О Иегова любий и цэний тумэн!

1, 2. Со прижалпэ тэ пэрэандярэн бут лэ Иеговастирэ служытеля и сар када пар лэндэ дицол?

РОЗДИҚАМ, со сас тринэ манушэнца. Еқэ ԥралэсти и врачоря ԥэндэ, кай лэстэ ԥаро насвалимос. Андэ авэр ери лэ хулас, савэсти 50 бэрш, вишутэ па бути и во нисар нащи арақэл авэр бути. Ԥэй, сави андэ бэршэндэ, и сави на парашэл тэ кандэл лэ Дэвлэс, через пэско зор и через пэстирэ бэрша май набут ля тэ терэл андэ служэния лэ Иеговасти.

² Если ту ӷатярдян пэс андэ кода, со сас кодэла тринэ манушэнца, тути можэт тэ здэлпэ, кай акана ту нисо на ашэс. Кала терэлпэ кацаво, ту ни сости на лошавэс и гиндос, кай нисо на ашэс и через када тути можэт тэ авэл ԥарэс тэ ладис аврэнца.

3. Сар диқэл пэ манушэндири жызня о Сатана и кодэла, ко кандэн лэс?

³ Андэ люма, савяса правий о Сатана, лэ манушэндири жызня на ашэл нисо, сар и важ о Сатана. Во никала на жалуияс лэ манушэн. Во дя ла Евати хохавни свобода, хоть екжэно драго полэлас, если вой на кандэла лэ Дэвлэс, када анэна каринг и смэрть. О Сатана вся и время диқэлас пала вся, со терэлпэ андэ люма, када, кала тинэн и битинэн, пала политика и пала хохавнэ веры. Важ када амэ на удивисавас, кай важ о Сатана и важ кодэла, ко кандэн лэс, лэ манушэстири жызня на ашэл нисо.

4. Пала со амэ подаса дума андэ кадэя статья?

⁴ О Иегова камэл, кай амэ тэ цэнисарас корко пэс. Во поможый амэнди, кала варисо терэлпэ андэ жызня, кай амэ тэ на гиндосарас, кай амэ нисо на ашас (Псалом 136:23; Римлянам 12:3). Андэ кадэя статья амэ подаса дума, сар о Иегова подритярэл амэн. Пэрво, када, кала амэ насвалэ. Дуйто, када, кала най сар тэ затерас ловэ. И трито, када, кала через амарэ барэ бэрша, амэ полас, кай нисо нэ можэм тэ терас андэ служэния лэ Иеговасти. Но май англал, давай подаса дума пала кода, катар амэ ӷанас, кай о Иегова цэний кажнонэс андар мэндэ.

О ИЕГОВА ЦЭНИЙ АМЭН

5. Васо тумэ патян, кай о Иегова цэний лэ манушэн?

⁵ Хоть о Дэл и создал амэн анда прахо, амэ всаек важ лэстэ фартэ куч (Бытие 2:7). Роздиқам, васо амэ куч важ о Иегова. Во создал лэ манушэн, кай лэндэ тэ авэн кацавэ жэ качестворя, сар лэстэ (Бытие 1:27). Важ када англа лэ Дэвлэстирэ яқа, амэ пэ бутэстэ май куч, чем вся, со во создал. Инке, во дя амэнди тэ хулаисарас пэ вся, со пэ ԥув и пэ жывотни (Псалом 8:4—8).

6. Со инке сыкавэл, кай лэ Иеговасти куч и найсовершэни мануша?

⁶ Дажэ посли кода, сар о Адамо тердя о бэзэх, о Иегова на парашэля тэ цэний лэ манушэн. Амэ кадя фартэ лэстэ куч, кай во отдя пэстирэ любимонэ Шавэс, лэ Иисусос, кай тэ витинэл амэн лэ бэзэхэстар (1 Иоанна 4:9, 10). О Иисусо отдя пэстири жызня важ амэндэ, и важ када о Иегова рия каринг и жызня кодэлэн, ко муля, када «праведни и нэправедни». Кодэлэн, ко муля через лэ Адамоско бэзэх (Деяния 24:15). Андэ Библия пистромэ, сар дэ куч амэ лэ Иеговасти, и лэсти всаек скати амэнди бэрш, со за амэндэ зор и исин амэндэ ловэ чи нинай (Деяния 10:34, 35).

7. Росԥэнэн, васо инке важ о Иегова амэ куч?

⁷ Исин инке бут, со сыкавэл, кай о Иегова амэн цэний. Во шутя сама пэ кода, сар амэ прилям и лащи весть, и ақардя амэн каринг пэстэ (Иоанна 6:44). Кала амэ лям тэ пашувас каринг о Иегова, во ля тэ пашол каринг амэндэ (Иакова 4:8). О Иегова кадяжэ на жалуий пэстири время и о зор, кай тэ сытярэл амэн, и кадэлэса сыкавэл, кай амэ лэсти куч. Во ӷанэн, савэ амэ сам акана и савэ амэ можэм тэ авас май англэ. О Иегова амэн любий, и важ када сытярэл, кай тэ парудювас (Притчи 3:11, 12). Када драго сыкавэл, кай амэ куч важ о Иегова!

8. Сар кода, со запистромэ андэ Псалом 18:27—29, поможый амэнди правильно тэ диқас по ԥаримос?

⁸ Дэсавэ мануша гиндонас, кай о царё Давидо на ашэл нисо, и дажэ ԥэнэнас пэр лэстэ, кай во бибахтало. Но во ӷанэнас, кай о Иегова лэс любий и подритярэл. Када поможыяс лэсти правильно тэ полэл, сар паруделя лэстири жызня (2 Самуила 16:5—7). Кала амэнди ԥарэс по ди и пэрэандярас ԥари время, о Иегова ӷотово тэ поможый амэнди. Через када амэ можэм пэ вся тэ диқас па аврятэ и тэ пэрэандярас любо ԥаримос. (Адиносар Псалом 18:27—29b.) Ай кала амэн подритярэл о Иегова, хэба варисо можэт тэ на домэкэл амэн тэ служысарас лэсти лошаса? (Римлянам 8:31). Давайте подам дума пала трин маменторя, кала амэнди фартэ трэбуй тэ сэрас, кай о Иегова любий амэн и цэний.

КАЛА АМЭНДЭ ԤАРО НАСВАЛИМОС

9. Сар через кода, кай амэндэ ԥаро насвалимос, амэ можэм па аврятэ тэ диқас пэр пэстэ?

⁹ Дэкала через кода, кай амэндэ ԥаро насвалимос, амэ можэм тэ парашас тэ радосавас и гиндосарас, кай амэ нэ сможэм нисо тэ терас. Амэнди можэт тэ авэл лажаво, кала кодэла, ко паша амэндэ, диқэн, кай амэнца варисо най кадя чи кала амэ мангас, кай амэнди варико тэ поможый. Дажэ, если пала амаро насвалимос нико на ӷанэн, амэнди всаек лажаво, кай амэ нэ можэм тэ терас дила скати моӷли тэ терас варикала. Андэ кацави ԥари время о Иегова дэл амэнди зор. Сар?

10. Со, сар пистромэ андэ Притчи 12:25, можэт тэ дэл амэнди зор, кала амэ насвалэ?

¹⁰ Кала амэндэ ԥаро насвалимос, зор амэнди можэт тэ дэл лашо алав. (Адиносар Притчи 12:25c.) Андэ Библия о Иегова стодя бут лашэ алава, савэ ԥэнэн амэнди, кай амэ лэсти куч, и на шол сама пэ кода, кай амэндэ нинай зор (Псалом 31:19; 41:3). Кала амэ адиносарас лэ Иеговастирэ алава и дажэ най еқвар, вонэ поможын амэнди тэ пэрэандярас о ԥаримос, саво амэндэ по ди лэ насвалимастар.

11. Сар о Иегова поможысардя лэ ԥралэсти?

¹¹ Акэ, со пэрэжудя о ԥрал, савэс ақарэн Хорхе. Тэрнэса во заразисайля ԥарэ насвалимаса, саво одлэлас лэстар май бут и май бут зор. Через када во гиндояс, кай акана во нэ сможэт тэ терэл нисави дила. Во росԥэнэн: «Мэ на ӷанавас, кай через кадэва насвалимос авэла кадя ԥарэс по ди и манди сас лажаво, кай пэр мандэ шон сама. Манди ашэлас май ԥарэс и май ԥарэс, и мэ лэм тэ загиндосавав, сави авэла мэрни жызня. Манди сас кадя ԥарэс, кай мэ ясвэнца мангавас лэ Иеговас тэ поможый». Сар о Иегова лэс подритярдя? О Хорхе росԥэнэн: «Через кода, кай мэ вся и время гиндосаравас пала мэрно насвалимос, манди сас ԥарэс тэ адиносарав и Библия, и важ када манди подԥэндэ тэ адиносарав скуртинки стихоря анда Псалмы, андэ савэ ԥэнэнпэ, сар о Иегова заботийпэ пала пэстирэ служытеля. Мэ кажно дес адиносаравас и дажэ най еқвар проадиносаравас кодэла стихоря, и вонэ ман па чачимастэ подритярэнас. Прожыля время и кодэла, ко сас паша мандэ, линэ тэ шон сама, кай мэ лэм май часто тэ асав. Вонэ дажэ ԥэнэнас, кай, кода, кай мэ лэм тэ лошавав дэлас лэнди зор. Мэ полэм, кай о Иегова ашундя мэрнэ молитвы! Во поможысардя манди тэ диқав пэр пэстэ па аврятэ. Через и Библия мэ диқлэм, сар о Дэл полэл ман и дажэ на шол сама пэ мэрно насвалимос».

12. Со трэбуй тэ терас, кай о Иегова тэ поможый амэнди, кала амэндэ варисаво насвалимос?

¹² Кала тумэндэ варисаво насвалимос, патян, о Иегова ӷанэн, со тумэнди прижалпэ тэ пэрэандярэн. Фартэ мангэн лэс тэ поможый тумэнди правильно тэ диқэн пэ кода, со тумэнца терэлпэ. Посли када родэн лэ Иеговастирэ лашэ алава андэ Библия, савэ моӷли бы тумэн тэ подритярэн. Шон сама пэ стихоря, анда савэ дицол, сар лэ Иеговасти куч лэстирэ служытеля. Тоди тумэ полэна, кай о Иегова добро каринг всаворэ, ко на парашэл лэс тэ кандэл (Псалом 84:11).

КАЛА НАЙ САР ТЭ ЗАТЕРАС ЛОВЭ

13. Со можэт тэ авэл андо ди кай о хулай андо ери, савэстэ нинай бути?

¹³ Кажно хулай андо ери камэл, кай лэстирэ ерестэ тэ авэл вся, со трэбуй. Но со, если о хулай нисо на тердя вэрыто, ай лэс вишутэ па бути? Во старыийпэ тэ затерэл и ловэ, но лэстэ нисо на вижал, и через када во гиндой, кай во нисо на ашэл. Сар можэт вся тэ парудёл, если во май бут лэла тэ гиндой пала кода, пала со о Иегова дя алав?

14. Васо о Иегова вся и время зритярэл кода, пала со дя алав?

¹⁴ О Иегова вся и время ритярэл пэско алав (Иисус Навин 21:45; 23:14). Васо? Пэрво, важ кода кай тэ ашундёл лэ Иеговаско алав и саво о Иегова. Во дя алав, кай заботияпэ пала пэстирэ служытеля, савэ на парашэн лэс тэ кандэн. И во полэл, кай трэбуй тэ зритярэл кода, пала со дя алав (Псалом 31:1—3). Дуйто, о Иегова ӷанэн, кай амэнди авэла фартэ найдраго по ди, если во на поможыя кодэлэнди, ко андэ лэско ери. Во дэл алав, кай подритярэла амэн, кай амэндэ тэ авэл лащи дружба лэса и кадяжэ, кай амэндэ тэ авэл вся, со трэбуй важ и жызня, и нисо на тердярэла лэс када тэ стерэл! (Матфея 6:30—33; 24:45).

15. а) Саво ԥаримос сас кай и христианоря андэ пэрво вико? б) Со амэнди ԥэнэн о Иегова, сар пистромэ андэ Псалом 37:18, 19?

¹⁵ Кала амэ сэрас, васо о Иегова зритярэл пэско алав, тоди амэ можэм тэ патяс, кай о Иегова поможыя амэнди, кала амэнди ԥарэс, тэ затерас и ловэ, кай тэ прожувас. Роздиқам, со сас лэ христианонэнца, савэ жувэнас андэ пэрво вико. Кала и собрания андо Иерусалимо линэ фартэ тэ ӷонин, «ашэлэпэ ек и апостолоря, ай всаворэ рознашлэпэ» (Деяния 8:1). Погиндон, сар ԥарэс сас кодэлэ христианонэнди! Файма, вонэ ашадэ пэстирэ цэра и бути чи дила, сави терэнас. Но о Иегова лэн на ашадя андэ бида, и вонэ кадяжэ на умэклэ и вас (Деяния 8:4; Евреям 13:5, 6; Иакова 1:2, 3). О Иегова подритярдя андэ кодэя время лэ христианонэн, савэ на парашэнас лэс тэ кандэн, и во кадяжэ подритярэла и амэн. (Адиносар Псалом 37:18, 19d.)

КАЛА АМЭ ԤУРЮВАС

16. Васо амэ можэм тэ на допатяс, кай амэ куч важ о Иегова?

¹⁶ Кала амэ ԥурювас, амэнди можэт тэ здэлпэ, кай амэ ужэ на трэбуй лэ Иеговасти. Кала о царё Давидо ԥуреля, файма, лэстэ кацаво жэ сас по ди (Псалом 71:9). Сар о Иегова можэт тэ поможый амэнди?

17. Сости амэ сытювас кодэлэстар, со сас ла Джерияса?

¹⁷ Роздиқам, со сас еқа ԥэяса, савя ақарэн Джери. Ла ақардэ тэ сытярэн, сар тэ диқэн пала зало, кай тидэнпэ лэ Иеговастирэ свидетеля, но вой на камэлас интя тэ жал. И Джери ԥэндя: «Мэ ужэ ԥури и мэ ԥивли. И мэ на ӷанав нисо, со поможыя тэ диқав пала зало. Пэр со мэ тумэнди кацави?» Вэчэром, англа кода, сар тэ жал тэ сытёл, вой андэ молитва ԥэрнадя пэско ди лэ Иеговасти. Кала пэ авэр дес вой авеля андо зало, вой всаек на полэлас, состэ ла ақардэ. Андэ кодэя время, кала росԥэнэнас, со трэбуй тэ терэн, ек ԥрал, саво сытярэлас, ԥэндя, кай само ӷлавно, со амэ можэм тэ терас, када тэ камас тэ сытювас кай о Иегова. И Джери росԥэнэн: «Сэрав, мэ погиндосардэм: „Мандэ када исин!“ Мэ розровдэмпэ кодэлэстар, кай полэм, кай о Иегова ашундя мэрни молитва. Во дя манди тэ полав, кай мэ моӷу тэ стерав важ лэстэ варисо лашо и во камэл ман тэ сытярэл!» Прожыля и время и Джери росԥэнэн: «Мэ жавас пэ кодэя встреча и нервичисаравас, манди сас ԥарэс по ди. Ай сар жавас палпалэ, ԥэнэса, вурявас пэ ԥақэндэ, важ кода кай мэ полэм, кай мэ варисо ашав!»

18. Сар и Библия сыкавэл, кай о Иегова на парашэл тэ цэний кода, кай амэ служысарас лэсти, дажэ кала ԥурювас?

¹⁸ Амэ можэм тэ патяс, скати бы тэ на авэл амэнди бэрш, о Иегова виарақэла амэнди дила (Псалом 92:12—15). О Иисусо сытярэлас кадя, кай дажэ, если амэндэ на вижал бут тэ терас андэ служэния и амэнди здэлпэ, кай амэ на стас бут зор, важ о Иегова всаек куч вся, со амэ терас андэ служэния (Луки 21:2—4). Важ када спэрва гиндон пала кода, со па тумаро зор. Например, тумэ можэте тэ росԥэнэн аврэнди пала о Иегова, тэ мангэнпэ пала ԥрала и ԥэя и тэ подритярэн лэн, кай вонэ тэ на парашэн тэ кандэн лэ Иеговас. О Иегова полэл тумэн, сар пэстирэ амалэн, но най важ кода, кай тумэ варисо лэсти тэ дэн, ай важ кода, кай тумэ камэн лэс тэ кандэн (1 Коринфянам 3:5—9).

19. Андэр со дэн тэ патяс и алава, савэ запистромэ андэ Римлянам 8:38, 39?

¹⁹ Сави када бари бах тэ служысарас лэ Иеговасти, лэ Дэвлэсти, саво па чачимастэ цэний кодэлэн, ко на парашэл лэс тэ кандэл! Во создал амэн, кай амэ тэ терас кода, со во камэл, и кала амэ лэсти служысарас, кадэлэстар амари жызня ашэл май бахтали (Откровение 4:11). Хоть андэ люма, савяса правий о Сатана, пар мэндэ моӷут тэ диқэн кадя, кай амэ нисо на ашас и нисо нэ можэм тэ терас, лэ Иеговасти найлажаво важ амэндэ и во кадя на гиндой (Евреям 11:16, 38). Амэнди можэт тэ авэл ԥарэс через о насвалимос, через и бэрша чи через кода, кай най сар тэ затерас ловэ. Тоди трэбуй никала тэ на бистрас, кай нисо нэ сможэт амэн тэ одлэл кодэлэстар, кай амэн тэ на любий о небесно Дад! (Адиносар Римлянам 8:38, 39e.)