Кала ту фартэ насвало

«Кала манди ԥэндэ, кай мандэ рак легких и кишечника, мэ гиндосаравас, кай точно мэрэва. Но кала мэ рисайлэм анда больница, мэ погиндосардэм: „Канешно, мэ на ӷанавас, кай мандэ исин кацаво насвалимос, но кадэлэса трэбуй варисар тэ жував“» (Линда, 71 бэрш).

«Мандэ невралгия тройничного нерва по муй пэ лево риг. Дэкала кадя фартэ дуқал, кай мандэ аж лэлпэ депрессия. Мэ часто гиндосаравас, кай мэ екжэни и дажэ камавас тэ умарав корко пэс» (Элис, 49 бэрш).

Паша мануш, саво андэ инвалидно коляска, тердёл лэско ери

ЕСЛИ тутэ или варикастэ анда тирэ чаче исин насвалимос, саво можэт тэ анэн каринг и смэрть, тоди ту полэс, кай кадэлэстар можно тэ умэкэс и вас. Ԥарэс можэт тэ авэл най кати лэ насвалимастар, но и кодэлэстар, со терэлпэ андо ди. О мануш можэт инке май бут тэ дарал и тэ гиндой важ кода, кай бут и долӷо тэ ԥирэл кай и врачоря, кай ԥарэс тэ домардёл лащи лечения и тэ потинэл важ и лечения, ай кадяжэ кодэлэстар, саво вэрытимос жал лэ драбэндар, савэ во пэл. Через о ԥаримос андо ди май фартэ лэл тэ дуқал и тила и кадэлэстар и жызня ашэл инке май ԥари.

Но кай тэ виарақэс помощь? Бутэнди фартэ поможысардя кода, кай вонэ мангэнаспэ лэ Дэвлэсти и адинонас андэ Библия гиндоря, савэ подритярэн. Кадяжэ можэт тэ дэл зор кода, кай тут любин и подритярэн тирэ чаче и и друӷоря.

СО МОЖЭТ ТЭ ДЭЛ ПОМОЩЬ

О Роберто, савэсти 58 бэрш, ԥэнэн: «Дэ лэ Дэвлэсти тэ авэл паша тутэ андэ кацави время и во поможыя тути тэ виритярэс кадэва ԥаримос. Мангпэ лэ Иеговасти. Росԥэн лэсти, со тутэ по ди. Манг лэс тэ дэл тути о свынто духо. Манг лэс тэ поможый тути тэ на умэкэс и вас и тэ подритярэс пэско ери, кай тэ авэс спокойно андэ кадэя ԥари время».

О Роберто кадяжэ ԥэнэн: «Фартэ баро зор дэл о ери, важ кода кай ту ӷанэс, кай андо любо маменто тут подритярэна! Еқвар или дувар андо дес варико можэт тэ позвоний и тэ пушэл, сар мандэ и дила. Мэрнэ друӷоря звонин и пистрон манди всаворэ ригэндар. Мэ диқав, кай вонэ дэн манди зор, и када поможый тэ на умэкав и вас».

Если ту камэс тэ жас кай тиро друӷо, саво фартэ занасвайля, приашундю каринг кода, со ԥэндя и Линда: «Кодэва, ко насвало, камэл тэ жувэл сар всаворэ мануша, пэ скати када лэстэ вижала, и во най вся и время камэл тэ дэл дума пала пэско насвалимос. Важ када дэ дума пала кода, пала со обычно дэс дума аврэ манушэнца».

Лэ Дэвлэско зор, гиндоря анда Библия и помощь лэ ерестар и лэ друӷонэндар поможына тути тэ полэс, кай тэ жувэс трэбуй, дажэ если тутэ ԥаро насвалимос.

И стихоря анда Библия, савэ моӷут тэ подритярэн

Мангпэ лэ Дэвлэсти

«Мэ манглэм лэ Иеговас и во дя атвето манди. Во спасысардя ман всаворэстар, состар мэ дарав. Кодэва, ко умардо бидаса, ақардя и о Иегова ашундя» (Псалом 34:4, 6).

И Линда, пала сави сас пистромэ, ԥэнэн: «Мэ никала на мангавас лэ Дэвлэс: „Поможысар манди тэ виличисавав“, но мангавас лэс: „Поможысар манди тэ авав састи и вся тэ виритярав“».

Адиносар и Библия, кай тэ авэс састо

«Нико анда мануша на ԥэнэна: „Мэ насвало“» (Исаия 33:24).

Гиндосар пала кода, со о Дэл камэл тэ стерэл англэ. Кала ту аштярэса англэ о лашимос, када дэла тути зор вся тэ виритярэс.

Манг помощь кай о ери и кай и друӷоря

«О чачуно друӷо пэстири любовь сыкавэл пэ дила андэ любо время, во ԥрал, саво авеля пэ люма, кай тэ поможый андэ бида» (Притчи 17:17).

И Элис, пала сави сас пистромэ, ԥэнэн: «На гарадю лэ манушэндар, савэ паша тутэ. Дэ лэ друӷонэнди тэ поможын тути. Дэкала можэт тэ здэлпэ, кай ту екжэно и кай дажэ о Дэл тут на ашунэл, но и тоди на гарадю лэ манушэндар».