Сости сытярэл амэн пала амаро царё кода, кай амэ терас о Вэчэро по простому?

1, 2. а) Васо о Иисусо приԥэндя тэ прожал просто о Вэчэро, кай сэрэн пала лэстири смэрть? б) Пала савэ лэ Иисусостирэ качестворя амэ подаса дума?

МОЖЭТЕ тумэ тэ росԥэнэн, сар прожал о Вэчэро, кай сэрэн пала лэ Иисусостири смэрть? Бутэнди андар мэндэ када найԥарэс, важ кода кай во прожал фартэ просто. И всаек кадэва Вэчэро фартэ бут со сыкавэл. Но тоди, васо во прожал кадя просто?

² Кала о Иисусо жувэлас пэ ԥув, во ашундёлас кодэлэса, кай росԥэнэнас о чачимос просто и понятно (Матфея 7:28, 29). Во кадяжэ варикала приԥэндя пэстирэ учениконэнди, сар просто трэбуй тэ прожал о Вэчэро, кай тэ сэрэнb пала лэстири смэрть. Но кода, со во лэнди приԥэндя тэ терэн, бут со сыкавэл. Подам дума май драго пала Вэчэро и пала кода, со о Иисусо ԥэндя и стердя пэ кадэва Вэчэро. Кадя амэ инке май драго поласа, кай о Иисусо сас любящё, смило и на гиндояс пала пэстэ бут. И погиндосараса, сар инке май бут тэ терас кадя, сар во.

О ИИСУСО НА ГИНДОЯС ПАЛА ПЭСТЭ БУТ

3. Пэ скати дэ просто сас о Вэчэро, сар дицол анда Матфея 26:26—28, и со сыкавэнас о марно и о вино?

³ Кала о Иисусо заля тэ терэл о Вэчэро, кай тэ сэрэн пала лэстири смэрть, паша лэстэ слинэ 11 апостолоря, савэ кандэнас лэс. Во ля кода, со ашэляпэ па мисяйля, сави стонас по празнико патради и приԥэндя лэ апостолонэнди тэ терэн о Вэчэро по простому. (Адиносар Матфея 26:26—28c.) Во ля кати о марно би дрожэнго и о вино, савэ сас пэ мисяйля. Тоди о Иисусо ԥэндя лэ апостолонэнди, кай кадэла прости символоря сыкавэн лэстири совершэно тила и о рат, саво лэсти йто трэбуй авэла тэ отдэл важ лэндэ. И апостолоря, файма, дажэ на удивисайлэ, кай во приԥэндя кадя дэ просто тэ терэн кадэва важно Вэчэро. Васо?

4. Сар и алава, савэ о Иисусо ԥэндя ла Марфати, поможын амэнди тэ полас, васо о Вэчэро трэбуй тэ терас по простому?

⁴ Сгиндосарам, со тердяпэ андо трито бэрш, сар служыяс о Иисусо. Када сас варикай епаш бэрш каринг лэстири смэрть. Во авеля тэ побэшэл кай пэстирэ пашутнэ друӷоря кай о Лазарё, и Марфа и Мария. Полокэ, би грабимаско о Иисусо ля тэ сытярэл кодэлэн, ко котэ сас. Ай ла Марфати найкала сас тэ бэшэл и тэ ашунэл. Вой камэлас тэ уӷодий лэ кучутнэ ӷостёсти и гитояс разно хамос. О Иисусо шутя сама пэ када и би холяко дя лати тэ полэл, кай дэкала на трэбуй тэ стос бут хамос, кай тэ уӷодис варикасти (Луки 10:40—42). Ашэляпэ набут время жы каринг кода, сар о Иисусо тэ отдэл пэстири жызня и во тердя кадя, сар ԥэндя ла Марфати. Кала во заля тэ терэл о Вэчэро, кай тэ сэрэн пала лэстири смэрть, во приԥэндя лэнди тэ терэн када по простому. Со када ԥэнэн амэнди важ о Иисусо?

5. Пала саво лэ Иисусоско качество ԥэнэн кода, кай во приԥэндя тэ терэн о Вэчэро по простому и сар када дицол анда Филиппийцам 2:5—8?

⁵ Анда всаворэ лэ Иисусостирэ алава и дила дицолас, кай во на гиндояс пала пэстэ бут. Андэ послиднё рят андэ пэстири жызня пэ ԥув, во кадяжэ сыкадя, кай на гиндояс пала пэстэ бут (Матфея 11:29). Во ӷанэнас, кай йто пэ ԥув во анэна само бари жэртва. Во ӷанэнас, кай о Иегова рия лэс каринг и жызня и стерэла лэс царёса по нэбо. Хоть во када и ӷанэнас, во на камэлас, кай пэр лэстэ тэ шон сама. Во на камэлас, кай тэ стон барэ мисяйле и инке варисо, кай тэ сэрэн пала лэстири смэрть. Наоборот, во ԥэндя, кай еқвар андо бэрш тэ сэрэн пала лэстири смэрть и тэ терэн када по простому (Иоанна 13:15; 1 Коринфянам 11:23—25). Кода, кай о хамос сас просто, сыкавэл, кай о Иисусо на заваздэлас о шэро. Сар жэ амэ лошалэ, кай амаро небесно царё на гиндой пала пэстэ бут! (Адиносар Филиппийцам 2:5—8d.)

6. Сар, кала амэндэ ԥаримос, тэ на гиндосарас пала пэстэ бут, ай тэ терас кадя, сар о Иисусо?

⁶ Сар амэ тэ сыкавас, кай на гиндосарас пала пэстэ бут? Када, кала амэ май англал гиндосарас най пала амэндэ, ай пала авэр (Филиппийцам 2:3, 4). Погиндосарам пала послиднё рят андэ лэ Иисусостири жызня. Во ӷанэнас, кай йто мэрэла ԥаря смэртяса. И всаек во фартэ пэрэжывал пала пэстирэ апостолоря, савэ лэс кандэнас, кай вонэ лэна тэ ровэн пала лэстэ. Важ када во вся и рят сытярэлас лэн, подритярэлас и ԥэнэнас лашэ алава (Иоанна 14:25—31). Кодэлэса, кай о Иисусо на гиндояс пала пэстэ бут, во сыкадя, кай фартэ загиндояспэ пала пэстирэ ученикоря. Саво лашо примеро важ амэндэ!

ЛЭ ИИСУСОСТИ СМИЛОСТЬ

7. Сар о Иисусо сыкадя пэстири смилость, кала тердя о Вэчэро пэстирэ учениконэнца?

⁷ Прожыля набут время и о Иисусо сыкадя пэстири смилость посли кода, сар тердя о Вэчэро, кай тэ сэрэн пала лэстири смэрть. Во витидя тэ кандэл пэстирэ дадэс, хоть и ӷанэнас, сар ԥарэс лэсти авэла, кай лэс умарэна, важ кода кай во, кабута, ԥэнэнас найлашэ алава по Дэл (Матфея 26:65, 66; Луки 22:41, 42). О Иисусо на парашэля тэ кандэл лэ Дэвлэс, кай лэско алав тэ авэл инке май ашунгло и кай во пала лэ Иеговастири правления. Кадяжэ, кай тэ ԥэрнавэл о дром каринг и вечно жызня кодэлэнди, ко каийпэ андэ пэстирэ бэзэха. Андэ кодэя жэ время во сытярдя пэстирэ учениконэн кодэлэсти, со тэ терэн, кала англэ авэла о ԥаримос.

8. а) Со о Иисусо ԥэндя пэстирэ апостолонэнди, савэ лэс кандэнас? б) Сар посли лэ Иисусостири смэрть и ученикоря бут бэрша сыкавэнас, кай вонэ кадяжэ смили, сар и во?

⁸ Лэ Иисусостири смилость дицэля инке андэ кода, кай во на гиндояс кати пала пэско ԥаримос, саво лэстэ сас. Ай старыияспэ тэ поможый и тэ дэл зор пэстирэ апостолонэнди, савэ лэс кандэнас. Посли кода, сар о Иуда жылятар, о Иисусо заля тэ терэл кадэва Вэчэро. Кадэва Вэчэро сас трэбуй тэ дэл тэ сэрэн лэ помазаниконэнди, саво лашимос авэла англэ через кода, кай питяя лэско рат и кай вой тердя о нэво доӷоворо (1 Коринфянам 10:16, 17). О Иисусо росԥэндя лэ учениконэнди, со лэндар аштярэн лэско дад о Иегова и во. Васо? Кай тэ поможый лэнди тэ на парашэн тэ кандэн лэ Дэвлэс и тэ правин лэ Иисусоса по нэбо (Иоанна 15:12—15). Кадяжэ во росԥэндя лэнди, кай англэ лэндэ авэла ԥаримос. Инке во ԥэндя, кай тэ сытён лэстар и тэ на даран (Иоанна 16:1—4а, 33). Прожылэ бут бэрша и лэстирэ ученикоря кадяжэ анда вся оди терэнас, сар о Иисусо и слинэ смили. Саво бы ԥаримос лэндэ тэ на авэл, вонэ поможынас и подритярэнас ек аврэс, хоть лэн важ када моӷли и тэ умарэн (Евреям 10:33, 34).

9. Сар амэ можэм тэ авас смили и тэ терас сар о Иисусо?

⁹ Адес, амэ кадя жэ, сар и о Иисусо, трэбуй тэ авас смили. Када трэбуй, кала поможысарас лэ ԥралэнди, савэн ӷонин важ и вера. Андэ дэсавэ страны лэн нивасо стон андо бар. Кала кацаво терэлпэ, амэнди трэбуй тэ терас вся, кай лэнди тэ поможысарас. Кадяжэ тэ мангаспэ важ лэндэ, тэ жас кай и барэдэра, ай инке тэ дас дума пала лэндэ андо сындо (Филиппийцам 1:14; Евреям 13:19). Амэ сыкавас амари смилость, кала на парашас тэ росԥэнас важ о Дэл (Деяния 14:3). Сар и о Христос, амэ камас и май дур тэ росԥэнас аврэнди важ лэ Дэвлэско царство, дажэ, если важ када амэн лэна тэ ӷонин. Но дэкала амэ можэм тэ дарас. Со амэнди поможыя тэ на дарас?

10. Со амэнди трэбуй тэ терас, сар ашэнапэ набут курте каринг о Вэчэро и васо када фартэ важно?

¹⁰ Кай тэ авэл амэндэ смилость, трэбуй тэ гиндосарас пала лашимос, саво авэла англэ. Лэс амэнди дя о Иисусо кодэлэса, кай отдя пала амэндэ пэстири жызня (Иоанна 3:16; Эфесянам 1:7). Сар ашэнапэ набут курте каринг о Вэчэро, амэ можэм инке май драго тэ полас, сар тэ авас блаӷодарни пала выкупо. Када, тэ адиносарас и Библия по ӷрафико, кай тэ уӷанас май драго, со сас лэ Иисусоса англа лэстири смэрть. Кадяжэ тэ мангаспэ и тэ гиндосарас пала кода, со адиносарас. Тоди, сар аваса по Вэчэро, амэ май драго поласа, кай о марно и о вино сыкавэн и кучутни лэ Иисусостири жызня, сави во отдя важ амэндэ. Кала цэнисарас, со стердя о Иегова и о Иисусо важ амэндэ, амэ инке май фартэ лас тэ полас, саво лашимос када анэна амэнди и амарэ родости. Через када амэ аштярас инке май фартэ о лашимос, саво авэла англэ, и амэндэ авэла зор тэ пэрэандярас вся о ԥаримос (Евреям 12:3).

11, 12. Со дэл тэ сэрас кадэва Вэчэро?

¹¹ Сар амэ полям, о Вэчэро дэл амэнди тэ на бистрас най кати, кай о Иисусо отдя пэстири кучутни жызня пала амэндэ, но и кода, кай во смило и кай на гиндояс пала пэстэ бут. Во и акана кацаво, кала служый по нэбо, сар само баро рашай и старыийпэ пала амэндэ. Сар жэ амэ кадэлэсти лошалэ! (Евреям 7:24, 25). Кай тэ сыкавас пэстири блаӷодарность, андо 14 нисана, амэнди трэбуй тэ терас кода, со о Иисусо приԥэндя тэ терэн пэстирэ учениконэнди. Када тэ терас о Вэчэро, кай тэ сэрас пала лэстири смэрть (Луки 22:19, 20). Андо бэрш када само важно дес важ амэндэ.

¹² Кода, кай о Вэчэро терас по простому, сыкавэл инке пэ ек качество, через саво о Иисусо закамля тэ отдэл важ амэндэ пэстири жызня. Во ашундёлас кадэлэса, кала жувэлас пэ ԥув. Со када за качество?

ЛЭ ИИСУСОСТИРИ ЛЮБОВЬ

13. Сар дицол анда Иоанна 15:9 и 1 Иоанна 4:8—10, кай о Иегова и о Иисусо любин амэн, и касти када анэна лашимос?

¹³ О Иисусо любияс лэ манушэн кадя жэ фартэ, сар и лэско дад о Иегова. (Адиносар Иоанна 15:9e; 1 Иоанна 4:8—10f.) Во закамля тэ отдэл пэстири жызня важ амэндэ. Кода, кай во отдя пэстири жызня важ амэндэ сыкавэл, кай о Иегова и о Иисусо фартэ амэн любин. Кадэя любовь анэн лашимос, сар лэ помазаниконэнди, кадя и «аврэ бакрорэнди» (Иоанна 10:16; 1 Иоанна 2:2). Погиндон пала символоря, савэ исин по Вэчэро. Вонэ сыкавэн, кай о Иисусо любий и заботийпэ пала пэстирэ ученикоря.

14. Сар о Иисусо сыкадя, кай любий пэстирэ учениконэн?

¹⁴ О Иисусо на ԥэндя тэ стон по Вэчэро барэ мисяйле и инке варисо, ай стодя пэ мисяйля прости символоря. Кадэлэса во сыкадя, кай любий пэстирэ помазаниконэн. Лэнди трэбуй сас тэ терэн кадэва Вэчэро кажно бэрш. Дэкала лэнди сас трэбуй лэс тэ терэн андэ разни условия, дажэ андо баруно (Откровение 2:10). Вижалас лэндэ када тэ терэн? Да!

15, 16. Росԥэнэн, сар дэсавэ христианоря терэнас о Вэчэро, дажэ кала лэнди сас фартэ ԥарэс?

¹⁵ Пэрвонэ викостар жы кай амарэ деса и чачунэ христианоря вся и время, со бы тэ на авэл, терэнас кадэва Вэчэро. Дажэ, кала сас фартэ ԥарэс, вонэ сар моӷли всаек терэнас кадэва Вэчэро. Диқам, со сас. О Харольдо Кинго бэшэлас андо Китаё, андо баруно, андэ камера важ ек мануш. Лэсти трэбуй сас тэ погиндой, сар тэ терэл о Вэчэро. Во чоралэс стердя символоря анда кода, со сас лэстэ. Во виадиносардя, пэ скати можно сас, кала авэла точно кадэва дес, кай тэ терэл о Вэчэро. И кала поджыля и время, во дилабая дили, мангляпэ и росԥэндя библейско речь корко пэсти.

¹⁶ Акэ инке со сас. Жалас и дуйто мирово война. Андэ кодэя время дэсавэ ԥэя, савэ бэшэнас андо концлаӷерё, када баруно, на даранас пала пэстири жызня, кай тэ терэн кадэва Вэчэро. Но драго, кай и символоря сас прости. Вонэ смоӷли тэ терэн кадэва Вэчэро, кай лэн нико тэ на диқэл. Вонэ росԥэнэн: «Амэ терделям круӷом и табуретка, сави ушарадям парнэ которэса, пэ сави тердёнас и символоря. Кай амэн тэ на додиқэн, амэ на дям яг о вудуд, ай дям яг и свечка. [...] Амэ инке еқвар анда вся оди дям алав амарэ Дэвлэсти лэ Иеговасти, кай отдаса вся о зор и тераса кадя, кай авэр тэ полэн, кай лэско алав свынто». Сави дэ састи вера! И сави любовь о Иисусо сыкавэл кодэлэса, кай амэ можэм тэ терас о Вэчэро, дажэ кала када фартэ ԥарэс!

17. Пала савэ вопросоря амэнди авелоп драго тэ погиндосарас?

¹⁷ Кала поджал кадэва Вэчэро, трэбуй пэстар тэ пушас: «Сар мэ моӷу, сар о Иисусо, тэ сыкавав пэстири любовь каринг авэр? Гиндосарав мэ май бут пала пэстэ чи пала аврэндэ? Аштярав мэ лэ ԥралэндар и лэ ԥэяндар кода, со вонэ нэ моӷут тэ стерэн чи мэ лэн полав?». Давайте тэ терас кадя, сар о Иисусо и анда оди тэ жалуисарас аврэн (1 Петра 3:8).

НА БИСТРЭН, КАЙ О ИИСУСО НА ГИНДОЯС ПАЛА ПЭСТЭ БУТ, САС СМИЛО И ЛЮБИЯС АВРЭН

18, 19. а) Андэр со амэ можэм тэ патяс? б) Со амэнди трэбуй тэ терас ужэ акана?

¹⁸ Йто амэ ужэ парашаса тэ терас о Вэчэро, кай сэрэн лэ Иисусостири смэрть. Кала о Иисусо «авэла» андэ бида, сави никала на сас, во стидэла кодэлэн, «кас во витидя», кай тэ правий лэнца по нэбо. Посли када о Вэчэро парашэна тэ терэн (1 Коринфянам 11:26; Матфея 24:31).

¹⁹ Можэм тэ патяс, кай дажэ тоди лэ Иеговаско народо лэла лошаса тэ сгиндой о Вэчэро, саво сыкавэл, кай о Иисусо на гиндояс пала пэстэ бут, сас смило и любис аврэн. Андэ кодэя время лэ Иеговастирэ служытеля, савэ терэнас кадэва Вэчэро варикала, лэна тэ росԥэнэн аврэнди пала лэстэ. Ай пока терам, сар о Иисусо, на гиндосарам пала пэстэ бут, авам смили и любисарам аврэн. Сар амэ кадя тераса, тоди о Иегова дэла амэнди бут лашимос (2 Петра 1:10, 11).