Служин лэ Иеговасти, савэстэ нинай рабство

1, 2. а) Васо и мануша бут гиндонас пала рабство и пала кода, кай тэ одмэкэн анда рабство? б) Ко, сар ԥэндя о Павло, па чачимастэ одмэкэл лэ манушэн анда рабство?

И ПЭРВИ христианоря жувэнас пэ Римско ԥув. Котэ и мануша фартэ абуронас пэстирэ закононэнца, кодэлэса, сар вонэ сындонас и кай вонэ на слинэ никастирэ раборя. Но всаек кадэя бари Римско ԥув ритярдёлас пэ бути, сави терэнас и раборя. Кажно трито мануш пэ кадэя ԥув сас рабо. И христианоря и авэр мануша бут гиндонас и дэнас дума пала рабство и пала кода, кай тэ на авэл рабство.

² О апостоло Павло бут пистрояс пала рабство. Хоть и мануша домардёнаспэ, кай тэ улэн о ԥаримос и тэ сшон лэ барэ манушэн андэ Римско ԥув, о Павло када на терэлас. Но со терэлас во и авэр христианоря? Вонэ пристонас вся о зор, кай тэ росԥэнэн аврэ манушэнди лащи весть важ лэ Дэвлэско царство. Ай инке тэ росԥэнэн, кай о Иисусо пала мануша отдя пэстири жизня, сави фартэ куч. О Павло росԥэнэнас лэ ԥралэнди и лэ ԥэянди, ко па чачимастэ одмэкэл анда рабство. Пала када о Павло акэ со пистросардя: «О Иегова, када духо, ай кай лэ Иеговаско духо, котэ нинай рабство» (2 Кор. 3:17).

3, 4. а) Со о Павло пистросардя жы кай 2 Коринфянам 3:17? б) О Иегова одмэкэл анда рабство. Со амэнди трэбуй тэ терас, кай тэ вижас?

³ Май англал андэ кодэва же пи́сьмо, саво о Павло пистросардя андо форо Коринфо, во пистросардя, со сас лэ Моисеёса после кода, сар во змэкляпэ па плай Синай. Котэ о Иегова дэлас дума лэ Моисеёса через о анӷело. Кадэлэстар, кай о Моисеё о муй ля тэ светийпэ, сар қам. Израильтяноря, кала диқлэ када, пэрэдарайлэ. Важ када о Моисеё заушарадя о муй лэ кирпунэ которэса (Исх. 34:29, 30, 33; 2 Кор. 3:7, 13). Тоди о Павло ԥэндя: «Но, кала о мануш бандёл каринг о Дэл, о кирпуно котор злэлпэ» (2 Кор. 3:16). Со сыкавэн кадэла алава?

⁴ Андэ статья, сави сас май англал, амэ дям дума пала кода, кай о Иегова, саво вся создал, кати во терэл вся, со камэл. Важ када котэ, кай о Иегова и «лэ Иеговаско духо», котэ нинай рабство. Па лэ Павлостирэ алава, кай тэ вижас анда рабство амэнди трэбуй тэ бандювас каринг о Иегова. Израильтяноря пэ кода, со терэлас важ лэндэ о Иегова андэ пустыня, на диқэнас кадя, сар во. Израильтяноря вижылэ анда египетско рабство и камлэ тэ терэн кати кода, со камэлас лэнго ди (Евр. 3:8—10). Када сас, сар ԥэнэса, лэндэ слинэ заушарадэ и одя и годя кирпунэ которэса.

5. а) Состар одмэкэл амэн лэ Иеговаско духо? б) Катар амэ ӷанас, кай кала о мануш андо баруно чи андо рабство кай и мануша, во всаек най андо рабство? в) Пала со амэнди трэбуй тэ подас дума?

⁵ Рабство, анда саво одмэкэл лэ Иеговаско духо, када май бут чем, кала одмэкэн анда рабство лэ манушэндар. Лэ Иеговаско духо одмэкэл анда рабство кадя, сар и мануша нащи тэ одмэкэн. Во одмэкэл амэн анда рабство лэ бэзэхэстар, ла смэртятар, ла хохавня вератар и кодэлэстар, сости андэ хохавнэ веры приритярдёнпэ (Рим. 6:23; 8:2). Сар дэ драго, кай во одмэкэл анда кадэва рабство! Даже о мануш, саво андо баруно чи андо рабство кай и мануша, всаек най рабо андэ када вся (Быт. 39:20—23). Када дицол анда кода, со сас ла ԥэяса Нанси Юэн и лэ ԥралэса Харольдо Кинго, савэ бут бэрша бэшлэ андо баруно важ пэстири вера. Пала лэндэ амэ можем тэ диқас пэ амари интернет-телевидения. Сар амэ тэ сыкавас, кай ценисарас кода, кай амэ най андо рабство? И сар годявэрнэс пэс тэ андярас, важ кода кай амэ най андо рабство?

МЭК АВЭЛ ТУМЭНДИ КУЧ, КАЙ О ДЭЛ ОДМЭКЛЯ ТУМЭН АНДА РАБСТВО

6. Андар со дицолас, кай важ и израильтяноря на сас куч, кай о Иегова одмэкля лэн анда рабство?

⁶ Погиндосар, тути стердэ кучутно подарко. Кала ту полэс, пэ скати во дэ куч, ту авэса блаӷодарно кодэлэсти, ко тути лэс подарисардя. Важ и израильтяноря на сас куч кода, кай о Иегова одмэкля лэн анда египетско рабство. Прожылэ найбут шона, сар вонэ вижылэ анда Египто и вонэ линэ тэ ровэнпэ. Вонэ фартэ закамлэ тэ хан кода, со лэндэ сас андо Египто. Вонэ даже закамлэ тэ ринпэ палпалэ. Кати погиндон, о мащё, и краставички, и кавуноря, и пурум и о чисноко сас важ лэндэ май куч чем кода, кай тэ тэлён лэ чачунэ Дэвлэсти лэ Иеговасти най андо рабство! Важ када о Иегова пэр лэндэ фартэ холяйля (Чис. 11:5, 6, 10; 14:3, 4). Анда када амэ трэбуй тэ сытювас.

7. Сар о Павло терэлас кадя, сар пистросардя андо 2 Коринфянам 6:1 и сар амэ тэ терас кадя сар во?

⁷ О апостоло Павло ԥэнэнас всаворэ христианонэнди, тэ авэн блаӷодарни, кай о Иегова одмэкля лэн анда рабство через пэско шаво о Иисус Христос. (Адиносар 2 Коринфянам 6:1a). О Павло сас андо рабство кай о бэзэх и кай и смэрть, и лэско ди дошалярэлас лэс. Но во всаек ԥэндя: «Блаӷодарисарас лэ Дэвлэс через о Иисус Христос, амаро Ӷосподо!» Но васо? Май интя о Павло пистросардя лэ ԥралэнди, савэ, кадя сар и во, патянас андо Иегова: «Лэ духоско законо, саво дэл жизня, лэ Христоса, одмэкля тут лэ бэзэхэстирэ законостар и ла смэртятар» (Рим. 7:24, 25; 8:2). Сар и о Павло амэ трэбуй тэ на бистрас, кай о Иегова одмэкля амэн анда рабство лэ бэзэхэстар и ла смэртятар. Сар? О Иегова через о Иисусо витиндя амэн лэ бэзэхэстар и ла смэртятар. Када поможый тэ служисарас лэ вужэ одеса и кадэлэстар амэндэ бари радость (Пс. 40:8).

8, 9. а) Состар о Пётро фэрияс лэ христианонэн, важ кода кай лэн одмэклэ анда рабство? б) Состар амэнди тэ фэрисавас?

⁸ Амэ трэбуй тэ авас блаӷодарни лэ Иеговасти, кай амэ най андо рабство. Но и через кода, кай амэ най андо рабство, тэ на терас о найлашимос. Важ када о апостоло Пётро фэрияс лэ христианонэн, кай вонэ тэ на терэн кода, со камэл и ӷрешно тила. (Адиносар 1 Петра 2:16b). Кадэла алава дэн тэ сэрас, со тердяпэ лэ израильтянонэнца андэ пустыня. Но андэ амари время лэ Петростирэ алава поджан инке май фартэ. О Сатана и лэско миро бут со сыкавэн, кай амэ тэ закамас тэ жувас акэ сар. Тэ проандярас время, тэ ԥиравас йда, тэ хас и тэ пас кадя, сар андэ кадэва миро. И мануша, савэ терэн и реклама, дилярэн амэн. Вонэ када терэн через и шукарнэ мануша. И шукарнэ мануша сыкавэн кадя, кай амэ тэ закамас тэ тинас кода, со амэнди па чачимастэ на трэбуй. Сар дэ вушэро тэ дилярэн амэн, кай амэ тэ лас тэ терас кода, со камэл и ӷрешно тила, и тэ бистрас, кай амэн одмэклэ анда рабство.

⁹ Лэ Петростирэ алава поджан и андэ авэр дила, скати и кай тэ сытён, сави бути тэ витидэн. Пэ бэятцэ, савэ сытён андэ школа тасавэн, кай вонэ фартэ драго тэ сытён. Васо? Кай вонэ и май дур тэ жан тэ сытён, кай лэндэ тэ авэл бари образования. Лэнди ԥэнэн, кай сар лэндэ нинай бари образования, тоди вонэ на виарақэна лащи бути, и на затерэна барэ ловэ. Кодэла, ко тасавэн пэ тэрнэ мануша доԥэнэн лэнди, кай кодэла, кастэ бари образования, затерэн май барэ ловэ. Лэ тэрнэ манушэнди может тэ здэлпэ, кай када чачимос. Важ кода кай андэ кадэя время вонэ витидэн, сар май дур тэ жувэн, сар и скати тэ затерэн. Но, со трэбуй тэ сэрэн лэндирэ дада и дэя?

10. Амэндэ исин право тэ витидас. Тоди пала со трэбуй тэ сэрас?

¹⁰ Варико гиндой, ай катэ мандэ исин право тэ витидав па мэрнятэ. И кода, со мэ камав тэ терав, мэрно ди мэкэл ман. Андэ кадэя время лэ манушэсти здэлпэ, кай каринг када поджан лэ Павлостирэ алава: «Васо кода, со мэ витидав, тэ сындой аврэско ди?» (1 Кор. 10:29). Но кадэла алава на поджан кардэ! Чаче, амэндэ исин право тэ витидас. Амэ можем тэ витидас, скати и кай тэ сытювас, скати и сави бути тэ терас. Но амэнди всаек трэбуй тэ сэрас, кай исин, со амэнди нащи тэ терас. Инке трэбуй тэ сэрас, кай кодэлэстар, со амэ витидас может тэ авэл лашимос, ай может и най. Акэ, васо о Павло спэрва пистросардя: «Вся па законо [«мэкэл тэ терэн» Современно русско переводо], но най вся анэн лашимос. Вся па законо, но най через вся о мануш ашэл май лашо» (1 Кор. 10:23). Вижал, кала амэ витидас, амэ трэбуй тэ шас сама най кати пэ кода, со амэнди чалёл.

АМЭ ГОДЯВЭРНЭС ВИТИДАС, КАЛА СЛУЖИСАРАС ЛЭ ИЕГОВАСТИ, ВАЖ КОДА КАЙ НАЙ АНДО РАБСТВО

11. Васо о Иегова одмэкля амэн анда рабство?

¹¹ О Пётро мангля, кай вонэ тэ на терэн о найлашимос, важ кода кай вонэ най андо рабство. Во ԥэндя, кай вонэ тэ андярэн пэс «сар лэ Дэвлэстирэ раборя». Вижал, васо о Иегова через о Иисусо одмэкля амэн лэ бэзэхэстирэ законостар и ла смэртятар? Кай амэ тэ жувас, сар лэстирэ раборя.

12. Сости амэ сытювас лэ Ноёстар и лэстирэ ерестар?

¹² Сар амэнди тэ сыкавас, кай амэ най андо рабство? Тэ стас вся амаро зор, кай тэ терас лэ Дэвлэстири дила. Кала амэ стас лэ Дэвлэстири дила пэ пэрво ҭан, када фэрий амэн. Состар? Кай тэ на ашас раборя кодэлэсти, со амэ камас и каринг со цырдэл кадэва найлашо миро (Гал. 5:16). Погиндон пала Ноё и лэско ери. Вонэ жувэнас андэ фартэ билажавардо миро, кай марэнаспэ и умарэнас ек еқэс. Но кай о Ноё и лэско ери нисо на сас кодэлэ найлашэ мироса. Сар лэндэ када вижыля? Вонэ витидэ тэ терэн лэ Иеговастири дила. Вонэ линэ тэ терэн о ковчеӷо, тэ стидэн о хамос важ пэстэ и важ и животни и тэ росԥэнэн, кай авэла о потопо. Андэ Библия пистромэ: «И о Ноё стердя кадя, сар ԥэндя лэсти о Дэл. Кати кадя во и стердя» (Быт. 6:22). Со кадэлэстар вижыля? О Ноё и лэско ери фэрисайлэ, кала о Дэл улэлас о найлашо миро (Евр. 11:7).

13. Сави дила о Иегова приԥэндя, кай амэ тэ терас?

¹³ Со андэ амарэ деса о Иегова приԥэнэн амэнди тэ терас? Тэ росԥэнас и лащи весть. Кадя же терэнас и лэ Иисусостирэ ученикоря. (Адиносар Луки 4:18, 19c). Андэ амари время о Сатана «о дэл кадэлэ найлашэ мироско» терэл кадя, кай и мануша тэ на полэн, кай вонэ раборя кай и хохавни вера, кай и ловэ и кай лэ манушэстири правления (2 Кор. 4:4). Важ амэндэ кадя же, сар и важ о Иисусо, бари честь тэ росԥэнас важ о Иегова, кай и мануша тэ тэлён лэсти. Тэ тэлён лэ Дэвлэсти, савэстэ нинай рабство (Матф. 28:19, 20). Тэ росԥэнас важ о Иегова найвушэро дила. Андэ дэсавэ ҭана и мануша на камэн тэ ашунэн пала Дэл, ай варико даже холявэл пар мэндэ. Важ кода кай о Иегова приԥэндя тэ росԥэнас и лащи весть, кажно амэндар трэбуй тэ пушэл пэстар: «Сар мэ май бут тэ терав лэ Дэвлэстири дила, важ кода кай мэ най андо рабство?»

14, 15. Со витидэ бут лэ Иеговастирэ служителя? (Диқэн и картинка англа статья.)

¹⁴ Драго тэ диқас, кай бут лэ Иеговастирэ мануша закамлэ тэ жувэн май просто. Васо? Кай май бут тэ терэн лэ Дэвлэстири дила, важ кода кай полинэ, кай йто кадэва найлашо миро на авэла (1 Кор. 9:19, 23). Дэсавэ андэ пэстири собрания линэ тэ служин пионеронэнца. Ай варико пэрэлагля кордэ, кай на хутилэл кодэлэн, ко росԥэнэн важ о Дэл. Важ и панч бэрша, савэ прожылэ, линэ тэ служин пионеронэнца май бут чем 250 тысяч манушэн. Ай акана, кадя служин май бут чем ек миллионо сто тысяч манушэн. Сар дэ драго, кай амэндэ исин кацавэ ԥрала и ԥэя, савэндар амэ сытювас, савэ най андо рабство! Важ када вонэ годявэрнэс витидэн тэ служин лэ Иеговасти (Пс. 110:3).

¹⁵ Со поможысардя кадэлэ ԥралэнди и ԥэянди годявэрнэс тэ витидэн? Уӷанаса пала ԥрал Джоно и ԥэй Джудит, савэ 30 бэрш служисардэ най андэ ек страна. Вонэ сэрэн, кай андэ 1977 бэрш, кала ля тэ прожал и школа важ и пионероря, ԥэнэнас кай и ԥрала и ԥэя тэ пэрэладэн интя, кай на хутилэл кодэлэн, ко росԥэнэн важ о Дэл. О Джоно росԥэнэн, важ кода кай тэ пэрэладэл, во жувэлас просто и най еқвар парувэлас и бути. И акэ вонэ пэрэлаглэ андэ авэр страна. Со лэнди поможысардя тэ сытён тэ дэн дума пэ авэр шыб, тэ присытён каринг кода, сар жувэн и мануша котэ и каринг лэндири поӷода? Вонэ мангэнаспэ лэ Иеговасти и патянас лэсти. О Джоно росԥэнэнас, со лэстэ сас по ди: «Мэ патяв, кай кодэя дила, сави мэ теравас важ о Дэл, нисо на сас кадэлэстар май лашо. О Иегова ашэля май пашэ манди, сар любящё дад. Акана мэ май драго полав и алава анда Иакова 4:8: „Пашон каринг о Дэл, и во пашола каринг тумэндэ“. Мэ виарақлэм кода, со на хутилэлас манди андэ служения лэ Дэвлэсти».

16. Сар и ԥрала и ԥэя, савэ, важ кода, кай най андо рабство, годявэрнэс витидэн андэ жизня?

¹⁶ Кай дэсавэ ԥрала и ԥэя вижал тэ служин пионеронэнца набут время. Но бут андар лэндэ терэн бути пэ теократически стройки, савэ па вся ԥув. Кала строинас и ӷлавно управления андо Уорвико (штато Нью-Йорко, США) варикай 27 тысяч ԥралэн и ԥэян служинас котэ добровольцонэнца, варико сас котэ дуй курте, варико сас жы кай о бэрш и май бут. Кай тэ терэн котэ бути, бут андар лэндэ отстодэ пэстири дила. Када драго, тэ сытювас кацавэ ԥралэндар и ԥэяндар, савэ, важ кода кай най андо рабство, годявэрнэс витидэн тэ прославляют лэ Иеговас, лэ Дэвлэс, савэстэ нинай рабство!

17. Мануш годявэрнэс витидэл, со тэ терэл, важ кода кай о Дэл одмэкля лэс анда рабство. Саво лашимос во аштярэл англэ?

¹⁷ Амэ блаӷодарни лэ Иеговасти, кай уӷанглям лэс и кай амэ най андо рабство через кода, кай тэлювас лэсти! Мэк кода, со амэ витидас андэ пэстири жизня сыкавэл,кай важ амэндэ куч, кай амэ най андо рабство. Важ кода кай амэ най андо рабство, амэ на ласа тэ терас найгодявэрнэс, ай ласа май бут тэ терас лэ Иеговастири дила, скати вижала па амаро зор. И тоди амэ йто диқаса, сар стерэнапэ и алава анда Римлянам 8:21: «Лэс одмэкэна анда рабство, андэ саво тернён, лэсти дэна райкани жизня, андэ сави нинай рабство, сави исин кай лэ Дэвлэстирэ бэятцэ».