So daștis te cheres caște trais ande iech lumea nevi

Le articolea cai sas mai anglal sicade că na pa but timpo o Del va anela o sfârșito cadala lumeaco nasul hai sea le pharimata cai voi andea-le ci va mai avena. Daisaras te pachias ciaces cadai buchi. Sostar? O Cuvânto le Devlesco, i Biblia, phenel amenghe:

„I lumea nachel”. (1 IOAN 2:17)

Daisaras te avas siguri că va avena vi manușa cai va așena andi viața anda codoia că sa codo verseto phenel:

„Con cherel i voia le Devleschi așel anda sea o timpo”.

Anda codoia, dacă camas te așias andi viața, trebul te cheras i voia le Devleschi. Caște dichas savi si i voia le Devleschi, trebul mai anglal te prinjianas-les.

DAISARAS TE AȘIAS ANDI VIAȚA DACĂ ‘ARĂSAS TE PRINJIANAS’ LE DEVLES

Colajo: 1) Iech asistenta medicalo așel pe iech holo anda spitalo, chini hai peradi. 2) Voi lel iech pauza ca i cafeteria hai dichel pesca colega că citil bucurime iech revista. 3) I colega citil lache iech verseto Biblico hai del-la iech cartea de vizită pe savi si o site-o jw.org.

O Isus phendea: „Cadaia însemnol i viața veșnico: te arăsăn te prinjianen tut, o corcoro ciacio Del”. (Ioan 17:3) Caște așias andi viața pala o sfârșito hai te traisaras veșnico, trebul ‘te arăsas te prinjianas’ le Devles. Trebul te jianas mai but sar că o Del existil sar te prinjianas chichiva buchia anda leste. Trebul te avas amala leia. Ca iech amalimos te avel chidino, trebul te beșas ande iech than amare amaleia. Sa cadea si vi le buchia ando amalimos le Devleia. Te dichas chichiva bare ciacimata andai Biblia cai ajutin-ame te phandas iech șucar amalimos le Devleia hai te încăras-les.

Ciacimata cai sichioas-le andai Biblia

O Del camlea ca le manușa te train ando Paradiso

Vo cărdea le iechto manușen, o Adam hai i Eva, hai șiutea-le andi bar le Edenoschi, iech than zurales șucar. Von las-le perfecți hai o Del dea-le sea so trebulas-le caște avel len iech viața fericime. Daștinas te train veșnico. Dacă avileas te așen amala le Devleia, avileas te na meren niciechdata. Tha alosarde te na respectin iech porunca cai dea-la lenghe o Del.

Jianas sostar si amen aghies pharimata

Anda codoia că ci ascultisardea le Devlestar, o iechto manuș, Adam, hasardea i posibiblitatea te trail veșnico hai cărdea ca vi sea le manușa cai avile pala leste te hasaren cadai posibilitatea. I Biblia phenel: Prin iech corcoro manuș dea o bezăh andi lumea hai prin o bezăh o merimos, hai cadea o merimos nachlo ca sea-l manuș”. (Romani 5:12) Cadea sar iech nasfalimos genetico nachel catar le dada ca o șiavo cai năștil-pe, sa cadea le șiave le Adamosche line i imperfecțiunea lestar. Anda codoia, sea le manușa phurion hai meren.

O Del cărdea deja vareso anda amende

I Biblia phenel: „Cadea de but iubisardea o Del la lumea, că dea pesche Șiaves unico-năștime, că oricon sicavel pachiamos ande leste te na avel distrugime, tha te avel-les viața veșnico”. (Ioan 3:16) O Del bișialdea le Isusos pi phuv caște del peschi viața anda amende. Dich so phenel o Prabhakar, iech murș anda India cai siles 86 bărșa, anda cado daro pherdo iubirea: „Cadaia sicavel i bari iubirea le Iehovaschia anda mande. Leschi iubirea dea-ma i speranța te traisarav veșnico.

Sar daisaras te sicavas amari aprecierea anda so cărdea o Del anda amende

I Biblia phenel că daisaras te sicavas amari aprecierea anda so cărdea o Del anda amende amende ‘cana respectisaras lesche porunci’. (1 Ioan 2:3) O Iehova Del pherdo iubirea sicavel amenghe so daisaras te cheras caște bucurisaras-ame viațatar aghies. (Isaia 48:17, 18, nota de subsol) O Del ci camel te avas duchade. Vo phenel amenghe că, dacă respectisaras lesche sfaturi, va avela-ame iech viața fericime aghies hai, mai but sar cadaia, va daisaraia te traisaras veșnico.

CITISAR ANDE FIESAVO GHIES O CUVÂNTO LE DEVLESCO, I BIBLIA

I asistenta dichel caring o cerii pala so citil andai Biblia cana sili avri ande lachi pauza. — Daștis te așes andi viața cana va avela o sfârșito la lumeaco dacă manghes le Devles te ajutil-tu, hai cheres leschi voia.

Caște așias andi viața, si importanto te zuriaras amaro pachiamos ande fiesavo ghies. Tha o Isus phendea: „Tha, vo phendea lesche parpale: „Si scriime: «O manuș te na trail numai manreia, tha vi orisave cuvântoia cai înclel anda o mui le Iehovasco”. (Matei 4:4)

Aghies, arachas le cuvintea le Iehovasche andi Biblia. Chichi va avela te studiis mai but cado lil sfânto, va avela te sichios bare ciacimata anda so cărdea, so cherel hai so va cherela o Del andal manușa.

MANG LE DEVLES TE AJUTIL TUT

So daștis te cheres dacă cames te ascultis le Devlestar, tha si tuche pharo te meches le buchia cai vo phenel că sile greșime? Dacă san ande cadai situația, iech prinjianimos exacto anda o Del daștil te ajutil tut.

Sar exemplo, iech jiuvli, casche va avela te phenas Sakura, cai sas-la iech viața imoralo, începosardea te studiil i Biblia. Voi așundea anda i porunca le Devleschi te ‘nașel catar i imoralitarea sexualo’. (1 Corinteni 6:18) I Sakura manglea le Devles te del-la zuralimos hai daisardea te mechel i viața imoralo cai sas-la. Cu sea cadala, voi trebul mai dur te așel contra le tentații. Voi phenel: „Cana avel ande mânri goghi gânduri imoralo, rughiv-ma le Iehovasche hai phenav lesche sea so si ande mânro ilo, hai jianav că vo ci mechel-ma corcori ande cadai lupta. I rugăciunea ajutisardea-ma te pașioav mai but le Iehovastar”. Cadea sar i Sakura, milioanea manușa arăsăn te prinjianen le Devles. Vo del-le o zuralimos caște cheren paruimata hai te avel-le iech viața ciaci ande lesche iacha. (Filipeni 4:13)

Chichi va avela te prinjianes mai mișto le Devles, cadichi chio amalimos leia va avela vi mai chidino hai va avela te arăsăs ‘te aves prinjiando lestar’. (Galateni 4:9; Psalmo 25:14) Cadea, va avela te așes andi viața cana va avela o sfârșito hai va avela te trais andi lumea nevi le Devleschi. Tha sar va avela i viața andi lumea nevi? O articolo cai avel sicavel o răspunso.

a Iehova si o anav le Devlesco cadea sar sicavel i Biblia.