Ашунэн лэ Иеговаско ӷолосо

1, 2. а) Сар о Иегова дэл дума лэ манушэнца? б) Пала со амэ подаса дума андэ кадэя статья?

ЛЭ ИЕГОВАСТИ чалёл амэнца тэ дэл дума. Андэ дэлмутни время во пэрэдэлас пэстирэ гиндоря через и пророкоря, анӷелоря и через пэско Шаво, Иисус Христос (Амос 3:7; Галатам 3:19; Откровение 1:1). Адес о Иегова дэл дума амэнца через и Библия. Во подарисардя ла амэнди, кай амэ тэ полас, сар во гиндой и со терэл.

² Кала о Иисусо сас пэ ԥув, о Иегова тривар дя дума па нэбо. Давайте подаса дума, со о Дэл ԥэндя андэ кажно случаё, сости амэн сытярэн лэстирэ алава и васо важно лэн тэ ашунас.

«ТУ МЭРНО ЛЮБИМО ШАВО»

3. а) Со ԥэндя о Иегова, сар запистромэ андэ Марка 1:9—11, кала о Иисусо болделя? б) Савэ важни маменторя амэ уӷанас анда кадэла алава?

³ Андэ Марка 1:9—11 запистромэ пэрво случаё, кала о Иегова дэлас дума па нэбо. (Адиносарb.) Во ԥэндя лэ Иисусости: «Ту мэрно любимо Шаво, ту терэс кода, со манди чалёл». Лэ Иисусости фартэ чалеля тэ ашунэл пэстирэ Дадэстар кацавэ алава, андэ савэ дицэля, кай во лэс любий и патял, кай о Иисусо стерэла вся, со ԥэнэна о Иегова. Анда лэ Иеговастирэ алава амэ уӷанаса трин важни маменторя важ о Иисусо. Пэрво, кай о Иисусо лэско Шаво. Дуйто, кай о Иегова любий пэстирэ Шавэс. Трито, кай о Иисусо терэл вся, со чалёл лэ Иеговасти. Уӷанам май драго пала кадэла маменторя.

4. Сар полэлас о Иегова лэ Иисусос посли кода, сар во болделя?

⁴ «Ту мэрно любимо Шаво». Кадэлэ алавэнца о Иегова сыкадя, кай во и лэско Шаво о Иисусо фартэ драго полэн ек аврэс. Жы каринг кода, сар о Иисусо тэ авэл пэ ԥув, во сас по нэбо, сар анӷело, во сас лэ Дэвлэско Шаво. И кала о Иисусо болделя, пэр лэстэ сжыля о свынто духо, саво бишалдя о Дэл. Сар пистромэ андэ Марка 1:11 кадэлэса, кай о духо сжыля по Иисусо, о Иегова дя тэ полэн, кай лэстирэ любимонэ Шавэстэ исин нэви дила. Да, кала о Иисусо болделя, о Иегова акэ, со сыкадя. Кода, кай лэ Иисусостэ, саво сас лэско помазано Шаво, акана исин надежда тэ рийпэ палпалэ по нэбо. Васо? Кай тэ ашэл Царёса и Само Барэ Рашаса, савэс стодя о Дэл (Луки 1:31—33; Евреям 1:8, 9; 2:17). Важ када, кала о Иисусо болделя, кай о Иегова сас, васо тэ ԥэнэн: «Ту мэрно любимо Шаво» (Луки 3:22).

5. Со амэ можэм тэ сытювас лэ Иеговастар, кала во ԥэнэнас лэ Иисусости, кай любий лэс?

⁵ «Ту мэрно любимо Шаво». Кода, кай о Иегова сыкадя, кай любий лэ Иисусос, сытярэл амэн, кай андэ любо маменто трэбуй тэ подритярас аврэн лашэ алавэнца (Иоанна 5:20). Кала кодэва, ко амэнди фартэ куч, хвалий амэн и ԥэнэн, кай любий амэн, амэ росцветисарас. Тэ любисарас и тэ подритярас, када фартэ трэбуй амарэ чаченди, кадяжэ лэ ԥралэнди и лэ ԥэянди андэ собрания. Кала амэ хвалисарас аврэн, кадэлэса амэ поможысарас лэнди, кай и вера тэ авэл май састи и кай вонэ тэ на парашэн тэ служын лэ Иеговасти. Лэ родителёнэнди фартэ важно тэ хвалин пэстирэ бэятонэн. Кала и родителя на хвалин и на жалуийн пэстирэ бэятонэн, тоди и бэятцэ барён, сар и цвиторя би лэ қамэско.

6. Васо амэ можэм тэ патяс лэ Иисусости?

⁶ «Ту терэс кода, со манди чалёл». Анда кадэла алава дицол, кай о Иегова фартэ патял, кай о Иисусо стерэла вся, сар камэл о Иегова. Важ када амэ кадяжэ можэм фартэ тэ патяс, кай о Иисусо стерэла вся, пала со о Иегова дя алав (2 Коринфянам 1:20). Кала амэ гиндосарас, сар терэлас о Иисусо, амэ инке май фартэ камас тэ сытювас лэстар и тэ жас па лэско дром. О Иегова патял, кай амэ када стераса. Во ӷанэн, кай амэ лэстирэ служытеля и май дур сытюваса кай о Иисусо (1 Петра 2:21).

«АШУНЭН ЛЭС»

7. Кала, сар пистромэ андэ Матфея 17:1—5, о Иегова до дуйто дя дума па нэба и со во ԥэндя?

⁷ Адиносар Матфея 17:1—5c. Дуйто разо о Иегова дя дума па нэбо, кала о Иисусо «сыкадя пэсти слава». О Иисусо ақардя лэ Петрос, лэ Иаковос и лэ Иоаннос тэ жан лэса по вучо плай. Котэ вонэ додиқлэ нэобычно видения. Лэ Иисусоско муй ля тэ светийпэ, сар о қам, ай лэсти йда ашэля фартэ парни, аж ля тэ хал и яқа. Паша лэстэ вонэ додиқлэ лэ Моисеёс и лэ Ильяс, савэ дэнас дума лэ Иисусоса пала лэстири смэрть и кала во рияпэ каринг и жызня. И апостолоря фартэ камэнас тэ совэн, но прошутэпэ, кала додиқлэ кадэя нэобычно видения (Луки 9:29—32). Посли када лэн заушарадя светло туча, и вонэ ашундэ анда туча лэ Дэвлэско ӷолосо! Сар и тоди, кала о Иисусо болделя, о Иегова упалэ ԥэндя пэстирэ Шавэсти, кай во лэс любий. Во ԥэндя: «Када мэрно любимо Шаво, саво терэл кода, со манди чалёл». Но пэ кадэва разо во инке ԥэндя: «Ашунэн лэс».

8. Со ашэля кай о Иисусо и кай ученикоря посли кода, сар диқлэ и видения, андэ сави о Иисусо сыкадя пэстири слава?

⁸ Кадэя видения дя тэ полэн, сави власть и слава авэла кай о Иисусо, кала во ашэла Царёса андэ лэ Дэвлэско Царство. Лэ Иисусости сас трэбуй тэ прожал через о ԥаримос и мучительно смэрть. Кадэя видения подритярдя и дя лэсти зор. Кадяжэ через кадэя видения и вера лэ Иисусостирэ учениконэнди ашэля май састи. И када дя лэнди зор тэ виритярэн о ԥаримос, ай кадяжэ, кай вонэ тэ терэн бут бэрша и найвушэро дила. Кода, кай о Иисусо сыкадя пэстири слава, фартэ драго запомнил о Пётро и во пала када драго сэрэлас дажэ, кала прожыля варикай 30 бэрш (2 Петра 1:16—18).

9. Савэ советоря о Иисусо дя пэстирэ учениконэнди?

⁹ «Ашунэн лэс». Кала о Иегова ԥэндя кадэла алава, во дя драго тэ полас, кай во камэл амэ тэ кандас лэстирэ Шавэс и тэ жувас кадя, сар во ԥэнэн. Кала о Иисусо сас пэ ԥув, во росԥэнэнас кода, со сас фартэ важно тэ ашунас. Например, во анда оди любияс пэстирэ учениконэн и сытярэлас лэн тэ росԥэнэн и лащи весть. Инке ԥэнэнас, вся и время тэ терэн кода, со камэл о Дэл (Матфея 24:42; 28:19, 20). Ай инке во лэнди ԥэндя тэ терэн вся, со андэ лэнго зор и тэ на здэнпэ (Луки 13:24). О Иисусо шолас сама пэ кода, кай лэстирэ ученикоря тэ любин ек аврэс и тэ авэн ек пала еқэстэ и тэ ритярэн лэстирэ законоря (Иоанна 15:10, 12, 13). Кода, сости во сытярэлас, сас фартэ трэбуй сар тоди, кадя и андэ амари время.

10, 11. Сар амэ тэ сыкавас, кай кандас лэ Иисусос?

¹⁰ О Иисусо ԥэндя: «Кажно, ко тердёл пэ риг кай о чачимос, терэн кода, со мэ ԥэнав» (Иоанна 18:37). Амэ кандас и ашунас лэско ӷолосо, кала на холявас ек пэ еқэстэ и анда вся оди простисарас (Колоссянам 3:13; Луки 17:3, 4). Кадяжэ амэ сыкавас, кай кандас лэ Иисусос, кала росԥэнас и лащи весть «андэ лащи время и андэ найлащи время» (2 Тимофею 4:2).

¹¹ Кадяжэ о Иисусо ԥэндя: «Мэрнэ бакрорэ кандэн, со мэ ԥэнав» (Иоанна 10:27). Лэ Иисусостирэ ученикоря най кати ашунэн кода, со во лэнди ԥэнэн, но и терэн кадя. Вонэ на домэкэн пэсти андо ди, кай фартэ тэ загиндонпэ пала кода, со терэн кажно дес (Луки 21:34). Со май ӷлавно важ лэндэ тэ ритярэн и законоря, савэ дя о Иисусо, дажэ кала када фартэ ԥарэс. Амарэ ԥралэнди прижыляпэ тэ пэрэандярэн бут ԥаримос. Када, кала ӷонин важ и вера, чорымос, ураӷано, тинойпэ и ԥув чи инке варисавэ биды. Но саво бы ԥаримос лэндэ тэ на авэл, вонэ всаек на ашадэ лэ Иеговас. О Иисусо ԥэнэн кацавэ христианонэнди: «Ко прилэл мэрнэ законоря и ритярэл лэн, кодэва любий ман. Ай ко любий ман, кодэлэс любия мэрно Дад» (Иоанна 14:21).

12. Андэр со инке дицол, кай амэ кандас лэ Иисусос?

¹² Сар амэ инке тэ сыкавас, кай кандас лэ Иисусос? Тэ кандас кодэлэн, ко машкар амэндэ барэдэр (Евреям 13:7, 17). Андэ послидни бэрша андэ лэ Дэвлэсти арӷанизацыя бут со паруделя. Амэндэ ашэлэ бут нэвэ инструменторя важ и служэния. Кадяжэ линэ тэ прожан па аврятэ и собрании, савэ прожан андо машкар курко. Инке паруделя кода, кай амэ лям па аврятэ тэ диқас пала залоря, кай тидэнпэ лэ Иеговастирэ свидетеля и кадяжэ тэ строисарас и тэ терас ремонто андэр лэндэ. Сар амэ блаӷодарни лэ ԥралэнди, кай вонэ любин амэн и пала кода, сар годявэрнэс амэн сытярэн! Амэ можэм тэ патяс, кай о Иегова блаӷословия кода, кай амэ старысавас тэ терас кадя, сар ԥэнэн и ԥрала анда арӷанизацыя.

13. Саво лашимос анэна амэнди кода, кай кандас лэ Иисусос?

¹³ Кала амэ терас вся, со ԥэндя о Иисусо, када анэн амэнди лашимос. О Иисусо дя алав пэстирэ учениконэнди кода, сости во лэн сытярэл, кодэлэстар лэндири вера авэла май састи. Во ԥэндя: «Тумэнди авэла май вушэро по ди». И инке во ԥэндя: «Важ кода кай мэрно ӷамо вушэро и мэрно ԥаримос найԥаро» (Матфея 11:28—30). Андэ Библия исин штар книӷи Евангелия, андэ савэ пистромэ важ лэ Иисусости жызня и служэния. Када поможый, кай амари вера тэ авэл май састи и тэ авас май бужанглэ (Псалом 19:7; 23:3). О Иисусо ԥэндя: «Бахталэ кодэла, ко ашунэл лэ Дэвлэско алав и терэл кадя!» (Луки 11:28).

О ДЭЛ ТЕРЭЛ, КАЙ ТЭ ПРОСЛАВИТ ПЭСКО АЛАВ

14, 15. а) Кала, сар запистромэ андэ Иоанна 12:27, 28, о Иегова трито разо дя дума па нэбо? б) Васо можно тэ ԥэнэс, кай лэ Иеговастирэ алава подритярдэ лэ Иисусос и динэ лэсти зор?

¹⁴ Адиносар Иоанна 12:27, 28d. О Иоанно пистросардя пала трито случаё, кала о Иегова дэлас дума па нэбо. Кала ашэлэсаспэ набут деса каринг пэсти смэрть, о Иисусо сас андо Иерусалимо, кай тэ терэл послиднё разо и Патради. Во ԥэндя: «Мэрно ди фартэ пэрэжывает». Потом во ԥэндя лэ Дэвлэсти кацавэ алава: «Дадэ, стер, кай тиро алав тэ авэл ашунгло». И па нэбо ашунделя ӷолосо: «Мэ стердэм, кай тэ прославляют мэрно алав и инке стерава».

¹⁵ О Иисусо пэрэжывал, кай лэстар фартэ бут со зависело. Во сас трэбуй тэ на парашэл тэ кандэл лэ Иеговас. Во ӷанэнас, кай лэс лэна жэстоко тэ марэн ла чукняса, потом во мэрэла ԥаря смэртяса (Матфея 26:38). Важ о Иисусо сас фартэ важно тэ прославляют лэстирэ Дадэско алав. Лэ Иисусос дошалярэнас андэ кода, кай во ԥэнэн найлашэ алава по Дэл и во пэрэжывал, кай пэстиря смэртяса тэ на опозорит лэ Дэвлэс. Акана во драго ӷанэнас, кай лэ Иеговаско алав лэна тэ прославляют. И алава, савэ ԥэндя лэско Дад, подритярдэ лэ Иисусос, и динэ лэсти зор тэ пэрэандярэл о ԥаримос, саво сас трэбуй тэ авэл. Файма, кати ек о Иисусо поля, со камля тэ ԥэнэн лэско Дад. Но всаек о Дэл стердя кадя, кай кадэла алава тэ уӷанас и амэ (Иоанна 12:29, 30).

16. Васо амэ пэрэжываем, кала диқас, кай по Дэвлэско алав ԥэнэн найлашэ алава?

¹⁶ Файма, амэ кадяжэ сар о Иисусо пэрэжываем, кала диқас, кай по Дэвлэско алав ԥэнэн найлашэ алава. Можэт сас кацаво, кала амэнца обжылэпэ нэсправедливо. Можэт амэ пэрэжываем, кай амарэ вороӷоря росԥэнэн важ амэндэ хохаимос и кадэлэса ԥэнэн найлашэ алава по Дэл и пэ лэстири арӷанизацыя. Тоди и алава, савэ о Иегова ԥэндя лэ Иисусости, подритярэна и амэн. На трэбуй фартэ тэ пэрэжываем. Амэ можэм тэ патяс, кай «о лашимос андо ди, саво лэ Дэвлэстар, саво май баро кодэлэстар, со о мануш полэл... фэрия тумарэ одя и годя через о Иисусо» (Филиппийцам 4:6, 7). О Иегова стерэла кадя, кай лэско алав тэ прославляют. Лэ Дэвлэско Царство улэла вся о найлашимос, саво терэл о Сатана и лэско миро лэ Дэвлэстирэ служытелёнэнди (Псалом 94:22, 23; Исаия 65:17).

ВАСО ВАЖНО ТЭ АШУНАС ЛЭ ИЕГОВАСКО ӶОЛОСО?

17. Сар о Иегова дэл дума амэнца, сар запистромэ андэ Исаия 30:21?

¹⁷ О Иегова и адес дэл дума амэнца. (Адиносар Исаия 30:21e.) Канешно, лэско ӷолосо на ашундёл па нэбо. Но во дя амэнди и Библия, через сави во амэн сытярэл. Ай инке Иегова дэл пэско духо кодэлэсти, «ко на ашавэл и диқэл пала хабэ», кай во тэ дэл лэ Иеговастирэ служытелёнэнди литература (Луки 12:42). Вой фартэ бут исин. Када печатно литература, онлайн литература, видео и аудио!

18. Сар лэ Иеговастирэ алавэндар амари вера ашэл май састи и сар вонэ дэн амэнди смилость?

¹⁸ Давайте вся и время тэ сэрас и алава, савэ о Иегова ԥэндя па нэбо пэстирэ Шавэсти. Мэк лэ Дэвлэстирэ алава, савэ запистромэ андэ Библия, поможына тэ патяс, кай во пала вся диқэл. Кадяжэ, кай во улэла вся о найлашимос, саво амэнди терэл о Сатана и лэско жэстоко миро. Амэнди трэбуй драго тэ ашунас лэ Иеговаско ӷолосо. Тоди амэндэ вижала тэ виритярас любо ԥаримос, саво амэндэ исин акана и саво авэла англэ. Андэ Библия пистромэ: «Тумэнди трэбуй тэ ӷанэн тэ виритярэн о ԥаримос, кай посли, сар стерэна, со камэл о Дэл, во дэла тумэнди кода, пала со дя алав» (Евреям 10:36).