Revelația
12 Pala codoia iech baro semno sas dichlo ando cerii: iech jiuvli huriadi le chameia, tela lache pânre sas o șionoto hai pe laco șăro sas-la iech coroana anda 12 cerhaia. 2 Voi sas-li phari hai delas cingar ande lache ducha hai chinuri le naștereache. 3 Hai iech aver semno dichlea-pe ando cerii. Ita: iech baro balauro lolo sar i iag, saves siles efta șăre hai deș șinga hai pe lesche șăre si efta coroane; 5 Voi cărdea iech șiavo, iech țâno murș, ande lesco vast va avela iech toiago anda sastrî saveia va păstorila sea le națiunen. Laco șiavo sas-lo îngărdo sigo co Del hai ca lesco trono. 6 I jiuvli nașlea ando pustio, cai sas-la iech than pregătime le Devlestar hai cai avelas te del-pe lache hamos 1 260 ghiesa. 7 Hai ando cerii astardea iech războio: o Mihael hai lesche îngeri marde-pe contra o balauro, hai vi o balauro hai lesche îngeri marde-pe, 8 tha ci câștighisarde hai nici na mai arachlea-pe than ando cerii anda lende. 9 Cadea că, o balauro o baro, o purano sap, codo cai bușiol Beng hai Satan, cai athavel sea le manușen pa i phuv, sas-lo șiudino tele. Sas-lo șiudino pi phuv, hai lesche îngerea sas-le șiudine ande iech than lesa. 10 Hai așundem iech zuralo glaso ando cerii, cai phenelas: „Acana avilea i salvarea, o zuralimos hai o Regato amare Devlesco, hai vi o zuralimos lesche Cristososco, anda codoia că codo cai doșarel amare phralen, savo doșarel-le ghies hai riat angla amaro Del, sas-lo șiudino tele! 12 Anda codoia, bucurin-tume, ceruri hai tumen, cai beșen ande lende! Tha vai de tumende, phuv hai marea, pentru că o Diavolo hulisto tumende astardo iecha barea holiatar, jianglindoi că mai siles țâra timpo!”. 14 Tha la jiuvleache sas lache dine codola dui phaca iecha barea acvilache caște zburil ando pustio, cai sas-lo pregătime anda late, cai avelas te del-pe lache haben iech timpo, timpuria hai iech dipaș timpo, dur catar o mui le sapesco. 15 Hai o sap șiordea anda pesco mui pai sar iech bari len pala i jiuvli, caște avel nachadi catar i bari len. 17 Hai o balauro holiardea-pe pi jiuvli hai gălea te marel-pe codolența cai așile anda lache șiave, cai încăren le porunci le Devlesche hai savenghe sas dini i buchi te den duma anda o Isus.