Сости амэ сытювас анда лэ Иисусостирэ послидни алава?

1, 2. Со сас лэ Иисусоса андэ кодэва дес, кала во муля?

ЖАЛ 14 нисана 33 бэрш лэ Иисусостар. Андэ кадэва дес по Иисусо хохадэ и дошалярдэ лэс андэ кода, со во на тердя. Лэстар асанаспэ, марэнас, ай потом примардэ каринг о столбо, пэ саво во трэбуй сас тэ мучийпэ и тэ мэрэл. Лэстирэ пэрнэ и вас сас промардэ карфянца. И кажно разо, кала во ԥурдэлас или ԥэнэнас алав, лэсти фартэ дуқалас. Но во трэбуй сас тэ ԥэнэн варисо фартэ важно.

² Сар пистромэ андэ Матфея 17:5, о Иегова камэл, кай амэ тэ кандас лэстирэ Шавэс. Давайте диқаса, со о Иисусо ԥэнэн, кала мэрэл по столбо и погиндосараса, сости амэ сытювас анда лэстирэ алава.

«ДАДЭ, ПРОСТИСАР ЛЭН»

3. Пала кастэ о Иисусо мангэлас лэ Иеговас: «Дадэ, простисар лэн»?

³ Со о Иисусо камля тэ ԥэнэн кадэлэ алавэнца? По столбо о Иисусо мангэласпэ: «Дадэ, простисар лэн». Пала кастэ о Иисусо ԥэнэнас? Кай май драго тэ полас када, диқам, со ԥэнэн о Иисусо май англэ: «Вонэ на ӷанэн, со терэн» (Луки 23:33, 34). Май ӥто всаворэстар о Иисусо дэлас дума пала римски воиноря, савэ примардэ лэс каринг о столбо. Вонэ па чачимастэ на ӷанэнас, ко сас о Иисусо. Инке во можэт дэлас дума пала мануша, савэ ԥэнэнас, кай лэс тэ умарэн, но сар прожыля время, вонэ патяе андэр лэстэ (Деян. 2:36—38). Хоть лэ Иисусоса обжылэпэ нэсправедливо, во на ля тэ холявэл и тэ сындой кодэлэн, ко камля, кай во тэ мэрэл (1 Пет. 2:23). Наоборот, во мангэлас лэ Иеговас, кай во тэ простий лэн.

4. Сости амэ сытювас анда кода, сар о Иисусо простияс лэ вороӷонэн?

⁴ Сости амэ сытювас анда лэ Иисусостирэ алава? Амэнди трэбуй тэ сытювас лэ Иисусостар и тэ простисарас аврэн (Кол. 3:13). Дэсавэ мануша, ай дэкала дажэ амаро родо, моӷут тэ на дэн амэнди тэ служысарас лэ Иеговасти. Важ кода кай вонэ на камэн тэ полэн, андэр со амэ патяс, и сар амэ жувас. Вонэ дажэ моӷут тэ хохавэн пар мэндэ, тэ ԥэнэн найлашэ алава, тэ вишон и тэ ԥабарэн амари литература, ай можэт дажэ камэн тэ умарэн амэн. Но на трэбуй тэ ритярас пэр лэндэ холи. Фэдэр авэла тэ мангас лэ Иеговас, кай вонэ тэ полэн андэр со амэ патяс и тэ патян андо Иегова (Матф. 5:44, 45). Да, тэ простис дэкала фартэ ԥарэс. Особенно, если амэнца обжылэпэ нэсправедливо. Но если амэ ритярас андэ амаро ди и холи, тоди амэнди авэла ԥарэс ла тэ улас. Ек ԥэй ԥэнэн: «Если мэ простисарав лэ манушэс, када на сыкавэл, кай мэ гиндосарав, кай во стердя правильно. Кала мэ простисарав, када сыкавэл, кай мэ на ритярав и холи андэ мэрно ди» (Пс. 37:8). Ай кадяжэ кала простисарас кодэлэн, ко амэн холярдя, када анэна амэнди лашимос, и амари жызня авэла май бахтали (Эф. 4:31, 32).

«ТУ АВЭСА МАНЦА АНДО РАЁ»

5. Пала со о Иисусо дя алав еқэ преступникости, и васо?

⁵ Со о Иисусо камля тэ ԥэнэн кадэлэ алавэнца? Паша Иисусо пэ столборя сас примардэ дуй преступникоря. Спэрва вонэ тожэ ԥэнэнас пэр лэстэ найлашэ алава (Матф. 27:44). Но потом ек андар лэндэ поля, кай о Иисусо на стердя нисо найлашо (Луки 23:40, 41). И инке кадэва мануш, кала о Иисусо мэрэлас, ԥэндя лэсти: «Иисусо, на бистэр пала мандэ, кала авэса андэ пэско Царство» (Луки 23:42). Кадэлэ алавэнца во сыкадя, кай патял, кай о Иисусо рияпэ каринг и жызня и ашэла царё. Сави дэ састи вера сас кай кадэва мануш! О Иисусо ԥэндя лэсти: «Ԥэнав тути адес, ту авэса манца андо Раё» (Луки 23:43). Лэ Иисусостирэ алава «ԥэнав тути» и «ту авэса манца» сыкавэн, кай во дэл алав лично кодэлэ манушэсти, кай во авэла тэ жувэл андо раё пэ ԥув. О Иисусо ӷанэнас, кай лэско Дад полэл и жалуий лэ манушэн. Важ када о Иисусо и ԥэндя кацавэ алава, савэ придинэ зор кадэлэ преступникости, саво тожэ мэрэлас по столбо (Пс. 103:8).

6. Сости амэ сытювас анда лэ Иисусостирэ алава, савэ во ԥэндя лэ преступникости?

⁶ Сости амэ сытювас анда лэ Иисусостирэ алава? О Иисусо фартэ шолпэ пэ пэско Дад (Евр. 1:3). О Иегова простий, полэл и жалуий амэн. Но кай о Иегова тэ простий, амэнди трэбуй анда вся оди тэ каисавас андэ всаворэ амарэ ӷрехоря и тэ патяс, кай кати через лэ Иисусостири смэрть о Иегова простий амэн (1 Иоан. 1:7). Дэкасти фартэ ԥарэс тэ патял, кай о Иегова варикала простия лэс. Если и тутэ кацавэ гиндоря, тоди погиндосар акэ пала со. Англа пэстири смэрть о Иисусо поля и жалуисардя лэ преступникос, саво кати кати ля тэ патял. Тоди хэба о Иегова на полэла и на жалуия и на простия пэстирэ служытелёнэн, савэ най ек бэрш служын лэсти, кандэн и ритярэн лэско законо? (Пс. 51:1; 1 Иоан. 2:1, 2).

«АКЭ ТИРО ШАВО! АКЭ ТИРИ ДЭЙ!»

7. Со ԥэндя о Иисусо ла Марияти и лэ Иоанности, сар ԥэнэнпэ андэ Иоанна 19:26, 27, и васо?

⁷ Со о Иисусо камля тэ ԥэнэн кадэлэ алавэнца? (Адиносар Иоанна 19:26, 27.) О Иисусо пэрэжывал пала пэстири дэй, сави андэ кодэя время ужэ сас ԥивли. Лэстирэ ԥрала и ԥэя моӷли тэ позаботинпэ, кай латэ тэ авэл вся, со трэбуй важ и жызня. Но ко поможысардоп лати, кай во тэ на парашэл тэ служый лэ Иеговасти? Амэ на ӷанас, лэ Иисусостирэ чаче ԥрала сас андэ кодэя время лэстирэ ученикоря чи най. Но амэ ӷанас, кай о Иоанно сас апостоло, саво лэс никала на ашавэлас и сас лашо друӷо. Важ о Иисусо всаворэ, ко служыяс лэ Иеговасти, сас сар ери (Матф. 12:46—50). Важ када во ԥэндя, кай пала лэстири дэй тэ заботийпэ о Иоанно. О Иисусо любияс ла Мария и пэрэжывал пала латэ. Во ӷанэнас, кай о Иоанно драго диқэла пала латэ и поможыя, кай латири вера андо Дэл тэ авэл май састи. О Иисусо ԥэндя пэстиря дати: «Акэ тиро шаво!» Ай лэ Иоанности во ԥэндя: «Акэ тири дэй!» Кадэлэ десэстар о Иоанно ашэля важ и Мария сар чачо шаво. Во заботияспэ пала латэ, сар пала пэстири дэй. О Иисусо сыкадя бари любовь каринг кадэя манушни, сави сар кати во арақаделяпэ, фэрияс лэс, заботияспэ и диқэлас пала лэстэ. И дажэ англа лэстири смэрть, вой сас паша лэстэ!

8. Сости амэ сытювас анда лэ Иисусостирэ алава, савэ во ԥэндя ла Марияти и лэ Иоанности?

⁸ Сости амэ сытювас анда лэ Иисусостирэ алава? Амэнди моӷут тэ авэн май пашэ и ԥрала и ԥэя анда собрания, чем амаро ери. О родо можэт тэ на дэл амэнди тэ служысарас лэ Иеговасти и дажэ тэ парашэл амэнца тэ дэл дума. Но сар ԥэндясас о Иисусо, если амэ лэ Иеговаса и андэ лэстири арӷанизацыя, тоди амэ нисо на хасараса, ай наоборот амэндэ авэла вся май бут. Андэ собрания и ԥрала и ԥэя важ амэндэ авэна, сар дад и дэй, и сар ԥрал и ԥэй (Мар. 10:29, 30). Андэ собрания амэ всаворэ, сар ек баро ери, андэ саво всаворэ любин ек еқэс, любин лэ Иеговас и патян лэсти. Со тумэндэ кадэлэстар по ди? (Кол. 3:14; 1 Пет. 2:17).

«МЭРНО ДЭЛ, ВАСО ТУ МАН АШАДЯН?»

9. Со амэ можэм тэ полас анда лэ Иисусостирэ алава, савэ запистромэ андэ Матфея 27:46?

⁹ Со о Иисусо камля тэ ԥэнэн кадэлэ алавэнца? Англа пэстири смэрть о Иисусо зацыписайля: «Мэрно Дэл, мэрно Дэл, васо ту ман ашадян?» (Матф. 27:46). Андэ Библия точно на росԥэнэнпэ, васо о Иисусо ԥэндя кадя. Но амэ можэм тэ погиндосарас акэ пала со. Кадэлэса во стердя о пророчество, саво запистромэ андо Псалом 22:1b. Инке кадэлэ алавэнца во сыкадя, кай о Иегова на фэрияс лэс ла бидатар, но во полэлас, васо о Иегова када домэкля (Иов 1:10). Во трэбуй сас тэ на парашэл тэ кандэл лэ Дэвлэс андэ кадэва ԥаримос, саво никастэ анда мануша на сас. Ай кадяжэ, кадэлэ алавэнца во сыкадя, кай на стердя нисо, васо лэс трэбуй сас тэ умарэн.

10. Сости амэ сытювас анда лэ Иисусостирэ алава, савэ во ԥэндя лэ Иеговасти?

¹⁰ Сости амэ сытювас анда лэ Иисусостирэ алава? Пэрво, амэ на трэбуй тэ аштярас, кай о Иегова авэла тэ фэрий амэн любона бидатар. О Иисусо пэрэандярдя вся о ԥаримос. Можэт и амэнди прижалапэ тэ хасарас пэстири жызня через кода, кай амэ на парашас тэ кандас лэ Иеговас (Матф. 16:24, 25). Но амэ можэм точно тэ ӷанас, кай о Иегова на домэкэла ԥаримос, саво най па амаро зор (1 Кор. 10:13). Амэнца, сар и лэ Иисусоса, моӷут тэ обжанпэ нэсправедливо (1 Пет. 2:19, 20). Кодэла, ко на дэн амэнди спокойно тэ служысарас лэ Иеговасти, терэн када най важ кода, кай амэ терас варисо най кадя, ай важ кода кай амэ на терас, сар всаворэ мануша андэ кадэя люма и росԥэнас о чачимос пала Дэл (Иоан. 17:14; 1 Пет. 4:15, 16). О Иисусо полэлас, васо о Иегова домэкля, кай лэстэ тэ авэл кацаво ԥаримос. Но дэсавэ лэ Иеговастирэ служытеля, савэ на парашэн лэс тэ кандэн, моӷут тэ на дополэн, васо о Иегова домэкэл, кай андэ лэндири жызня тэ авэл ԥаримос (Авв. 1:3). Но амаро Дэл, саво полэл и жалуий и саво на грабий тэ холявэл, ӷанэн, кай вонэ всаек патян лэсти. Лэнди просто фартэ ԥарэс, и о Иегова терэл кадя, кай лэнди тэ авэл май вушэро по ди (2 Кор. 1:3, 4).

«ТЭ ПАВ»

11. Васо о Иисусо ԥэндя и алава, савэ запистромэ андэ Иоанна 19:28?

¹¹ Со о Иисусо камля тэ ԥэнэн кадэлэ алавэнца? (Адиносар Иоанна 19:28.) Васо о Иисусо ԥэндя: «Тэ пав»? Кадя во стердя о пророчество, саво запистромэ андо Псалом 22:15: «Мэрно зор вишутеля, сар ԥаго котор анда ӷлиняно посуда, и мэрни шыб прилиписайля каринг о талуй». Посли кода сар лэ Иисусос примардэ каринг столбо, лэстэ пэрэшутеля андо муй и во фартэ камэлас тэ пэл. Лэсти трэбуй сас варико андэ када тэ поможый.

12. Сости амэ сытювас анда кода, кай о Иисусо мангля тэ пэл?

¹² Сости амэ сытювас анда лэ Иисусостирэ алава? О Иисусо на гиндояс, кай тэ мангэл помощь варикастар, када найдраго. И амэ нащи кадя тэ гиндосарас. Если амэнди трэбуй варисо тэ стерас, тоди амэ терас када екжэнэ, кала амэндэ исин пэ када зор. Но если амэндэ нинай зор, амэ можэм тэ мангас помощь, кай авэр ԥрала и ԥэя анда собрания. Например, если о ԥрал или и ԥэй андэ бэршэндэ, вонэ моӷут тэ мангэн варикас анда собрания, кай лэн тэ андярэн андо маӷазино или каринг о врачо. Ай если варикасти ԥарэс по ди, тоди можно тэ мангэн лэ старейшынонэн или варикас анда собрания, кай вонэ тэ поможын или тэ виашунэн (Прит. 12:25). На ласа тэ бистрас, кай и ԥрала и ԥэя любин амэн и фартэ камэн тэ поможын амэнди андо ԥаримос (Прит. 17:17). Но вонэ нэ моӷут тэ полэн, со амэндэ по гиндо, и кай амэнди трэбуй помощь, если амэ лэн пала када на мангаса.

«МЭ КАДА СТЕРДЭМ!»

13. Со андя лэ манушэнди, кай о Иисусо на парашэля тэ кандэл лэ Дэвлэс жы каринг пэстири смэрть?

¹³ Со о Иисусо камля тэ ԥэнэн кадэлэ алавэнца? 14 нисана, посли обедо, кала сас варикай 3 часа, о Иисусо ӷромко ԥэндя: «Мэ када стердэм!» (Иоан. 19:30). Англа пэстири смэрть о Иисусо ӷанэнас, кай стердя вся, пала со мангля лэс лэско Дад. Со именно во стердя? Пэрво, о Иисусо доԥэндя, кай о Сатана хохавно, и кай совершэно мануш можэт андэ вся тэ кандэл лэ Дэвлэс, дажэ если о Сатана фартэ када на камэл. Дуйто, о Иисусо отдя пэстири жызня, кай тэ витинэн амэн лэ бэзэхэстар. Важ када и найсовершэни мануша моӷут тэ уӷодин лэ Дэвлэсти и тэ жувэн вечно. И трито, о Иисусо доԥэндя, кай о Иегова справедливо правителё и кадэлэса во прослависардя пэстирэ Дадэс.

14. Савэ гиндонэнца трэбуй тэ жувэс кажно дес?

¹⁴ Сости амэ сытювас анда лэ Иисусостирэ алава? Амэнди трэбуй кажно дес тэ пристас бут зор, кай тэ на парашас тэ кандас лэ Дэвлэс. О ԥрал, Максвелло Френдо, проандярэлас и библейско Школа Галаад. Погиндон, со во ԥэндя пэ ек международно канӷрэсо пала преданность лэ Дэвлэсти: «На отстов пэ потом кода, со можэш тэ стерэс адес. Важ кода кай ту на ӷанэс, со авэла туса тэся. Кажно дес жув кадя, кай кабута када тиро послиднё шансо, тэ доԥэнэс, кай ту камэс тэ жувэс вечно». Да, мэк кажно дэс авэла кацаво, кабута када послиднё возможность тэ сыкавэс, кай ту кандэс лэ Дэвлэс! Тоди дажэ англа смэрть ту ԥэнэса: «Иегова мэ стердэм вся, кай тэ на парашав тут тэ кандав, мэ сыкадэм, кай о Сатана хохавно, зашутэмпэ пала тут и доԥэндэм, кай ту лашо правителё».

«АНДЭ ТИРЭ ВАС ОТДАВ ПЭСТИРИ ЖЫЗНЯ»

15. Андэр со патялас о Иисусо, сар пистромэ андэ Луки 23:46?

¹⁵ Со о Иисусо камля тэ ԥэнэн кадэлэ алавэнца? (Адиносар Луки 23:46.) О Иисусо ӷанэнас, кай ек о Иегова можэт тэ ришый, со лэса авэла англэ. И во патялас, кай лэско Дад никала на бистрэла пала лэстэ. Важ када во ԥэндя: «Дадэ, андэ тирэ вас отдав пэстири жызня!» (Луки 23:46).

16. Сости ту сытёс анда кода, со сас лэ ԥралэса?

¹⁶ Сости амэ сытювас анда лэ Иисусостирэ алава? Отдэ пэстири жызня лэ Иеговасти андэ вас. Важ када трэбуй анда вся оди тэ патяс лэ Иеговасти. Уӷанам пала ԥрал Джошуа, савэсти сас кати 15 бэрш, кала во муля лэ насвалимастар, саво на виличияспэ. Во отԥэнделя, кай лэс тэ личин кодэлэса, со жал против лэ Дэвлэско законо. И англа пэстири смэрть во ԥэндя пэстиря дати: «Мэ отдав пэстири жызня лэ Иеговасти. [...] ...Мамунь, мэ патяв, кай о Иегова рия ман каринг и жызня. Во ӷанэн вся, со мандэ по ди, и ӷанэн, сар мэ лэс дэ фартэ любисарав»c. Кажно андар мэндэ трэбуй тэ пушэл пэстар: «Ай со если андэ мэрни жызня авэла кацаво, кай манди прижалапэ тэ хасарав и жызня, кай тэ ашавпэ преданно лэ Дэвлэсти. Тоди патява мэ лэ Иеговасти? Отдава мэ пэстири жызня лэ Иеговасти? И патява, кай если мэ отдава мэрни жызня важ лэстэ, во сэрэла пала мандэ и рия ман каринг и жызня?»

17, 18. Сости амэ сытювас анда послидни лэ Иисусостирэ алава? (Диқэн и рамка «Сости амэ сытювас анда послидни лэ Иисусостирэ алава?»)

¹⁷ Амэ уӷанглям бут важни гиндоря анда послидни лэ Иисусостирэ алава! Вонэ сыкадэ пэ скати дэ важно тэ простисарас аврэн и тэ патяс, кай о Иегова простия амэн. Инке вонэ поможын тэ сэрас, кай амэндэ исин розлашо ери, када и ԥрала и ԥэя андэ собрания. Вонэ андэ любо маменто поможына, кати трэбуй тэ мангас лэн пала када. Инке кадэла алава придэн амэнди зор тэ полас, кай о Иегова поможыя амэнди тэ виритярас любо ԥаримос. Трэбуй тэ жувас кажно дес кадя, кабута амэндэ исин послиднё возможность тэ сыкавас, кай амэ на парашас тэ кандас лэ Иеговас. И анда кадэла алава амэ кадяжэ полас, кай амари жызня андэ лэ Иеговастирэ вас.

¹⁸ Да, кадэла алава, савэ ԥэндя о Иисусо, кала мэрэлас, фартэ важни важ амэндэ! Ласа тэ сэрас пала лэндэ и тэ терас кадя, сар уӷанглям. Кадя амэ сыкавас, кай кандас лэ Иеговас и лэстирэ Шавэс (Матф. 17:5).