1919 шэл бэрш палпалэ

Через кадэва доӷоворо появисайля нэви арӷанизацыя, када и Лига Нацый. Вой трэбуй сас тэ поможый, кай и народоря тэ терэн дила еқэҭанэ, кай тэ авэл машкар и мануша мирно и безопасно. Бут христиански қандиря подритярдэ и Лига Нацый. Федерально совето церквей Христа андэ Америка ԥэндя пала латэ «через и политика о Дэл ля тэ правий пэ ԥув». Кадэла қандиря андэ вся подритярдэ и Лига Нацый и бишалдэ пэ Парижско мирно конференцыя пэстирэ манушэн. Ек андар лэндэ ԥэндя, кай «заляпэ нэво вико андэ лэ манушэндири жызня».

Чаче заляпэ нэви жызня, но най лэндирэ зорэса, ко сас пэ конференцыя. О 1919 бэрш сыкадя, кай заляпэ нэви жызня андэ амари дила, кай тэ росԥэнас важ о Дэл. О Иегова дя гиндо пэстирэ народости тэ росԥэнэн лащи весть кадя, сар никала. Но май англал, кай и Исследователя Библии трэбуй сас бут со тэ парудёл.

НАЙВУШЭРО ТЭ ВИТИДЭН

Кажно бэрш витидэнас, ко тэ авэл президенто андо Общество Сторожэво башня, Библий и трактаторя. Када сас трэбуй тэ авэл андэ суббота 4 января андо 1919 бэрш. Но андэ кадэя время о Джозефо Рутерфордо, саво тоди сас барэдэр пэ Иеговастири народостири дила, и кадяжэ семь авэр ԥрала, пэ савэ хохадэ, бэшэнас андо баруно андэ Атланта (штато Джорджия, США). Важ када линэ тэ гиндон, трэбуй, кай вонэ тэ ашэнпэ барэдэра, чи тэ витидэн аврэн?

Кала о ԥрал Рутерфордо бэшэлас андэ камера андо баруно, во пэрэжывал пала кода, со авэла ла арӷанизацыяса. Во ӷанэнас, кай дэсавэ ԥрала камэнас тэ витидэн президентос варикас аврэс. Важ када во пистросардя письмо кодэлэнди, ко стидэпэ, кай вонэ тэ витидэн лэ ԥралэс Эвандеро Кауардо. Важ лэстэ во пистросардя, кай во спокойно, годявэрно и вся и время кандэл лэ Дэвлэс. Но бут ԥрала камлэ тэ терэн па аврятэ и тэ отстон по епаш бэрш тэ витидэн президентос. И адвокаторя, савэ защищяли лэ ԥралэн андо баруно, гиндонас кадяжэ. Со май бут важ када дэнас дума, со май фартэ пэрэжывали, кай тэ на заспоринпэ.

Потом о Ричардо Барберо ԥэндя пэ алава, савэ ԥэндя ек ԥрал, кай вонэ сас сар о «паи, саво мудардя и яг». О ԥрал, саво сас машкар кодэла мануша, ԥэндя: «Мэ най адвокато, но раз и дума зажыля пала законо, тоди мэ дэсо ӷанав пала кодэла, ко жувэл па законо. О Дэл камэл, кай лэс тэ на парашэн тэ кандэн. Мэ полав, кай авэла драго, кала сыкаваса, кай амэ патяс лэ ԥралэсти лэ Рутерфордости и витидаса лэс упалэ президентоса» (Псалом 18:25).

Потом ек ԥрал, савэс ақарэнас Александро Макмиллано, саво бэшэлас андо баруно, росԥэнэнас, кай пэ авэр дес о ԥрал Рутерфордо постучисардя андэ лэсти камера и ԥэндя: «Прошу о вас через и решотка». Во пэрэдя лэ Макмилланости и телеграмма. Па яқа можно сас тэ полэс, со котэ пистромэ. Андэр латэ сас пистромэ: «И ԤРАЛА О РУТЕРФОРДО, О УАЙЗО ВАНО БАРБЕРО, О АНДЕРСОНО БУЛЛИ И О СПИЛЛО, КАДА О ПРЕЗИДЕНТО И ПЭРВИ ТРИН ЧЛЕНЫ ПРАВЛЕНИЯ. ВСАВОРЭН ЛЮБИСАРАС». Када сыкадя, кай посли кода, сар витидэ всаворэн бэрэдэрэн, о Джозефо Рутерфордо и Уильямо ван Амбурго ашэлэпэ пэ пэсти должность. Кадя о ԥрал Рутерфордо на парашэля тэ авэл президенто.

СВОБОДА!

Кала и восемь ԥрала бэшэнас андо баруно, кодэла, ко на парашэнас тэ кандэн лэ Дэвлэс и Исследователя Библии стидэнас бутэн манушэн тэ подпистрон и лила, кай кадэлэ ԥралэн тэ одмэкэн. Кадэла смили ԥрала и ԥэя стидэ май бут чем 700 000 подписей. Андо 1919 бэрш, андо 26 марто, в среду, жы каринг кода, сар тэ подэн кадэла лила, о Рутерфордо и авэр ԥрала вижылэ анда баруно.

Андэ речь, сави росԥэндя кодэлэнди, ко лэс аштярэлас, о ԥрал Рутерфордо ԥэндя: «Мэ патяв, о ԥаримос, саво амэ всаворэ пэрэандярдям, кати сытярдя амэн тэ пэрэандярас инке май ԥари время. [...] Тумэ старыинаспэ най важ кода, кай кати тэ вилэн пэстирэ ԥралэн анда баруно. Када сас най ӷлавно. [...] Ӷлавно, пала со тумэ старыинаспэ, када, кай тэ росԥэнэн о чачимос, и кодэлэнди, ко терэнас кадэя дила, о Дэл дя лашимос».

Кода, со сас амарэ ԥралэнца по сындо, сыкадя, со о Иегова можэт тэ терэл. 14 мая андо 1919 бэрш о апелляцыонно сындо ԥэндя: «Кодэлэндэ, кас дошалярэнас, сас право, кай тэ розлэнпэ андэ лэндири дила справедливо. Но када на сас. И важ када о приӷоворо амэ отменисарас». И ԥрала бэшэнас андо баруно важ фартэ бари дила. И если лэнди просто тэ стердоп амнистия или тэ диноп май вушэро наказания, тоди андэ лэндирэ лила всаек ашэлопэ и отметка, кай лэн сындосардэсас. Но лэн будэр на линэ тэ дошалярэн. Важ када о Рутерфордо на хасардя пэстири адвокатско дила и када поможысардя лэсти и май англэ най еқварэс тэ защищяет лэ Иеговастирэ народос андо Верховно Сындо андэ США.

ЗАКАМЛЭ ТЭ РОСԤЭНЭН ВАЖ О ДЭЛ

О ԥрал Макмиллано росԥэнэнас: «Амэ на ленисавасас и на камасас тэ бэшас би дилако и тэ аштярас, пока о Дэл залэла амэн по нэбо. Амэ полям, кай трэбуй бут тэ терас дила, кай тэ диқас, со камэл о Дэл».

Кодэла, ко терэнас андэ ӷлавно управления, лэндэ на вижалас упалэ тэ вимэкэн и литература, сар вонэ када терэнас бут бэрша. Васо? Пока и ԥрала, савэ диқэнас пала арӷанизацыя, бэшэнас андо баруно, формы важ и печать будэр на сас. Кадэлэстар сас фартэ ԥарэс, и дэко гиндосардэ, кай будэр на ласа тэ росԥэнас важ о Дэл.

Сас варикасти интересно весть важ о Царство чи най, сави росԥэнэнас и Исследователя Библии? Кай тэ полэн када, о ԥрал Рутерфордо закамля тэ росԥэнэн и речь. Ақарэнас всаворэн, ко камэнас тэ ашунэн. О ԥрал Макмиллано росԥэнэн: «Если бы нико тэ на авелоп, тоди амэ полиноп, кай и дила важ и проповедь кончисайля».

Кадя, андо 1919 бэрш андо 4 маё курте, андо Лос-Анджелесо (штато Калифорния), о ԥрал Рутерфордо, хоть и сас фартэ насвало, росԥэндя речь «Надежда важ кодэла, ко фартэ аштярэл». Котэ сас варикай 3 500 манушэн, и фартэ бутэ манушэнди на хутилдэ ҭана. Пэ авэр дес авелэ инке 1 500 мануша. Атвето дицолас, и мануша фартэ камэнас тэ ашунэн о чачимос!

Кода, со тердэ и ԥрала, сыкадя, сар и май дур лэ Иеговастирэ свидетеля тэ росԥэнэн важ о Дэл.

ВОНЭ ӶОТОВИ ТЭ РОСԤЭНЭН ВАЖ О ДЭЛ

Андэ «Сторожэво башня» лэ 1 августостар лэ 1919 бэршэстар сас пистромэ, кай андо начало сентябрё андо Сидар-Пойнто (штато Огайо) авэла канӷрэсо важ всаворэ. Ек тэрно Исследователё Библии анда штато Миссури о Кларенсо Бити росԥэнэн: «Кажно полэлас, кай трэбуй тэ авэл пэ кадэва канӷрэсо». Котэ стидэпэ май бут чем 6 000 ԥралэн и ԥэян, вонэ кацаво дажэ на аштярэнас. Инке май бари радость сас кодэлэстар, кай май бут чем 200 мануша болделэ андэ озери Эри, сави сас паша канӷрэсо.

По панчто дес по канӷрэсо, када сас андо 5 сентябрё андо 1919 бэрш, андэ пэстири речь «Ақарас лэ сотрудниконэн» о ԥрал Рутерфордо ԥэндя, кай вижыля нэво журнало, пэ саво ԥэнэн «Золотой век»a, андэ саво трэбуй сас тэ авэл пистромэ пала «всаворэ важни новости и па Библия тэ росԥэнэн, васо када терэлпэ».

Всаворэнди, ко сас Исследователё Библии, ԥэнэнас тэ жан смило и тэ росԥэнэн важ о Дэл кодэлэ журналоса. Андо письмо драго сас пистромэ, «кай кажно [болдо] служытелё трэбуй тэ сэрэл, кай тэ росԥэнэн важ о Дэл, када бари бах. И трэбуй ужэ акана май бут тэ терэн андэ кадэя бари дила, кай тэ росԥэнэн всаворэ манушэнди». Бут мануша драго ашунэнас! Каринг о декабрё через кода, кай и вазвещятеля Царства бут росԥэнэнас, по журнало подпистросайлэ май бут чем 50 000.

Каринг кода сас жэ тэ кончийпэ о 1919 бэрш и андэ лэ Иеговаско народо вся ашэля па аврятэ и лэндэ ашэля нэво зор. Кадяжэ исполнисайлэ дэсавэ пророчества, савэ сыкавэнас и послидни деса. О Иегова ужэ диқля, кай лэско народо на ля тэ терэл кода, со лэсти на чалёл и о народо ашэля май вужо, сар пистромэ андэ Малахия 3:1—4. Лэ Иеговастирэ служытеля ужэ вижылэ анда «Вавилоно Велико», сар ԥэнэса анда баруно и о Иисусо стодя «лэ кандинэс и годявэрнэс рабос»b (Откровение 18:2, 4; Матфея 24:45). Акана и Исследователя Библии сас ӷотови тэ терэн и дила, сави камля тэ дэл лэнди о Иегова.