Мэк тумари любовь ашэл май бари

1. Ко поможысардя тэ стидэн и собрания андэ Филиппы?

КАЛА о апостоло Павло, о Сила, о Лука и о Тимофеё авелэ андо римско форо Филиппы, вонэ додиқлэ, кай котэ жувэн бут мануша, савэ камэнас тэ ашунэн и весть пала Царство. Кадэла штар ԥрала, савэндэ ԥаболас оди тэ терэн май бут дила, поможысардэ тэ стидэн и собрания. И катутнэ ученикоря линэ тэ стидэнпэ вмести, файма, андо цэр кай и Лидия, сави прилэлас лэ манушэн анда вся оди (Деяния 16:40).

2. Саво ԥаримос йто ашэля кай и филиппийско собрания?

² Прожыля набут время и кай и нэви собрания ашэля ԥаримос. О Сатана стердя кадя, кай кодэла, ко вэрыцыяс о чачимос, линэ тэ ӷонин лэ христианонэн, савэ на парашэнас тэ росԥэнэн и лащи весть пала Царство. Лэ Павлос и лэ Силас залинэ и мардэ лэ хворостинэнца и бэшардэ андо баруно. Посли кода, сар вонэ вижылэ, вонэ авелэ каринг и нэвэ ученикоря и подритярдэ лэн. Потом о Павло, о Сила и о Тимофеё ужылэ анда Филиппы, ай о Лука, файма, ашэляпэ андо форо. Со тердяпэ кадэла собранияса май дур? Через лэ Иеговаско свынто духо и нэвэ ԥрала и ԥэя на парашэнас май бут тэ терэн андэ служэния лэ Иеговасти (Филиппийцам 2:12). Кай о Павло сас, васо андэр лэндэ тэ абурой!

3. Пала со мангэласпэ о Павло, сар пистромэ андэ Филиппийцам 1:9—11?

³ Варикай дэш бэрш палпалэ о Павло пистросардя о письмо андэ филиппийско собрания. Кала адиносарас кадэва письмо дицол, сар о Павло фартэ любий пэстирэ ԥралэн и лэ ԥэян, савэ патян лэса андо ек Дэл. Во пистросардя лэнди: «Мэ скучисарав пала тумэндэ всаворэндэ, и мандэ андо ди кацави жэ любовь, сар кай о Христос» (Филиппийцам 1:8). О Павло кадяжэ ԥэндя, кай мангэлпэ пала лэндэ, кай о Иегова тэ поможый, кай лэндэ тэ авэл инке май бари любовь. Инке, кай вонэ тэ уӷанэн, со трэбуй май фартэ, и тэ авэн вужэ англа лэ Дэвлэстирэ яқа, и тэ на змарэн аврэн па правильно дром, и тэ анэн лашэ плодоря. Тумэ, канешно, соӷласинапэ, кай лэ Павлостирэ алава анда оди, моӷут бутэсти амэн тэ сытярэн. (Адиносар Филиппийцам 1:9—11b.) Давайте май драго роздиқаса кадэла алава и погиндосараса, сар кадя тэ терас.

МАЙ ФАРТЭ ЛЮБИН

4. а) Сар о Иегова сыкадя, кай фартэ любий амэн, сар пистромэ андэ 1 Иоанна 4:9, 10? б) Сави дэ бари амари любовь трэбуй тэ авэл каринг о Дэл?

⁴ О Иегова сыкадя, кай фартэ любий амэн, кала бишалдя пэ ԥув пэстирэ Шавэс, кай во тэ отдэл и жызня пала амарэ ӷрехоря. (Адиносар 1 Иоанна 4:9, 10c.) Через кода, кай о Дэл любий амэн, амэнди тожэ камэлпэ тэ любисарас лэс (Римлянам 5:8). Сави дэ бари трэбуй тэ авэл амари любовь? Тэ полас када поможына лэ Иисусостирэ алава, савэ во ԥэндя лэ фарисеёнэнди: «Любисар пэстирэ Дэвлэс лэ Иеговас всаворэ одеса, всаворя жызняса, всаворя годяса» (Матфея 22:36, 37). Да, амэ камас всаворэ одеса тэ любисарас лэ Дэвлэс. Кадяжэ амэ камас, кай амари любовь дес десэстар тэ ашэл май бари. О Павло пистросардя лэ филиппийцонэнди, кай лэндири любовь трэбуй тэ ашэл «со май бари и май бари». Со поможыя амэнди май фартэ тэ любисарас лэ Дэвлэс?

5. Со тэ терас, кай май фартэ тэ любисарас лэ Дэвлэс?

⁵ Кай тэ любисарас лэ Дэвлэс, спэрва трэбуй тэ уӷанас лэс. Андэ Библия пистромэ: «Ко на любий, кодэва на уӷангля лэ Дэвлэс, важ кода кай о Дэл исин любовь» (1 Иоанна 4:8). О апостоло Павло росԥэндя, кай амари любовь ашэла май бари кодэлэстар, кала амэ май бут уӷанас о чачимос пала Дэл и полас, сар во диқэл пэ разни вопросоря (Филиппийцам 1:9). Кала амэ кати лям тэ сытювас па Библия, амэ набут ӷанасас важ о Дэл, но и тоди амэ ужэ лям тэ любисарас лэс. И со май бут уӷанасас пала о Иегова, со май бари ашэлас амари любовь каринг лэстэ. Акэ, васо кадя важно вся и время тэ сытювас па Библия и тэ гиндосарас пала кода, сости сытелям (Филиппийцам 2:16).

6. Со инке амэнди трэбуй, кай амари любовь тэ ашэл май бари, сар пистромэ андэ 1 Иоанна 4:11, 20, 21?

⁶ Через кода, кай полас, кай о Дэл фартэ любий амэн, амэ камас тэ любисарас лэ ԥралэн и лэ ԥэян. (Адиносар 1 Иоанна 4:11d, 20, 21e.) Можэт амэ гиндосарас, кай тэ любисарас лэ ԥралэн и лэ ԥэян авэла вушэро, важ кода кай амэ служысарас лэ Иеговасти и камас, кай амэндэ тэ авэн кацавэ жэ качестворя сар лэстэ. Кадяжэ амэ сытювас лэ Иисусостар, саво любий амэн кадя фартэ, кай отдя пэстири жызня важ амэндэ. И всаек амэнди дэкала найвушэро тэ ритярас о законо тэ любисарас ек еқэс. Сэрэн, со тердяпэ андэ собрания андэ Филиппы?

7. Сости амэн сытярэл лэ Павлоско совето, саво во дя ла Еводияти и ла Синтихияти?

⁷ Кай и Еводия и Синтихия ԥаболас оди тэ служын лэ Дэвлэсти. Вонэ служынас вмести лэ Павлоса. Но сас кадя, кай вонэ спорисайлэ, важ кода кай лэндэ сас разно характеро. Андэ пэско письмо о Павло пистросардя ла собранияти, андэ сави служынас Еводия и Синтихия. Во фартэ шутя сама пэ кадэла дуй ԥэя и ворта дя совето, кай тэ на парашэн «тэ гиндон еқэндар» (Филиппийцам 4:2, 3). О Павло ришыл, кай трэбуй сас тэ пистрой всаворэнди андэ собрания: «Терэн вся би холяко и би спороско» (Филиппийцам 2:14). Можно тэ патяс, кай кадэла советоря, савэ ԥэндэ ворта, поможысардэ, най кати ла Еводияти и ла Синтихияти. Кадяжэ вонэ поможысардэ и аврэ ԥралэнди и ԥэянди андэ Филиппы тэ любин май фартэ ек еқэс.

8. Васо амэнди дэкала ԥарэс тэ любисарас лэ ԥралэн и лэ ԥэян и сар тэ улас кода, со на домэкэл тэ любисарас лэн?

⁸ Амэнди, сар ла Еводияти и ла Синтихияти, можэт тэ авэл ԥарэс тэ любисарас лэ ԥралэн и лэ ԥэян, важ кода кай май бут шас сама пэ кода, кала и мануша терэн варисо най кадя. Всаворэ амэ кажно дес терас варисо най кадя. Если амэ нащи вишас анда шэро аврэндирэ ошыбки, тоди амэ лэн най кадя ласа тэ любисарас. Ԥэнаса, варисаво ԥрал бистэрдя, кай трэбуй сас тэ дэл помощь тэ прилас андо зало, кай тидэнпэ лэ Иеговастирэ свидетеля, и амэ пэр лэстэ холяйлям. Если тэ сэрас ек лэстирэ ошыбки, амари холи лэла кати тэ ашэл май бари, ай и любовь тэ ужал. Сас тумэнца варисо кацаво? Тоди погиндон акэ пала со. О Иегова диқэл, со амэ терас най кадя, и кадяжэ диқэл, со терэл най кадя кадэва ԥрал. Но всаек о Дэл на парашэл тэ любий амэн и лэс. Важ када амэнди трэбуй тэ сытювас кай о Иегова, тэ диқас андэ мануша ек о лашимос. Если амэ стас вся о зор и старысавас тэ любисарас лэ ԥралэн и лэ ԥэян, тоди амэ ласа тэ гиндосарас еқэндар (Филиппийцам 2:1, 2).

«КОДА, СО МАЙ ФАРТЭ ТРЭБУЙ»

9. Со камля тэ ԥэнэн о Павло лэ филиппийцонэнди кадэлэ алавэнца «со май фартэ трэбуй»?

⁹ Через о Павло о Дэл сыкадя лэ ԥралэнди и лэ ԥэянди, савэ жувэнас андэ Филиппы, ай кадяжэ всаворэ аврэ христианонэнди тэ уӷанэн, «со май фартэ трэбуй» (Филиппийцам 1:10). Со ужал андэ кадэла алава «со май фартэ трэбуй»? Када, кай лэ Иеговаско алав тэ авэл свынто, тэ терас лэстири дила, тэ подритярас, кай тэ авэл ладо и тэ гиндосарас, сар ек андэ собрания (Матфея 6:9, 10; Иоанна 13:35). Если када само ӷлавно андэ амари жызня, тоди амэ па чачимастэ любисарас лэ Иеговас.

10. Со трэбуй тэ терас, кай тэ авас вужэ англа Дэл?

¹⁰ О Павло кадяжэ ԥэндя, кай амэнди трэбуй тэ авас вужэ англа Дэл. Кай тэ авас вужэ англа лэ Дэвлэстирэ яқа, када на сыкавэл, кай трэбуй тэ авас совершэни. Амэ нэ можэм тэ авас кацавэ вужэ сар о Иегова. Но англа лэ Иеговастирэ яқа аваса вужэ, если амэ тераса вся, кай амари любовь тэ ашэл май бари, и тэ уӷанас, со май фартэ трэбуй. И ек, сар тэ сыкавас амари любовь каринг и ԥрала и ԥэя, када, кай тэ на змарас лэн па правильно дром.

11. Васо нащи тэ змарэс аврэн па правильно дром?

¹¹ Никас на змарэн па правильно дром. Пэ кадэла алава фартэ трэбуй тэ шас сама. Через со авэр моӷут тэ змардён па правильно дром? Кода, савэ амэ витидас развличении, сави пар мэндэ йда и дажэ, сави амэндэ бути. Можэт дажэ андэ кода, со амэ витидас нинай нисо вэрыто. Но если через кода, со амэ витидям, варикас хал и совесть, тоди када фартэ найдраго. Па лэ Иисусостирэ алава, кодэва, ко змарэл лэстирэ бакрорэн па правильно дром, лэсти фэдэр авелоп тэ амблавэн бар пэ кор и тэ шон лэс андэ моря (Матфея 18:6).

12. Сости амэ сытювас кай пианероря?

¹² Диқам, сар ек хулай пэстиря хулаяса, савэ служынас пианеронэнца, тердэ кадя, сар ԥэндя о Иисусо. Вонэ служынас андэ собрания, андэ сави найдэлмут болделя ек ери. Кадэла мануша барёнас андэ кацавэ еря, кай вся строӷо, и бут со нащи сас тэ терэн. Вонэ гиндонас, кай лэ христианонэнди нащи тэ ԥирэн андо кино. Дажэ пэ кодэва кино, кай нинай нисо вэрыто. Вонэ фартэ удивисайлэ, сар када кадя, кай и пианероря жылэ андо кино. Тоди и пианероря ришыли будэр тэ на жан андо кинотеатро, пока кадэлэ ерестири совесть май драго уӷанэна, со лашо, ай со най (Евреям 5:14). Вонэ тердэ кадэва лашимос, важ кода кай на гиндонас пала пэстэ, ай гиндонас пала кадэва ери. Лэндири любовь сас най кати пэ алава, но и пэ дила (Римлянам 14:19—21; 1 Иоанна 3:18).

13. Сар можэт найспецыально тэ вижал, кай о мануш тэ стерэл бэзэх?

¹³ Дэкала амэ можэм найспецыально тэ змарас аврэн па правильно дром, кай тэ терэн бэзэх. Сар када можэт тэ авэл? Ԥэнаса, о мануш ля тэ сытёл па Библия, во бут зор стодя, кай тэ мэкэл тэ пэл. Во полэл, кай лэсти нащи дажэ набут тэ пэл. Кай кадэва мануш ашэля састи вера и во болделя. Прожыля варисави время и лэс ақарэл авэр христианино пэстэ цэрэ тэ побэшэн, и заставий лэс тэ пэл. Анда вся оди во ԥэнэн: «Ту акана болдо и о свынто духо тути трэбуй тэ дэл зор тэ ритярэс пэс андэ вас. И ту можэш набут тэ пэс, скати цырдэл тиро ди». Кати погиндон, со авелоп кадэлэ нэвэ ԥралэса, если во тэ канглоп!

14. Сар амэ сытювас пэ амарэ христиански собрании тэ терас кадя, сар пистромэ андэ Филиппийцам 1:10?

¹⁴ Амэ сытювас пэ амарэ христиански собрании тэ терас кадя, сар пистромэ андэ Филиппийцам 1:10. Сар? Пэрво, пэ собрании амэ бут сости сытювас, и полас, со важ о Иегова май важно. Дуйто, амэ терас кадя, со сытелям, кай тэ авас вужэ англа лэ Дэвлэстирэ яқа. Трито, пэ собрании амэн сытярэн тэ любисарас и тэ терас лашимос (Евреям 10:24, 25). Со май бут амэн подритярэн и ԥрала, со май бут амэ любисарас лэн и амарэ Дэвлэс. Если амэндэ исин любовь каринг о Дэл и каринг и ԥрала, амэ стаса вся о зор, кай тэ на авас важ авэр кацавэ, через кастэ моӷут тэ змардён па правильно дром.

НА ПАРАШЭН ТЭ АНЭН «ЛАШЭ ПЛОДОРЯ»

15. Со када тэ анэс «лашэ плодоря»?

¹⁵ О Павло анда вся оди мангэласпэ, кай лэ христианонэндэ андэ Филиппы «тэ авэн... ԥэрдо лашэ плодоря» (Филиппийцам 1:11). Андэ кадэла плодоря, ужанас любовь каринг о Иегова и каринг лэско народо, ай кадяжэ кода, кай вонэ росԥэнэнас аврэнди пала пэстири вера андо Иисусо и пала лашимос, саво авэла англэ. Андэ Филиппийцам 2:15 исин инке ек соса во лэн сыстосардя. Котэ пистромэ: «Тумэ светин, сар свето андэ люма». Амэ трэбуй тэ на бистрас лэ Христостирэ алава, савэ во ԥэндя пэстирэ учениконэнди: «Тумэ свето андэ люма» (Матфея 5:14—16). Во кадяжэ приԥэндя пэстирэ учениконэнди тэ жан и тэ сытярэн лэ манушэн, кай вонэ тэ авэн ученикоря и тэ росԥэнэн важ лэстэ жы кай «само дурутнэ ҭана пэ ԥув» (Матфея 28:18—20; Деяния 1:8). Амэ анас «лашэ плодоря», если стас вся пэско зор андэ кадэя важно дила.

16. Сар и алава анда Филиппийцам 1:12—14 сыкавэн, кай тэ светис «сар свето андэ люма», можно дажэ, кала ԥарэс? (Диқэн и картинка пэ обложка.)

¹⁶ Амэ можэм тэ светисарас, «сар свето андэ люма», со бы тэ на авэл андэ амари жызня. Дэкала кода, со амэн на домэкэл тэ росԥэнас и весть, наоборот поможый. Сэрэн, со сас лэ апостолоса Павлоса. Во пистрояс письмо лэ филиппийцонэнди, кала сас тала домашнё аресто андо Римо. Но и цэпоря на уритярэнас лэс кодэлэстар, кай тэ на росԥэнэн и лащи весть лэ халавдэнди и кодэлэнди, ко лэстэ авэлас. Андэ кадэя ԥари время о Павло анда вся оди служыяс, и када дэлас лэ ԥралэнди о зор и смилость, кай и вонэ тэ на даран тэ росԥэнэн, со пистромэ андэ Писания. (Адиносар Филиппийцам 1:12—14f; 4:22.)

17. Росԥэнэн, сар и ԥрала на парашэн тэ росԥэнэн важ о Дэл, дажэ кала исин кода, со на домэкэл.

¹⁷ Бут ԥрала и ԥэя, кацавэ жэ смили, сар и о Павло. Хоть вонэ жувэн андэ страны, кай вольно на росԥэнэн важ о Дэл, ай кадяжэ и па цэра, када лэн всаек на тердярэл. Вонэ всаек родэн, кай и сар тэ росԥэнэн и лащи весть (Матфея 10:16—20). Андэ ек кацави страна о раёно надзирателё подԥэндя лэ вазвещятелёнэнди, кай лэнго участко тэ авэл лэнго родо, сосидоря, каса сытён андэ школа, каса терэн бути, чи просто, кас ӷанэн. Важ и дуй бэрша андэ кадэва раёно и собрании ашэлэ пэ бутэстэ май бут. Можэт котэ, кай амэ жувас пэ амари дила инке нинай запрето. Но амэ всаек можэм лэндар тэ сытювас. Амэнди трэбуй вся и время тэ виарақас, кай и сар май бут тэ служысарас и тэ патяс, кай о Иегова дэла зор тэ виритярас любо ԥаримос (Филиппийцам 2:13).

18. Со амэнди трэбуй тэ терас?

¹⁸ Акана амэнди со май фартэ трэбуй тэ приашундювас каринг лэ Павлостирэ алава, савэ во пистросардя андо письмо лэ филиппийцонэнди. На бистрам, со трэбуй тэ авэл важ амэндэ май важно. Кадяжэ на бистрам, кай трэбуй тэ авас вужэ англа Дэл, тэ на авас кацавэ, кай через амэндэ варико тэ змардёл па правильно дром и тэ анас лашэ плодоря. Тоди амари любовь ашэла со май бари и май бари, и амэ ласа тэ прослявляем амарэ Дадэс лэ Иеговас, саво заботийпэ пала амэндэ.