Von dichle sar si i ciaci iubirea le phralenghi

I YOMARA hai lache phrala, Marcelo hai Hiver, beșen ande iech gav anda Guatemala. I Yomara astardea te studiil le Martorența le Iehovasche, hai pala codoia vi lache dui phrala. Tha trebunas te nachen părdal iech baro pharimos. Sea le trin sas-le core hai, cana astarde te studiin ci jianenas te citin ande Braille. Anda codoia, o phral casa studiinas citilas le paragrafea hai le versetea biblico.

Iech aver pharimos sas te jian ca le întruniri. Anda codoia că i mai pașă sala sas ca 40 minutea lendar, von ci daștinas te jian corcore. Tha le phrala andai congregația ajutisarde-le te arăsăn ca sea le întruniri. Hai mai târzio, cana primisarde teme andal cursanți ca i întrunirea anda o mașcar le curchesco, le phrala repetisarde ande iech than lența, caște daștin te sichion-le hai te încăren-le ande penghi goghi.

Ando mai 2019, le întruniri astarde te încăren-pe chiar ande lengo gav. Ando timpo, code muchisardea-pe iech familia de pionieri regulari. Von camle anda sea o ilo te sicaven le trine tărnen o sistemo Braille. Tha sar avenas te cheren cadaia dacă nici von ci prinjianenas-les? Von găle ca iech biblioteca hai line othar chichiva lila cai sicavenas o alfabeto Braille hai sar daștil te avel sicado averenghe.

Ande numai chichiva șiona, i Yomara, o Marcelo hai o Hiver sichile te citin mișto ande Braille hai, pala codoia barile spiritualo.a Acana, sea le trin slujin sar pionieri regulari, hai o Marcelo si vi slujitoro auxiliaro. Anda codoia că cheren but buchia anda o Iehova, lenghi bucuria hai zelo zuriaren vi averen.

Anda cadal trin tărne si zurales cuci o ajutorii cai den-les lenghe le phrala andai congregația. I Yomara phenel: „Le Martori sicade amenghe iech ciaci iubirea încă de anglal”. O Marcelo mai phenel: „Si man lașe amala andi congregația hai simțosarav că cherav partea anda iech familia internaționalo cai sili phangli prin iubirea”. Sea le trin abia ajucăren te dichen o ghies cana sea i phuv va avela iech paradiso. (Ps. 37:10, 11; Is. 35:5)