув тэ авэл кадя, сар камэл о Дэл. Будэр на авэла лэ Сатанас и лэ найвужэн (Откровение 20:1—3). И мануша будэр на лэна тэ насвавэн и тэ мэрэн. Через о выкупо, всаворэ мануша, савэ кандэн лэ Дэвлэс, лэна тэ жувэн вечно андо раё пэ ԥув (Откровение 22:1—3). Лэ Дэвлэско алав авэла свынто через о Царство. Со када сыкавэл? Када сыкавэл, кай всаворэ мануша лэна тэ стон патив по Дэвлэско алав. (Дик и ссылка 21.)
КАЛА О ИИСУС ХРИСТОС АШЭЛЯ ЦАРЁ?
22. Катар амэ ӷанас, кай о Иисусо на сас Царё, сар сас пэ ԥув и на ашэля Царёса сразу, сар рисайля каринг и жызня?
22 Кала о Иисусо сас пэ ԥув, во сытярдя пэстирэ учениконэн тэ мангэнпэ: «Мэк авэл тиро царство». Анда кадэла алава дицол, кай андэ кодэя время лэ Дэвлэско Царство инке на авеля. О Иегова инке нэ создал пэско правительство и на стодя лэ Иисусос Царёса. Ай можэт о Иисусо ашэля Царёса сразу, сар кати рисайля по нэбо? Най, во инке дэсави время аштярэлас. Катар амэ када ӷанас? Пала када сас пистромэ андо Псалом 110:1. Котэ пистромэ, кай о Иегова ԥэнэн: «Бэш па право вас мандар. Пока мэ на става тирэ вороӷонэн тути тала пэрнэ». Сар росԥэндэ и апостолоря о Пётро и о Павло, андэ кадэва пророчество ԥэнэнаспэ важ о Иисусо, кала во рисайля каринг и жызня (Деяния 2:32—35; Евреям 10:12, 13). Вижал, дажэ посли кода, сар о Иисусо рисайля каринг и жызня, во инке дэсави время аштярэлас, кала о Дэл стола лэс Царёса. Сар долӷо лэсти трэбуй сас тэ аштярэл?
Пэ ԥув авэла кадя, сар камэл о Дэл, кала правия лэ Дэвлэско Царство
23. а) Кала о Иисусо ашэля Царё андэ лэ Дэвлэско Царство? б) Пала со амэ уӷанаса анда авэр ӷлава?
23 О Иисус Христос ашэля Царё андо 1914 бэрш (Псалом 110:2). Интересно, кай инке жы каринг о 1914 бэрш, дэсавэ чачунэ христианоря полэнас, кай кадэва бэрш, сар дицолас анда библейски пророчества, трэбуй сас тэ авэл фартэ важно. Кода, со ля тэ терэлпэ пэ ԥув лэ 1914 бэршэстар сыкадя, кай вонэ правильно полэнас. Со стердя о Иисусо, кала андо 1914 бэрш ашэля Царёса? Во сшутя лэ Сатанас пэ ԥув. И акана, сар ԥэнэнпэ андэ Откровение 12:12, лэ Найвужэстэ «ашэляпэ набут время». Вижал, кай жы каринг кода, сар лэ Дэвлэско Царство стерэла пэ ԥув кадя, сар камэл о Дэл, ашэляпэ фартэ набут время. Анда авэр ӷлава амэ уӷанаса, со инке доԥэнэн, кай амэ жувас андэ кадэя время. (Дик и ссылка 22.)