Мэ диқлэм, сар и верни мануша шонпэ пэ шукарни витка, сави росцветий

Мэ розасаемпэ, мэ на ԥэндоп, кай мэрно друӷо шолпэ по верующё мануш. Важ када пушлэм: «Ай со ту ӷанэс пала Библия?» Во атветил манди най сразу. Во набут поаштярдя, ай тоди ԥэндя, кай лэстири дэй лэ Иеговаско Свидетелё и во латар дэсо уӷангля. Мэ ԥарувавас тэ уӷанав май бут и манглэм лэ друӷос, кай во тэ росԥэнэн манди.

Амэ лэ друӷоса дям дума почти вся и рят. Во росԥэндя, кай ла люмаса правий о Сатана и пала када ԥэнэнпэ андэ Библия (Иоан. 14:30). Возможно, тумэ пала када ӷанэн вся пэстири жызня, но мэ ашундэмас када пэрво разо. Када ман фартэ ля лэ одестар. И мануша вся и время ԥэнэнас, кай ла люмаса правий о Дэл и кай во добро и справедливо. Но мандэ када андо шэро на стидэласпэ, важ кода кай диқавас, со терэлпэ андэ люма. Хоть манди тоди сас кати 26 бэрш, андэ пэстири жызня мэ диқлэм бут со, состар манди сас фартэ ԥарэс.

Мэрно дад служыяс андэ халавдия, пэ сави ԥэнэн военно-воздушные силы андэ США. Важ када, кала мэ сымас бэято, мэ драго ӷанавас, кай исин ядерно уӷроза и кай и халавдэ андэ любо маменто ӷотови тэ тасавэн пэ кнопка. Кала мэ сытювавас андо коледжо андэ Калифорния, андо Вьетнамо жалас и война. Сар и бут мануша, мэ участвовал андэ студенчески протесторя. И рая розӷонинас амэн лэ дубинкэнца и шонас о ӷазо, саво фартэ халас и яқа, и через када амэ унашасастар. Када сас время, кала на полэс, со терэлпэ андо миро. Лэ манушэн анда политика умарэнас, сас митингоря и беспорядкоря. Бут мануша ԥэнэнас пэско гиндо, и сас фартэ ԥарэс тэ розлэспэ, со и сар тэ терэс.

Андо 1970 бэрш мэ лэм тэ терав бути пэ северно побережье пэ Аляска и затердэм барэ ловэ. Тоди мэ вуряйлэм андо Лондоно, тиндэм мотоцыкло и лаглэм по юӷо, кордэ, каринг и яқа диқэн. Через дэсавэ шона мэ долаглэм жы каринг и Африка. Па дром мэ диқлэмпэ манушэнца, савэ кадяжэ, сар и мэ, камэнас тэ унашэн лэ ԥаримастар, через саво вонэ нэ моӷли нормально тэ жувэн.

Да, андэ пэстири жызня мэ бут со диқлэмас. Важ када, кала анда Библия мэ уӷанглэм, кай пэ люма влияет и найлащи духовно создания, када манди бут со сыкадя. Ай со тоди терэл о Дэл? Манди камэласпэ тэ уӷанав.

Ӥто мэ арақлэм атвето. Потом мэ кадяжэ уӷанглэм и полюбисардэм бутэ манушэн, савэ андэ разни маменторя андэ пэстири жызня сыкадэ, кай вонэ верни еқэ чачунэ Дэвлэсти.

СЕВЕРНО ИРЛАНДИЯ: «ԤУВ, КАЙ БОМБЫ И ПУЛИ»

Сар мэ авелэм андо Лондоно, мэ манглэм мэрнэ друӷостиря да, кай вой тэ дэл манди и Библия. Ӷэт май интя мэ сымас андо Амстердамо. Еқварэс, кала сас ужэ тэмно, мэ адиносаравас и Библия пэ вулица паша фонарё, и када додиқля ек ԥрал. Во поможысардя манди май бут тэ уӷанав пала латэ. Посли када мэ лаглэм андо Дублино и виарақлэм ирландско филиало лэ Иеговастирэ свидетелёнэнго. Котэ мэ и познакомился еқэ ԥралэса, саво сас мудро и опытно. Лэс ақарэнас Артур Маттьюзо. Мэ манглэм лэс, кай тэ изучает манца и Библия, и во соӷласисайля.

Мэ лэ шэрэса ужылэм, кай тэ адиносарав и книжки и журналоря, савэ вимэкэн лэ Иеговастирэ свидетеля, ман када фартэ зацырдэлас. И канешно, мэ адиносаравас и Библия. Када анэнас манди бари лош по ди! Пэ собрании мэ диқавас, кай дажэ и бэяцэ ӷанэн атветоря пэ вопросоря, пала савэ и годявэрнэ мануша гиндон ужэ бут время: «Васо исин о найлашымос? Ко када о Дэл? Со терэлпэ посли смэрть?» Мэ давас дума кати лэ Свидетелёнэнца. Када сас най ԥарэс, важ кода кай андэ вся и страна мэ будэр никас на ӷанавас. Вонэ поможысардэ манди тэ полюбисарав лэ Иеговас и тэ закамав тэ андярав лэстири время.

Андо 1972 бэрш мэ болделэм. Через ек бэрш мэ лэм тэ служысарав сар общё пианеро андэ фартэ найбари собрания андэ Ньюри (Северно Ирлания). Мэ злэм цэр, саво тердёлас по плай. Пэ сосиднё мал пасынаспэ и гурувня. Англа лэндэ мэ лэм тэ репетирую пэстирэ речи. Здэласпэ, кай вонэ ман внимательно ашунэнас, пока чамбэнас и чар. Канешно, вонэ нэ моӷли тэ дэн манди совето, но блаӷодаря кадэлэсти мэ сытелэм тэ диқав пэ кодэла, кас сытярав. Андо 1974 бэрш ман назначили тэ служысарав сар спецыально пианеро. Мэрно напарнико сас Найджело Питто, саво ашэля мэрно друӷо пэ вся и жызня.

Андэ кодэя время андэ Северно Ирландия сас нэспокойно. Варико дажэ ԥэндя, кай када «ԥув, кай бомбы и пули». Сар кабута кадя и трэбуй, пэ вулицы и мануша умарэнаспэ, стидэнаспэ и снайпероря, сас перестрелки и зорвинас и машыны. Проблемы сас сар андэ политика, кадя жэ и андэ религии. Но и протестанторя, и католикоря ӷанэнас, кай лэ Иеговастирэ свидетеля на лэна тэ участвуют андэ политика. Важ када амэ моӷли тэ росԥэнас важ о Дэл свободно и тэ на дарас, кай и мануша обжанапэ амэнца найдраго. Лэ цэрэндирэ хула́я, савэнди амэ росԥэнасас важ о Дэл, ӷанэнас, кала и кай андо форо можэт тэ залэлпэ упалэ кацави бида. Вонэ амэнди пала када ԥэнэнас, кай амэ кордэ тэ на жас.

Но всаек опасни ситуацыи сас. Еқвар манца сас о Денисо Карригано, саво тожэ служыяс пианероса. Амэ проповедовали андо сосиднё форицэ, кай на сас лэ Свидетелёнэн. Раньшэ амэ самас котэ кати ек разо. Котэ ек жувли хохадя пар мэндэ, кай амэ британски халавдэ, савэ притердэпэ простонэ манушэнца. Наверно, вой кадя погиндосардя, важ кода кай андэ амари дума на ашундёлас о ирландско акцэнто. Через када амэ лям фартэ тэ пэрэжываем. Андэ кодэя время, дажэ если о мануш просто драго обжаласпэ лэ халавдэнца, лэс моӷли тэ умарэн или тэ прострелин лэсти и чанг. Пока аштярасас о автобусо пэ остановка и поӷосавасас, амэ додиқлям, сар каринг и кафэ, кай сас кодэя жувли, подлагля и машына. Вой вижыля и ля тэ дэл дума дуе муршэнца, савэ бэшэнас андэ машына, и сыкавэлас пар мэндэ. Тоди вонэ подлаглэ каринг амэндэ и линэ тэ роспушэн, сар ԥирэл о автобусо. Кала авеля о автобусо, вонэ подинэ дума лэ водителёса, но амэ на ашундям лэндири дума. Аврэ манушэн андо автобусо на сас, важ када амэ погиндосардям, кай кала виладаса анда форо, вонэ амэн умарэна. Но кадя на тердяпэ. Кала амэ вижасас анда автобусо, мэ пушлэм кай о водителё: «Кодэла мурш... пушэнас пала амэндэ?» Во ԥэндя: «Мэ ӷанав, ко тумэ, и ԥэндэм пала када лэнди. Нэ пэрэжывайте. Вся авэла драго, вонэ нисо на стерэна».

Андо 1976 бэрш пэ областно канӷрэсоa андо Дублино мэ встретил еқа ԥья анда Англия, сави служыяс сар спецыально пианеро. Ла ақарэнас Полина Ломакс. Вой сас духовно, сэжо и шукарни. Вой и лако ԥрал Рэё ӷанэнас и истина вся пэстири жызня. Через ек бэрш амэ ла Полинаса пожэнисайлям и ужэ вмести лям тэ служысарас сар спецыальни пианероря андо Баллими́но, андэ Северно Ирландия.

Варисави время амэ самас андэ раёно служэния и поможысарас лэ ԥралэнди андо Бэ́лфасто, Лондонде́рри и андэ авэр опасни ҭана. Амэн фартэ лэлас лэ одестар лэ ԥралэндири и лэ ԥэяндири вера. Кай тэ служын лэ Дэвлэсти, вонэ ашавэнас кода, андэр со патянас, парашэнас найдраго тэ гиндон пала авэр и улэнас и холи. Дицолас, кай о Иегова блаӷословияс лэн и фэрияс.

Мэ прожудэм андэ Ирландия 10 лет. Тоди андо 1981 бэрш амэн ла хулаяса ақардэ андо 72 класо Школы Галаад. Посли латэ амэн назначили андэ Сьерра-Леоне (Западно Африка).

СЬЕРРА-ЛЕОНЕ: ЧОРОРЭ, НО ВЕРНИ

Андо мисианерско цэр амэнца жувэнас 11 розлашэ ԥрала и ԥэя. Амэндэ сас общё кухня, трин туалеторя, дуй душоря, телефоно, стирально машынка и сушылка. Часто моӷли нэожыдано тэ мударэн о вудуд. По чердако беӷийнас и крысы, ай андо подвало сас сапа.

Хоть и условия андэ жызня сас най идеальни, и служэния анэнас амэнди радость. И мануша стонас патив пэ Библия и внимательно ашунэнас. Бут линэ тэ изучают и прилинэ о чачимос. Катутнэ мануша ԥэнэнас пэр мандэ «ӷосподин Роберто», ай пэ Полина «ӷоспожа Роберто». Чаче тэ ԥэнав, через дэсави время мэ лэм май ридко тэ проповедую, важ кода кай сас бут бути андо филиало. Тоди и мануша линэ тэ ԥэнэн пэ Полина «ӷоспожа Полина», ай пэр мандэ «ӷосподин Полина». Ла Полинати када фартэ чалёлас!

Бут ԥрала жувэнас чорорэс. Но о Иегова всегда заботияспэ пала лэндэ, и дэкала фартэ нэожыдано (Матф. 6:33). Сэрав пала ек ԥэй. Латэ ашэлэпэ и ловэ кати пэ кода, кай тэ тинэл тэ хан пэсти и пэстирэ бэятонэнди. Но вой отдя лэн лэ ԥралэсти, савэстэ сас насвалимос малярия, кай во тэ тинэл пэсти о драб. И кати погиндон: андэ кодэва жэ дес каринг латэ нэожыдано авеля ек жувли и мангля, кай вой тэ подшынэл лати и бал. Вижыля кай ла ԥьятэ появисайлэ и ловэ. Кацавэ ситуацыи терэнаспэ фартэ часто.

НИГЕРИЯ: УӶАНАС И НЭВИ КУЛЬТУРА

Амэ прослужысардям андэ Сьерра-Леоне девять лет. Тоди амэн пэрэандярдэ андо Вефилё андэ Нигерия. Када сас баро филиало. Мэ теравас кодэя жэ бути, сави мандэ сас андэ Сьерра-Леоне. Но важ и Полина бут со паруделя, и лати када сас найвушэро. Вой присытеля кажно шон тэ проповедует по 130 часов, и мануша, савэнца вой изучала и Библия, барёнас духовно. Ай катэ ла назначили андо швейно мастерско, котэ вой десэнца подсувэлас и йда. Лати трэбуй сас дэсави время, кай тэ присытёл каринг када. Но вой ля тэ полэл, кай и ԥрала и ԥэя фартэ цэнин латири бути, и тоди вой май бут ля тэ шол сама пэ кода, кай тэ подритярэл аврэ вефильцонэн.

И культура андэ Нигерия сас важ амэндэ нэобычно, амэнди трэбуй сас бутэсти тэ сытювас. Еқвар каринг мандэ андо офисо зажыля о ԥрал, кай тэ познакомит ла ԥьяса. Ла кати ақардэ тэ служый андо Вефилё. Кала мэ ущелэм, кай тэ дав лати о вас, вой пэля каринг мэрнэ пэрнэ. Мэ сымас в шоке! Мэ сразу вспомнил пала дуй случаёря анда Библия, савэ пистромэ андэ Деяния 10:25, 26 и Откровения 19:10. Мэ погиндосардэм: «Можэт тэ ԥэнав лати, кай вой тэ на терэл кадя?» Андэ кодэя жэ время мэ полавас, кай если ла ақардэ андо Вефилё, тоди вижал вой ӷанэн, сости сытярэл и Библия.

Вся и время пока амэ ласа дасас дума, манди сас нэудобно. Мэ пэрэжывал, и важ када посли проандярдэм иследования. Мэ уӷанглэм, кай и ԥэй тердя кадя, сар сас принято андэ латири культура, сави инке сас андэ дэсавэ ҭана андэ страна. Лэндэ сас принято, кай кадя тэ терэн и мурша, и жувля. Кадэлэса вонэ на сыкавэнас, кай тэлён лэ манушэсти, ай сыкавэнас, кай стон бари патив пэр лэстэ. И дажэ андэ Библия росԥэнэнпэ пала кацавэ случаёря (1 Сам. 24:8). Мэ сымас лошало, кай нисо на ԥэндэм ла ԥьяти и на лажавардэм ла.

Амэ познакомились разнонэ ԥралэнца и ԥэянца андэ Нигерия, савэ бут бэрша сыкавэнас пэстири верность лэ Дэвлэсти. Акэ история лэ ԥралэсти, савэс ақарэн Айзая Адагбоноb. Во уӷангля о чачимос андэ тэрнэ бэрша, но прожыля и время и лэстэ арақлэ проказа. Лэс одбишалдэ андо спецыально ҭан, кай жувэн и прокажони. Котэ кроме лэстэ будэр на сас лэ Свидетелёнэн. Хоть най всаворэнди чалёлас, со во росԥэнэн, блаӷодаря лэсти май бут чем 30 прокажони прилинэ о чачимос. И во дажэ арӷанизовал андэ кодэва ҭан, кай вонэ жувэнас, и собрания.

КЕНИЯ: И ԤРАЛА СЫКАВЭН ТЕРПЕНИЯ КАРИНГ МАНДЭ

Андо 1996 бэрш амэн назначили андо филиало андэ Кения. Мэ на сымас андэ кадэя страна посли кодэя дума, пала сави мэ ԥэндэм май данглал. Амэ жувасас андо Вефилё. Котэ, часто сар ӷостёря, авэнас цынёне зэлэни обезьянки, пэ савэ ԥэнэн верветки. Если варисави ԥэй анэнас и фрукты, вонэ ла «обчорэнас». Еқвар и ԥэй андо Вефилё бистэрдя тэ ԥандавэл и фэлястры. Ай кала рисайля, вой додиқля, кай латэ андэ комната бэшэн бут обезьянки и зумавэн лако хамос. И ԥэй зацыписайля и унашлятар котар, ай и обезьянки тожэ зацыписайлэ и занашлэтар.

Амэ ла Полинаса лям тэ ԥирас андэ собрания пэ шыб суахили. Ӷэт май интя манди динэ тэ проандярав и книӷаизучения (акана амэ ԥэнас пэ када изучения Библии андэ собрания). Но мэ най драго ӷанавас кодэя шыб. Канешно мэ ӷотовился и важ када моӷ тэ проадиносарав о вопросо, но если и атветоря сас най кацавэ, сар пистромэ андо абзацо, мэ лэн на полавас. Ԥэнаса ворта, и ситуацыя найвушэро! Манди сас жалко лэ ԥралэн и лэ ԥэян. Мэ фартэ удивисайлэм кодэлэсти, сар вонэ обжанаспэ манца. Вонэ терпеливо и смирено диқэнас пэ кода, кай кадэя встреча динэ тэ проандярав манди.

США: ВЕРНОСТЬ, ХОТЬ ИСИН ВОЗМОЖНОСТЬ ТЭ БАРВАДЁС

Амэ на жудям андэ Кения дажэ ек бэрш. Андо 1997 бэрш амэн ақардэ андо Вефилё андо Бруклино (Нью-Йорк). Акана амэ жувасас андэ барвали страна, кай через о мищимос лэ манушэндэ исин бут ԥаримос (Прит. 30:8, 9). Но дажэ катэ и ԥрала и ԥэя сыкавэн пэстири састи вера. Вонэ отдэн пэстири время и ловэ най кай тэ розбарвадён, ай кай тэ подритярэн и дила, сави терэл лэ Иеговастири арӷанизацыя.

Важ пэстири жызня амэ диқлям, сар и ԥрала и ԥэя сыкавэн пэстири верность андэ разни ситуацыи. Андэ Ирландия — верность, хоть и исин жэстокость. Андэ Африка — верность андэ кодэла ҭана, кай нинай лэ свидетелёнэн и котэ, кай исин чорымос. Андэ США — верность, хоть и исин возможность тэ барвадёс. Сар радуийпэ о Иегова, кала диқэл пэ мануша, савэ любин лэс со бы тэ на авэл андэ жызня!

И бэрша «нашэн май ӥто, чем о челноко» (Иов 7:6). Акана амэ служысарас андэ всемирно ӷлавно управления андэ Уорвико. Амэ радосавас, кай терас ек дила лэ манушэнца, савэ па чачимастэ любин ек еқэс. Амэ бахталэ и лошалэ, кай можэм тэ терас кода, со па амаро зор, кай тэ подритярас амарэ Царёс, лэ Иисусос Христос, саво ӥто блаӷословия бутэ манушэн, савэ ашэлэпэ лэсти верни (Матф. 25:34).