Chiar cana somas zurales lajiavuni arăslem iech misionara

Năștisailem ando bărș 1951 andi Viena (Austria), ande iech familia catolico. Somas iech șei lajiavuni, tha sas man pachiamos ando Del hai manglem man butivar. Cana sas man enia bărșa, mânro dad astardea te sichiol andai Biblia le Martorența le Iehovasche, hai, pala țâra timpo, vi mânri dei.

Na pala but timpo, găleam ca i congregația Döbling anda Viena. Cherasas but buchia ande iech than sar familia: citisardeam hai sichileam andai Biblia, găleam ca le întruniri, hai ajutisardeam ca le congresea. Încă de cana somas țânorri, mânro dad ajutisardea man te iubiv mai but le Devles. Mai but, vo manghelas-pe sea o timpo ca me hai mânri phei te avas pioniere. Tha, ande codo timpo, me ci camlem.

ASTARAV TE DAV SEA MÂNRO TIMPO ANDI BUCHI LE IEHOVASCHI

Boldem man ando bărș 1965, cana sas man 14 bărșa. Tha, andi predicarea, sas manghe pharo te dav duma le manușența cai ci prinjiandemas-len. Butivar pachiaiem că le coaver tărne si mai lașe sar me hai camlem te dichen man lașe iachența. Cadea că, ca țâra timpo pala so boldem man, cărdem manghe amala cai ci slujinas le Iehovasche. Ciaiolas man te beșav lența, tha mânro ilo doșarelas man anda codoia că jianglem că na-i mișto te beșav but timpo codolența cai ci slujin le Iehovasche. Tha ci sas man o zuralimos te cherav iech paruimos. So ajutisardea man?

Ande codo timpo, iech tărni cai sas-la 16 bărșa, po anav Dorothée, cărdilea vestitoarea ande amari congregația. Dichlem chichi de but ciaiolas-la i predicarea chăr chărestar. Chiar cana me somas iech țâra mai bari sar voi, ci cărdemas cadea de but andi predicarea. Gândisardem man: „Mânro dad hai mânri dei sile Martori, hai voi si corcori co ciacimos. Cu sea că lachi dei si nasfali, i Dorothée jial sea o timpo andi predicarea”. O șucar exemplo cadala tărneaco zuriardea man te cherav mai but anda o Iehova. Pala țâra timpo, me hai i Dorothée astardeam o pionierato ande iech than. Mai anglal, cărdeam o pionierato auxiliaro hai pala codoia slujisardeam sar pionierea regularo. Anda codoia că cadala pheia ciaiolas-la cadea de but te jial andi predicarea, vi man astardea te ciaiol man te jiav andi predicarea. Voi ajutisardea man te astarav te sichioav varecasa andai Biblia. Ando timpo, sas manghe mai ușoro te dav duma chăr chărestar, po drom sau ande aver thana.

Ando iechto bărș cana astardem te slujiv sar pioniera regularo, ande amari congregația avilea iech phral austriaco, po anav Heinz. Vo prinjiandea o ciacimos andi Canada, cana gălea ca pesco phral, cai sas-lo Martoro. O Heinz sas bișialdo ande amari congregația andi Viena sar pioniero specialo. Ciailea man lestar de cana dichlem-les. Tha vo camelas te cărdiol misionaro, hai me ci camlemas cadaia. Cadea că, mai anglal ci phendem lesche că ciaiol man lestar. Tha, pala iech timpo, me hai o Heinz astardeam te prinjianas amen mai mișto, leam amen hai astardeam te cheras o pionierato ande iech than andi Austria.

ASTARAV TE CAMAV TE SLUJIV SAR MISIONARA

O Heinz phenelas manghe butivar chichi de but camel te avel misionaro, tha ci phendea manghe niciechdata că trebul vi me te avav misionara. Vo ajutilas man te gândisarav man cadalate hai șiolas manghe pușimata sar avelas: „Dacă na-i amen șiave, ci daisaras te cheras mai but andi buchi le Iehovaschi?”. Chiar cana somas pioniera, pachiaiem că si prea pharo anda mande te avav misionara. Cu sea cadala, o Heinz, pherdo răbdarea, dea duma manța mai dur anda cadaia. Vo ajutisardea man te gândisarav man mai but sar daștiv te ajutiv le manușen, ando than te gândisarav man prea but mande. So phendea manghe sas so trebulas te așunav.

Țâra po țâra, astardem te camav te avav misionara, cadea că cărdeam iech cererea anda i Școala Galaad. Tha o phral cai cherelas buchi co birouo le Betelosco phendea manghe că mai anglal trebul te sichioav mai mișto i șib englezo. Pala so nachle trin bărșa de cana dem mânri zor de sichioav cadai șib, bi te ajucăras amen, samas bișialde ande iech congregația andai șib sârbo-croato anda Salzburg (Austria). Slujisardeam ande cado teritorio efta bărșa, hai iech anda cadal bărșa mânro rrom slujisardea sar o phral cai vizitil le congregații. I șib sârbo-croato sas phari. Cu sea cadala, samas bucurime că astardeam te sichioas andai Biblia bute manușența.

Pala codoia, ando bărș 1979, le phrala anda o Betelo phende amenghe te jias iech țâra timpo andi Bulgaria. Anda codoia că i buchi anda o Iehova sas-li așadi ande cado them, le phrala phende amenghe te phiravas amen sar cana sam andi vacanța. Cadea că ci predichisardeam, tha leam amența garades țâne lila anda le panji pheia cai beșenas andi Sofia, i capitala le themeschi. Chiar cana darailem, o Iehova ajutisardea man hai dea man zuralimos. Sas iech buchi phari, tha vi șucar. Dichleam o tromai cadale pheiango hai lenghi bucuria, chiar cana i poliția daștilas oricana te astarel-len hai te phandavel-len. Lengo șucar exemplo dea man o tromai te cherav sea so camel o Iehova mandar ande leschi buchi.

Pala iech timpo, mai cărdeam iech cererea anda i Școala Galaad, hai acana, samas acharde. Pachiaiam că va avela te cheras i școala andel State Unite. Tha, ande noiembria 1981, astardea te cherel-pe i școala vi ando Wiesbaden (Germania). Anda codoia că o materialo sas andi șib germano, sas manghe mai ușoro te hachiarav-les. Tha cai avelas te avas bișialde?

SAMAS BIȘIALDE ANDE IECH THEM CAI SI BUT RĂZBOAIA

Pala i școala, samas bișialde andi Kenya. Cu sea cadala, i filiala anda Kenya pușlea amen dacă daisaras te slujisaras andi Uganda, iech them cai sas pașă. Mai but sar deșe bărșența mai anglal, i armata angla savi sas o generalo Idi Amin dea tele o guverno anda Uganda. Ando timpo lesche raimasco, mii manușa sas-le mudarde hai milioanea manușa îngărenas iech viața zurales phari. Pala codoia, ando bărș 1979, o guverno anda Uganda pale sas-lo dino tele. Cadea că, daștin te hachiaren sostar sas manghe dar te jiav ande codo them. Tha i Școala Galaad ajutisardea amen te șioas amaro pachiamos ando Iehova, cadea că găleam cai samas bișialde.

I viața andi Uganda sas zurales phari. O guverno ci daștilas te del le manușenghe pai, curento sau aver buchia cai trebulas lenghe. Le telefoanea ci jianas. Le manușa mudarenas-pe iech averes hai ciorenas, vi mai but andi riat. Cadea că, cana sas tunerico, savore așenas chăre hai manghenas-pe ca chonic te na avel te ciorel lenghe buchia sau te mudarel-len. Chiar cana i viața sas zurales phari, le phrala hai le pheia anda Uganda încărde zuralo pengo pachiamos.

Ande 1982, me hai o Heinz arăsleam ande Kampala, i capitala le themeschi. Mai anglal, panji șiona, beșleam ando chăr la familiaco Waiswa, o Sam hai i Christina. Von primisarde amen ande lengo chăr, chiar cana sas-len panji șiave hai beșenas ande iech than încă ștare neamurența. Butivar, o phral hai i phei Waiswa, ande iech than penghe șiavența, daștinas te han numai iech data po ghies. Tha von sas gata te den vi amenghe anda penghe buchia. Sode timpo beșleam cadala familiasa, me hai o Heinz sichileam but buchia cai ajutisarde amen ande amari viața sar misionari. Sar exemplo, sichileam sar te halavas amen țâra paiesa hai pala codoia te folosisaras codo pai andi toaleta. Ande 1983, me hai o Heinz arachleam amenghe iech chăr ande iech than mai siguro andi Kampala.

I predicarea anelas amenghe but bucuria. Anav manghe amintea că, ande iech șion, deam mai but sar 4 000 revistea. Tha so anelas amenghe mai but bucuria sas le manușa. Len sas-len iech bari pachiv caring o Del hai camenas te den duma andai Biblia. Butivar, me hai o Heinz încărdeam mașcar 10 hai 15 studii biblico. Ande codo timpo, sichileam but buchia codolendar casa studiisardeam andai Biblia. Sar exemplo, chiar cana trebunas te jian telal ca le întruniri ande fiesavo curco, von ci rovarenas-pe niciechdata hai sea o timpo sas-le fericime.

Ande 1985 hai 1986, pale sas dui războaia andi Uganda. Dichleam butivar șiave cai sas-len arme. Von sas-le folosime caște dichen con nachelas po drom. Mangleam amen butivar le Iehovasche caște jianas so te cheras hai te avel amen pacea ando ilo, ando timpo so rodeam le manușen cai camenas te prinjianen o ciacimos. Hai o Iehova așundea amare manglimata. Butivar, bâstărdeam amare daraimata cana arachleam varecas cai camelas te așunel o mesajo anda o Regato.

Samas zurales bucurime cana predichisardeam vi le manușenghe cai avile anda aver thema. Sar exemplo, studiisardeam iecha familiasa anda Tatarstan (i Rusia Centralo). Von bușionas Murat hai Dilbar Ibatullin. O Murat cherelas buchi sar medico. Le dui cărde o bolimos hai slujin mai dur le Iehovasche anda sea o ilo. Pala codoia, arachleam iecha jiuvlea andai Ucraina cai bușiolas Tatiana Vileiska, cai sas-li cadea de peradi că camlea te mudarel-pe. Pala so cărdea o bolimos, i Tatiana gălea parpale andi Ucraina hai, pala iech timpo, astardea te traducil amare lila andi șib ucrainiano.a

SLUJISARAS ANDE IECH AVER THEM

Ande 1991, cana me hai o Heinz samas andi vacanța andi Austria, i filiala scriisardea amenghe hai phendea amenghe că va avela te jias ande iech nevo them: Bulgaria. Pala so ci mai sas o comunismo andi Europa de Est, i buchi le Martorenghi le Iehovaschi andi Bulgaria arăslea te avel prinjiandi legalo. Pala sar phendeam mai anglal, me hai o Heinz andeam garades lila ande cado them cana amari buchi sas-li așadi. Tha, acana, samas bișialde code caște predichisaras.

Le phrala phende amenghe te na mai jias parpale andi Uganda. Cadea că ci daisardeam te jias ca amaro chăr caște las amare buchia sau te las amenghe lașio ghies amare amalendar. Găleam co Betelo andai Germania, cai sas amenghe dini iech mașina, hai pala codoia găleam caring i Bulgaria. Code samas bișialde andi Sofia, ande iech grupa ande savi sas cam 20 vestitori.

Andi Bulgaria sas amen neve pharimata. Ando iechto than, ci prinjiandeam i șib. Mai but, andi șib bulgaro sas numai dui anda amare lila: O ciacimos cai îngărel ca i viața veșnico hai Sicaimata biblico anda le șiavorre. Sa cadea, sas zurales pharo te astares te sichios le manușența andai Biblia. Chiar cana sas cadal pharimata, amari țâni grupa predichisardea iagasa ando ilo. Cadai buchi sas dichli catar i Changheri Ortodoxo hai atunci astarde te aven opral amende le ciace pharimata.

Ande 1994, amari organizația ci mai sas-li prinjiandi legalo hai le manușa astarde te phiraven-pe amența sar cana samas iech secta periculoso. Chichiva phrala sas-le phandade. Ca le știri, phenenas-pe hohaimata nasul anda le Martori le Iehovasche. Phenelas-pe că mudaren penghe șiaven hai șion penghe manușen te mudaren-pe corcore. Sas zurales pharo te predichisaras. Butivar, me hai o Heinz arachleam manușa cai denas cingar caring amende, șiudenas buchianța hai acharde i poliția. Ci daisardeam te primisaras lila biblico ando them hai sas sea mai pharo te arachas thana cai te încăras amare întruniri. I poliția chiar așadea o programo ieche congresosco. Me hai o Heinz ci samas sicade ca le manușa te phiraven-pe cadichi de nasul amența. Chichi de diferime sas cado teritorio codolestar andai Uganda, cai le manușa sas-le lașe hai camenas te prinjianen mai but le Devles! So ajutisardea amen te nachas prin cado paruimos?

Samas zurales bucurime că beșleam ande iech than amare phralența hai pheianța. Von sas-le fericime anda codoia că arachle o ciacimos hai dichle cuci o ajutoro cai amen deam-les lenghe. Așileam iech pașa aver hai zuriardeam amen iech averes. Ande codo timpo, sichileam că daisaras te avas fericime oricai avelas te slujisaras dacă gândisaras amen mai but le manușende, ando than te dichas mai but le pharimata.

Tha, ando timpo, i situația lașiardea-pe. Ande 1998, amari organizația sas pale prinjiandi legalo hai, pala țâra timpo, sas amen mai but lila andi șib bulgaro. Pala codoia, ande 2004, sas iech baro ghies: sas dedichime amari filiala. Acana, andi Bulgaria slujin 2953 phrala hai pheia, cai sile ande 57 congregații. Hai ando bărș de servicio cai nachlo, ca i Comemorarea avile 6 475 manușa. Chiar cana mai anglal andi Sofia slujinas numai panji pheia, acana cade si enia congregații. Dichleam amare iachența sar ‘codo țâno arăslea iech mia’. (Is. 60:22)

NACHLEAM PRIN PHARIMATA PERSONALO

Somas vi nasfali. Ande cadal bărșa, sas man mai but tumori, iech anda lende chiar po creiero. Cărdem radioterapie hai pala codoia iech operația de 12 ore andi India caște avel duriardi i mai bari partea andai tumoarea. Beșleam iech timpo ca i filiala andai India caște cherav man pale mișto, hai pala codoia găleam parpale andi Bulgaria.

Le medici phende mânre rromesche că siles iech nasfalimos raro cai bușiol Huntington. Cado nasfalimos cherelas te avel lesche pharo te jial, te del duma hai te mișchil-pe. Sas sea mai pharo lesche te descurchil-pe corcoro hai sas-les mai but nevoia mânre ajutorostar. Poiechdata, i situația ande savi samas hai i dar că ci daștiv te lav sama lestar perade man. Ande codo timpo, ajutilas amen iech phral tărno cai bușiolas Bobi hai cai acharelas butivar mânre rromes andi predicarea. Le Bobesche ci sas lesche lajiav anda o modo sar delas duma mânro rrom sau sar mișchilas-pe. Daisardem sea o timpo te mangav o ajutoro cadale tărnesco cana me ci daisardemas te ajutiv mânre rromes. Chiar cana me hai mânro rrom alosardeam te na avel amen șiave ande cado sistemo, simțosardeam că o Iehova dea amen iech șiavo, le Bobes. (Mar. 10:29, 30)

Mânre rromes, o Heinz, sas-les vi cancero. Fal manghe nasul că, ande 2005, mânro rrom mulea. Pala lesco merimos, simțosardemas man zurales corcori. Ci avelas manghe te pachiav că ci mai silo pașa mande. Tha o Heinz încă silo ande mânri goghi hai ande mânro ilo. (Luca 20:38) Butivar, sar nachel o ghies, așunav lesche dumes pherde lașimos hai lesche sfaturi goghiaver, sar cana avelas cade. Mulțumiv zurales but le Iehovasche anda le șucar bărșa ande save slujisardem ande iech than mânre rromesa ande Leschi buchi.

MULȚUMISARAV LE IEHOVASCHE ANDA LESCO AJUTORII

Daștiv te phenav ciaces că o Iehova sas-lo pașa mande ande sea le pharimata prin save nachlem. Vo ajutisardea man te na mai avav lajiavuni hai te avav iech misionara cai iubil but le manușen. (2 Tim. 1:7) Anda codoia că o Iehova ajutisardea amen, vi me, hai vi mânri phei mai țâni das sea amaro timpo ande leschi buchi. Acana, voi hai laco rrom, cai si iech phral cai vizitil le congregații, jian andi Europa caște dichen le congregații andai șib sârbo. O Iehova așundea le manglimata mânre dadesche, phende bute bărșența mai anglal.

Cana studiiv andai Biblia, iech bari pacea pherel mânro ilo. Sichilem că, atunci cana nachav prin pharimata, trebul te mangav man „vi mai zurales”, cadea sar o Isus. (Luca 22:44) I iubirea hai o lașimos le phralengo anda mânri congregația anda Nadejda, Sofia, si o răspunso ca mânre manglimata phende le Iehovasche. Butivar, le phrala hai le pheia acharen man pende hai sicaven manghe chichi de but iubin man. Cana beșav lența, som ciaces bucurime.

Butivar gândiv man ca o ghies cana va uștena le mule. Gândiv man că dichav mânre dades hai mânra deia sar așen angla amaro chăr hai sile sa cadea de șucar sar ando ghies cana line-pe. Dichav vi mânra pheia, cai cherel amenghe vareso lașio te has. Gândiv man că dichav mânre rromes, o Heinz, că beșel pașa amende hai lel sama pesche grastesar. Cana gândiv man sar va avela andi lumea nevi, ci mai gândiv man cadichi de but ca mânre sentimentea hai mânro ilo pherdiol recunoștința anda o Iehova.

Cana gândiv man le buchiande prin save nachlem ande mânri viața hai ca o șucar viitorii cai ajucărel man, daștiv te phenav sar phendea vi o David: „Cai avilemas dacă ci pachiaiemas că va avela te dichav o lașimos le Iehovasco ando them codolengo jiuvinde? Sperisar ando Iehova, av tromano hai chio ilo te avel zuralo! Da, sperisar ando Iehova!”. (Ps. 27:13, 14)