О Иегова любий кодэлэн, ко виритярэн о ԥаримос, кала анэн плодоря
«Кодэла, ко пэ лащи ԥув, када и мануша... савэ... кала виритярэн о ԥаримос, анэн плодоря» (ЛУКИ 8:15).
1, 2. а) Васо амэ камас тэ терас инке май бут, кала уӷанас, кай и ԥрала и ԥэя на парашэн тэ росԥэнэн котэ, кай и мануша на шон сама пэ весть? (Диқэн и картинка англа статья.) б) Со о Иисусо ԥэндя пала кода, кала росԥэнэн важ о Дэл котэ, кай вибарелэ? (Диқэн и сноска.)
О СЕРДЖО И ОЛИНДА, када о ери пионероря анда США. Лэнди май бут чем 80 бэрш. Послидни бэрша лэндэ дуқан и пэрнэ и через када лэнди ԥарэс тэ ԥирэн. Но всаек, кажно дес каринг и семь тэсара, вонэ авэн кордэ, кай прожан фартэ бут мануша. Вонэ терэн када бут бэрша. О Серджо и Олинда вижан пэ пэско ҭан паша автобусно остановка, кай тэ дэн библейско литература кодэлэнди, ко прожан паша лэндэ. Май бут мануша на шон сама пэр лэндэ. Но о Серджо и Олинда ашэнпэ пэ пэско ҭан и сыкавэн, кай лошалэ тэ диқэн лэн. Андо епаш дес вонэ полокэ жан цэрэ. Пэ авэр дес, каринг и семь тэсара, вонэ жан упалэ каринг и автобусно остановка. Вонэ на парашэн тэ росԥэнэн важ о царство шов дес андо курко, цыло бэрш.
2 О Серджо и Олинда бут бэрша росԥэнэн котэ, кай найбут мануша приашундёнпэ каринг и лащи весть. Кай и бут ԥрала и ԥэя кацаво же ԥаримос. Кала тумэндэ кацаво же ԥаримос, камас анда вся оди тэ похвалисарас тумэн, важ кода кай тумэ на парашэн тэ росԥэнэн важ о Дэлa. Кода, со тумэ терэн, дэл зор кацавэ ԥралэнди и ԥэянди, савэ уже бут бэрша служин лэ Иеговасти и даже лэ районнонэ надзирателёнэнди. Ек андар лэндэ ԥэнэн: «Кала служисарав кацавэ ԥралэнца и ԥэянца, мэ камав тэ терав инке май бут». Инке ек районно ԥэнэн: «Кода, кай вонэ на парашэн тэ кандэн лэ Дэвлэс, дэл манди зор тэ на парашав и тэ на дарав тэ терав лэ Дэвлэстири дила». Акэ, со ԥэндя инке ек районно надзирателё: «Кодэлэстар, со вонэ терэн, манди ашэл май драго по ди».
3. Пала со амэ уӷанаса андэ кадэя статья и васо?
3 Кай и май дур тэ стас зор, кай тэ терас и дила, сави приԥэндя о Иисусо, подаса дума акэ пала со. Васо дэкала амэ умэкас и вас? Савэ амэ анас плодоря, кала росԥэнас важ о царство? И сар, кала када терас, тэ виритярас о ԥаримос?
ВАСО ДЭКАЛА АМЭ УМЭКАС И ВАС?
4. а) Со сас андо ди кай о Павло, важ кода кай май бут анда евреёря на камэнас лэс тэ ашунэн? б) Васо лэстэ сас кацаво андо ди?
4 Сас тумэндэ варикала, кай тумэ умэклэ и вас, важ кода кай и мануша на камэн тэ ашунэн важ о царство? Тоди тумэ полэн, со сас по ди кай о апостоло Павло. Во росԥэнэнас важ о Дэл варикай 30 бэрш. Важ кадэя время во бутэ манушэнди поможысардя тэ ашэн христианоря (Деян. 14:21; 2 Кор. 3:2, 3). Но анда евреёря набут мануша ашэлэ лэ Христостирэ ученикоря. Май бут андар лэндэ отԥэндэпэ тэ ашунэн лэ Павлос, ай дэсавэ ӷонинас лэс (Деян. 14:19; 17:1, 4, 5, 13). Со сас кадэлэстар кай о Павло по ди? Во ԥэндя: «Ԥэнав о чачимос, сар кодэва, ко жал пала Христос... кай мэрно ди ровэл и вся время дуқал» (Рим. 9:1—3). Васо кацаво лэстэ сас андо ди? Во росԥэнэнас лэ евреёнэнди анда вся оди, важ кода кай фартэ загиндояспэ пала лэндэ. Лэсти сас ԥарэс тэ диқэл, сар и мануша отԥэндёнпэ лэ Дэвлэстар, саво жалуий анда вся оди.
5. а) Васо амэ росԥэнас важ о Дэл? б) Васо нинай нисо, кай дэкала амэ умэкас и вас?
5 Амэ, сар и о Павло росԥэнас лэ манушэнди важ о Дэл, важ кода кай анда вся оди камас тэ поможысарас лэнди (Матф. 22:39; 1 Кор. 11:1). Амэ пар пэстэ ӷанас, скати лашимос авэла кодэлэндэ, ко витидэл тэ служий лэ Дэвлэсти. И амэ камас, кай авэр тэ полэн, пэ скати и жизня лэ Иеговаса авелоп май лащи. Важ када амэ упалэ и упалэ росԥэнас лэ манушэнди о чачимос пала Иегова. И росԥэнас, со во загиндосардя тэ стерэл важ и мануша. Ԥэнэса, амэ андям лэ манушэнди шукарно подарко и мангас лэн, кай вонэ тэ прилэн лэс. Но вонэ на камэн лэс тэ лэн. Важ када нинай нисо, кай амэндэ дуқал оди, сар кай о Павло. Амэндэ дуқал оди най важ кода, кай амэндэ найсасти вера, ай важ кода кай и мануша па чачимастэ амэнди куч. И тоди, хоть дэкала амэ и умэкас и вас, амэ всаек на парашас тэ росԥэнас важ о Дэл. Амэ гиндосарас кадя же сар и Елена, сави служий пионероса май бут чем 25 бэрш: «Манди ԥарэс тэ росԥэнав важ о Дэл. Но мэ на камлоп тэ терав варисо авэр».
САР АМЭ АНАС ПЛОДОРЯ?
6. Пала со амэ подаса дума?
6 Васо амэ патяс, кай кажнонэстэ вижала тэ терэл лэ Дэвлэстири дила, кай во тэ на жудоп? Кай тэ уӷанас пала када, трэбуй тэ полас дуй лэ Иисусостирэ притчи. Андэ кадэла притчи во росԥэнэн, кай трэбуй тэ анэн и плодоря (Матф. 13:23). Пэрво, када притча пала виноӷрадно витка.
7. а) Кас сыкавэн «кодэва, ко залэлпэ ла ԥувьяса», «чачуни виноӷрадно витка» и «виточки»? б) Со амэ камас тэ уӷанас?
7 Адиносар Иоанна 15:1—5b, 8c. Шон сама, со ԥэндя о Иисусо пэстирэ апостолонэнди: «Мэрно дад ашунгло кодэлэса, кай тумэ анэн бут плодоря и доԥэнэн, кай тумэ мэрнэ ученикоря». О Иисусо ԥэндя, кай о Иегова, када «кодэва, ко залэлпэ ла ԥувьяса». Пала пэстэ во ԥэндя, кай во, када и «чачуни виноӷрадно витка», ай лэстирэ ученикоря када и «виточки»d. Но, со сыкавэн и плодоря, савэ трэбуй тэ анэн кодэла, ко жан пала Христос? Андэ кадэя притча о Иисусо на ԥэндя пала када ворта. Но во ԥэндя дэсо, со поможый тэ полас, со сыкавэн и плодоря.
8. а) Васо и плодоря андэ лэ Иисусостири притча на сыкавэн, кай када нэвэ ученикоря? б) Со о Иегова амэндар на аштярэл?
8 О Иисусо ԥэндя пала пэско дад: «Во улэл мандар кажно виточка, сави на анэн и плодоря». Тэ ԥэнас па аврятэ, о Иегова гиндой, кай амэ лэстирэ служителя кати тоди, сар анас и плодоря (Матф. 13:23; 21:43). Кадэя притча на сыкавэл, кай и плодоря, када и нэвэ ученикоря (Матф. 28:19). Тоди авелоп кадя, кай сар лэ Иеговастирэ свидетелёстэ на вижыля тэ поможый варикасти тэ ашэл лэ Иеговастирэ манушэса, тоди во кодэя «виточка, сави на анэн и плодоря». Но када най кадя! Амэ на стераса, кай о мануш тэ ашэл лэ Иисусоско ученико через лэско зор. Важ кода кай о Иегова любий амэн, во никала на мангэл и на дэл амэнди дила, сави най па амаро зор (Втор. 30:11—14).
9. а) Со када плодоря, савэ амэ анас? б) Пала сави притча амэ подаса дума и васо?
9 Со када и плодоря, савэ амэ трэбуй тэ анас? Када, кала терас и дила, сави па амаро зор. Сави дила дя о Иегова пэстирэ манушэнди? Кай вонэ тэ росԥэнэн лащи весть пала лэско царство (Матф. 24:14)e. Лэ Иисусостири притча пала кодэва, ко сеий, поможый амэнди тэ полас када. Подам дума пала кадэя притча.
10. а) Со када «семя» и со када «ԥув» андэ лэ Иисусостири притча? б) Со барёл по зэрноско стеблё?
10 Адиносар Луки 8:5—8f, 11—15g. Андэ притча пала кодэва, ко сеий, и «семя», када «лэ Дэвлэско алав», инке када и весть пала царство. И ԥув, када лэ манушэско ди. И семя, сави пэля пэ лащи ԥув, вижал андар латэ, мэкэл и корнёря и барёл. Тоди по стеблё лэл тэ барёл о зэрно «пэ шэл разоря май бут», чем шутэ. Но савэ када стеблёря, барэ чи най? Катэ росԥэнэнпэ най пала стеблёря. Катэ росԥэнэнпэ пала нэвэ семена, савэ через и время вижана анда ԥув и ашэна стеблёря, пэ савэ барёл о зэрно. Андэ кадэя притча росԥэнэнпэ, сар анда ек зэрно ашэл бут. Сар када поджал каринг амари служения?
Сар амэ, кала виритярас о паримос, тэ анас плодоря? (Диқэн о абзацо 11.)
11. а) Сар и притча пала кодэва, ко сеий, поджал каринг амари служения? б) Сар амэ анас нэвэ плодоря?
11 Кала варико анда свидетеля чи амарэ родителя росԥэндэ амэнди чачимос пала царство, ԥэнаса, вонэ посеисардэ и семя андэ ԥув. Вонэ слинэ фартэ лошалэ, кала диқлэ, кай амэ прилям лащи весть пала царство. Кадэя семя барёлас жы кай кодэя время, дэкин по стеблё на ля тэ барёл о зэрно. Амэ диқлям, кай пэ стеблёря на барён нэвэ стеблёря, ай барёл нэво зэрно. Кадяжэ и амэ на анас нэвэ лэ Христостирэ учениконэн, ай анас нэви семя пала царствоh. Но сар амэ када терас? Кажно разо, кала амэ росԥэнас аврэнди пала лэ Дэвлэско царство, амэ ԥэнаса, сеисарас и семя, сави варикала попэля андэ амаро ди (Луки 6:45; 8:1). Важ када, дэкин амэ на парашас тэ росԥэнас пала лэ Дэвлэско царство, амэ терас дила, и кала виритярас о ԥаримос.
12. а) Со амэ уӷанас анда лэ Иисусостири притча пала виноӷрадно витка и пала кодэва, ко сеий? б) Со тумэндэ кадэлэстар по ди?
12 Со амэ уӷанас анда лэ Иисусостири притча пала виноӷрадно витка и пала кодэва, ко сеий? Ашунэна и мануша и весть, сави амэ росԥэнас чи най, амэндэ всаек вижала тэ анас плодоря. Ӷлавно, тэ на парашас тэ росԥэнас аврэнди. Кадэва же гиндо ԥэндя о Павло: «Кажнонэ манушэсти дэна лашимос важ лэстири дила» (1 Кор. 3:8). О Иегова дэл амэнди лашимос, важ кода кай амэ терас лэстири дила, ай най важ кода, со вижал анда амари дила. Акэ, со ԥэнэн и Матильда, сави служий уже 20 бэрш пионероса: «Мэ фартэ лошали, важ кода кай ӷанав, кай о Иегова дэл лашимос важ о зор, саво амэ стас, кала терас лэстири дила!»
САР, КАЛА ВИРИТЯРАС О ԤАРИМОС, ТЭ АНАС ПЛОДОРЯ?
13, 14. Сар андэ Римлянам 10:1, 2 о Павло ԥэндя, васо во на парашэлас тэ росԥэнэн важ лэ Дэвлэско царство?
13 Сар, кала амэ виритярас о ԥаримос, тэ анас и плодоря? Уӷанам май бут пала Павло. Амэ ӷанас, кай лэ Павлости сас найвушэро по ди, кай и евреёря на прилэнас и весть пала царство. И всаек во на умэкэлас и вас. Шон сама, со во пистросардя лэ христианонэнди андо Римо пала кода, со сас лэстэ по ди каринг и евреёря: «Ԥрала, мэ мангавпэ каринг о Дэл пала лэндэ и камав анда вся мэрно ди, кай вонэ тэ спасынпэ. Мэ ԥэнав лэнди, кай кода, сар вонэ служин лэ Дэвлэсти, на сжалпэ лэ чачимаса, хоть вонэ и терэн када анда вся оди» (Рим. 10:1, 2). Васо о Павло на парашэлас тэ росԥэнэн важ о Дэл?
14 О Павло ԥэндя, васо во на парашэлас тэ росԥэнэн лэ евреёнэнди важ о Дэл. Пэрво, важ кода кай во «анда вся оди» камэлас када тэ терэл. Во всаворэ одеса камэлас, кай хоть варико андар лэндэ тэ спасыйпэ (Рим. 11:13, 14). Дуйто, васо во на парашэлас тэ росԥэнэн важ о Дэл, када, кай во мангэласпэ каринг о Дэл пала лэндэ. Во фартэ мангэлас лэ Дэвлэс, кай во тэ поможый кадэлэ народости тэ прилэн и весть пала царство. И трито, васо во на парашэлас тэ росԥэнэн, када, кай додиқля, кай вонэ служин лэ Дэвлэсти анда вся оди. Во диқэлас андэ мануша лашимос и патялас, кай варикала вонэ ашэна лэ Иеговастирэ мануша. О Павло пар пэстэ ӷанэнас, кай лэ евреёнэндэ, савэ служин лэ Дэвлэсти анда вся оди, вижала тэ ашэн лашэ лэ Христостирэ учениконэнца.
15. Сар амэ тэ терас, сар о Павло? Росԥэнэн.
15 Сар амэ тэ терас, сар о Павло? Пэрво, со трэбуй амэндэ тэ авэл, када, кай амэ фартэ тэ камас тэ виарақас кодэлэн, «кас цырдэл каринг о чачимос, саво дэл вечно жизня». Дуйто, амэнди трэбуй фартэ тэ мангас лэ Иеговас, кай во тэ поможый амэнди тэ дас дума кадя, кай лэ манушэнди тэ дожал када андо ди (Деян. 13:48; 16:14). И Сильва, сави служий пионероса 30 бэрш, ԥэнэн: «Англа кода, сар тэ жав тэ росԥэнав па цэра, мэ мангав лэ Иеговас, кай во тэ поможый манди драго тэ гиндосарав пала кадэла мануша». Амэ кадяжэ мангаспэ лэ Иеговасти, кай и анӷелоря тэ бишалэн амэн лэ манушэндэ, савэ камэн тэ ашунэн (Матф. 10:11—13; Отк. 14:6). О ԥрал Роберто, саво служий пионероса май бут чем 30 бэрш, ԥэнэн: «Сар дэ драго, тэ терас бути лэ анӷелонэнца, важ кода кай вонэ ӷанэн, со терэлпэ андэ жизня кай и мануша, савэнди амэ росԥэнас важ о Дэл!» Трито, со амэнди трэбуй, тэ диқас лашимос андэ мануша и тэ патяс, кай варикала вонэ лэна тэ служин лэ Иеговасти. О старейшина, савэс ақарэн Карло, болделя май бут чем 50 бэрш палпалэ. Акэ, со во ԥэнэн: «Кала мэ росԥэнав, мэ диқав по мануш, камэл во тэ уӷанэн важ о Дэл чи най. Шол во сама пэ кода, со мэ росԥэнав чи най, пушэл во варисо и диқэл во холяса пэр мандэ чи най». Сар и лэ Павлостэ, амэндэ вижала, кала виритярас о ԥаримос, тэ анас плодоря.
«НА ДЭ ТЭ ОТЦЫЁЛ ПЭСТИРЭ ВАСТЭСТИ»
16, 17. а) Сости амэн сытярэн и алава анда Экклезиаст 11:6? б) Росԥэнэн, сар пэ амари служения шон сама авэр мануша.
16 Кала здэлпэ, кай и мануша на шон сама пэ весть важ о царство, никала на бистрэн сар кода, кай амэ служисарас может тэ лэл лэ манушэн одестар. (Адиносар Экклезиаст 11:6i). Хоть бут, ко амэн на ашунэн, вонэ шон сама, сар амэ утидэ, сар амэ драго пэс андярас и, кай драго лэнца обжаспэ. Прожал время и вонэ полэн, кай кода, со вонэ пала амэндэ гиндонас, па чачимастэ най кадя. О Серджо и Олинда, пала савэ дям дума андэ пэрво абзацо, диқлэ када пэр пэстэ.
17 О Серджо росԥэнэн: «Важ кода кай амэ занасвайлям, амэ дэсави время на самас по ҭан, кай роздасас и литература. Кала амэ упалэ авелям и мануша, савэ прожанас паша амэндэ, линэ тэ пушэн: „Со тердяпэ? Амэнди на хутилэлас тумэн“». И Олинда ԥэндя: «И водителя анда автобусоря лэ вастэса сыкавэнас, кай лошалэ тэ диқэн амэн и дэсавэ водителя цыпинас амэнди „Тумэ райканэ!“ Вонэ даже манглэ амарэ журналоря». Ек мурш пашэля каринг о стендо, кай сас и литература, дя лэнди цвиторя и ԥэндя «наис».
18. Васо тумэ камэн тэ анэн плодоря, кала виритярэн о паримос?
18 И акэ, кала амэ на дас тэ отцыёл пэстирэ вастэсти и росԥэнас и весть пала царство, кадэлэса амэ терас бари дила (Матф. 24:14). Но май бари лош кодэлэстар, кай када чалёл лэ Иеговасти. Во любий всаворэ пэстирэ манушэн, савэ анэн плодоря, кала виритярэн о паримос.
a Анда штар Евангелии дицол, кай даже лэ Иисусости на сас вушэро тэ росԥэнэн котэ, кай во вибареля (Матф. 13:57; Мар. 6:4; Луки 4:24; Иоан. 4:44).
b Иоанна 15:1—5: «Мэ чачуни виноӷрадно витка, ай мэрно дад кодэва, ко залэлпэ ла ԥувьяса. Во улэл мандар кажно виточка, сави на анэн и плодоря. Ай кажнона, сави анэн и плодоря, терэл вужи, кай вой инке май бут тэ анэн и плодоря. Тумэ уже вужэ через лэ Дэвлэско алав, саво мэ ԥэндэм тумэнди. Авэн еқэндар манца, и мэ авава еқэндар тумэнца. Сар и кай и виточка на вижал екжэни тэ анэн и плодоря, сар вой най пэ виноӷрадно витка, кадя и тумэндэ на вижала тэ терэн и дила, сар тумэ най еқэндар манца. Мэ, витка, ай тумэ виточки. Ко еқэндар манца и каса мэ еқэндар, кодэва терэл бут дила. Ай би мэрно тумэндэ нисо на вижала тэ терэн».
c Иоанна 15:8: «Мэрно дад ашунгло кодэлэса, кай тумэ анэн бут плодоря и доԥэнэн, кай тумэ мэрнэ ученикоря».
d Андэ кадэя притча и «виточки», када кодэла, ко лэна тэ жувэн по нэбо. Но авелоп драго, кай всаворэ лэ Дэвлэстирэ мануша тэ сытён анда кадэя притча.
e Алава «тэ анэн и плодоря» сжанпэ лэ алавэнца «о духо терэл». Кадэя и авэр статья шон сама, кай «тэ дас дума» важ о царство (Гал. 5:22, 23; Евр. 13:15).
f Луки 8:5—8: «Вижыля кодэва, ко андэ ԥув сеий и семена. Кала во сеияс, дэсавэ семена пэлинэ паша дром, и лэн затопчисардэ, и небесни птицы похалэ лэн. Дэсавэ пэлинэ по плай и, кала вонэ вижылэ анда ԥув, зашутелэ, важ кода кай на сас паи. Дэсавэ семена пэлинэ машкар колючё чар. И кала и колючё чар вибареля еқэҭанэ лэнца, вой на дя лэнди тэ барёл. Ай дэсавэ пэлинэ пэ лащи ԥув, и кала вижылэ анда ԥув андэ́ пэ шэл разоря май бут кодэлэстар, скати посеисардэ. Кала во росԥэндя када, во анда вся ӷолосо ԥэндя: „Кодэлэстэ, кастэ исин кан, кай тэ ашунэл, мэк ашунэл“».
g Луки 8:11—15: «Кода, со мэ росԥэндэм, акэ со сыкавэл. Семя, када лэ Дэвлэско алав. Кодэла, кай паша дром, када, ко ашундэ о алав. Но тоди авэл о Сатана и залэл о алав анда лэндирэ одя, кай вонэ тэ на патян и тэ на фэринпэ. Кодэла, ко по плай, када, ко ашундэ о алав и лошаса прилинэ лэс. Но лэндэ нинай корнёря. Варисави время вонэ патян. Но кала лэндэ о ԥаримос, отжан ла вератар. Со пэля машкар колючё чар, када кодэла, ко ашундэ о алав, но отжылэ, важ кода кай затасавэл о ԥаримос, о барвалимос и развлечения кадэла жизняти. И колючё чар замарэл и на дэл тэ спилой о зэрно. Ай кодэла, ко пэ лащи ԥув, када и мануша, кастэ шукарно и лашо ди, савэ сар ашундэ о алав, фэрин лэс и виритярэн о ԥаримос, кала анэн плодоря».
h Андэ авэр время о Иисусо кадяжэ ԥэнэнас пала кода, кай тэ сеин и семя и кай тэ стидэн о зэрно. Во када ԥэнэнас, кай лэстирэ ученикоря тэ сытярэн аврэн (Матф. 9:37; Иоан. 4:35—38).
i Экклезиаст 11:6: «Тэсара сеисар о зэрно и жы рятятэ на дэ тэ отцыёл пэстирэ вастэсти».