Нико на простий кадя, сар о Иегова

1. Пала саво чачимос пистромэ андэ Экклезиаст 7:20?

О ЦАРЁ Соломоно пистросардя: «Нинай пэ ԥув праведнонэ манушэс, саво тердоп кати о лашимос и на тердоп бэзэх» (Эккл. 7:20). Чаче, кадя и исин! Амэ всаворэ ӷрешни (1 Иоан. 1:8). Важ када амэнди фартэ трэбуй, кай амэн тэ простий о Дэл, ай кадяжэ авэр мануша.

2. Со амэндэ по ди, кала амаро пашутно друӷо простий амэн?

² Ко андар мэндэ никала нэ обижал пэстирэ пашутнэ друӷос? Канешно, посли када амэ камасас тэ помирисавас лэса и анда вся оди мангасас прощения. Со амэндэ сас по ди, кала о друӷо простисардя амэн? Кадэлэстар ашэл май вушэро, и амаро ди радуийпэ.

3. Пала со амэ подаса дума андэ кадэя статья?

³ Амэ камас, кай о Иегова тэ авэл важ амэндэ само пашутно друӷо. Но дэкала амэ ԥэнас или терас кода, со лэсти на чалёл и состар можэт тэ дуқал лэско ди. Васо амэ можэм тэ авас уверени, кай о Иегова камэл амэн тэ простий? Соса на шолпэ, сар простий о Иегова и мануша? И кас простий о Иегова?

О ИЕГОВА КАМЭЛ ТЭ ПРОСТИЙ

4. Катар амэ ӷанас, кай о Иегова камэл тэ простий?

⁴ И Библия драго сыкавэл, кай о Иегова камэл тэ простий. Кала по плай Синаё о Дэл сыкавэлас лэ Моисеёсти пэстири слава, во ԥэндя через о анӷело: «Иегова, Иегова, добро Дэл, во полэл и жалуий анда вся оди, на грабий тэ холявэл, никала на ашавэл и лэстири преданно любовь фартэ бари. Во сыкавэл преданно любовь каринг и тысячи, простий и дош, о бэзэх и кала жан против законо» (Исх. 34:6, 7). О Иегова — добро Дэл, и во жалуий анда вся оди. Во всегда ӷотово тэ простий лэ ӷрешникос, если кодэва каийпэ (Неем. 9:17; Пс. 86:15).

5. Со камэл тэ терэл о Иегова через кода, кай ӷанэн пала амэндэ вся? (Псалом 103:13, 14).

⁵ Сар амаро Создателё, о Иегова ӷанэн пала амэндэ вся. Кати погиндон, пэскати дэ драго о Дэл ӷанэн кажнонэ манушэс! (Пс. 139:15—17). Во диқэл всаворэ нэдостаткоря, савэ пэрэдинэпэ амэнди лэ родителёнэндар через о нэсовершэнство. Кадяжэ во ӷанэн, со повлияло пэ амари жызня и васо амэ кацавэ. Со блаӷодаря кадэлэсти о Иегова камэл тэ терэл? Во камэл тэ жалуий амэн анда вся оди (Пс. 78:39; проадинон Псалом 103:13, 14).

6. Сар о Иегова сыкадя, кай камэл тэ простий?

⁶ О Иегова сыкадя, кай камэл тэ простий. Во полэл, кай через о пэрво мануш, о Адамо, всаворэ амэ ашэлям ӷрешни (Рим. 5:12). Най па амаро зор тэ улас о бэзэх и смэрть (Пс. 49:7—9). Но о Дэл амэн фартэ любий и жалуий, и во позаботисайля, кай тэ спасый амэн. Со во стердя? Андэ Иоанна 3:16 ԥэнэнпэ, кай о Иегова «отдя [пала амэндэ] пэстирэ Шавэс, саво лэстэ ек кацаво» (Матф. 20:28; Рим. 5:19). Можно тэ ԥэнас, кай о Иисусо заля амаро ҭан и муля вместо амэндэ (Евр. 2:9). Важ када всаворэ, ко патян андэр лэстэ, моӷут тэ освободинпэ лэ бэзэхэстар и ла смэртятар. Кати погиндон, пэскати дэ ԥарэс сас лэ Иеговасти тэ диқэл, сар мучийпэ лэско Шаво, кала лэс кадя жэстоко умарэнас! Если бы о Иегова на камлоп тэ простий амэн, во никала на домэклоп, кай лэско Шаво тэ мэрэл.

7. Савэ случаёря анда Библия сыкавэн, кай о Иегова простий анда вся оди?

⁷ Андэ Библия росԥэнэнпэ, кай о Иегова анда вся оди простияс лэ манушэн (Эф. 4:32). Пала кастэ тумэ погиндосардэ? Можэт, пала царё Манассия? Кадэва найлашо мануш терэлас бут, со сас гряца важ о Иегова. Во тэлёлас лэ хохавнэ дэвлэнди и подмарэлас каринг када аврэн. О Манассия умардя пэстирэ шавэн и андя лэн андэ жэртва лэ хохавнэ дэвлэнди. Во дажэ стодя лэ идолонэн андэ лэ Иеговаско свынто храмо. Андэ Библия ԥэнэнпэ: «Во терэлас фартэ бут найлашимос англа лэ Иеговастирэ яқа и холярэлас лэс» (2 Лет. 33:2—7). И всаек, кала о Манассия каисайля, о Иегова анда вся оди простисардя лэс. О Дэл дажэ «рисардя лэс андо Иерусалимо по царско престоло» (2 Лет. 33:12, 13). Ай можэт, тумэ погиндосардэ пала Давидо. Андэ пэстири жызня во терэлас барэ ӷрехоря. Например, во изменил андо брако, ай потом умардя лэ манушэс. Но кала о Давидо прижангля пэстири дош и анда вся оди каисайля, о Иегова лэс простисардя (2 Сам. 12:9, 10, 13, 14). Кадэла случаёря драго сыкавэн, кай о Иегова камэл тэ простий. Нико анда мануша на сыстояпэ лэ Иеговаса андэ кода, сар во простий. Давайте подаса дума пала када май бут.

САР ПРОСТИЙ О ИЕГОВА?

8. Васо нико на сыстояпэ кодэлэса, сар простий о Иегова?

⁸ О Иегова — «Сындомари всаворя ԥувьяко» (Быт. 18:25). Лашо сындомари трэбуй драго тэ ӷанэн и законоря. Кадяжэ и о Иегова, во най кати Сындомари, но и Кодэва, ко стол и законоря (Ис. 33:22). О Иегова май драго всаворэндар ӷанэн, со лашимос, ай со най. Со инке трэбуй, кай о сындомари драго тэ сындой? Англа кода, сар тэ прилэл и ришэнии, во трэбуй драго тэ розуӷанэн вся и ситуацыя. Андэ када ни ек сындомари на сыстояпэ лэ Иеговаса.

9. Пэр со шол сама о Иегова, кала прилэл ришэния, тэ простий лэ манушэс чи най?

⁹ Кала о Иегова розлэл варисави дила, во драго ӷанэн вся и ситуацыя. Кадэлэса во на шолпэ пэ сындомаря анда мануша (Быт. 18:20, 21; Пс. 90:8). О Дэл ӷанэн май бут, чем амэ можэм тэ диқас или тэ ашунас. Во драго полэл, сар по мануш повлияло, кай во жувэл, сар лэс барярдэ, саво характеро и качестворя пэрэдинэпэ лэсти лэ родителёнэндар, ай кадяжэ саво лэстэ эмоцыонально и психическо зор. О Иегова диқэл лэ манушэско ди. Во полэл, со камэл о мануш и васо во када терэл. Лэ Дэвлэстар нисо на гаравэса (Евр. 4:13). Вижал, кала о Иегова прилэл ришэния, тэ простий лэ манушэс чи най, во шол сама пэ вся.

10. Катар амэ ӷанас, кай лэ Иеговастирэ ришэнии всегда справедливи? (Второзаконие 32:4).

¹⁰ О Иегова — Само Баро Сындомари. Лэстирэ ришэнии всегда справедливи. Во никала на шол сама, саво мануш пар пэстэ, пэ лэстирэ способности, барвалимос, ай кадяжэ ашунгло во чи най (1 Сам. 16:7; Иак. 2:1—4). Нико нэ можэт тэ заставий лэ Иеговас варисо тэ стерэл или тэ подтинэл лэс (2 Лет. 19:7). Во никала на прилэл и ришэнии анда холи (Исх. 34:7). Чаче, о Иегова — само лашо Сындомари, важ кода кай во диқэл и ӷанэн вся. (Проадинон Второзаконие 32:4.)

11. Соса на шолпэ лэ Иеговастири прощения пэ кода, сар простин и мануша?

¹¹ О Иегова простий совсем най кадя, сар и мануша. Када драго дицол анда Библия. Сар ԥэнэнпэ андэ ек библейско справочнико, дэкала андэ Еврейски Писании исин алав, саво пистрон «кати тоди, кала и дума жал пала лэ Иеговастири прощения важ о ӷрешнико. Лэс никала нэ используют, кала дэлпэ дума пала кода, сар и мануша простин ек еқэс. Лэндири прощения на сыстояпэ кодэлэса, сар простий о Дэл». Кати кай о Иегова исин право полностью тэ простий кодэлэс, ко стердя бэзэх, но каийпэ. Со анэн лэ Иеговастири прощения?

12, 13. а) Со по ди кай о мануш, савэс простисардя о Иегова? б) Сар простий о Иегова?

¹² Кала амэ полас, кай о Иегова амэн простисардя, амэндэ ашэл драго по ди и амэн будэр на хал и совесть. Кацаво можэт тэ авэл кати тоди, кала амэн простий екжэно о Иегова (Деян. 3:19). Во домэкэл, кай амэ упалэ тэ авас лэстирэ пашутнэ друӷоря, кабута амэ никала и на тердям бэзэх.

¹³ Если о Иегова простисардя, во ужэ никала на лэла тэ дошалярэл амэн или тэ спушэл пала када (Ис. 43:25; Иер. 31:34). Андэ Библия ворта ԥэнэнпэ: «Сар дур ек еқэстар о востоко и о западо, кадя дэ дур во одындярдя амэндар амарэ ӷрехоря» (Пс. 103:12)b. Кала амэ гиндосарас, сар простий о Иегова, када лэл амэн лэ одестар и амэ ашас май блаӷодарни (Пс. 130:4). Но кас простий о Иегова?

КАС ПРОСТИЙ О ИЕГОВА?

14. Со амэ уӷанглям пала кода, сар простий о Иегова?

¹⁴ Сар амэ диқлям, кала о Иегова прилэл ришэния, тэ простий лэ манушэс чи най, во на шол сама пэ скати дэ ԥаро бэзэх во стердя. Сар амаро Создателё, Сындомари и Кодэва, ко стол и законоря, о Иегова фартэ бут ӷанэн. И во использует када, кала прилэл варисави ришэния. Но пэр со о Дэл шол сама, кала витидэл, тэ простий лэ манушэс чи най?

15. Пэр со шол сама о Иегова, кала прилэл ришэния, тэ простий лэ манушэс чи най? (Луки 12:47, 48).

¹⁵ Пэрво, пэр со шол сама о Иегова, — ӷанэнас о мануш, кай терэл нэправильно чи най. О Иисусо ворта ԥэндя пала када андэ Луки 12:47, 48 (проадинон). Если варико полэл, кай жал против лэ Иеговаско законо, и всаек кадя терэл, — када баро бэзэх. О Иегова можэт тэ на простий лэс (Мар. 3:29; Иоан. 9:41). Но дэкала амэ терас варисо нэправильно, хоть и полас, кай када на чалёл лэ Иеговасти. Можэм амэ тоди тэ надеисавас, кай во амэн простия? Канешно, да. Давайте роздиқаса инке ек маменто, пэ саво шол сама о Иегова.

16. Со када тэ каисавас и васо када трэбуй, кай о Иегова тэ простий?

¹⁶ Дуйто, о Дэл диқэл, анда вся оди каийпэ о мануш чи най. Но со значит тэ каиспэ? Када тэ парувэс пэско гиндо и со андо ди. Ай если о мануш камэлас тэ стерэл варисо найлашо, во трэбуй тэ ашавэл кадэва гиндо. Кодэва, ко каийпэ, фартэ пэрэжывает, кай стердя нэправильно. Лэсти ԥарэс най кати кодэлэстар, со во стердя. Во полэл, кай вся када тердяпэ, кай во дуреля лэ Иеговастар. Погиндосарам: о Манассия и о Давидо стердэ барэ ӷрехоря, но о Иегова лэн простисардя важ кода, кай вонэ анда вся оди каисайлэ (1 Цар. 14:8). Вижал, о Дэл трэбуй тэ диқэл, кай амэ каисайлям. Тоди во амэн простия. Но хутила просто тэ пэрэжываем пала пэско бэзэх? Най. О Иегова аштярэл, кай амэ варисо ласа тэ терасc. Када инке ек маменто, пэ саво во шол сама.

17. Со амэнди трэбуй тэ парувас андэ пэстири жызня и сар када поможыя упалэ тэ на шылисавас? (Исайя 55:7).

¹⁷ Трито, важ о Иегова важно, кай о ӷрешнико тэ парудёл. О Дэл аштярэл, кай во парашэла тэ терэл бэзэх и упалэ лэла тэ андярэл лэстири время. (Проадинон Исайя 55:7.) О мануш трэбуй тэ парувэл пэстирэ гиндоря и тэ сытёл тэ диқэл пэ вся кадя, сар о Иегова (Рим. 12:2; Эф. 4:23). Во трэбуй тэ ришый важ пэстэ, кай будэр на лэла тэ гиндой и тэ терэл кадя, сар на чалёл лэ Иеговасти (Кол. 3:7—10). Но вся када авелоп евья, если бы о Иисусо тэ на отдиноп пала амэндэ пэстири жызня. Блаӷодаря кадэлэсти, лэ Иеговастэ исин право тэ простий амэн и тэ стерэл, кай амэ тэ авас вужэ лэ бэзэхэстар. Если амэ терас вся, кай тэ парувас пэстири жызня, о Иегова обязательно амэн простия через лэ Иисусостири жэртва (1 Иоан. 1:7).

ПАТЯН, КАЙ О ИЕГОВА ТУМЭН ПРОСТИЯ

18. Со амэ уӷанглям пала кода, сар простий о Иегова?

¹⁸ Давайте вспомним, со амэ роздиқлям андэ кадэя статья. Нико на сыстояпэ лэ Иеговаса андэ кода, сар во простий. Катар амэ када ӷанас? Пэрво, во камэл тэ простий. Дуйто, во ӷанэн амэн май драго, чем варико авэр. Во ӷанэн пала амэндэ вся, и лэсти найԥарэс тэ полэл, анда вся оди амэ каисавас чи най. Трито, кала о Иегова простий, во дэл амэнди возможность упалэ тэ жувас вужэ одеса, кабута амэ и на тердямас нисаво бэзэх. Блаӷодаря кадэлэсти амэ можэм тэ авас уверени, кай во амэнца довольно.

19. Хоть амэ нэсовершэни и дэкала шылисавас, васо амэ на трэбуй тэ умэкас и вас?

¹⁹ Пока амэ ӷрешни, амэндэ на вижала никала тэ на терас бэзэх. Но амэн моӷут тэ подритярэн и алава анда «Понимание Писания»: «Лэ Дэвлэстирэ служытеля нэсовершэни и дэкала моӷут тэ шылинпэ, но о Иегова анда вся оди жалуий лэн. Блаӷодаря кадэлэсти лэн будэр на лэла тэ хал и совесть пала ошыбки, савэ вонэ стердэ (Пс 103:8—14; 130:3). Если вонэ анда вся оди старыинпэ тэ андярэн лэ Дэвлэстири время, вонэ моӷут тэ лошавэн (Фп 4:4—6; 1Ин 3:19—22)» (статья «Раскаяние», абзацо 7). Када фартэ придэл зор!

20. Со амэ уӷанаса анда авэр статья?

²⁰ Амэ блаӷодарни лэ Иеговасти, кай во камэл тэ простий амэн, кала амэ анда вся оди каисавас андэ пэстирэ ӷрехоря. Сар амэ можэм тэ сытювас лэстар? Андэр со шолпэ, сар простий о Иегова и мануша, но андэр со исин разница? Васо амэнди трэбуй пала када тэ ӷанас? Атветоря пэ кадэла трин вопросоря амэ уӷанаса анда авэр статья.