«Авэн свынти»

1. Саво совето о апостоло Пётро дя лэ христианонэнди и васо можэт тэ здэлпэ, кай када най па амаро зор?

АНДЭ пэско пэрво письмо о апостоло Пётро пистросардя, андэр со и христианоря трэбуй тэ сытён лэ Иеговастар: «Авэн свынти андэ вся, со тумэ терэн, сар кодэва, ко свынто, саво ақардя тумэн. Важ кода кай пистромэ: „Авэн свынти, важ кода кай мэ свынто“» (1 Пет. 1:15, 16). Хоть во обратияспэ каринг и памазаникоря, пэ лэстирэ алава трэбуй тэ шон сама и кодэла, ко надеийпэ тэ жувэл пэ ԥув. О Иегова андэ вся свынто, и во мангэл амэн тэ сытювас тэ авас свынти, сар во. Вижал, кай амэ можэм и трэбуй тэ авас свынти андэ вся, со амэ терас. Но варико можэт тэ гиндой, кай када най па лэско зор, важ кода кай амэ всаворэ нэсовершэни. О Пётро тожэ терэлас ошыбки, но всаек важ о Иегова во сас свынто. Ай када сыкавэл, кай и амэ можэм тэ авас свынти.

2. Пала савэ вопросоря амэ подаса дума андэ кадэя статья?

² Андэ кадэя статья амэ подаса дума пала штар вопросоря: 1) Со када святость? 2) Со андэ Библия ԥэнэнпэ пала лэ Иеговастири святость? 3) Со када тэ авас свынти андэ вся, со амэ терас? 4) Васо лэ Иеговастирэ друӷоря трэбуй тэ авэн свынти?

СО КАДА СВЯТОСТЬ?

3. Со бут мануша гиндон, кала ашунэн алав «свынто»? Кай тэ уӷанас о чачимос пала святость?

³ Кала и мануша ашунэн алав «свынто», вонэ прецтавляют пэсти манушэс, савэстэ помэкло муй и саво ԥиравэл рашаицко ӥда. Но чаче када кадя? О Иегова свынто и андэ Библия пала лэстэ ԥэнэнпэ, кай во «бахтало Дэл» (1 Тим. 1:11). Кадяжэ андэр латэ пистромэ: «Бахтало о народо, каско Дэл о Иегова!» (Пс. 144:15). Ай инке о Иисус Христос сындояс кодэлэн, ко ԥиравэлас особо ӥда, кай англа всаворэ тэ сыкавэл пэстири праведность (Матф. 6:1; Мар. 12:38). Сар чачунэ христианоря, амэ полас, со када святость, но най кадя, сар гиндон и мануша, ай сар пистромэ андэ Библия. Амэ патяс, кай амаро свынто и любящё Дэл никала на манглоп амэндар кода, со най па амаро зор. Важ када, если о Иегова ԥэнэн амэнди: «Авэн свынти», значит, амэ можэм кацавэ тэ авас. Но канешно, кай тэ авас свынти андэ вся, со амэ терас, амэнди спэрва трэбуй тэ полас, со када святость.

4. Со сыкавэн и алава «свынто» и «святость»?

⁴ Кала андэ Библия пистромэ алава «свынто» и «святость», обычно дэлпэ дума, сар правильно тэ тэлювас лэ Иеговасти, сар вужэс тэ андярас пэс и пала кода, со свынто. Кадэла алава сыкавэн, кай варисо или варикас отделисардэ важ и служэния лэ Иеговасти. Аврэ алавэнца, амэ свынти, если жувас и тэлювас лэ Иеговасти кадя, сар во камэл, и если амэндэ исин лащи дружба лэса. Кати погиндон: тумэ можэте тэ авэн друӷоря лэ свынтонэ Дэвлэсти! Но особено лэл лэ одестар, кала амэ гиндосарас, со андэ Библия пистромэ пала лэ Иеговастири святость.

«СВЫНТО, СВЫНТО, СВЫНТО О ИЕГОВА»

5. Со амэ уӷанас пала Иегова, кала адиносарас андэ Библия пала анӷелоря?

⁵ О Иегова свынто андэ вся. Када сыкавэн и алава, савэ ԥэндэ и серафиморя: «Свынто, свынто, свынто, о Иегова, хулай пэ войскоря!» (Ис. 6:3). И серафиморя находинпэ паша лэ Иеговаско престоло. Канешно, кай тэ авэн паша свынто Дэл, вонэ екжэнэ трэбуй тэ авэн свынти. И чаче, кай варисаво ҭан пэ ԥув тэ авэл свынто, хутилэла, кай котэ тэ авэл лэ Иеговаско анӷело. Например, кадя тердяпэ, кала о анӷело сыкаделя лэ Моисеёсти «андэ яг, сави сас машкар колючё кусто» (Исх. 3:2—5; Иис. Н. 5:15).

6, 7. а) Со ԥэндя о Моисеё, кай и израильтяноря тэ сэрэн пала лэ Иеговастири святость? (Исход 15:1, 11). б) Со дэлас лэ израильтянонэнди тэ сэрэн, кай о Иегова свынто? (Диқэн и картинка пэ обложка.)

⁶ Посли кода, сар о Моисеё лэ израильтянонэнца пэрэжылэ и Лоли моря, во ԥэндя лэнди тэ шон сама, кай лэнго Дэл о Иегова свынто. (Адиносар Исход 15:1, 11.) Пэ мануша, савэ тэлёнас лэ дэвлэнди андо Египто, дажэ и пашэ на ԥэнэса, кай вонэ сас свынти. Кацавэ жэ сас и мануша, савэ жувэнас андо Ханаано. Кай тэ тэлён пэстирэ дэвлэнди, вонэ терэнас билажавардимос и дажэ анэнас лэ бэятонэн андэ жэртвы (Лев. 18:3, 4, 21—24; Втор. 18:9, 10). Када сас гряца лэ Иеговасти, и во на камэлас, кай варисо кацаво тэ авэл машкар лэско народо. О Иегова свынто андэ вся. И кай и израильтяноря тэ сэрэн пала када, пэ сомнакуни пластина по тюрбано кай о само баро рашай, сас пистромэ: «О Иегова свынто» (Исх. 28:36—38).

⁷ Кадэя надпись дэлас всаворэнди, ко ла диқэл, тэ сэрэн, кай о Иегова свынто. Но най всаворэ израильтяноря моӷли тэ диқэн лэ само барэ рашас. Тоди можно тэ ԥэнэс, кай вонэ на ӷанэнас када? Най. Всаворэ мурша, жувля и бэяцэ ашунэнас пала када, кала адинонас лэ Моисеёско законо (Втор. 31:9—12). Прецтавьте, кай тумэ тердён вмести всаворэнца и ашунэн кацавэ алава: «Мэ о Иегова, тумаро Дэл. [...] Авэн свынти, важ кода кай мэ свынто». «Авэн свынти важ мандэ, важ кода кай мэ, о Иегова, свынто» (Лев. 11:44, 45; 20:7, 26).

8. Со амэ можэм тэ полас, кала адиносарас Левит 19:2 и 1 Петра 1:14—16?

⁸ Давайте май бут шаса сама пэ алава, савэ кадяжэ адинонас англа всаворя израильтяноря. Вонэ запистромэ андэ Левит 19:2: «Авэн свынти, важ кода кай мэ, тумаро Дэл Иегова, свынто». Май ӥто всаворэстар, имено пала кадэя заповедь ԥэндя о Пётро. (Адиносар 1 Петра 1:14—16.) Канешно, и христианоря на трэбуй тэ ритярэн лэ Моисеёско законо. Но если о Пётро шутя сама пэ кадэла алава, значит, вонэ поджан и каринг амэндэ. Да, о Иегова свынто, и кодэлэнди, ко любий лэс, трэбуй тэ терэн вся, кай тэ авэн свынти. Кадэла алава поджан каринг всаворэ лэстирэ служытеля, и нэ важно, надеинпэ вонэ тэ жувэн по нэбо или андо раё пэ ԥув (1 Пет. 1:4; 2 Пет. 3:13).

«АВЭН СВЫНТИ АНДЭ ВСЯ, СО ТУМЭ ТЕРЭН»

9. Васо авелоп драго тэ роздиқас 19 ӷлава Левит?

⁹ Если амэ камас, кай амаро свынто Дэл Иегова тэ авэл амэнца довольно, амэнди трэбуй тэ уӷанас, сар амэ екжэнэ тэ авас свынти. И о Иегова подробно росԥэнэн пала када. Бут со можно тэ уӷанас анда 19 ӷлава Левит. Акэ со пала латэ росԥэндя ек еврейско учоно, савэс ақарэн Маркусо Калишо: «Можно тэ ԥэнас, кай кадэя удивительно ӷлава со май важно часть анда книӷа Левит и анда вся пятикнижыя». Давайте подаса дума пала дэсавэ стихоря анда кадэя ӷлава и уӷанаса, сости амэ можэм тэ сытювас. Кадяжэ на ласа тэ бистрас, кай и законоря андэ кадэя ӷлава начинаюца алавэнца «Авэн свынти».

10, 11. Со амэнди трэбуй тэ терас, сар ԥэнэнпэ андэ Левит 19:3, и васо када важно?

¹⁰ Посли алава: «Авэн свынти», о Иегова ԥэндя: «Стон патив по дад и пэ дэй... Мэ Иегова, тумаро Дэл» (Лев. 19:2, 3).

¹¹ Амэ трэбуй каринг оди тэ прилас лэ Дэвлэстирэ алава пала кода, кай трэбуй тэ стас патив пэ родителя. Еқвар ек тэрно мануш пушля кай о Иисусо: «Саво лашимос мэ тэ стерав, кай мандэ тэ авэл вечно жызня?». Пэ када о Иисусо ԥэндя лэсти, кай во кадяжэ трэбуй тэ стол патив по дад и по дэй (Матф. 19:16—19). Инке о Иисусо най еқвар ԥэнэнас, кай и фарисеёря и учителёря андо Израилё терэнас вся, лиш бы тэ на заботинпэ пала родителя. Сар ԥэндя о Иисусо, кадя вонэ отԥэнделэ лэ Дэвлэстирэ алавэстар (Матф. 15:3—6). Ай андэ када ужал о законо анда Левит 19:3 и панчто анда Дэш заповеди (Исх. 20:12). И упалэ, давайте тэ на бистрас, кай о законо тэ стас патив по дад и дэй жал сразу посли алава «Авэн свынти, важ кода кай мэ, тумаро Дэл Иегова, свынто».

12. Со тумэ можэте тэ пушэн пэстар? (Левит 19:3)

¹² Тумэ можэте тэ пушэн пэстар: став мэ патив пэ родителя? Можэт, тумэ полэн, кай най вся и время андярэнас пэс лэнца кадя, сар трэбуй. Да, кода, со сас, на парувэса, но тумэ можэте тэ стон цэль адесутнэ десэстар тэ стерэн вся па аврятэ. Погиндон: «Моӷу мэ тэ проандярав лэ родителёнэнца май бут время? Трэбуй лэнди варисави помощь па цэр? Подритярав мэ лэн, кай лэнди тэ авэл драго по ди и кай вонэ тэ на хасарэн и радость андэ служэния?» Кадэла вопросоря поможына тумэнди май драго тэ ритярэн лэ Дэвлэстири заповедь анда Левит 19:3.

13. а) Со за инке ек законо пистромэ андэ Левит 19:3? б) Со стердя о Иисусо, сар пистромэ андэ Луки 4:16—18, и сости амэ можэм лэстар тэ сытювас?

¹³ Андэ Левит 19:3 о Иегова ԥэндя, со инке трэбуй сас тэ терэн и израильтяноря, кай тэ авэн свынти: «Ритярэн мэрнэ субботы». Важ кода кай и христианоря на жувэн па лэ Моисеёско законо, амэ на ритярас и суббота. И всаек, если амэ погиндосараса пала кадэва законо и саво лашимос во анэнас лэ израильтянонэнди, амэ можэм бут сости тэ сытювас. В субботу и израильтяноря отцыёнас ла бутятар, и лэндэ сас май бут время важ о Дэлb. Имено в субботу о Иисусо авеля андэ синагога андэ пэско форо и ля тэ адиной лэ Дэвлэско алав (Исх. 31:12—15; адиносар Луки 4:16—18). Кала амэ гиндосарас пала законо важ и суббота, со тоди амэ камас тэ терас? Кажно дес тэ витидас время важ лэ Дэвлэстири дила, савэ бы заняти амэ тэ на авас. Вижал када тумэндэ или, можэт, тумэнди трэбуй варисо тэ парувэн? Если тумэ кажно дес витидэн время важ лэ Дэвлэстири дила, тоди тумэ ашэна май пашэ каринг о Дэл. Би кадэлэско нащи тэ авэн свынти.

АШЭН МАЙ ПАШЭ КАРИНГ О ДЭЛ

14. Саво важно гиндо бут разоря ԥэнэнпэ андэ 19 ӷлава Левит?

¹⁴ Кай тэ авас свынти, амэ трэбуй тэ прилас важно гиндо, пала саво бут разоря ԥэнэнпэ андэ 19 ӷлава Левит. В концэ андо штарто стихо ԥэнэнпэ: «Мэ Иегова, тумаро Дэл». Кадэла алава пистромэ андэ кадэя ӷлава 16 раз. Вонэ шонпэ пэ само пэрво заповедь: «Мэ Иегова, тиро Дэл... Тутэ на трэбуй тэ авэн авэр дэвла, ай кати мэ» (Исх. 20:2, 3). О христианино, саво камэл тэ авэл свынто, на домэкэла, кай варико или варисо тэ одындярэл лэс лэ Дэвлэстар. И важ кода кай амэ ԥэнас пэр пэстэ лэ Иеговастирэ свидетеля, амэ никала на стераса кода, со мэлярдоп лэско свынто алав (Лев. 19:12; Ис. 57:15).

15. Со амэ камас тэ терас, кала адиносарас андэ 19 ӷлава Левит, сар трэбуй сас тэ анэн и жэртвы?

¹⁵ И израильтяноря трэбуй сас тэ ритярэн бут законоря, кай тэ прижанэн лэ Иеговас пэстирэ Дэвлэса. Андэ Левит 18:4 ԥэнэнпэ: «Жувэн па мэрнэ законоря и ритярэн мэрнэ заповеди. Мэ Иегова, тумаро Дэл». Дэсавэ анда кадэла заповеди пистромэ андэ 19 ӷлава Левит. Например, андэ стихоря 5—8, 21 и 22 ԥэнэнпэ, сар и израильтяноря трэбуй сас тэ анэн андэ жэртвы лэ жывотнонэн. Если бы о израильтянино жылоп против кадэла алава, кадя во маӷрисардоп кода, со свынто важ о Иегова. Ай со через кадэла алава камэн тэ терэн и христианоря? Сар ԥэнэнпэ андэ Евреям 13:15, амэ камас тэ отдас лэ Иеговасти амари хвала. Када лэс фартэ радуий.

16. Саво принцыпо анда 19 ӷлава Левит сыкавэл, кай лэ Дэвлэстирэ служытеля на трэбуй тэ шонпэ пэ авэр мануша?

¹⁶ Если амэ камас тэ авас свынти, амэ трэбуй тэ стас зор, кай тэ на шаспэ пэ мануша андэ кадэва миро. Но када найвушэро. Дэкала авэр мануша, например кодэла, каса амэ сытювас андэ школа, терас бути или о родо, савэ най свидетеля, моӷут тэ подмарэн амэн, кай амэ тэ стерас кода, со на диноп амэнди тэ служысарас лэ Иеговасти кадя, сар во камэл. Андэ кацавэ маменторя амэ трэбуй тэ прилас серьёзно ришэния. Со амэнди поможыя? Шон сама по принцыпо анда Левит 19:19: «На лэн пэр пэстэ ӥда, сави суди анда разни ҭава». Блаӷодаря кадэлэ законости и израильтяноря на шонаспэ пэ авэр народоря. Канешно, и христианоря нэ против тэ ԥиравэн ӥда, сави суди анда разно материя, например анда хлопко и синтэтика. Но амэ против, кай тэ ашас кацавэ жэ, сар и мануша, савэ на жувэн па Библия, дажэ если вонэ сытён амэнца андэ школа, терэн амэнца бути или амаро родо. Канешно, амэнди куч амарэ чаче и амэ любисарас амарэ пашутнэн. Но всаек, андэ кацавэ серьёзни вопросоря амэ, сар лэ Дэвлэстирэ служытеля, на камас тэ шаспэ пэ авэр мануша. Када фартэ важно, важ кода кай, сар амэ дям дума андэ кадэя статья, и святость сыкавэл, кай амэ отделимэ важ и служэния лэ Дэвлэсти (2 Кор. 6:14—16; 1 Пет. 4:3, 4).

17, 18. Сости амэ сытювас анда кода, со пистромэ андэ Левит 19:23—25?

¹⁷ И алава «Мэ Иегова, тумаро Дэл» дэнас лэ израильтянонэнди тэ сэрэн, кай вонэ трэбуй тэ стон и дружба лэ Иеговаса по пэрво ҭан андэ жызня. Пала кадэва гиндо май драго росԥэнэнпэ андэ Левит 19:23—25 (адиносар). Погиндон, со кадэла алава сыкавэнас важ и израильтяноря, кала вонэ зажылэ пэ Обетованно ԥув. Если о израильтянино садияс и витка, во нащи сас тэ хал плодоря пар латэ трин бэрш. По штарто бэрш во трэбуй сас тэ анэн уражаё сар подарко лэ Иеговасти. И кати по панчто бэрш во моӷ тэ хал плодоря па кодэя витка. Кадэва законо напоминал лэ израильтянонэнди, кай вонэ на трэбуй сас тэ гиндон кати пала пэстэ. По пэрво ҭан андэ жызня вонэ трэбуй сас тэ стон и служэния лэ Иеговасти и тэ сэрэн, кай во можэт пала лэндэ тэ позаботийпэ и лэсти найԥарэс тэ проправарэл лэн. Кадяжэ о Дэл ԥэнэнас лэ израильтянонэнди, кай вонэ тэ подритярэн и служэния через и пожэртвования.

¹⁸ О законо анда Левит 19:23—25 шолпэ пэ алава, савэ ԥэндя о Иисусо: «Нэ пэрэжывайте пала пэстири жызня, со тэ хан или со тэ пэн». Тоди о Иисусо росԥэндя васо: «Тумаро небесно Дад ӷанэн, кай тумэнди вся када трэбуй». Если о Дэл заботийпэ дажэ пала птицы, во обязательно позаботияпэ и пала амэндэ (Матф. 6:25, 26, 32). Амэ андэ вся патяс лэ Иеговасти. Кадяжэ амэ дас помощь кодэлэнди, касти када трэбуй. Инке амэ поможысарас лэ ловэнца андэ собрания. Хоть амэ и на хвалисавас всаворэнди пала пэстири лащи дила, о Иегова шол сама пэ амари щедрость и обязательно блаӷословия амэн (Матф. 6:2—4). Если амэ подритярас лэ Иеговастири дила лэ ловэнца, амэ сыкавас, кай жувас па принцыпо анда Левит 19:23—25.

19. Савэ важни гиндоря тумэ уӷанглэ анда кадэя статья?

¹⁹ Андэ кадэя статья амэ подям дума кати пала дэсавэ стихоря анда 19 ӷлава Левит и уӷанглям, сар амэ можэм тэ лас примеро амарэ свынтонэ Дэвлэстар. Важ кода кай кати кадя амэ можэм тэ авас свынти андэ вся (1 Пет. 1:15). И мануша диқэн, сар амэ пэс андярас, и када лэн кадя лэл лэ одестар, кай дэсавэ дажэ лэн тэ славин лэ Иеговас (1 Пет. 2:12). Но андэ 19 ӷлава Левит исин и бут авэр важни гиндоря. Амэ подаса дума пала лэндэ андэ авэр статья и роздиқаса, сар инке амэ можэм тэ сыкавас, кай жувас па лэ Петростирэ алава «Авэн свынти».