1920 шэл бэрш палпалэ

О Иегова па чачимастэ дя зор лэ манушэнди, савэ анда вся ди росԥэнэнас пала лэстэ. Важ о бэрш лэ пианеронэн, пэ савэ раньшэ ԥэнэнас разносчики книг, ашэля май бут. Лэн сас 225, ай ашэля 350. Пэрво разо андэ ӷлавно управления бишалдэ пэстирэ отчоторя 8 тысяч вазвещятеля. О Иегова блаӷословисардя пэстирэ служытелёнэн, кай вонэ стонас бут зор. И важ када и мануша лэн ашунэнас, сар никала.

ԤАБОЛ ОДИ АНДЭ СЛУЖЭНИЯ

Андо 1920 бэрш 21 марта о Джозефо Рутерфордо, саво андэ кода время диқэлас пала дила, сави терэнас и Исследователя Библии, трэбуй сас тэ ԥэнэн и речь «Милионоря, савэ жувэн акана, никала на мэрэна». И Исследователя Библии стонас бут зор, кай тэ ақарэн всаворэн, ко камэл тэ ашунэл кадэя речь. Вонэ излинэ ек анда само барэ театроря андо Нью-Йорко и роздинэ варикай 320 тысяч приӷлашэния.

Нико на гиндояс, кай авэна скати мануша. Андо театро сас май бут чем 5 тысяч ҭана. И андэр лэстэ сас ԥэрдо мануша. Инке 7 тысяч мануша, савэ камэнас тэ ашунэн и речь, на поместисайлэ. Андэ «Сторожэво Башня» ԥэнэнаспэ, кай када сас ек анда встречи, пэ сави стидяпэ кадя бут миро, сави проандярдэ и Международни Исследователя Библии.

Лэ Дэвлэстирэ служытелёнэн линэ тэ ӷатярэн па речь, сави вонэ росԥэнэнас: «Милионоря, савэ жувэн акана, никала на мэрэна». Андэ кода время вонэ инке на полэнас, кай пала Дэл трэбуй тэ росԥэнэн па вся и люма и кай пэ када трэбуй инке май бут время, чем вонэ гиндонас. Но кай и Исследователя Библии ԥаболас оди андэ служэния. И ԥэй Айда Олмстед ля тэ ԥирэл пэ собрания андэ 1902 бэрш. Вой росԥэнэн, кай вонэ ӷанэнас, кай лэ манушэн аштярэн бут блаӷословении. Вонэ никала на хасарэнас и время, кай всаворэнди тэ росԥэнэн пала Дэл.

ЕКЖЭНЭ ВИМЭКАС И ЛИТЕРАТУРА

Кай лэ ԥралэндэ и лэ ԥэяндэ тэ авэл, со тэ адинон пала Иегова, андо Вефилё линэ тэ печатают и литература. Важ када андо форо Бруклино пэ вулица Миртл-авеню, 35, най дур лэ Вефилёстар излинэ здания и стодэ котэ станко, кай тэ печатают.

Акэ со росԥэнэн о Лио Пелл и Уолтеро Кесслеро, савэ линэ тэ служын андо Вефилё. Када сас андо январё 1920 бэрш. Уолтеро росԥэнэн, кала вонэ авелэ анда Вефилё, о надзирателё подиқля пэр лэндэ и ԥэндя, кай до обеда цыло пол часа. И дя лэнди бути тэ ԥиравэн анда подвало и коробки лэ книжкэнца.

О Лио росԥэнэн, кай пэ авэр дес лэнди динэ тэ халавэн и стины по пэрво этажо. Май мэлали бути во инке на диқлясас. Но вонэ терэнас кадэя дила важ о Дэл и полэнас, кай када бари бах.

Прожыля набут время и «Сторожэво Башня» линэ тэ печатают пэ плоско машынка, сави сас по дуйто этажо. Пэр латэ сас напечатани 60 тысяч журналоря. Када сас выпуско «Сторожэво башня» лэ 1 февралёстар 1920 бэрш. Кодэла времятар андо подвало андэ кадэя здания и ԥрала стодэ инке ек печатно машынка, сави сас фартэ бари. Важ када пэр латэ ԥэнэнас «Линкор», сар по баро караблё. Андо 1920 бэрш лэ 14 апрелёстар пэ кадэя машынка линэ тэ вимэкэн о журнало «Золотой век». Дицол, кай о Иегова блаӷословисардя кода, кай и добровольцоря анда вся оди терэнас кадэя дила.

«ЛАСА ТЭ ЛАДИСАРАС»

Лэ Иеговастирэ служытеля, савэ на парашэнас лэс тэ кандэн, радуинаспэ, кай моӷли тэ терэн кадэя нэви дила вмести. Но кала сас ԥари время андо 1917 жы кай 1919 бэрш, дэсавэ Исследователя Библии ашадэ и арӷанизацыя. Со лэнди поможысардоп тэ ринпэ?

Андэ «Сторожэво башня» лэ 1 апрелёстар 1920 бэрш вижыля статья, пэ сави ԥэнэнас «Ласа тэ ладисарас». Андэр латэ сас запистромэ кацавэ лашэ алава: «Амэ патяс, кай всаворэ, кастэ исин лэ Ӷосподоско духо... забистрэна и ошыбки, савэ сас... и лэна тэ жувэн вмести и тэ ладин, сар ек ери».

Бут ко шутя сама пэ кадэла алава. Ек ери андэ пэско письмо росԥэндя, кай май бут бэршэстар вонэ на росԥэнэнас важ о Дэл. Вонэ полинэ, кай када сас нэ правильно. Будэр вонэ на камэн тэ змардёнпэ па лэ Дэвлэско дром. Лэ ԥралэндэ и лэ ԥэяндэ, савэ упалэ линэ тэ служын, сас бут дила.

РОЗДАС И КНИЖКА «ZG»

И Исследователя Библии 21 июня 1920 бэрш линэ тэ роздэн и книжка «ZG», пэ сави ԥэнэнас «Завершённая тайна». Латэ сас ковли обложкаa. Но андо 1918 бэрш пэ кадэя книжка стодэ запрето. Важ када по складо лэн ашэлясаспэ фартэ бут.

Кадэя дила мангэнас тэ терэн всаворэн вазвещятелёнэн, ай най кати пианеронэн. Када моӷ тэ терэл кажно болдо мануш и трэбуй сас тэ терэл анда вся оди. О Эдмундо Хуперо росԥэнэнас, кай кала терэнас кадэя дила, бут ко пэрво разо андэ пэсти жызня служыяс цэр цэрэстар. Во кадя жэ росԥэндя, кай кати тоди вонэ полинэ пэ скати тэ бари бути лэнди трэбуй авэла тэ стерэн.

ПА АВРЯТЭ ТЕРАС АМАРИ ДИЛА АНДЭ ЕВРОПА

Кала сас Пэрво мирово война, сас ԥарэс тэ уӷанэн, сар жал и дила кай и Исследователя Библии андэ авэр страны. И о ԥрал Рутерфордо закамля тэ подритярэл лэн и тэ парувэл варисо андэ служэния. Важ кода андо 1920 бэрш 12 августа во и инке штар ԥрала лаглэ андэ Великобритания и андэ авэр страны, кай тэ диқэнпэ лэ ԥралэнца.

О Рутерфордо и авэр Исследователя Библии лаглэ андэ Великобритания. Котэ вонэ проандярдэ трин канӷрэсоря, ай кадяжэ 12 собрании, пэ савэ во кажно разо росԥэнэнас пэстири речь. Кодэя речь виашундэ варикай 50 тысяч мануша. Посли када андэ «Сторожэво башня» ԥэнэнаспэ, кай вой фартэ подритярдя лэ ԥралэн и лэ ԥэян. Вонэ линэ зор, закамлэ инке май бут тэ служын и линэ инке май фартэ тэ любин ек еқэс. И дажэ кодэла, касти сас ԥарэс по ди, линэ тэ лошавэн. Ай андо Парижо о ԥрал Рутерфордо ԥэндя и речь «Милионоря, савэ жувэн акана, никала на мэрэна». Котэ андо зало на сас ни ек свободно ҭан. Кала во доԥэндя и речь, каринг лэстэ поджылэ триста мануша и ԥэндэ, кай камэн май бут тэ уӷанэн пала Дэл.

Потом о Рутерфордо и авэр ԥрала, савэ сас лэса, лаглэ андэ Афины, андо Каиро и андо Иерусалимо. Важ и мануша, савэ камэнас май бут тэ уӷанэн пала Дэл, во стердя складо важ и литература андэ форо Рамаллах и рисайля андэ Европа. Котэ андэ Швейцария во стердя филиало, саво сас ӷлавно па вся Европа. О ԥрал Рутерфордо камэлас, кай котэ тэ вимэкэн и литература.

СМИЛО РОСԤЭНАС ПАЛА НЭСПРАВЕДЛИВОСТЬ

Осенью андо 1920 бэрш и Исследователя Библии вимэклэ журнало «Золотой век», савэстэ сас номеро 27. Када сас особо журнало. Котэ смило росԥэнэнас, сар ӷонинас лэ ԥралэн и лэ ԥэян андо 1918 бэрш. И печатно машынка, пэ сави ԥэнэнас «Линкор», терэлас дес и рят. И пэр латэ вимэклэ май бут, чем штар милионоря кадэла журналоря.

Анда кадэва журнало и мануша уӷанглэ, кай сас сындо кай и ԥэй Эмма Мартин. Вой служыяс сар пианеро андо Сан-Бернардино (штат Калифорния, США). Андо 1918 бэрш 17 марта вой и инке трин ԥрала, Эдуардо Хаммо, и Эдуардо Сонненбурго и Эрнесто Стивенсо, сас пэ най бари собрания важ и Исследователя Библии.

Пэ кодэя собрания авеля ек мануш. Кадэлэ манушэс подбишалдя о прокуроро, кай во тэ виарақэл, васо тэ дошалярэн лэ Исследователёнэн Библии. И во виарақля кода, со родэлас. Када сас и книжка «Завершенная тайна». Прожыля набут время, и ла ԥья Мартин, лэ ԥралэнца Хаммо, Сонненбурго и Стивенсо залинэ андо бар. Лэн дошалярэнас андэ кода, кай вонэ роздэнас и книжка, пэ сави сас запрето. Кадя вонэ кабута жанас против о Законо пала шпионажо.

Амаря ԥья и тринэ ԥралэн бэшардэ и динэ лэнди по трин бэрш. Вонэ най еқвар обжаловали кадэя ришэния и стердэ вся со моӷут, кай тэ доԥэнэн, кай вонэ найдошалэ. Но нисо на поможысардя. И лэ 17 маёстар андо 1920 бэрш лэнди прижыляпэ тэ отбэшэн пэско сроко. Но йто вся паруделя андэ лащи риг.

Андо 1920 бэрш 20 июня о ԥрал Рутерфордо росԥэндя пала када по канӷрэсо андэ Сан-Франциско. Лэ манушэнди, савэ ашунглэ пала када по канӷрэсо, фартэ на чалеля, сар обжылэпэ лэ ԥралэнца и лэ ԥэянца. И вонэ бишалдэ телеӷрамма лэ президентости. Котэ сас пистромэ, кай вонэ патян, кай ла ԥья Эмма Мартин сындосардэ нэсправедливо. Вой на жыля против о Законо пала шпионажо. Вонэ гиндонас, кай када фартэ нэсправедливо, кай и барэ мануша андэ власти евья дошалярдэ ла и стодэ андо бар.

Пэ авэр жэ дес о президенто Вудро Вильсоно одмэкля ла ԥья Мартин, ай кадяжэ лэ ԥралэн Хаммо, Сонненбурго и Стивенсо.

Андо 1920 бэрш кай и Исследователя Библии сас бут сости тэ радуинпэ. Бути андэ ӷлавно управления сас май бут и май бут. И вонэ сар никала росԥэнэнас пала лэ Дэвлэско Царство, кай кати во улэла всаворэ проблемы, савэ исин кай и мануша (Матфея 24:14). Ай андо 1921 бэрш о чачимос пала Царство трэбуй сас тэ росԥэнэн инке май бутэ манушэнди.