О Иегова блаӷословий кодэлэн, ко простий

1. Со ԥэнэн о Иегова кодэлэнди, ко каийпэ?

О ИЕГОВА най кати амаро Создателё, Сындомари и Кодэва, ко стол и законоря, но и любящё небесно Дад (Пс. 100:3; Ис. 33:22). Если амэ стердям бэзэх, но анда вся оди каисайлям, во можэт амэн тэ простий и фартэ камэл када тэ стерэл (Пс. 86:5). О Иегова любий амэн и важ када ԥэнэн амэнди через пэско пророко Исайя: «Хоть акана тумарэ ӷрехоря сар лоли материя, вонэ ашэна парнэ, сар ӥв» (Ис. 1:18).

2. Со поможыя амэнди тэ ладисарас аврэнца?

² Амэ всаворэ нэсовершэни, и важ када дэкала ԥэнас и терас кода, со обижает аврэн (Иак. 3:2). Но амэ всаек можэм лэнца тэ дружысарас, если сытювас тэ простисарас (Прит. 17:9; 19:11; Матф. 18:21, 22). Кала варико амэн холярэл, о Иегова аштярэл, кай амэ простисараса (Кол. 3:13). И амэндэ исин бут причины када тэ терас, важ кода кай екжэно о Иегова анда вся оди простий амэн (Ис. 55:7).

3. Со амэ уӷанаса андэ кадэя статья?

³ Андэ кадэя статья и дума жала пала кода, сар амэ, нэсовершэни мануша, можэм тэ сытювас лэ Дэвлэстар и тэ простисарас аврэн. Амэ уӷанаса атветоря пэ кацавэ вопросоря: Пала савэ бэзэха трэбуй тэ ԥэнас лэ старейшынонэнди? Васо о Иегова камэл, кай амэ тэ простисарас? Сости амэ можэм тэ сытювас лэ ԥралэндар и лэ ԥэяндар, савэнди андя ԥаримос, кай авэр стердэ бэзэх?

КАЛА О ХРИСТИАНИНО ТЕРЭЛ БАРО БЭЗЭХ

4. а) Со трэбуй тэ стерэл лэ Иеговаско служытелё, саво стердя баро бэзэх? б) Сави обязаность исин кай и старейшыноря?

⁴ Кала амэ уӷанас, кай варико стердя баро бэзэх, амэ трэбуй тэ росԥэнас пала када лэ старейшынонэнди. Пала кацавэ барэ ӷрехоря ԥэнэнпэ андэ 1 Коринфянам 6:9,10. Вся, со жал против лэ Дэвлэско законо и фартэ найдраго андэ лэстирэ яқа — када баро бэзэх. Важ када о мануш, саво стердя бэзэх, трэбуй тэ росԥэнэн пала када лэ Иеговасти и тэ мангэл помощь, кай и старейшыноря (Пс. 32:5; Иак. 5:14). Со тоди трэбуй тэ стерэн и ԥрала? Кати кай о Дэл исин власть полностью тэ простий о бэзэх блаӷодаря кодэлэсти, кай о Иисусо отдя пэстири жызняb. Но о Иегова аштярэл, кай и старейшыноря па Библия тэ прилэн ришэния, можэт ли кадэва мануш тэ ашэлпэ андэ собрания (1 Кор. 5:12). Вонэ трэбуй тэ дэн атветоря пэ кацавэ вопросоря: Спецыально о мануш стердя кадэва бэзэх? Гаравэлас во, кай стердя нэправильно? Сар долӷо во терэлас бэзэх? И само ӷлавно: со доԥэнэн, кай во каийпэ анда вся оди? Сыкавэл ли варисо, кай о Иегова простисардя лэс? (Деян. 3:19).

5. Васо и старейшыноря трэбуй тэ подэн дума кодэлэса, ко стердя бэзэх?

⁵ Со трэбуй тэ терэн и старейшыноря, кала дэн дума кодэлэса, ко стердя бэзэх? Вонэ трэбуй тэ прилэн кодэя жэ ришэния, сави ужэ приля о Иегова. Важ када вонэ мангэнпэ и стон бут зор, кай тэ полэн и библейски принцыпоря (Матф. 18:18). Сар када фэрий и собрания? Если о мануш на каийпэ, лэс исключина, и тоди во нэ сможэт тэ анэн вредо лэ Иеговастирэ служытелёнэнди (1 Кор. 5:6, 7, 11—13; Титу 3:10, 11). Но возможно, и старейшыноря смоӷут тэ поможын лэсти тэ каийпэ, и о Дэл лэс простия (Луки 5:32). Тоди и ԥрала помангэнапэ, кай лэстэ упалэ тэ авэл лащи дружба лэ Иеговаса (Иак. 5:15).

6. Можэт ли о Иегова тэ простий лэ манушэс, савэс исключисардэ анда собрания? Росԥэнэн.

⁶ Прецтавим, кай о мануш на каийпэ, кала и старейшыноря лэса дэн дума. Тоди лэс исключин анда собрания. Если во жыля против законо, саво исин андэ страна, и старейшыноря на лэна тэ фэрин лэс кодэлэстар, со лэс аштярэл. О Иегова домэкля, кай и власти тэ сындон любонэс, ко терэл о найлашимос, и нэважно, каийпэ во чи най (Рим. 13:4). Но если потом во загиндояпэ, анда вся оди каияпэ и парудёла, о Иегова радостяса простия лэс (Луки 15:17—24). Кадя авэла, дажэ если о бэзэх сас фартэ баро (2 Лет. 33:9, 12, 13; 1 Тим. 1:15).

7. Сар амэ можэм тэ простисарас кодэлэс, ко стердя бэзэх против амэндэ?

⁷ Драго по ди кодэлэстар, кай амэнди на трэбуй тэ ришаем пала Иегова, ашэл о мануш, кай лэс тэ простисарас чи най. И всаек дэсо амэ можэм тэ стерас. Со имено? Дажэ если о мануш на мангля амэндар прощения, амэ можэм лэс тэ простисарас и тэ старысавас тэ на холявас пэр лэстэ. Но чаче тэ ԥэнас, пэ када можэт тэ ужал бут время и зор, особено если амэн фартэ холярдэ. Акэ со ԥэнэнпэ андэ «Сторожэво башня» пала 15 сентябрё 1994 бэрш: «Кала амэ простисарас варикас, амэ на ԥандавас и яқа пэ лэско бэзэх. Кала о христианино простий, во доверяет лэ Иеговасти и отдэл вся андэ лэстирэ вас. О Дэл — праведно Сындомари всаворя люмако, и андэ пэстири время во стерэла, кай тэ авэл справедливость. Васо о Иегова камэл, кай амэ тэ простисарас и тэ отдас вся андэ лэстирэ вас?

ВАСО О ИЕГОВА КАМЭЛ, КАЙ АМЭ ТЭ ПРОСТИСАРАС

8. Сар амэ можэм тэ сыкавас пэстири блаӷодарность лэ Иеговасти, кай во жалуий амэн анда вся оди?

⁸ Кала амэ простисарас, амэ сыкавас, кай блаӷодарни лэ Иеговасти. Еқвар о Иисусо росԥэндя и притча. Во сыстосардя лэ Дэвлэс лэ царёса, саво простисардя лэ рабости баро вужылимос. Ай кодэва рабо на жалуисардя пэстирэ друӷос, саво лэсти сас вужыло пэ бутэстэ май набут (Матф. 18:23—35). Сости о Иисусо камля амэн тэ сытярэл? Если амэ па чачимастэ блаӷодарни, кай о Иегова жалуий амэн анда вся оди, амэ ласа тэ старысавас тэ простисарас аврэн (Пс. 103:9). Бут бэрша палпалэ андэ «Сторожэво башня» ԥэнэнаспэ: скати бы амэ тэ на простисарас аврэн, када никала на сыстояпэ кодэлэса, сар простий о Иегова через лэ Иисусостири жэртва.

9. Савэ манушэн жалуий о Иегова? (Матфея 6:14, 15).

⁹ Если амэ простисарас аврэн, о Иегова простия амэн. О Иегова жалуий кодэлэн, ко жалуий аврэн (Матф. 5:7; Иак. 2:13). О Иисусо шутя сама пэ кадэва гиндо, кала сытярэлас, сар трэбуй тэ мангаспэ. (Проадинон Матфея 6:14, 15.) Ай инке о Иегова май раньшэ ԥэндя пала када, кала дэлас дума лэ Иовоса. Кай кадэва праведно мануш фартэ дуқалас оди через и алава, савэ ԥэндэ о Элифазо, о Билдадо и о Цофаро. Но о Иегова ԥэндя лэ Иовости тэ мангэлпэ пала лэндэ. О Иово кадя и стердя, и о Дэл дя лэсти бут лашимос (Иов 42:8—10).

10. Васо можно тэ ԥэнас, кай амэ терас пэсти вэрыто, кала ритярас и холи? (Эфесянам 4:31, 32).

¹⁰ Кала ритярас и холи, амэ терас вэрыто корко пэсти. И холи можэт тэ авэл сар бар по ди, ай о Иегова камэл, кай амаро ди тэ лошавэл. (Проадинон Эфесянам 4:31, 32.) Андэ Библия ԥэнэнпэ: «Параш тэ холявэс и тэ вижас андар пэстэ» (Пс. 37:8). Када фартэ годявэрнэс, чаче ш? Если амэ на отшас пэстар и холи, кадэлэстар римойпэ амаро зор и ашэл найдраго по ди (Прит. 14:30). Тэ холявэс пэ варикастэ — када всаек, со тэ пэс о ядо и тэ надеиспэ, кай вэрыто авэла кодэлэсти, ко тут обидел. Вижал, кала амэ простисарас аврэн, када анэн амэнди кати о лашимос (Прит. 11:17). Амэнди ашэл май вушэро по ди, и амэн нисо на лэла тэ тердярэл андэ служэния лэ Иеговасти.

11. Со андэ Библия ԥэнэнпэ пала кода, кай тэ рин пала пэстэ? (Римлянам 12:19—21).

¹¹ Кати кай о Дэл исин право тэ рий. О Иегова на дя амэнди право тэ рисарас кодэлэсти, ко терэл амэнди вэрыто. (Проадинон Римлянам 12:19—21.) Через пэско нэсовершэнство, амэ нэ можэм тэ розлас и дила кадя драго, сар о Дэл (Евр. 4:13). Кадяжэ через и холи, амэ дэкала гиндосарас найгодявэрнэс. Най евья о Иегова ԥэндя лэ Иаковости тэ пистрой: «Манушэстэ, саво вижал андар пэстэ, на вижала тэ авэл лашо англа Дэл» (Иак. 1:20). Амэ можэм тэ патяс, кай о Иегова обязательно стерэла вся, кай тэ авэл справедливо.

12. Андар со дицол, кай амэ патяс андэ лэ Иеговастири справедливость?

¹² Кала амэ простисарас, амэ сыкавас, кай уверени андэ лэ Иеговастири справедливость. Васо амэ трэбуй тэ домэкас, кай о Иегова тэ сындой? Важ кода кай во обязательно улэла вся о ԥаримос, саво исин лэ бэзэхэстар. Андо раё пэ ԥув о Иегова стерэла кадя, кай амэндэ будэр на лэла тэ дуқал оди кодэлэстар, со сас. Андэ Библия ԥэнэнпэ: «Кода, со сас, на лэна тэ сэрэн и када на авэла по ди» (Ис. 65:17). Но вижала амэндэ тэ отшас пэстар и холи, кала амэнди стердэ бут найлашимос? Да. Давайте уӷанаса, сар аврэндэ вижыля када тэ стерэн.

ЛАШИМОС КОДЭЛЭСТАР, КАЙ ПРОСТИСАРАС

13, 14. Сости амэ сытювас анда кода, со росԥэндя о Энтони?

¹³ Бут амарэ ԥрала и ԥэя смоӷли тэ простин кодэлэн, ко андя лэнди ԥаримос. Сар о Иегова лэн блаӷословисардя?

¹⁴ Акэ со сас андэ жызня кай о Энтониc анда Филиппины. Кала во инке на сас лэ Иеговаско свидетелё, лэстирэ барэдэрэ ԥралэс умардя ек мануш, савэс ақарэнас Хосе. О Энтони сас фартэ холинако и камля тэ рий пала пэско ԥрал. Кодэлэ манушэс астардэ и стодэ андо бар. Кала во вижыля, о Энтони солахадя, кай виарақэла лэс и умарэла. Во дажэ тиндя пэсти марди. Но потом о Энтони уӷангля лэ Иеговастирэ свидетелёнэн. Акэ со во росԥэнэн: «Кала мэ лэм тэ изучаю и Библия, мэ полэм, кай манди трэбуй тэ парував пэско характеро и пэстири жызня. Вижал, мэ трэбуй сымас тэ отшав пэстар и холи». Кала прожыля и время, о Энтони болделя, ай тоди ашэля старейшына андэ собрания. Сар жэ во удивисайля, кала уӷангля, кай о Хосе тожэ ашэля лэ Иеговаско свидетелё. Кала вонэ диқлэпэ, вонэ анда вся оди облинэ ек еқэс, и о Энтони ԥэндя лэсти, кай простисардя лэс. Во росԥэнэн, кай кала во када стердя, лэстэ сас бари лош по ди. Акэ саво лашимос лэ Иеговастар!

15, 16. Сости амэ сытювас кай о Питеро и Сью?

¹⁵ Андо 1985 бэрш, кала о Питеро и Сью сас пэ собрания, андо Зало Царства тердяпэ баро взрыво. Сар потом уӷанглэ, котэ стодэ и бомба. Када халя ла ԥья зорэстар. Вой ля найдраго тэ диқэл и тэ ашунэл, и парашэля тэ чуствует о запахоd. О Питеро и Сью часто пушэнас пэстар: «Ко моӷ тэ стерэл кадя вэрыто?» Прожылэ бэрша, и кодэлэ манушэс астардэ и бэшардэ андо бар пэ вся и жызня. Кала кай о Питеро и Сью пушлэ, простисардэ вонэ кодэлэ манушэс чи най, акэ со вонэ ԥэндэ: «О Иегова сытярэл амэн тэ на ритярас и холи. Во сыкавэл, кай када можэт найдраго тэ влияет пэ амаро зор, по ди и пэ амари годи. Важ када амэ сразу лям тэ мангаспэ, кай о Иегова тэ поможый амэнди тэ отшас и холи, тэ бистрас и обида и тэ жувас дальшэ».

¹⁶ Но вушэро сас лэнди тэ простин? Най. Вонэ росԥэнэн: «Дэкала кай и Сью ашэл найдраго лэ зорэса. И тоди андрэ упалэ вся лэл тэ тирёл. Но амэ на домэкас, кай и холи тэ авэл андо ди, и важ када вой ӥто прожал. Амэ можэм анда вся оди тэ ԥэнас: если кодэва преступнико варикала ашэла амарэ ԥралэса, амэ аваса фартэ ради! Амэ полям, кай и библейски принцыпоря дэн амэнди чачуни свобода. И кадэя свобода пэ бутэстэ май бари, чем можно пэсти прецтавить. Амэнди кадяжэ придэл зор, кай о Иегова ӥто улэла вся о вредо и блаӷословия амэн».

17. Сости амэ сытювас кай и Мира?

¹⁷ Кала и Мира ля тэ изучает и Библия, вой сас миростэ и латэ сас дуй цынёне бэяцэ. Лако хулай на приля о чачимос. Через дэсави время во изменил лати и мэкля лэ ерес. Амари ԥэй росԥэнэн: «Кала о хулай жылятар, мандэ сас по ди кацаво жэ, со и бутэндэ, кас придинэ пашутнэ мануша. Манди на патяласпэ андэ када, мэ задиляйлэмас, холявавас, дошаляравас пэс и умэклэм и вас». Кай и Мира фартэ дуқалас оди, кай лако хулай придя ла. Вой ԥэнэн: «Када мучияс ман бут время, и мэ полэм, кай кадэлэстар римойпэ мэрни дружба лэ Иеговаса и аврэ манушэнца». И Мира смоӷла тэ отшол пэстар и холи и будэр на камэл, кай латирэ хуластэ тэ авэл варисо найдраго андэ жызня. Амари ԥэй дажэ надеийпэ, кай варикала во ашэла лэ Иеговаско служытелё. И Мира ля май бут тэ гиндой пала лашимос, саво авэла англэ, и акана довольно пэстиря жызняса. Латэ вижыля тэ поможый пэстирэ шавэнди тэ полюбин лэ Иеговас, и вонэ пэстирэ еренца тожэ служын лэсти.

О ИЕГОВА — САМО ЛАШО СЫНДОМАРИ

18. Андэр со амэ можэм тэ авас уверени, кала ӷанас, кай о Иегова — Само Баро Сындомари?

¹⁸ Сар дэ драго тэ ӷанас, кай амэнди на трэбуй тэ прилас кацавэ серьёзни ришэнии, кай тэ сындосарас лэ манушэн! Кадэва право исин кати кай о Само Баро Сындомари, кай о Дэл Иегова (Рим. 14:10—12). Амэ можэм тэ авас уверени, кай лэ Дэвлэстирэ ришэнии всегда авэна справедливи! (Быт. 18:25; 1 Цар. 8:32).

19. Со о Иегова, сар само лашо Сындомари, стерэла важ амэндэ англэ?

¹⁹ Амэ фартэ аштярас кодэя время, кала о Иегова улэла о бэзэх и о нэсовершэнство. Тоди во дэла амэнди лашо зор и стерэла, кай по ди тэ авэл драго. Амэ никала нэ вспомним, саво ԥаримос амэндэ сас андэ жызня (Пс. 72:12—14; Отк. 21:3, 4). Важ амэндэ фартэ куч, кай о Иегова ужэ акана поможый амэнди: во сыкавэл райкано примеро, кай амэ тэ простисарас аврэн.