О Иегова дя манди май бут, чем мэ аштяравас

Но кала мэ ашэлэм пианероса, мандэ заляпэ нэви интересно жызня, сави мэ дажэ на аштяравас (Эфесянам 3:20). Но васо мэ када закамлэм тэ стерав? Камэн, мэ росԥэнава, сар вся заляпэ?

Мэ арақаделэмпэ андо Берлино (Германия) андо 1939 бэрш, англа кода, сар заляпэ и Дуйто мирово война. Андо 1945 бэрш, кала ужэ кончияспэ и война, о Берлино фартэ бомбинас. Еқварэс бомбинас амари вулица, но амэнди лэ ереса вижыля тэ загарадювас андэ бомбоубежыщя. Кай тэ фэрисавас, амэ пэрэлаглям андо Эрфурто. Када форо, андэ саво арақаделяпэ мэрни дэй.

Мэрни дэй фартэ камэлас тэ уӷанэн о чачимос. Вой адинояс и книжки, савэ пистросардэ ашунглэ мануша, ай кадяжэ книжки анда разни веры. Но атвето кадя и на уӷангля. Варикай андэ 1948 бэрш, амэндэ цэрэ авелэ дуй лэ Иеговастирэ свидетеля. И дэй ԥэндя лэнди тэ зажан и зашутя лэн вопросонэнца. Варикай через часостэ вой ԥэндя манди и мэрня цыкнэдэря ԥэяти: «Мэ уӷанглэм о чачимос!» Посли када амэ ла даса и ла ԥэяса лям тэ ԥирас пэ собрания андо Эрфурто.

Андо 1950 бэрш амэ рисайлям андо Берлино и лям тэ ԥирас андэ собрания «Берлин, Кройцберг». Ай потом амэ инке еқвар пэрэлаглям и лям тэ ԥирас андэ собрания «Берлин, Темпельхоф». Прожыля время и дэй болделя, ай мэ инке нисар нащи болдювавас. Васо?

МЭ ТЕРАВАС ВСЯ, КАЙ ТЭ НА ЛАЖАВ

Мэ набут теравас лэ Иеговастири дила, важ кода кай лажавас. Хоть мэ и ԥиравас андэ служэния, но важ и дуй бэрш екжэно кадя никаса и на давас дума. Но вся паруделя, кала мэ лэм тэ дав дума лэ ԥралэнца и лэ ԥэянца, савэ варикала сыкадэ пэстири бари смилость и сыкадэ, кай на парашэлэ тэ кандэн лэ Иеговас. Варико андар лэндэ сас андэ нацыско концлаӷерё и отбэшля андо баруно андо Восточно Германия. Ай варико на даралас, кай лэс залэна и стона андо баруно и всаек чоралэс ԥиравэлас и библейско литература андэ Восточно Германия. Кода, со терэнас кодэла христианоря, фартэ ля ман лэ одестар. Мэ лэм тэ гиндосарав: «Вонэ на даранас, кай лэн залэна и стона андо баруно важ о Иегова и важ и ԥрала. Тоди манди кадяжэ трэбуй тэ на дарав и тэ на лажав тэ дав дума важ о Дэл».

Мэ лэм тэ патяв андэр пэстэ посли кода, сар андо 1955 бэрш, лэм тэ росԥэнав важ о Дэл андэ спецыально компания. Андо «Информаторо»a сас пистромэ о письмо, саво пистросардя о ԥрал Нейтано Норро. Андэр лэстэ ԥэнэнаспэ, кай кадэя компания трэбуй тэ авэл само бари андэ история. О ԥрал ԥэндя, кай если ла подритярэна всаворэ вазвещятеля, «када авэла кацаво шон, саво никала на бистрэна, андэ саво росԥэнэнас важ о Дэл па вся и ԥув». Кадя и сас. Мэ дэм алав лэ Иеговасти тэ жував важ лэстэ и андо 1956 бэрш, болделэм еқэҭанэ лэ дадэса и ла ԥэяса. Прожыля набут время и манди прижыляпэ тэ витидав инке, со тэ терав.

Бут бэрша мэ полавас, кай тэ служыс пианероса, када само лашо дром андэ жызня. Но всаек на грабисававас тэ ашав пианеро. Май англал мэ гиндосаравас тэ терав бути андо Берлино, и тэ сытював, сар тэ тинав и тэ битинав импортно товаро. Потом мэ камавас, кай мандэ драго тэ вижал тэ терав кадэя дила. Важ када андэ 1961 бэрш, мэ лэм тэ терав бути андо Гамбурго, само баро портово форо андэ Германия. Со май бут время мэ отдавас ла бутяти, со май дур мэ отставас, кай тэ служысарав пианероса. Через со мэ закамлэм тэ служысарав пианероса?

Мэ блаӷодарисарав лэ Иеговас пала кода, кай через и ԥрала, савэ ман любин, поможысардя манди тэ пэрэдиқав, со манди май куч андэ жызня. Дэсавэ мэрнэ друӷоря ужэ залинэ тэ служын пианеронэнца и ашэлэ важ мандэ примеро. Ай инке о ԥрал Эрихо Мундто, саво прожыля о концлаӷерё, подритярэлас ман и ԥэнэнас, кай май фартэ тэ патяв лэ Иеговасти. Во росԥэндя, кай и ԥрала, савэ бэшэнас андо баруно и савэ надеинаспэ пэ корко пэстэ, прожыля время и лэндири вера ашэля май слабо. Ай кодэла, ко андэ вся патялас лэ Иеговасти, виритярдэ вся и ашэлэ кодэла, пэр кастэ ритярдёлас и собрания.

О Мартино Пётцингеро, саво потом служыяс андо Руководящё совето, вся и время ԥэнэнас лэ ԥралэнди: «И смилость, када само лашо, со можэт тутэ тэ авэл!» Кала мэ погиндосардэм пала лэстирэ алава, мэ ашадэм и бути, и андо июне андо 1963 бэрш лэм тэ служысарав пианероса. Када сас само лащи ришэния андэ мэрни жызня. Через дуй шон, кала мэ инке на лэм тэ родав и нэви бути, манди ԥэндэ, кай мэ моӷут тэ ашав спецыально пианеро. Ай через дэсавэ бэрша о Иегова ман обрадосардя. Ман ақардэ тэ сытював андо 44 класо андэ Школа Галаад.

СЫТЕЛЭМ ЛАШИМАСТИ АНДО ГАЛААДО

«На сдэнпэ фартэ йто!» Када сас само важно, со мэ сытелэм, кала сытювавас андэ Школа Галаад. Кадэла алава любинас тэ ԥэнэн най еқварэс о Нейтано Норро и о Лаймано Суингло. Вонэ сытярэнас амэн тэ на умэкас и вас, саво бы ԥаримос тэ на авэл андэ амари назначения. О ԥрал Норро ԥэнэнас: «Пэр со тумэ лэна тэ шон сама? Пэ мэл, пэ комаря чи по чорымос? Или шона сама пэ витки, пэ цвиторя, пэ лошалэ мануша, савэ паша тумэндэ? Сытён лэ любин лэ манушэн!» Еқварэс, кала о ԥрал Суингло росԥэнэнас, васо дэсавэ ԥрала ашадэ пэстири назначения, лэстирэ яқа ԥэрделэ ясвэнца и во чуть на заровдя. Кай тэ улэл пэс, во дажэ парашэля тэ росԥэнэн пэстири речь. Ман када кадя ля лэ одестар, и мэ витидэм важ пэстэ никала тэ на терав кода, со на чалёла лэ Христости, и лэстирэ ԥралэнди, савэ на парашэн тэ кандэн лэ Иеговас (Матфея 25:40).

Кала амэнди динэ кода, кай амэ ласа тэ служысарас, дэсавэнди вефильцонэнди ашэля интересно и вонэ линэ тэ роспушэн пала када. Вонэ фартэ лошавэнас кажно разо, кала варико ԥэнэнас, андэ сави страна лэс бишалдэ, пока мэ на ԥэндэм: «Конго». Вонэ сразу ашэлэ мулком и ԥэндэ: «Ой, андо Конго... Мэк поможый тути о Иегова!» Андэ кодэя время, андэ новости ԥэнэнас, кай андо Конго (Киншасо), жалас война и умарэн ек еқэс. Но мэ сэравас, сости ман сытярдэ андо Галаадо. Андо сентябрё андэ 1967 бэрш, посли кода, сар амэ закончили тэ сытювас андэ Школа, вмести лэ Генрихоса Денбостелёса и лэ Клодоса Линдсеемоса лаглямтар андо Киншасо, андэ столица Конго.

СЫТЮВАС, КАЙ ТЭ АВАС ЛАШЭ МИСИАНЕРОРЯ

Кала амэ авелям андо Киншасо амэ трин шон сытювасас французско шыб. Посли када амэ вуряйлям андо форо Лубумбашо (май англал сас Элизабетвилё), саво тердёл по само юӷо андо Конго, пэ ӷраница ла Замбияса. Амэ лям тэ жувас андэ лэ мисианероско цэр андо машкар форо.

Андэ бут районоря андо Лубумбашо май англал никала на сас лэ Иеговастирэ свидетеля, и амэ фартэ лошавасас кодэлэстар, кай амэ аваса пэрви, ко росԥэнэна лэ манушэнди о чачимос. Прожыля набут время, и амэндэ ужэ на хутилэлас зор тэ сытярас кодэлэн, ко камэлас тэ сытёл па Библия, важ кода кай лэн сас фартэ бут. Амэ кадяжэ росԥэнасас важ о Дэл лэ барэдэрэнди, савэ терэнас андо правительство и андэ ваздии. Бут андар лэндэ стонас патив пэ Библия и пэ амари дила. Котэ май бут мануша дэнас дума пэ шыб суахили, важ када амэ лэ Клодоса Линдсееса лям тэ сытювас кадэя шыб. Посли када амэн бишалдэ андэ суахилийско собрания.

Амэндэ бут со сас интересно, но и на обжасаспэ би ԥаримаско. Амэ най еқвар диқасас матэн халавдэн, савэндэ сас мардя, и холинатирэ лэ ран, савэ амэн евья дошалярэнас. Еқварэс андэ кодэя время, кала жалас и собрания, андо мисианерско цэр динэ рая лэ мардянца. Амэн залинэ андэ бари ваздии, и проритярдэ до вэчэра жы каринг 10 часоря, по мэлало поло. Тоди амэн одмэклэ.

Андо 1969 бэрш манди динэ тэ терав разъездно дила. Андэ мэрно раёно ужалас и африканско саванна. Дэкала манди прижаласпэ долӷо тэ жав па росхаладэ и чикалэ вуски дромора и через бари чар. Еқварэс мэ рятяравас андэ ек гаворо, и тала мэрни кровать бэшэлас и каӷни лэ пуёнэнца. Никала на бистрава, инке на ԥэрнадёлас о дес, вой лэлас тэ цыпий и жунгавэлас ман. Манди фартэ драго, кала мэ вспоминаю пала кода, сар амэ лэ ԥралэнца стидасаспэ вэчэронэнца паша яг, и дасас дума пала чачимос анда Библия.

Но само баро ԥаримос амэндэ сас, када и мануша, савэ притерэнаспэ, кай вонэ лэ Иеговастирэ свидетеля, ай екжэнэ подритярэнас арӷанизацыя «Китавала»b. Дэсавэ андар лэндэ болделэ и дажэ ашэлэ старейшыноря андэ собрания. Но андэ бут случаёря кай и ԥрала и ԥэя, савэ на парашэнас тэ кандэн лэ Дэвлэс, вижыля тэ ӷатярэн кадэлэ манушэн (Иуды 12). Прожыля время и о Иегова вивужардя и собрания, и через када май бут мануша линэ тэ авэн андэ собрания.

Андэ 1971 бэрш ман ақардэ андо филиало андо Киншасо. Котэ мэ теравас разно дила. Кацави, сар пэрэписка, заԥэнавас и литература, и вопросоря па обслужывания. Андо Вефилё мэ сытелэм кодэлэсти, сар тэ терав амари дила андэ бари страна, кай найлашэ дрома, нинай вудуд и нинай лашо транспорто. Дэкала амарэ письморя, савэ бишалэнас андэ собрании па почта самолётоса, заритярдёнас пэ варискати шона. И почта виӷрузинас анда самолёторя андэ лодки, савэ потом бут курте забэшэнас андэ чар анда гиацинторя, савэ барён по паи. Но хоть сас кацаво и авэр ԥаримос и дила на тердёлас.

Мэ вся и время удивисававас, сар и ԥрала подӷотавливали барэ канӷрэсоря, важ кода кай лэндэ почти нисо на сас. Вонэ терэнас и сцэна анда термитнико, ай о каркасо сас анда бамбуко, и стины и кода, пэр со тэ бэшэн, сас анда комышо. Ай анда тростнико стердэсас сар париндора, савэнца ушарадэс и крыша и стердэ столоря. Вся стидэнас которорэнца анда лэ виткэндирэ шкорки. Мэ фартэ радосававас, кала диқавас, кай всаворэ ԥрала и ԥэя сас лошалэ и виарақэнас, сар тэ вижан анда ситуацыя. Мэ полюбисардэм лэн всаворэ одеса. Мэ пала лэндэ фартэ скучисаравас, кала манди динэ нэви назначения и мэ улаглэм анда страна!

СЛУЖЭНИЯ АНДЭ КЕНИЯ

Андо 1974 бэрш ман пэрэандярдэ андо филиало андэ Найроби (Кения). Амэндэ сас бут дила, важ кода кай о кенийскио филиало диқэлас пала служэния андэ дэш пашутнэ страны, андэ дэсавэ андар лэндэ пэ амари дила сас запрето. Мэ най еқварэс сымас андэ кадэла страны, май часто анда всаворэ, андэ Эфиопия, кай амарэн ԥралэн фартэ ӷонинас. Бутэнца андар лэндэ фартэ жэстоко обжанаспэ, бэшарэнас андо баруно, и дажэ умарэнас. Но вонэ вся виритярдэ, важ кода кай лэндэ сас лащи дружба лэ Иеговаса и ек еқэса.

Андо 1980 бэрш мэрни жызня паруделя кодэлэстар, кай мэ жэнисайлэм пэ Гейла Матесон, вой сас анда Канада. Амэ ласа сытювасас андэ ек класо андэ Школа Галаад, ай потом бут время пэрэпистросавасас. И Гейла служыяс мисианероса андэ Боливия. Кала прожылэ 12 бэрш амэ упалэ диқлямпэ андо Нью-Йорко. Прожыля набут время и амэ жэнисайлям андэ Кения. Мэ фартэ цэнисарав ла Гейла, важ кода кай лати вся и время чалёлас тэ терэл лэ Иеговастири дила, и вой лошавэлас кодэлэсти, со амэндэ исин. И акана вой мэрно помошнико, саво ман кандэл и друӷо, саво любий.

Андо 1986 бэрш и Гейла и мэ, лям тэ терас разъездно дила, сави мэ теравас вмести ла служэнияса андо камитето филиало. Амэ самас андэ бут страны, пала савэ диқэлас амаро филиало.

Мэ анда оди вспоминаю, сар ӷотивились каринг о канӷрэсо андо 1992 бэрш андо Асмэре (Эритрея), тоди инке пэ амари дила котэ на сас запрето. Амэ моӷли тэ виарақас кати амбаро, саво сас андрал май хужэ чем упрал. Андэ кодэва дес, кала сас о канӷрэсо, мэ фартэ удивисайлэм. И ԥрала стердэ кадя, кай во ашэля достойно ҭан, кай тэ тэлювас лэ Иеговасти. Бут еря андэ цэрал шукарни материя и драго притидэ и затидэ вся, со сас найшукарно. Пэ кодэва лашо канӷрэсо сас 1 279 мануша.

И жызня андэ разъездно служэния кацави, кай ту на ӷанэс, со авэла англэ. Амэ никала на ӷанасас, кай жуваса. Еқварэс амэ жувасас андо лашо цэр по бэрэӷо паша океано. Ай пэ авэр разо амэ жувасас андэ хибара анда саструнэ листоря, ай каринг о ҭан, кай тэ прожаспэ важ пэстэ, сас май бут чем сто метроря. Но ӷлавно важ амэндэ сас най кода, сар амэ жувасас, ай кода, кай амэ десэнца росԥэнасас важ о Дэл лэ пианеронэнца и лэ вазвещятелёнэнца, савэндэ ԥабол оди. Кала амари назначения паруделя, амэнди прижыляпэ тэ ашавас бутэн амарэ друӷонэн, пала савэ амэ фартэ скучисарасас.

СО ДЯ И СЛУЖЭНИЯ АНДЭ ЭФИОПИЯ?

Андэ время, кала кончисайлэ 1980 бэрша и залинэпэ 1990 бэрша пэ амари дила динэ розришэния андэ дэсавэ страны, пала савэ диқэлас о кенийско филиало. Тоди котэ кадяжэ ашэлэ филиалоря и офисоря. Андо 1993 бэрш амэн назначили андо офисо андо форо Аддис-Абеба (Эфиопия). Бут бэрша котэ сас запрето, ай акана пэ амари дила динэ розришэния.

О Иегова блаӷословисардя и служэния андэ Эфиопия. Бут ԥрала и ԥэя линэ тэ служын пианеронэнца. Кажно бэрш лэ 2012 бэршэстар пианеронэнца служын май бут чем 20 процэнторя анда всаворэ вазвещятеля. Линэ тэ проандярэн теократически школы, и построисардэ май бут чем 120 залоря, кай тидэнпэ лэ Иеговастирэ свидетеля. Андо 2004 бэрш и мануша анда Вефилё пэрэлаглэ андэ нэви здания, котэ жэ построисардэ Зало важ и канӷрэсоря.

Мандэ и кай Гейла ашэлэ бут друӷоря ԥрала и ԥэя анда Эфиопия. Вонэ любинас амэн анда вся оди, када лэлас амэн лэ одестар. Важ кода кай амэндэ ашэля найдраго лэ зорэса, амэн пэрэандярдэ андо центральноевропейско филиало. Хоть пала амэндэ катэ драго диқэн, амэнди фартэ на хутилэл амарэн друӷонэн.

О ИЕГОВА ДЯ ТЭ АШЭН МАЙ БУТ

Амэ диқлям, сар о Иегова терэл, кай о чачимос тэ уӷанэн май бут (1 Коринфянам 3:6, 9). Например, кала мэ пэрво разо росԥэндэм лэ руандийсконэ манушэнди, савэ терэнас андэ плая андо Конго, андэ Руанда совсем на сас вазвещятеля. Акана котэ май бут чем 30 000 ԥрала и ԥэя. Андэ 1967 бэрш андо Конго (Киншасо) сас варикай 6 000 вазвещятеля. Акана андэ кадэя страна варикай 230 000 ԥрала и ԥэя. Ай по Вэчэро, кай сэрэн лэ Иисусостири смэрть андо 2018 бэрш сас май бут чем милионо мануша. Андэ страны, пала савэ варикала диқэлас о кенийско филиало, акана май бут чем 100 000 вазвещятеля.

Май бут чем 50 бэрш палпалэ о Иегова ԥэндя манди через разни ԥрала тэ служысарав полновременно. И хоть мэ идоси терав вся, кай тэ на лажав, мэ сытелэм андэ вся тэ патяв лэ Иеговасти. Кода, со мэ сытелэм андэ Африка, поможысардя манди, кай мэ тэ ӷанав тэ аштярав и тэ сытював тэ радосавав кодэлэсти, со исин. Мэ и Гейла абуросарас андэ амарэ кучутнэ ԥрала и ԥэя, савэ прилэнас амэн анда вся оди и никала на умэкэнас и вас и патянас лэ Иеговасти. Мэ кадя блаӷодарно лэ Дэвлэсти важ лэско лашимос! Кода, со о Иегова дя манди, када май бут, чем мэ аштяравас (Псалом 37:4).