Фэрин о лашимос андо ди и тоди, кала андэ жызня варисо парудёл

1, 2. а) Со дэкала кай о христианино андо ди, кала во на аштярэл, ай лэстэ варисо парудёл андэ жызня? (Диқэн и картинка англа статья.) б) Со дэла зор амэнди, сар пистромэ андэ 131 Псалом, тэ фэрисарас о лашимос андо ди?

О ЛЛОЙДО И АЛЕКСАНДРА служынас андо вефилё 25 бэрш, ай тоди лэнди ԥэндэ, кай вонэ тэ уладэн. Спэрва лэнди сас ԥарэс по ди. О Ллойдо ԥэнэн: «Мэ и на гиндосаравас, сар мэ жувава, кала на терава и дила андо вефилё. Ла годяса мэ полавас, васо кадя ашэля. Но кала прожылэ дэсавэ курте и дажэ шона, мэ на парашавас тэ гиндосарав, кай мэ ужэ на трэбуй. Дэкала манди сас драго по ди, ай дэкала мэ умэкавас и вас».

² Кодэлэстар, кай андэ амари жызня варисо йто парудёл, амэ залас тэ загиндосавас пала бут со и амэнди ашэл фартэ ԥарэс по ди (Притчи 12:25). Файма, амэнди ԥарэс тэ присытювас каринг када. Со поможыя тэ на загиндосавас пала када фартэ? (Адиносар Псалом 131:1 жы кай 3a). Подам дума пала дэсавэ лэ Иеговастирэ служытеля, савэ жувэнас дэлмут и савэ жувэн акана. Сар лэндэ вижыля тэ фэрин о лашимос андо ди и тоди, кала андэ жызня варисо парудёл.

«О ЛАШИМОС АНДО ДИ, САВО ЛЭ ДЭВЛЭСТАР»

3. Сар паруделя лэ Иосифостири жызня?

³ Кала лэ Иосифости сас варикай 17 бэрш, лэстирэ чаче ԥрала битиндэ лэс андо рабство. Васо? Во сас со май любимо шаво кай пэско дад и вонэ важ када вороӷуинас лэс (Бытие 37:2 жы кай 4, 23 жы кай 28). Андо Египто, дур пэстирэ дадэстар о Иосиф сас спэрва, сар рабо, ай тоди попэля андо баруно. Када вся жалас 13 бэрш. Со дя зор лэсти тэ на холявэл и тэ на умэкэл и вас?

4. а) Пала со, файма, гиндояс о Иосифо, кала сас андо баруно? б) Сар о Иегова сыкадя, кай ашундя лэ Иосифостирэ молитвы?

⁴ Файма, андо баруно о Иосифо гиндояс, сар о Иегова поможыяс лэсти и дэлас лэсти зор (Бытие 39:21; Псалом 105:17 жы кай 19). Файма, во гиндояс пала сунэ, савэ диқэлас, кала сас тэрноро. Сунэ пала кода, со авэла англэ. Через лэндэ о Иегова кадяжэ дэлас лэсти зор (Бытие 37:5 жы кай 11). Во мангэласпэ и, файма, най еқвар андэ молитва, росԥэнэнас лэ Иеговасти, со лэстэ андо ди (Псалом 145:18). О Иегова ашундя лэ Иосифостирэ молитвы и поможысардя лэсти. Во поможысардя лэсти тэ патял, кай авэла лэса андэ всаворэ лэстирэ биды (Деяния 7:9, 10)b.

5. Сар «о лашимос андо ди, саво лэ Дэвлэстар» поможый амэнди андэ служэния лэсти?

⁵ Пэ скати тэ на авэл амэнди ԥарэс андэ жызня, амэндэ авэла «лашимос андо ди, саво лэ Дэвлэстар» и саво фэрий амари годи. (Адиносар Филиппийцам 4:6, 7c). Кала амэ гиндосарас, состар ԥарэс по ди, амэнди трэбуй тэ мангас, кай о Иегова тэ поможый. Тоди о Иегова поможыя, кай амэндэ тэ авэл лашимос андо ди, через саво амэндэ вижала и май англэ анда вся оди тэ служысарас лэсти. Ай кадяжэ поможыя тэ на умэкас и вас, кала амэндэ фартэ бут ԥаримос. Кадэлэсти амэ сытювас кай лэ Дэвлэстирэ мануша, савэ жувэн амэнца андэ ек время.

МАНГЭН ЛЭ ИЕГОВАСТАР, КАЙ ВО ТЭ ДЭЛ ТУМЭНДИ ЛАШИМОС АНДО ДИ

6, 7. Сар амарэ молитвы поможын, кай амэндэ тэ авэл лашимос андо ди? Росԥэнэн.

⁶ О Райано и Джульетта дэсави время служынас спецыальнонэ пионеронэнца. Кала лэнди ԥэндэ, кай лэндири время андэ кадэя служэния вижыля, лэнди сас фартэ ԥарэс. О Райано ԥэнэн: «Амэ манглямпэ лэ Иеговасти и росԥэндям лэсти вся, со амэндэ по ди. Амэ полям, кай андэ кадэя время амэндэ вижала тэ сыкавас, кай амэ андэ вся патяс лэсти. Андэ амари собрания бут кодэлэн, ко найдэлмут болделя. Важ када амэ мангасас лэ Иеговас, кай во тэ поможый амэнди тэ авас кодэла, кастар вонэ сытёна, кай тэ авэл фартэ састи вера».

⁷ Ашундя о Иегова лэндири молитва? О Райано ԥэнэн: «Кала амэ манглямпэ, вся о ԥаримос, саво амэндэ сас па оди ужыля, и ашэля май вушэро. „О лашимос андо ди, саво лэ Дэвлэстар“ фэрисардя амаро ди и годи. Амэ полям, кай и май дур анда оди тэ служысарас лэ Иеговасти амэндэ вижала. Вижала тоди, кала амэ гиндосараса и амэндэ андо ди авэла кадя, сар трэбуй».

8—10. а) Сар о Дэл амэнди поможый, кала амэ фартэ загиндосавас? б) Сар о Иегова поможый амэнди, кала терас лэстири дила, сави важ амэндэ со май куч?

⁸ Лэ Дэвлэско свынто духо поможый, кай амэндэ тэ авэл лашимос андо ди. Во кадяжэ поможый, кай и алава анда библейски стихоря тэ терэн кадя, кай амэ пэ пэрво ҭан тэ стас лэ Дэвлэстири дила. (Адиносар Иоанна 14:26, 27d). Акэ со сас лэ Филипоса и ла Мэрияса, ереса, савэ терэнас лэ Дэвлэсти дила андо вефилё варикай 25 бэрш. Сар прожылэ штар шона, кала вонэ улаглэ анда вефилё, лэндэ сас ԥаримос. Кай о Филипо и кай и Мэри мулинэ и дэя. Ай кадяжэ муля инке ек мануш анда лэнго родо. Кадяжэ лэнди прижыляпэ тэ диқэн пала ла Мэрияко дад, саво сжыля па годятэ.

⁹ О Филипо росԥэнэн: «Манди здэласпэ, кай мандэ вижал тэ пэрэандярав кадэва ԥаримос. Но варисо сас най кадя. Кала адиносаравас андэ „Сторожэво башня“ и статья, кай тэ сытювас, мэ шутэм сама пэ алава анда Колоссянам 1:11. Мэ виритяравас о ԥаримос, но мандэ на вижалас тэ аштярав и тэ на холявав, ай кадяжэ манди на хутилэлас лош. И алава анда кадэва стихо динэ манди тэ сэрав акэ пала со. И лош авэла най кодэлэстар, со мандэ андэ жызня, ай кодэлэстар, со терэл лэ Дэвлэско свынто духо андэ мэрни жызня».

¹⁰ Тэ терэн лэ Иеговастири дила важ о Филипо и Мэри сас, со май куч андэ жызня. И важ када о Иегова дя лэнди бут лашимос. Кала вонэ улаглэ анда вефилё, вонэ линэ тэ сытярэн па Библия манушэн, савэ камэнас тэ сытён най еқвар андо курко. И Мэри ԥэнэн: «Кала амэ сытярасас лэ манушэн па Библия, амэ самас фартэ лошалэ. Кадя о Иегова дя амэнди тэ патяс, кай вся авэла драго».

ДОМЭКЭН, КАЙ О ИЕГОВА ТЭ ДЭЛ ТУМЭНДИ ЛАШИМОС

11, 12. а) Сар о Иосифо домэкля, кай о Иегова тэ дэл лэсти лашимос? б) Саво лашимос о Иегова дя лэ Иосифости?

¹¹ Дэкала андэ амари жызня варисо парудёл, кала амэ и на аштярас када. Тоди амэ лас фартэ тэ загиндосавас пала кода, со авэла англэ. Кадя авелоп и лэ Иосифоса. Но во терэлас вся, со андэ лэско зор. Важ када о Иегова андэ лэско ԥаримос дя лэсти лашимос. Во сас андо баруно и терэлас любо дила, сави лэсти дэнас. Лэсти дэлас дила о мануш, саво диқэлас пала всаворэ барунаря, савэ котэ бэшэнас. О Иосифо терэлас кадэя дила кадяжэ драго, сар терэлас бути кай о Потифаро (Бытие 39:21 жы кай 23).

¹² Еқвар лэ Иосифости приԥэндэ тэ терэл, со ԥэнэна и дуй мануша, савэ бэшэнас андо баруно. Кадэла мануша варикала терэнас бари бути кай о фараоно. О Иосифо терэлас лашимос и када фартэ ля лэн лэ одестар. Важ када вонэ росԥэндэ лэсти, пала со фартэ загиндонаспэ. Вонэ росԥэндэ пала сунэ, савэ вонэ нащи полэнас и савэ лэнди найдэлмут снисайлэ (Бытие 40:5 жы кай 8). О Иосифо дажэ и на гиндояс, кай кадэла думатар лэс вимэкэна анда баруно. Во пробэшля инке дуй бэрш. Ай кала лэс вимэклэ, во ашэля андо Египто баро мануш. Барэдэр лэстар сас кати о фараоно (Бытие 41:1, 14 жы кай 16, 39 жы кай 41).

13. Сар тэ домэкас, кай о Иегова тэ дэл амэнди лашимос, со бы тэ на авэл андэ амари жызня?

¹³ Амэндэ, кадяжэ сар и кай о Иосифо, авэла кацаво, со амэндэ на вижала тэ парувас. Но кала амэ ӷанас тэ аштярас и на холявас и терас вся, со андэ амаро зор, тоди амэ домэкаса, кай о Иегова тэ дэл амэнди лашимос (Псалом 37:5). Дэкала амэ на ӷанас, со тэ терас. Но сар пистросардя о апостоло Павло «амэндэ най кацаво ԥаримос, анда саво амэ на вижаса» (2 Коринфянам 4:8). О Иегова никала на ашавэла амэн. Ай май фартэ тоди, кала амэндэ пэ пэрво ҭан тэ гиндосарас пала лэстири дила и тэ терас ла.

ТЕРЭН ЛЭ ИЕГОВАСТИРИ ДИЛА

14—16. Андар со дицол, кай важ о Филиппо тэ терэл лэ Дэвлэстири дила сас, со май куч, и тоди, кала варисо парудёлас андэ жызня?

¹⁴ О Филиппо сас кодэва, ко росԥэнэнас пала Дэл. Во пэстиря жызняса сыкадя, сар тэ на парашэс тэ терэс лэ Иеговастири дила, со бы тэ на парудёл андэ жызня. Во терэлас нэви дила, сави лэсти дя тэ терэл о Иегова и лэсти када чалёлас (Деяния 6:1 жы кай 6). Но акэ вся паруделя. Кала умардэ лэ Стефанос, андо Иерусалимо линэ тэ ӷонин лэ христианонэн. Важ кода кай ӷонинас кодэлэн, ко жанас пала Христос, вонэ ужылэ анда форо. Ай о Филиппо жыля андэ Самария, андо форо, кай и мануша инке трэбуй сас тэ уӷанэн и лащи весть (Матфея 10:5; Деяния 8:1, 5).

¹⁵ О Филиппо камэлас тэ жал кордэ, каринг бишалэла лэ Иеговаско свынто духо. О Иегова бишалдя лэс андэ Самария. Лэ манушэн анда Самария, савэн вэрыцынас и иудеёря, ля лэ одестар, кай о Филиппо драго обжаласпэ лэнца. «Бутэ манушэнди, сар еқэсти, чалёлас тэ ашунэн» лэстирэ алава (Деяния 8:6 жы кай 8).

¹⁶ Прожыля время и лэ Дэвлэско духо бишалдя лэ Филиппос андо Азото и Кесария. Котэ жувэнас бут мануша, савэ на сас евреёря (Деяния 8:39, 40). Прожылэ варикай 20 бэрш кодэлэстар, сар о Филиппо пэрво разо андэ Самария росԥэнэнас и лащи весть. И акана андэ лэстири жызня упалэ варисо паруделя. Во жэнисайля и лэ ереса жувэлас котэ, кай росԥэнэнас и лащи весть. Во на диқэлас пэ кода, со паруделя андэ лэстири жызня. Важ лэстэ кадяжэ, сас со май куч андэ жызня тэ терэл лэ Иеговастири дила. О Иегова дя бут лашимос лэ Филиппости и лэстирэ ерести (Деяния 21:8, 9).

17, 18. Сар кода, кай амэ терас лэ Дэвлэстири дила поможый тэ авэл андо ди лашимос и тоди, кала варисо парудёл?

¹⁷ Бут пионероря доԥэнэн, кай кала терэс бут лэ Дэвлэстири дила, када поможый тэ авэл по ди вушэро и тоди, кала варисо парудёл андэ жызня. О Озборно и Полайт, о ери, саво жувэл андо ЮАР, парашэлэ тэ терэн дила андо вефилё. Вонэ гиндонас, кай авэла вушэро тэ виарақэн цэр и бути, сави на залэл вся о дес. О Озборно ԥэнэн: «Сас ԥарэс, кай бут время нащи виарақасас бути». Ай лэстири хулаи и Полайт ԥэнэн: «Прожылэ трин шон, ай бути на сас и ловэ кадяжэ. Амэнди сас фартэ ԥарэс».

¹⁸ Со поможысардя лэнди андэ кадэва ԥаримос? О Озборно росԥэнэн: «Амэ росԥэнасас пала Дэл лэ манушэнца анда собрания. Када поможысардя, кай амэндэ тэ авэл лашимос андо ди. Амэ погиндосардям кадя, кай фэдэр тэ стас вся о зор тэ терас лэ Дэвлэстири дила, чем тэ бэшас и тэ ровас. Кадэлэстар амэ ашэлям фартэ лошалэ. Амэ родасас бути и виарақлям ла».

АНДЭ ВСЯ ПАТЯН ЛЭ ИЕГОВАСТИ

19—21. а) Со поможыя, кай амэндэ по ди тэ авэл лашимос? б) Со амэндэ авэла, кала амэ присытюваса каринг кода, со парудёл?

¹⁹ Амэ полям, кай кала амэ терас вся, кала варисо парудёл андэ амари жызня и андэ вся патяс лэ Иеговасти, тоди амэнди авэла драго по ди. (Адиносар Михея 7:7e). Времяса амэ поласа, кала амэ присытювас каринг кода, со парудёл, амэ май фартэ лас тэ полас лэ Дэвлэс, сар кодэлэс, каса ладисарас, хас и пас. Акэ со ԥэнэн и Полайт, пала сави сас пистромэ май англал. Вой ԥэнэн: «Кала мэ улаглэм анда вефилё, мэ полэм, со када, андэ вся тэ патяв лэ Иеговасти дажэ тоди, кала здэлпэ, кай вся фартэ ԥарэс. Мэ лэм инке май фартэ тэ полав лэ Дэвлэс, сар кодэлэс, каса ладисарав, хав и пав».

²⁰ И Мэри, пала сави сас пистромэ май англал, кадяжэ диқэл пала пэско ԥуро дад и служый пионероса. Акэ со вой ԥэнэн: «Мэ полэм, кала мэ фартэ пала варисо загиндосавав, манди трэбуй тэ тердював, тэ мангавпэ и тэ на гиндосарав пала када. Со май бут, сости мэ сытелэм, када тэ отдав вся андэ лэ Иеговастирэ вас. Када манди фартэ трэбуй авэла англэ».

²¹ О Ллойдо и Александра, ԥэнэн: «Кодэлэстар, со парудёлас андэ амари жызня, кала амэ када на аштярасас, дицолас, сави амэндэ вера. Инке через када дицэля, вижала амэндэ тэ пэрэандярас и ԥари время, важ кода кай фартэ патяс лэ Иеговасти чи най. О ԥаримос, саво амэ пэрэандярас, поможый амэнди тэ авас май лашэ».

22. Андэр со амэ патяс, кала терас вся, со па амаро зор, кала амэндэ варисо парудёл?

²² Андэ кадэва миро амэндэ варисо парудёл, кала амэ када на аштярас. Амэнди дэн нэви дила андэ служэния. Амэндэ парудёл варисо андо ери чи ашэл най во, о зор. Но со тэ на парудёл андэ амари жызня, амэ патяс, кай о Иегова диқэл пала амэндэ и поможый, кала амэнди када трэбуй (Евреям 4:16; 1 Петра 5:6, 7). Ай акана терэн вся, со па тумаро зор и тоди, кала тумэндэ варисо парудёл. Мангэнпэ амарэ дадэсти, саво по нэбо и сытён андэ вся тэ патян лэсти. Кадя тумэндэ вижала тэ фэрин о лашимос андо ди, со бы тэ на парудёл андэ тумари жызня.