Чаче о Иисусо отдя пэстири жызня важ мандэ?

АНДЭ БИБЛИЯ можно тэ проадинос чачунэ алава кодэлэндирэ, кастэ сас кацаво по ди, сар и амэндэ (Иакова 5:17). Амэнди вушэро тэ полас, со камля тэ ԥэнэн о Павло. Во ԥэндя: «Кала мэ камав тэ терав лашимос, андэр мандэ ужэ исин о найлашимос. [...] Бибахтало мэ мануш!» (Римлянам 7:21—24). Лэстирэ чачунэ алава моӷут фартэ тэ подритярэн амэн, кала амэ борисавас кодэлэса, кай амэ найсовершэни.

Но о Павло ԥэнэнас, кай лэстэ сас най кати када андо ди. Андэ Галатам 2:20 во пистросардя кода, андэр со патялас: «[О Иисусо] сыкадя пэстири любовь каринг мандэ и отдя пэс важ мандэ». Исин тумэндэ кацаво андо ди? Можэт исин, но най вся и время.

Если манди авэл упалэ по ди кода, кай мэ нисо на ашав важ и дэлмутнэ ӷрехоря, тоди манди ԥарэс тэ патяв, кай о Иегова любий и простий ман. И тоди манди можэт тэ авэл ԥарэс тэ патяв андэ кода, кай о Иисусо отдя пэстири жызня важ мандэ. Ай камэл о Иисусо, кай мэ кати кадя тэ полав лэстири жэртва? Если када кадя, тоди сар андэ када тэ патяв? Давай подас дума пала кадэла дуй вопросоря.

СО ГИНДОЙ О ИИСУСО?

О Иисусо па чачимастэ камэл, кай ту тэ полэс, кай во отдя пэстири жызня важ тутэ. Васо андэ када можно тэ патяс? Погиндосар пала кода, со пистромэ андэ Луки 23:39—43. Паша Иисусо по столбо амбладёл мурш. Во прижандёл, кай стердя приступления. Можэт када сас варисави фартэ бари дила, если лэс кадя позорно казнин. Кадэва мануш фартэ пэрэжывает, во мангэл лэ Иисусос: «На бистэр пала мандэ, кала авэса андэ тиро Царство».

Со ԥэндя лэсти о Иисусо? Представь пэсти, лэстэ вся дуқал, но во бандярэл о шэро, диқэл лэ манушэсти андэ яқа и анда оди ԥэнэн лэсти: «Ԥэнав тути адес, ту авэса манца андо Раё». О Иисусо моӷ тэ ԥэнэн кодэлэ приступникости, кай «Шаво манушыкано авеля кай... тэ отдэл пэстири жызня, кай тэ витинэл бутэн» (Матфея 20:28). Во кадя на ԥэндя, но во дя лэсти тэ полэл, кай во отдэл пэстири жызня важ лэстэ. Андэ алава «тути», «ту» и «манца» дицол, кай во када ԥэндя анда оди. И кала о Иисусо ԥэндя «ту», во ԥэнэнас важ кадэва мануш, кай во жувэла андо раё пэ ԥув.

Патя, о Иисусо камэлас, кай кодэва мануш тэ полэл, кай во отдэл пэстири жызня важ лэстэ. Погиндосар, о Иисусо камэлас, кай када тэ полэл о приступнико, саво дажэ на сас лэско ученико. Тоди хэба во на камэл, кай андэ када май фартэ тэ патял о христианино, саво болдо и служый лэ Дэвлэсти? Со поможыя тути, дажэ если тутэ сас варикала ӷрехоря тэ патяс, кай о Иисусо отдя пэстири жызня важ тутэ?

СО ПОМОЖЫСАРДЯ ЛЭ ПАВЛОСТИ?

И служэния, сави сас кай о Павло, поможыяс лэсти тэ патял, кай о Иисусо отдя пэстири жызня важ лэстэ. Во пистросардя: «Мэ фартэ блаӷодарно лэ Иисусости Христости, амарэ Ӷосподости, саво дя манди зор, важ кода кай во гиндой пала мандэ, кай мэ на парашав тэ кандав лэс, и дя манди, кай мэ тэ служысарав. Хоть май англал мэ ԥэнавас найлашэ алава по Дэл, ӷонисаравас и сымас наӷло» (1 Тимофею 1:12—14). О Павло полэлас, кай если о Иисусо дя лэсти кадэя дила, тоди во патял лэсти, любий лэс и сыкавэл, кай жалуий анда оди. О Иисусо кадяжэ приԥэндя кажнонэсти андар мэндэ тэ росԥэнас и лащи весть (Матфея 28:19, 20). Поможыя кадэва гиндо амэнди тэ полас, кай о Иисусо отдя пэстири жызня и важ амэндэ?

О Альберто почти 34 бэрша сас исключоно анда собрания. Во росԥэнэн: «Мэрнэ ӷрехоря вся и время англа мандэ. Но кала мэ росԥэнав важ о Дэл, мэ полав, кай терав и дила, сави о Иисусо приԥэндя манди тэ терав, сар када сас лэ апостолоса Павлоса. Кадэлэстар мэ лав зор и када поможый манди правильно тэ диқав пэр пэстэ, пэ пэстири жызня и пэ кода, со авэла англэ» (Псалом 51:3).

О Аллано, саво варикала сас приступнико и андярэлас вэрыто жызня, во прижандёл: «Мэ идоси вспоминаю, скати найлашимос мэ стердэм лэ манушэнди. Важ када дэкала мандэ по ди кацаво, кай мэ бибахтало. Мэ фартэ блаӷодарно лэ Иеговасти, важ кода кай во домэкля кацавэ ӷрешникос, сар мэ, тэ росԥэнав и лащи вести лэ манушэнди! Кала мэ диқав, сар вонэ ашунэн кадэя весть, мэ гиндосарав, саво о Иегова добро и любящё. Мэ полав, кай через мандэ во поможый кодэлэнди, кастэ сас кацави жэ жызня».

Кала амэ росԥэнас важ о Дэл, амэ гиндосарас важ о лашимос и стас пэско зор, кай тэ терас и лащи дила. Если о Иисусо дя амэнди кадэя дила, тоди во патял амэнди, любий амэн и жалуий анда вся оди.

О ИЕГОВА «МАЙ БУТ ӶАНЭН АМАРЭ ОДЕСТАР»

Пока на авэла конец ла люмати, савяса правий о Сатана, амаро ди най еқварэс лэла тэ дошалярэл амэн пала дэлмутнэ ӷрехоря. Сар тэ улас пэстар кацаво анда оди?

Ла Джина часто дошалярэл лако ди. Васо? Важ кода кай вой андэ тэрнэ бэрша ԥэнэнас, кай кандэл лэ Иеговас, ай екжэни жувэлас па аврятэ. Вой ԥэнэн: «Мэ фартэ лошали, кай „О Дэл май бут ӷанэн амарэ одестар“!» (1 Иоанна 3:19, 20). Амэн кадяжэ можэт тэ подритярэл о гиндо пала кода, кай о Иегова и о Иисусо полэн амэн, ӷрешнонэ манушэн май драго чем амэ корко пэс. На бистрэн, кай о выкупо сас потиндо най пала совершэни мануша, ай пала кодэла, ко, хоть и ӷрешно, но каийпэ андэ пэстирэ ӷрехоря (1 Тимофею 1:15).

Кай тэ патяс андэ када лэ одеса, трэбуй тэ мангаспэ и тэ гиндосарас пала кода, сар о Иисусо полэлас лэ найсовершэнонэ манушэн, и кадяжэ анда вся оди тэ терас и дила, сави во амэнди дя, када тэ служысарас. Через када амэ, сар и о Павло, можэм тэ ԥэнас: «[О Иисусо] сыкадя пэстири любовь каринг мандэ и отдя пэс важ мандэ».