Faptele
2 Code arachlea ieche iudeos po anav Aquila, cai țârdelas-pe anda o Pont, cai avilea de țâra timpo andi Italia ande iech than lesca rromniaia, i Priscila, anda codoia că o Claudiu poruncisardea ca sea le iudei te tiliaren andai Roma. Cadea că, gălea lende 3 hai, anda codoia că jianenas te cheren sa codoi buchi, așilea ande lengo chăr hai cherelas buchi lența, anda codoia că lenghi buchi sas te cheren țărhea. 4 Vo încărelas iech cuvântarea andi sinagoga ande fiesavo sabato hai delas duma cadea că le iudei hai le greci pachianas-les. 5 Cana o Sila hai o Timotei avile tele andai Macedonia, o Pavel cărdea zurales but anda i predicarea le cuvântoschi hai sicadea le iudeienghe că o Isus si o Cristoso. 24 Iech iudeo po anav Apolo, andai Alexandria, avilea co Efes. Vo delas duma zurales mișto hai prinjianelas mișto le Scripturi. 25 Cado manuș sas-lo sicado o drom le Iehovasco hai, astardo spiritostar, delas duma hai sicavelas mișto le buchia anda o Isus, tha prinjianelas numai o bolimos le Ioanosco. 26 Vo începosardea te del duma pherdo tromai andi sinagoga. Cana așunde-les i Priscila hai o Aquila line-les de iech partea hai sicade-les mai mișto o drom le Devlesco.