«Амэ на умэкас и вас»!

1. Со трэбуй тэ терэн и христианоря, кай тэ допрастэн до конца, кай лэндэ тэ авэл и вечно жызня?

И ХРИСТИАНОРЯ, ԥэнэса, прастэн па дром, кай лэндэ тэ авэл и вечно жызня. Варико ля тэ прастэл найдэлмут, ай варико прастэл ужэ бут бэрша. Но всаворэнди амэнди фартэ трэбуй тэ допрастас до конца. Кода, со ԥэндясас о апостоло Павло лэ христианонэнди андэ Филиппы, дэла амэнди зор тэ допрастас до конца. Дэсавэ мануша анда филиппийско собрания, андэ пэрво вико ужэ дэсави время служынас лэ Иеговасти. Вонэ прастэнас драго. Но о Павло ԥэндя лэнди, кай вонэ трэбуй тэ на парашэн тэ прастэн, саво бы ԥаримос тэ на авэл. Во камэлас, кай вонэ и май дур лэстар тэ сытён и анда вся зор тэ домардён кода, каринг со прастэн (Филиппийцам 3:14).

2. Васо кода, со о Павло ԥэндя лэ филиппийцонэнди, сас ԥэндо тоди, кала трэбуй?

² И алава, савэ о Павло ԥэндя лэ филиппийцонэнди, сас ԥэндэ, кала трэбуй. Кала ашэля филиппийско собрания, лэн линэ тэ ӷонин. Вся заляпэ кодэлэстар, кала варикай андо 50 бэрш лэ И. Х., о Павло и о Сила жылэ тэ терэн и дила, сави дя лэнди о Дэл андэ Македония и андэ Филиппы (Деяния 16:9). Котэ вонэ диқлэ манушня, савя ақарэн Лидия, сави лэн виашундя. «О Иегова ԥэрнадя лако ди», и вой приля лащи весть (Деяния 16:14). Прожыля набут время, вой и кодэла, ко жувэнас андэ лако цэр, болделэ. Но о Бэнг на хасарэлас евья и время. И мануша линэ лэ Павлос и лэ Силас, андярдэ каринг о форицко правителё и хохадэ пэр лэндэ, кай вонэ никасти на дэн покоё. Лэн мардэ, бэшардэ андо баруно, ай посли када приԥэндэ тэ вижан анда форо (Деяния 16:16—40). Но вонэ всаек на умэклэ и вас. Ай со можно тэ ԥэнас пала ԥрала и ԥэя андэ нэви собрания? Вонэ кадяжэ на сдэнаспэ. Лэн подритярдя кода, со сас лэ Павлоса и лэ Силаса.

3. Со полэлас о Павло? Савэ вопросоря амэ роздиқаса?

³ О Павло сас кацаво, кай на умэкэлас и вас (2 Коринфянам 4:16). Но во полэлас, кай тэ допрастэл до конца, лэсти нащи сас тэ хасарэл анда гиндо кода, пала со во прастэл. Сости амэ можэм тэ сытювас лэ Павлостар? Сар кода, со терэн и ԥрала и ԥэя андэ амари время, доԥэнэн, кай о ԥаримос можно тэ виритярас? И сар кода, кай аштярас о лашимос, саво авэла англэ, дэл амэнди зор тэ на умэкас и вас?

СОСТИ АМЭ СЫТЮВАС КАЙ О ПАВЛО?

4. Сар лэ Павлостэ вижалас тэ служый лэ Иеговасти, со бы лэстэ тэ на авэл?

⁴ Погиндосарам, кай сас о Павло, кала пистрояс о Письмо лэ филиппийцонэнди. Во сас андо Римо тала домашнё аресто. Во нэ моӷ свободно тэ росԥэнэн важ о Дэл. И всаек о Павло росԥэнэнас важ о Дэл кодэлэнди, ко лэстэ авэлас. Ай инке, во пистрояс письморя андэ собрании, савэ сас дур. Адес бут христианоря, савэндэ нинай зор тэ вижан анда цэр, кадяжэ терэн вся, кай тэ росԥэнэн важ о Дэл всаворэнди, ко лэндэ авэл. Кадяжэ, вонэ пистрон письморя кодэлэ манушэнди, савэн и ԥрала и ԥэя нащи застанут цэрэ.

5. Со, сар пистромэ андэ Филиппийцам 3:12—14, поможысардя лэ Павлости тэ на одбандёл кодэлэстар, каринг со прастэл?

⁵ О Павло на домэкэлас, кай кода, сости во домардёлас чи кода, кай шылияспэ, тэ одбандярэн лэс кодэлэстар, каринг со во прастэлас. Во ԥэндя, кай тэ жас каринг «кода, со англэ» (када, ԥэнэса, кай драго тэ допрастэс о дром), трэбуй тэ бистрэс пала «кода, со сас». (Адиносар Филиппийцам 3:12—14b.) Состар о Павло моӷ бы тэ одбандёл? Пэрво, кодэлэстар, со во домарделясас андэ иудейско вера. Но важ о Павло када сас мусоро (Филиппийцам 3:3—8). Дуйто, пала кода, кай во дошалярэлас пэс, кай спэрва ӷонияс лэ христианонэн. Но о Павло на дэлас кадэлэ гиндонэнди тэ хулаин пэр лэстэ. Трито, во моӷ тэ гиндой, кай ужэ бут со стердя важ о Иегова и акана можэт тэ отцыёл. И всаек во на домэкэлас кацавэ гиндоря. Лэ Павлостэ бут со вижыля тэ домардёл андэ служэния и во дажэ на диқля пэ кода, кай лэстэ сас бут ԥаримос. Лэс стодэсас андо баруно, мардэсас лэ хворостинэнца, помардэсас лэ барэнца, во сас пэ кораблёря, кала вонэ розмарделэсас, ай дэкала лэсти на хутилэлас хамос и йда (2 Коринфянам 11:23—27). Хоть о Павло бут сости домардёля и бут со пэрэжудя, во всаек ӷанэнас, кай трэбуй тэ допрастэл пэско дром. Кацаво жэ гиндо трэбуй и амэнди.

6. Пала со амэ трэбуй тэ бистрас, со варикала сас андэ амари жызня?

⁶ Сар кода, со сас лэ Павлоса, поможыя и амэнди тэ бистрас «кода, со сас» варикала андэ амари жызня? Можэт амэ фартэ дошалярас пэс пала бэзэх, саво амэ варикала стердямас. Если када кадя, тоди трэбуй май драго тэ уӷанас, васо о Иисусо отдя пэстири жызня? Кала амэ пала када сытювас па Библия, гиндосарас пала када и мангаспэ, када поможыя амэнди тэ отшас и гиндоря, через савэ пэс дошалярас. Можэт амаро ди парашэла амэн тэ дошалярэл пала бэзэх, саво о Иегова ужэ простисардя. Сости амэ инке можэм тэ сытювас кай о Павло? Варико андар мэндэ отԥэнделя кодэлэстар, через со во моӷ тэ затерэл бут ловэ, кай май бут тэ служый лэ Иеговасти. Вижала амэндэ тэ бистрас, «со сас» варикала андэ амари жызня и тэ на жалуисарас пала кода, со можно сас тэ стерас? (Числа 11:4—6; Экклезиаст 7:10). Инке андэ кода, «со сас» варикала андэ амари жызня, ужал, со амэ домарделямас андэ служэния лэ Иеговасти, или о ԥаримос, саво амэнди прижылясаспэ тэ пэрэандярас. Кала амэ на бистрас, сар о Иегова поможыяс амэнди и подритярэлас всаворэ кадэла бэрша, амэ ашас май пашэ каринг лэстэ. Но амэнди на трэбуй тэ гиндосарас, кай амэ ужэ бут со стердям важ о Иегова и акана трэбуй тэ отцыювас (1 Коринфянам 15:58).

7. Пала со амэнди трэбуй тэ сэрас, кала прастас, сар пистромэ андэ 1 Коринфянам 9:24—27? Росԥэнэн о примеро.

⁷ О Павло драго полэлас лэ Иисусостирэ алава: «Стон вся пэско зор» (Луки 13:23, 24). О Павло ӷанэнас, кай лэсти сар и лэ Христости, трэбуй тэ стол вся пэско зор до конца. Важ када во сыстосардя о христианско дром кодэлэса, сар прастэн. (Адиносар 1 Коринфянам 9:24—27c.) Кодэва, ко прастэл па форо, во сэрэл, кай лэсти трэбуй тэ допрастэл до конца и тэ на шол сама пэ варисо авэр. Можэт кацаво тэ авэл, кай кодэла, ко прастэн, тердёна и роздиқэна кода, со исин пэ ветрины андэ маӷазиноря? Канешно, най, важ кода кай вонэ камэн тэ вицэлэн! Кала прастас, кай тэ авэл и вечно жызня, амэнди кадяжэ нащи тэ шас сама ни пэр со. Кала амэ сэрас кода, пала со прастас, и сар о Павло стас вся пэско зор, амэ ласа и наӷрада.

СЛУЖЫСАРАС ЛЭ ИЕГОВАСТИ, ДАЖЭ КАЛА ԤАРИМОС

8. Через со амэ можэм тэ прастас май полокэс?

⁸ Давайте подаса дума пала трин маменторя, васо амэ можэм тэ прастас май полокэ. Када, кала амэ варисо аштярас, ай када идоси нинай, чи кала о зор ужэ най кацаво или о ԥаримос, саво на прожал. Амэн подритярэла кода, кала амэ сытюваса кодэлэндар, ко виритярдя кацаво ԥаримос (Филиппийцам 3:17).

9. Со тутэ можэт тэ авэл по ди, кала варисо долӷо аштярэс, ай када идоси нинай?

⁹ Кала варисо аштярас, ай када идоси нинай. Канешно, амэ фартэ аштярас кода, пала со о Иегова дя алав. Кала о пророко Аввакумо мангэлас лэ Иеговас май йто тэ улэл о найлашимос андэ Иуда, о Дэл ԥэндя лэсти тэ на грабийпэ и тэ аштярэл (Аввакум 2:3). Но кала амэ долӷо варисо аштярас, ай када идоси нинай, тоди на камэлпэ нисо тэ терэс. Амэ дажэ можэм тэ умэкас и вас (Притчи 13:12). Кадя и тердясаспэ, кала заляпэ о 20 вико. Андэ кодэя время бут памазани христианоря гиндонас, кай лэндэ авэла и небесно наӷрада андо 1914 бэрш. Но када кадя на ашэля. Со поможысардя лэ чачунэ христианонэнди тэ пэрэандярэн кацави пэрэжывания?

10. Сар ек хулай и хулаи пэрэандярдэ кода, со долӷо аштярэнас?

¹⁰ Роздиқам, со сас дуе христианонэнца, савэндэ вижыля тэ улэн кацави пэрэжывания. О ԥрал Ройало Спатцо болделя андэ 1908 бэрш, кала лэсти сас 20 бэрш. Во фартэ патялас, кай йто лэстэ авэла небесно наӷрада. Дажэ кала во камля тэ жэнийпэ андо 1911 бэрш, во ԥэндя ла манушняти, пэ сави камэлас тэ жэнийпэ, и савя ақарэнас Перл: «Ту ӷанэс, со авэла андо 1914 бэрш. Если амэ камас тэ жэнисавас, трэбуй тэ грабисавас!» Со лэнца сас, кала андо 1914 бэрш, вонэ на получисардэ и небесно наӷрада? Вонэ на умэклэ и вас, важ кода кай важ лэндэ сас май куч тэ терэн лэ Дэвлэстири дила, ай най тэ получин и наӷрада. Вонэ витидэ важ пэстэ тэ виритярэн любо ԥаримос и тэ допрастэн пэско дром. О Ройало и Перла бут бэрша служынас лэ Иеговасти и на парашэнас лэс тэ кандэн, пока на прожудэ пэстири жызня пэ ԥув. Тумэ, канешно, фартэ камэн тэ диқэн, сар о Дэл злэла о хохаимос па пэско алав и доԥэнэна, кай лэстири правления, со май лащи и стерэла вся, пала со дясас алав. Патян, кай када авэла андэ кодэя время, сави стодя о Иегова. Ай пока май бут служысарам лэ Дэвлэсти, и на домэкам, кай через кода, со долӷо аштярас, ай када идоси нинай, тэ на умэкас и вас и май набут тэ служысарас.

11, 12. Со поможыя амэнди тэ на парашас тэ прастас, кай тэ авэл и вечно жызня, дажэ кала амэндэ найлашо зор? Росԥэнэн пала Артуро Секордо.

¹¹ Кала о зор ужэ най кацаво. Кай тэ допрастэл до конца, лэ манушэстэ трэбуй тэ авэл лашо зор. Но важ кодэла, ко прастэл, кай тэ авэл лэндэ и вечно жызня, када най фартэ трэбуй. Дажэ кодэла, кастэ нинай зор, лэндэ можэт тэ авэл састи вера, и тэ отдэн лэ Иеговасти вся со май лашо (2 Коринфянам 4:16). Еқварэс кай о ԥрал Артуро Секордоd сас интересно дума ла медсестраса, сави терэлас андо Вефилё. Лэсти сас 88 бэрш, анда кадэла бэрша 55 бэрш во сас андэ вефильско служэния. Во сас ужэ би зорэско. И медсестра поджыля каринг лэстири кровать, кай тэ поможый, и анда оди ԥэндя: «Со кати ту на диқлян андэ пэстири жызня! Скати дила ту стердян важ о Иегова. Чаче, ԥрал Секордо?». Во диқля лати андэ яқа, заасая и ԥэндя: «Кадя и исин. Но кода, со мэ домарделэм, най само важно. Май важно тэ на парашав тэ кандав лэ Иеговас». Важ лэстэ на сас май ӷлавно кода, со сас андэ лэстири жызня.

¹² Можэт тумэ служын лэ Иеговасти ужэ бут бэрша, и акана ужэ най во о зор, и бут со на вижал тэ стерэн. На умэкэн и вас! Патян, кай о Иегова фартэ цэний вся, со тумэ терэнас важ лэстэ варикала (Евреям 6:10). На бистрэн, кай тумэ анда вся оди кандэн лэ Иеговас, сыкавэл най кода, скати тумэ служын, ай кода, кай тумэ на умэкэн и вас и терэн вся, со па тумаро зор (Колоссянам 3:23). О Иегова полэл амэн и на мангэл тэ терас кода, со най па амаро зор (Марка 12:43, 44).

13. Со прижыляпэ тэ пэрэжувэн лэ Анатолиёсти и ла Лидияти и сар кода, со сас лэнца, поможыя амэнди тэ виритярас о ԥаримос, саво йто на парашэл?

¹³ Ԥаримос, саво долӷо на прожал. Дэсавэнди лэ Иеговастирэ служытелёнэнди прижалпэ бут бэрша тэ пэрэандярэн о ԥаримос и кода, кай лэн ӷонин. Акэ, со сас лэ ԥралэса лэ Анатолиёса Мельникосаe. Лэсти сас 12 бэрш, кала лэстирэ дадэс залинэ и бэшардэ андо баруно, ай посли када одбишалдэ андэ Сибирь, май бут чем 7 000 километроря лэ цэрэстар андэ Молдова. Прожыля бэрш и лэстиря да, лэ папос и ла баба кадяжэ одбишалдэ андэ Сибирь. Кала прожыля время, вонэ смоӷли тэ ԥирэн пэ собрании, савэ прожанас андэ авэр гав. Важ када лэнди прижаласпэ па барэ мразоря, пешком, па йв тэ жан 30 километроря. Потом лэ ԥралэс лэ Мельникос залинэ и динэ трин бэрш, и лэстири хулаи Лидия ашэляпэ ла бэятаса, савяти сас бэршоро. О Анатолиё и лэско ери на парашэнас тэ служын лэ Иеговасти и най фартэ шонас сама пэ кадэва ԥаримос. Акана лэ Анатолиёсти 82 бэрш и во служый андо камитето филиала андэ Среднё Азия. Сытювам кай о Анатолиё и кай и Лидия и терам вся андэ служэния лэ Иеговасти, со па амаро зор. Ай кадяжэ виритярам о ԥаримос, сар и виритярасас май англал (Галатам 6:9).

НА БИСТРЭН ПАЛА ЛАШИМОС, САВО АВЭЛА АНГЛЭ

14. Со терэлас о Павло, кай тэ домардёл кода, каринг со прастэлас?

¹⁴ О Павло патялас, кай допрастэла о дром до конца, и домардёла кода, каринг со прастэлас. Важ кода кай во сас памазано христианино, во надеияспэ, кай лэстэ авэла о «лашимос, саво камэл тэ дэл о Дэл, тэ жувэн по нэбо». Но во полэлас, кай важ када лэсти трэбуй тэ стол бут зор (Филиппийцам 3:14). Андэ пэско письмо лэ христианонэнди андэ Филиппы, о Павло призындярдя лашо примеро, саво сас трэбуй тэ поможый лэнди тэ на бистрэн кода, каринг со вонэ жанас.

15. Со о Павло росԥэндя пала ӷражданство лэ филиппийцонэнди, кай тэ поможый лэнди тэ домардён кода, каринг со вонэ жан?

¹⁵ О Павло поможысардя лэ филиппийцонэнди тэ на бистрэн, кай лэнго ӷражданство по нэбо (Филиппийцам 3:20). Васо сас трэбуй пала када тэ на бистрэн? Андэ кодэя время римско ӷражданствоf фартэ цэнияспэ. Но о ӷражданство лэ памазанонэ христианонэнго сас пэ бутэстэ май куч. Через кадэва ӷражданство вонэ моӷли май бут варисо тэ стерэн, и о римско ӷражданство, паша кадэва на ашэлас нисо. Важ када о Павло ԥэндя лэ филиппийцонэнди: «Кати андярэн пэс кадя, кай тумэ тэ ашэн и лащи весть важ о Христос» (Филиппийцам 1:27). Адес и памазани христианоря роздраго сыкавэн, сар тэ домардён и наӷрада.

16. Со, сар пистромэ андэ Филиппийцам 4:6, 7, амэнди трэбуй тэ терас и всаек, по нэбо чи андо раё пэ ԥув амэ надеисавас тэ жувас вечно?

¹⁶ Всаек по нэбо чи андо раё пэ ԥув, амэ надеисавас тэ жувас вечно, амэнди трэбуй и май дур тэ домардювас кода, каринг со амэ жас. Никала на жалуисарам пала кода, со сас. Мэк нисо на одмарэл амэн тэ парашас тэ служысарас лэ Иеговасти (Филиппийцам 3:16). Можэт тумэ фартэ долӷо аштярэн кода, пала со о Дэл дя алав. Можэт тумэ ужэ ԥурэ, и о зор най кодэва. Ай можэт тумэ тэрпин ԥаримос бут бэрша и тумэн ӷонин. Со бы тумэндэ тэ на авэл, «ни пала со нэ пэрэжывайте». Андэ молитва ясвэнца «важ вся росԥэнэн лэ Дэвлэсти», и во дэла тумэнди кацаво спокойство, саво тумэ дажэ на аштярэн. (Адиносар Филиппийцам 4:6, 7g.)

17. Со амэ уӷанас андэ авэр статья?

¹⁷ Кодэва, ко прастэл, стол вся пэско зор, кай тэ допрастэл о дром до конца. Амэнди кадяжэ трэбуй тэ стас вся о зор, кай тэ допрастас каринг и вечно жызня. Пэ скати хутилэла амаро зор и возможности, ласа анда вся зор тэ служысарас лэ Иеговасти и тэ на бистрас пала лашимос, саво аштярэл амэн англэ. Со трэбуй тэ терас, кай тэ прастас интя каринг трэбуй и тэ на хасарас о зор? Авэр статья поможыя амэнди тэ полас, со трэбуй тэ стас пэ пэрво ҭан и тэ полас, со амэнди «май фартэ трэбуй» (Филиппийцам 1:9, 10).